ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠠᠯᠢᠰᠣᠨ ᠪᠣᠬᠠᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/10/23
      ᠣᠨᠠᠭᠠᠨ ᠪᠠᠭ᠎ᠠ ᠨᠠᠰᠣ ᠶᠢ ᠣᠬᠠᠭᠠᠨ ᠪᠣᠳᠣᠯ ᠲᠠᠢ ᠮᠢᠨᠢ ᠬᠤᠮᠢᠵᠣ᠂ ᠰᠡᠳᠭᠢᠯ ᠰᠠᠨᠠᠭᠠᠨ ᠤ ᠬᠠᠮᠤᠭ ᠣᠶᠢᠷ᠎ᠠ ᠵᠠᠢ ᠳᠤ ᠡᠰᠭᠡᠨ ᠰᠡᠶᠢᠯᠥᠭᠰᠡᠨ᠂ ᠨᠣᠳᠤᠭ ᠤᠨ ᠮᠢᠨᠢ ᠡᠨᠡᠬᠦ ᠵᠢᠵᠢᠭᠬᠡᠨ ᠨᠠᠭᠤᠷ ᠲᠣᠭᠤᠷᠢᠮ ᠬᠡᠮᠡᠷ ᠨᠣᠮᠢᠨ ᠴᠡᠩᠬᠡᠷ ᠴᠡᠩᠬᠡᠭ ᠣᠰᠣᠨ ᠢ ᠠᠯᠢᠰᠣᠨ ᠪᠣᠬᠠᠯ ᠭᠡᠳᠡᠭ᠃ ᠠᠯᠢᠰᠣᠨ ᠪᠣᠬᠠᠯ ᠪᠠᠷᠠᠭᠤᠨ ᠲᠠᠯ᠎ᠠ ᠪᠠᠷ ᠢᠶᠠᠨ ᠨᠣᠮᠣᠨ ᠬᠡᠯᠪᠡᠷᠢ ᠶᠢᠨ ᠮᠦᠷᠭᠦᠴᠡᠭ ᠡᠷᠭᠢ ᠲᠠᠢ᠃ ᠮᠦᠷᠭᠦᠴᠡᠭ ᠡᠷᠭᠢ ᠠᠴᠠ ᠴᠢᠨᠠᠭᠰᠢ ᠦᠷᠬᠦᠯᠵᠢᠯᠡᠭᠰᠡᠨ᠂ ᠨᠢᠳᠥ ᠠᠯᠳᠠᠮ᠎ᠠ ᠲᠡᠭᠰᠢ ᠰᠠᠶᠢᠬᠠᠨ ᠰᠠᠷᠠᠭᠤᠯ ᠲᠡᠨᠵᠢ ᠨᠢ᠂ ᠡᠪᠦᠭᠡ ᠶᠢᠨ ᠮᠢᠨᠢ ᠠᠯᠢᠰᠣ ᠡᠪᠡᠰᠥ ᠪᠠᠨ ᠬᠤᠷᠢᠶᠠᠳᠠᠭ ᠪᠠᠶᠠᠨ ᠲᠠᠩᠰᠤᠭ ᠬᠠᠳᠣᠯᠠᠩ ᠨᠢ ᠮᠦᠨ ᠪᠠᠶᠢᠵᠠᠢ᠃ ᠦᠩᠰᠢᠭ ᠰᠠᠶᠢᠬᠠᠨ ᠨᠠᠮᠣᠷ ᠤᠨ ᠣᠯᠠᠷᠢᠯ ᠬᠦᠷᠴᠥ ᠢᠷᠡᠬᠦ ᠲᠣᠭᠠᠯᠠᠩ ᠳᠤ᠂ ᠡᠪᠦᠭᠡ ᠮᠢᠨᠢ ᠬᠢᠶᠠᠭ ᠡᠪᠡᠰᠥ ᠬᠠᠳᠣᠯᠠᠩ ᠳᠤ ᠪᠠᠨ ᠭᠠᠷᠴᠥ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠢᠶᠠᠨ ᠡᠷᠭᠢ ᠲᠡᠨᠵᠢ ᠳᠤ ᠣᠷᠭᠤᠭᠰᠠᠨ᠂ ᠰᠠᠭᠯᠠᠭᠠᠷ ᠰᠠᠶᠢᠬᠠᠨ ᠡᠪᠥᠭᠡᠨ ᠬᠠᠶᠢᠯᠠᠰᠣᠨ ᠤ ᠰᠡᠭᠦᠳᠡᠷ ᠲᠤ ᠭᠠᠵᠠᠷ ᠡᠷᠥᠭᠰᠡᠨ ᠵᠣᠣᠬᠠᠨ ᠳᠤ ᠪᠠᠨ ᠭᠠᠣᠯᠢᠨ ᠲᠡᠪᠥᠷ᠎ᠡ ᠪᠠᠨ ᠰᠠᠭᠤᠯᠭᠠᠵᠣ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠢᠶᠠᠨ ᠠᠷᠢᠭᠤᠨ ᠲᠣᠩᠭᠠᠯᠠᠭ ᠷᠠᠰᠢᠶᠠᠨ ᠣᠰᠣ ᠪᠠᠷ ᠬᠡᠪ ᠤᠨ ᠴᠠᠢ ᠪᠠᠨ ᠴᠢᠨᠠᠵᠣ᠂ ᠠᠮᠰᠠᠬᠤ ᠠᠴᠠ ᠪᠠᠨ ᠣᠷᠢᠳ᠂ ᠠᠷᠢᠭᠤᠨ ᠰᠢᠮ᠎ᠡ ᠣᠮᠳᠠᠭᠠᠨ ᠤ ᠲᠡᠭᠡᠵᠢ ᠬᠡᠮᠡᠨ ᠲᠦᠷᠪᠡᠨ ᠵᠦᠭ ᠲᠤ ᠰᠠᠴᠣᠯᠢ ᠡᠷᠭᠦᠵᠥ ᠪᠠᠶᠢᠭᠰᠠᠨ᠃ ᠣᠳᠠᠵᠣ ᠲᠦᠳᠡᠯ ᠦᠭᠡᠢ᠂ ᠬᠠᠯᠢᠭᠤᠨ ᠨᠠᠮᠣᠷ ᠤᠨ ᠦᠶ᠎ᠡ ᠪᠣᠯᠵᠣ᠂ ᠡᠪᠦᠭᠡ ᠮᠢᠨᠢ ᠬᠠᠳᠣᠵᠣ ᠬᠢᠷᠭᠠᠭᠰᠠᠨ ᠬᠠᠳᠠᠭᠰᠠᠨ ᠰᠠᠶᠢᠬᠠᠨ ᠠᠯᠢᠰᠣ ᠡᠪᠡᠰᠥ ᠪᠠᠨ ᠭᠡᠷ ᠲᠡᠷᠭᠡ ᠮᠡᠳᠥ ᠲᠣᠮᠣ ᠲᠣᠮᠣ ᠠᠯᠢᠰᠣᠨ ᠪᠣᠬᠠᠯ ᠲᠠᠷᠣᠵᠣ᠂ ᠡᠪᠥᠯ ᠤᠨ ᠦᠯᠴᠢᠷ᠂ ᠬᠠᠪᠣᠷ ᠤᠨ ᠬᠠᠳᠠᠭᠤ ᠳᠤ ᠰᠠᠶ᠋ᠢ ᠬᠤᠳᠠ ᠬᠤᠷᠤᠭ᠎ᠠ ᠵᠦᠭ ᠢᠶᠠᠨ ᠲᠡᠷᠭᠡ ᠪᠠᠷ ᠢᠶᠠᠨ ᠲᠡᠭᠡᠭᠡᠵᠥ᠂ ᠲᠠᠪᠣᠨ ᠬᠤᠰᠢᠭᠤ ᠮᠠᠯ ᠰᠦᠷᠥᠭ ᠲᠤ ᠪᠠᠨ ᠲᠡᠵᠢᠭᠡᠯ ᠪᠣᠷᠳᠤᠭ᠎ᠠ ᠬᠠᠩᠭᠠᠳᠠᠭ᠃ ᠡᠶᠢᠨᠬᠦ ᠡᠴᠢᠭᠡ ᠲᠡᠭᠡᠳᠥ ᠶᠢᠨ ᠦᠶ᠎ᠡ ᠠᠴᠠ ᠡᠨᠡᠬᠦ ᠰᠠᠶᠢᠬᠠᠨ ᠲᠣᠩᠭᠠᠯᠠᠭ ᠣᠰᠣᠨ ᠤ ᠪᠠᠨ ᠲᠡᠨᠵᠢ ᠳᠤ᠂ ᠠᠯᠢᠰᠣ ᠡᠪᠡᠰᠥ ᠪᠠᠨ ᠪᠣᠬᠠᠯᠠᠵᠣ ᠨᠦᠬᠡᠴᠡᠯᠡᠭᠰᠡᠨ ᠠᠴᠠ ᠮᠠᠨ ᠤ ᠬᠢᠨ ᠣᠨ ᠣᠳᠠᠭᠠᠨ ᠳᠤ ᠪᠠᠨ ᠲᠣᠰ ᠣᠰᠣ ᠪᠠᠨ ᠠᠯᠢᠰᠣᠨ ᠪᠣᠬᠠᠯ ᠭᠡᠵᠣ ᠨᠡᠷᠡᠯᠡᠵᠡᠢ᠃       ᠠᠯᠢᠰᠣᠨ ᠪᠣᠬᠠᠯ ᠤᠨ ᠬᠤᠶᠢᠳᠣ ᠵᠠᠬ᠎ᠠ ᠳᠤ᠂ ᠡᠷᠭᠢ ᠨᠠᠯᠠᠵᠣ ᠣᠷᠭᠤᠭᠰᠠᠨ ᠣᠨᠵᠢᠯᠭ᠎ᠠ ᠰᠠᠶᠢᠬᠠᠨ ᠮᠦᠴᠢᠷ ᠲᠠᠢ ᠨᠢᠭᠡ ᠰᠠᠭᠤᠷᠢ ᠠᠪᠣᠷᠭᠤ ᠣᠳᠠ ᠮᠣᠳᠣᠨ ᠤ ᠣᠭ ᠠᠴᠠ ᠪᠠᠭᠠᠬᠠᠨ ᠬᠠᠷᠠᠵᠠ ᠪᠣᠯᠠᠭ ᠣᠨᠳᠣᠷᠴᠣ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣᠨ ᠳᠤ ᠡᠬᠢ ᠰᠣᠷᠪᠣᠯᠵᠢ ᠪᠣᠯᠵᠣ ᠪᠠᠶᠢᠬᠤ ᠨᠢ ᠦᠵᠡᠬᠦ ᠳᠤ ᠢᠯᠡᠬᠡᠨ᠃ ᠭᠡᠪᠡᠴᠥ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣᠨ ᠲᠦᠪᠰᠢᠨ ᠵᠢᠯ ᠤᠨ ᠲᠦᠷᠪᠡᠨ ᠣᠯᠠᠷᠢᠯ ᠳᠤ ᠶᠡᠷᠥ ᠲᠣᠭᠳᠠᠮᠠᠯ ᠪᠠᠶᠢᠳᠠᠭ ᠨᠢ ᠠᠳᠠᠪᠠᠰᠢ ᠭᠠᠶᠢᠬᠠᠯᠳᠠᠢ᠃ ᠭᠡᠶ᠎ᠡ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠡᠨᠡᠬᠦ ᠣᠨᠴᠠᠯᠢᠭ ᠨᠢ ᠠᠯᠳᠠᠨ ᠬᠢᠩᠭᠠᠨ ᠤ ᠰᠡᠵᠢᠭᠦᠷ ᠲᠤ ᠡᠭᠦᠰᠥᠭᠰᠡᠨ ᠲᠡᠭᠷᠢ ᠨᠠᠭᠤᠷ ᠲᠠᠢ ᠨᠡᠯᠢᠶᠡᠳ ᠲᠦᠰᠳᠡᠢ ᠪᠠᠶᠢᠨ᠎ᠠ᠃ ᠭᠡᠪᠡᠴᠥ ᠰᠢᠨᠡᠬᠡᠨ ᠰᠢᠳᠠᠭᠠᠭᠰᠠᠨ ᠸᠠᠭᠠᠷ ᠰᠠᠪᠠᠨ ᠳᠤ ᠰᠠᠪᠠᠯᠠᠭᠰᠠᠨ ᠣᠰᠣ ᠬᠡᠮᠡᠷ ᠲᠡᠭᠷᠢ ᠨᠠᠭᠤᠷ ᠤᠨ ᠤᠰᠤᠨ ᠳᠤ ᠰᠢᠷᠬᠡᠭ ᠡᠪᠡᠰᠥ ᠣᠷᠭᠤᠳᠠᠭ ᠦᠭᠡᠢ᠂ ᠰᠢᠨᠠᠭᠠᠨ ᠬᠤᠷᠣᠬᠠᠢ ᠴᠤ ᠲᠦᠯᠵᠢᠳᠡᠭ ᠦᠭᠡᠢ ᠦᠬᠦᠮᠡᠯ ᠣᠰᠣ ᠪᠣᠯᠬᠤ ᠲᠣᠯᠠ ᠪᠢ ᠲᠡᠭᠦᠨ ᠢ ᠶᠢᠷᠳᠢᠨᠴᠥ ᠶᠢᠨ ᠠᠮᠢᠳᠠᠨ ᠵᠢᠷᠭᠤᠭᠠᠨ ᠵᠦᠢᠯ ᠳᠤ ᠠᠮᠢᠨ ᠣᠰᠣᠨ ᠪᠣᠯᠣᠭᠰᠠᠨ ᠠᠯᠢᠰᠣᠨ ᠪᠣᠬᠠᠯ ᠲᠠᠢ ᠪᠠᠨ ᠵᠥᠢᠷᠯᠡᠬᠦ ᠲᠣᠷᠠᠰᠢᠯ ᠶᠡᠷᠥ ᠬᠦᠷᠬᠦ ᠦᠭᠡᠢ᠃       ᠠᠯᠢᠰᠣᠨ ᠪᠣᠬᠠᠯ ᠤᠨ ᠡᠬᠢ ᠪᠣᠯᠠᠭ ᠲᠤ᠂ ᠨᠢᠭᠡᠨ ᠴᠠᠭᠠᠨ ᠡᠷᠢᠶᠡᠨ ᠮᠣᠭᠠᠢ ᠣᠷᠣᠩᠨᠠᠵᠣ ᠪᠠᠶᠢᠳᠠᠭ᠃ ᠠᠬᠠᠮᠠᠳ ᠲᠣᠮᠣᠭᠠᠳᠠᠳ ᠠᠴᠠ ᠲᠣᠰ ᠮᠣᠭᠠᠢ ᠶᠢ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣ ᠪᠠᠨ ᠰᠠᠬᠢᠭᠰᠠᠨ ᠯᠣᠣᠰ ᠤᠨ ᠠᠶᠢᠮᠠᠭᠳᠠᠨ ᠪᠣᠯᠣᠨ᠎ᠠ ᠭᠡᠵᠤ ᠬᠡᠯᠡᠯᠴᠡᠨ᠎ᠠ᠃ ᠨᠠᠳᠠ ᠶᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠠᠶᠢᠯ ᠤᠨ ᠡᠪᠥᠭᠡᠴᠥᠥᠯ ᠲᠠᠭᠳᠣ ᠶᠢᠨ ᠰᠦᠮ᠎ᠡ ᠶᠢᠨ ᠨᠡᠷᠡᠳᠥ ᠯᠠᠮᠠ ᠶᠢ ᠵᠠᠯᠠᠵᠣ᠂ ᠲᠣᠰ ᠪᠣᠯᠠᠭ ᠤᠨ ᠣᠰᠣᠨ ᠳᠤ ᠢᠷᠡᠵᠥ᠂ ᠯᠣᠣᠰ ᠰᠠᠪᠳᠠᠭ ᠲᠠᠬᠢᠵᠣ᠂ ᠨᠣᠮ ᠰᠣᠳᠣᠷ ᠣᠩᠰᠢᠭᠤᠯᠵᠣ ᠪᠠᠶᠢᠭᠰᠠᠨ ᠣᠴᠢᠷᠳᠠᠢ᠃       ᠠᠯᠢᠰᠣᠨ ᠪᠣᠬᠠᠯ ᠤᠨ ᠨᠣᠮᠢᠨ ᠣᠢ ᠪᠠᠷ ᠡᠮᠵᠢᠶᠡᠷᠢᠯᠡᠭᠰᠡᠨ ︽ᠬᠦᠪᠴᠢ︾ ᠲᠠᠯ᠎ᠠ ᠶᠢᠨ ᠭᠥᠢᠬᠡᠨ ᠨᠣᠭᠤᠭᠠᠨ ᠣᠰᠣᠨ ᠤ ᠵᠠᠬ᠎ᠠ ᠪᠠᠷ᠂ ᠬᠤᠯᠣᠰᠣ ᠵᠡᠭᠡᠰᠥ ᠰᠠᠬᠤᠯᠢᠭᠵᠢᠨ ᠣᠷᠭᠤᠵᠣ᠂ ᠬᠦᠯ ᠲᠣᠯᠬᠤ ᠦᠭᠡᠢ ᠭᠦᠨ ᠴᠡᠭᠡᠯ ᠳᠤ ᠨᠢ ᠠᠷᠣ ᠭᠠᠵᠠᠷ ᠤᠨ ᠣᠰᠣᠨ ᠣᠷᠭᠤᠮᠠᠯ ᠣᠨᠠᠭᠠᠨ ᠲᠣᠭᠤᠷᠠᠢ ︵ᠣᠨᠠᠭᠠᠨ ᠲᠣᠭᠤᠷᠠᠢ ᠮᠡᠳᠥ ᠨᠠᠪᠴᠢ ᠲᠠᠢ ᠣᠰᠣᠨ ᠤ ᠤᠷᠭᠤᠮᠡᠯ︶ ᠬᠡᠰᠡᠭ ᠢᠶᠠᠷ ᠬᠦᠭᠯᠡᠷᠡᠭᠡᠳ᠂ ᠲᠣᠯᠢᠭᠠᠷ ᠰᠠᠶᠢᠬᠠᠨ ᠣᠰᠣᠨ ᠨᠢᠭᠤᠷ ᠢ ᠲᠡᠮᠡᠴᠡᠭᠰᠡᠨ ᠨᠠᠪᠴᠢᠰ ᠨᠢ ᠨᠠᠷᠠᠨ ᠤ ᠲᠣᠶᠠᠭᠠᠨ ᠳᠤ ᠪᠦᠷᠢᠶᠡᠰᠥᠯᠡᠵᠥ ᠬᠠᠷᠠᠭᠳᠠᠬᠤ ᠨᠢ ᠡᠮᠣᠨᠡᠳᠥ ᠣᠷᠣᠨ ᠤ ᠯᠢᠩᠬᠤᠸᠠᠳᠣ ᠨᠠᠭᠤᠷ ᠢ ᠡᠷᠬᠡ ᠦᠭᠡᠢ ᠰᠠᠨᠠᠭᠳᠠᠭᠤᠯᠣᠮ᠎ᠠ ᠠᠵᠢ᠃       ᠠᠭᠠᠷ ᠲᠡᠭᠷᠢ ᠳᠤ ᠲᠡᠭᠦᠵᠢᠯᠡᠭᠳᠡᠭᠰᠡᠨ ᠠᠷᠢᠭᠤᠨ ᠬᠡᠬᠡᠨᠴᠢᠷ ᠬᠠᠰ ᠲᠠᠪᠠᠭ ᠮᠡᠳᠥ᠂ ᠵᠣᠨ ᠤ ᠰᠦᠨᠢ ᠶᠢᠨ ᠲᠡᠷᠭᠡᠯ ᠰᠠᠷᠠᠨ ᠤ ᠲᠣᠩᠭᠤᠷᠣᠣ ᠲᠦᠷᠰᠥ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣᠨ ᠤ ᠭᠦᠨ ᠳᠤ ᠲᠣᠨᠣᠯᠵᠠᠩᠬᠠᠨ ᠬᠠᠷᠠᠭᠳᠠᠬᠤ ᠨᠢ ᠶᠠᠭ ᠭᠠᠵᠠᠷ ᠤᠨ ᠦᠷᠥᠴᠡ᠂ ᠯᠣᠣᠰ ᠤᠨ ᠣᠷᠳᠣᠨ ᠠᠴᠠ ᠨᠠᠷᠠᠨ ᠮᠠᠨᠳᠣᠭᠰᠠᠨ ᠮᠡᠳᠥ ᠦᠨᠡᠨ ᠪᠣᠳᠠᠳᠣ ᠠᠬᠤᠢ ᠪᠣᠯᠵᠣ ᠰᠣᠯᠢᠭᠳᠠᠭᠠᠳ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣ ᠶᠢ ᠣᠯᠠᠮ ᠨᠢᠭᠤᠴᠠᠯᠢᠭ ᠦᠵᠡᠮᠵᠢ ᠪᠠᠷ ᠴᠢᠮᠡᠵᠡᠢ᠃ ᠦᠳᠡᠰᠢ ᠰᠦᠨᠢ᠂ ᠡᠳᠥᠷ ᠲᠤ ᠦᠨᠳᠥᠷ ᠮᠣᠳᠣᠨ ᠤ ᠪᠠᠭᠯᠠᠷᠠᠭᠰᠠᠨ ᠮᠦᠴᠢᠷ ᠨᠠᠪᠴᠢᠰ ᠲᠤ ᠬᠤᠨᠣᠭᠯᠠᠭᠰᠠᠨ ᠵᠢᠰᠥᠨ ᠵᠦᠢᠯ ᠤᠨ ᠰᠢᠪᠠᠭᠤᠳ ᠤᠨ ᠣᠶᠠᠩᠭᠠᠳᠣ ᠲᠠᠭᠤ ᠴᠠᠷᠴᠠᠬᠤ ᠳᠤ᠂ ᠡᠪᠡᠰᠥᠨ ᠨᠠᠮᠠᠭᠠᠨ ᠳᠤ ᠨᠢᠭᠤᠭᠳᠠᠭᠰᠠᠨ᠂ ᠭᠤᠯᠢᠶ᠎ᠠ ᠶᠢᠨ ᠢᠰᠭᠡᠷᠥᠯᠳᠡ᠂ ᠴᠠᠷᠴᠠᠬᠠᠢ ᠶᠢᠨ ᠴᠠᠷᠭᠢᠯᠳᠠ᠂ ᠵᠦᠯᠭᠡᠨ ᠳᠤ ᠭᠤᠸᠠᠭᠯᠠᠬᠤ ᠮᠡᠯᠡᠬᠡᠢ ᠶᠢᠨ ᠲᠠᠭᠤᠨ ᠲᠠᠢ ᠬᠤᠣᠰᠯᠠᠨ ᠠᠯᠢᠰᠣᠨ ᠪᠣᠬᠠᠯ ᠳᠤ ᠪᠠᠨ ᠨᠠᠶᠢᠷᠠᠯ ᠬᠦᠭᠵᠢᠮ ᠪᠣᠯᠵᠣ ᠣᠶᠠᠩᠭᠠᠷᠠᠬᠤ ᠨᠢ ᠴᠢᠬᠢᠨ ᠳᠤ ᠨᠢᠭᠡ ᠯᠡ ᠡᠭᠡᠯᠢᠳᠡᠢ᠃ ᠭᠡᠨᠡᠳᠳᠡ ᠣᠰᠣᠨ ᠤ ᠬᠦᠪᠡᠭᠡ ᠲᠠᠭᠠᠵᠣ ︽ᠬᠤᠯᠠᠩ ᠭᠡᠬᠦ ᠲᠣᠮᠣ ᠵᠢᠭᠠᠰᠣᠨ ᠤ ᠴᠣᠯᠭᠢᠯᠳᠠ ᠴᠣᠣᠷᠢᠶ᠎ᠠ ᠲᠠᠳᠠᠬᠤ ᠲᠠᠢ ᠵᠡᠷᠭᠡ᠂ ᠠᠭᠤᠯᠠ ᠶᠢᠨ ᠪᠣᠭᠤ ᠭᠦᠷᠥᠭᠡᠰᠥ᠂ ᠦᠳᠡᠰᠢ ᠶᠢᠨ ᠨᠠᠮ ᠰᠡᠯᠡᠬᠦᠨ ᠢ ᠵᠠᠪᠰᠢᠵᠣ᠂ ᠠᠯᠢᠰᠣᠨ ᠪᠣᠬᠠᠯ ᠢ ᠵᠣᠷᠢᠨ ᠢᠷᠡᠵᠥ᠂ ᠷᠠᠰᠢᠶᠠᠨ ᠣᠰᠣᠨ ᠠᠴᠠ ᠠᠭᠤᠵᠢᠷᠠᠳᠠᠯ᠎ᠠ ᠣᠮᠳᠠᠯᠠᠵᠣ ᠪᠠᠶᠢᠬᠤ ᠨᠢ ᠮᠡᠳᠡᠵᠢ ᠶᠢᠨ ᠬᠡᠷᠡᠭ᠃ ᠭᠡᠶ᠎ᠡ᠂ ᠪᠣᠭᠤ ᠭᠦᠷᠥᠭᠡᠰᠥ ᠭᠡᠬᠦ ᠠᠴᠠ ᠵᠡᠷᠯᠢᠭ ᠠᠮᠢᠳᠠᠳ ᠴᠤ ᠬᠦᠮᠥᠨ ᠲᠦᠷᠥᠯᠬᠢᠳᠡᠨ ᠰᠢᠭ ᠣᠨᠳᠣᠷᠴᠣ ᠲᠠᠰᠣᠭᠰᠠᠨ ᠨᠣᠳᠤᠭ ᠣᠰᠣᠨ ᠳᠤ ᠪᠠᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠬᠠᠶᠢᠷ᠎ᠠ ᠭᠠᠮᠳᠠᠢ ᠭᠡᠳᠡᠭ ᠢ ᠣᠬᠠᠭᠠᠷᠠᠭᠤᠯᠣᠭᠰᠠᠨ ᠨᠢ᠂ ᠬᠠᠷᠠᠬᠠᠨ ᠪᠠᠭ᠎ᠠ ᠨᠠᠰᠣ ᠶᠢ ᠮᠢᠨᠢ ᠨᠠᠭᠠᠯᠢᠩᠬᠠᠶᠢᠳᠤᠭᠤᠯᠣᠭᠰᠠᠨ ᠬᠤᠩᠭᠤᠷ ᠨᠠᠮᠣᠷ ᠤᠨ ᠲᠡᠷᠡᠬᠦ ᠨᠠᠮᠵᠢᠭᠤᠨ ᠰᠠᠶᠢᠬᠠᠨ ᠦᠳᠡᠰᠢ ᠪᠠᠶᠢᠵᠣ ᠳ᠋ᠠ ᠬᠦᠭᠡᠷᠥᠬᠦᠢ᠃ ᠠᠪᠤ ᠶᠢᠨ ᠠᠵᠢᠯ ᠳᠤ ᠬᠠᠮ ᠲᠡᠮ ᠪᠣᠯᠵᠣ᠂ ᠠᠵᠠᠢ ᠪᠣᠭᠤᠷᠣᠯ ᠡᠪᠦᠭᠡ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠠᠯᠢᠰᠣᠨ ᠪᠣᠬᠠᠯ ᠤᠨ ᠲᠡᠨᠵᠢ ᠳᠤ ᠠᠯᠢᠰᠣ ᠪᠣᠬᠠᠯᠠᠵᠣ ᠶᠠᠭᠠᠷᠠᠪᠠ᠃         — ᠦᠷᠯᠥᠭᠡ ᠦᠳᠡᠰᠢ ᠶᠢᠨ ᠰᠢᠭᠦᠳᠡᠷᠢ ᠶᠢᠨ ᠣᠰᠣ ᠭᠡᠭᠴᠢ ᠪᠠᠶᠢᠭᠠᠯᠢ ᠶᠢᠨ ᠭᠤᠷᠪᠠᠨ ᠷᠠᠰᠢᠶᠠᠨ ᠤ ᠨᠢᠭᠡ ᠨᠢ ᠶᠣᠮ ᠰᠢᠣ ᠬᠦᠥ ᠮᠢᠨᠢ︕       — ᠰᠢᠭᠦᠳᠡᠷᠢ ᠶᠢᠨ ᠣᠰᠣᠨ ᠳᠤ ᠠᠯᠢᠰᠣ ᠪᠣᠬᠠᠯᠠᠪᠠᠯ᠂ ᠠᠯᠢᠰᠣ ᠡᠪᠡᠰᠥ ᠣᠨᠴᠠᠭᠠᠢ ᠰᠢᠮ᠎ᠡ ᠲᠡᠵᠢᠭᠡᠯ ᠰᠠᠭᠤᠬᠤ ᠪᠣᠯᠣᠨ᠎ᠠ ᠳ᠋ᠠ︕ ᠶᠠᠷᠢᠶ᠎ᠠ ᠬᠦᠭᠡᠷᠥᠭᠡ ᠲᠠᠢ ᠡᠪᠦᠭᠡ ᠶᠢᠨ ᠢᠶᠠᠨ ᠶᠠᠷᠢᠭᠰᠠᠨ ᠬᠡᠯᠡᠭᠰᠡᠨ ᠶᠣᠰᠣ ᠪᠠᠷ᠂ ᠦᠷᠯᠥᠭᠡ ᠦᠳᠡᠰᠢ ᠶᠢ ᠲᠡᠮᠡᠴᠡᠨ ᠠᠯᠢᠰᠣ ᠪᠣᠬᠠᠯᠠᠬᠤ ᠳᠠᠭᠠᠨ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣ ᠮᠢᠨᠢ ᠯᠠᠪᠳᠠᠢ ᠪᠠᠶᠢᠭᠠᠯᠢ ᠶᠢᠨ ᠨᠦᠭᠦᠭᠡ ᠨᠢᠭᠡ ᠷᠠᠰᠢᠶᠠᠨ ᠳᠤ ᠨᠢ ᠲᠣᠭᠠᠴᠠᠭᠳᠠᠨ᠎ᠠ ᠳ᠋ᠠ︕ ᠭᠡᠵᠥ ᠨᠢᠯᠬ᠎ᠠ ᠶᠢᠨ ᠴᠠᠭᠠᠨ ᠢᠳᠡᠭᠡᠯ ᠳᠡᠭᠡᠨ ᠪᠠᠶᠠᠰᠴᠣ ᠪᠠᠶᠢᠪᠠ᠃ ᠦᠨᠡᠬᠡᠷ ᠬᠠᠴᠢᠨ ᠳ᠋ᠠ︕ ᠨᠢᠭᠡ ᠪᠣᠬᠠᠯ ᠠᠯᠢᠰᠣ ᠰᠠᠯᠬᠢ ᠦᠭᠡᠢ ᠳᠤ ᠰᠠᠳᠠᠷᠠᠨ᠂ ᠵᠢᠪᠠᠷ ᠦᠭᠡᠢ ᠳᠤ ᠵᠠᠳᠠᠷᠠᠭᠠᠳ ᠪᠠᠶᠢᠳᠠᠭ ᠨᠢ ᠡᠪᠦᠭᠡ ᠪᠢᠳᠡ ᠬᠤᠶᠠᠷ ᠲᠤ ᠲᠠᠶᠢᠯᠬᠤᠶ᠎ᠠ ᠪᠡᠷᠬᠡ ᠣᠨᠢᠰᠤᠭ᠎ᠠ ᠠᠪᠴᠢᠷᠠᠵᠠᠢ᠃ ᠡᠭᠦᠨ ᠤ ᠲᠣᠬᠠᠢ ᠬᠡᠳᠥᠨ ᠡᠳᠥᠷ ᠴᠦᠬᠦᠷᠡᠩ ᠢᠶᠠᠨ ᠪᠠᠷᠠᠭᠰᠠᠨ ᠡᠪᠦᠭᠡ ᠮᠢᠨᠢ᠂ ᠡᠴᠥᠰ ᠰᠡᠭᠦᠯ ᠳᠤ ᠪᠠᠨ ᠠᠯᠢᠰᠣᠨ ᠪᠣᠬᠠᠯ ᠢᠶᠠᠨ ᠮᠠᠨᠠᠬᠤ ᠠᠴᠠ ᠳᠤᠭᠤᠰᠢᠳᠠᠢ ᠰᠢᠢᠳᠪᠥᠷᠢ ᠠᠯᠠᠭ᠎ᠠ ᠪᠣᠯᠪᠠ᠃ ᠡᠪᠦᠭᠡ ᠪᠢᠳᠡ ᠬᠤᠶᠠᠷ ᠴᠢᠨᠠᠳᠣ ᠲᠠᠯ᠎ᠠ ᠳᠤ ᠠᠭᠤᠯᠠ ᠲᠣᠪᠤ ᠮᠡᠳᠥ ᠲᠦᠩᠬᠦ᠋ᠢᠨ ᠬᠠᠷᠠᠭᠳᠠᠬᠤ ᠠᠯᠢᠰᠣᠨ ᠪᠣᠬᠠᠯ ᠢ ᠣᠩᠭᠢᠴᠠᠨ᠂ ᠲᠦᠷ ᠴᠠᠭ ᠤᠨ ᠣᠷᠣᠴᠠ ᠣᠷᠣᠩᠨᠠᠯ ᠪᠣᠯᠭᠠᠨ᠂ ᠬᠠᠷᠠᠬᠤ ᠳᠤ ᠲᠦᠭᠦᠮ ᠢ ᠪᠣᠳᠣᠵᠣ ᠪᠦᠭᠭᠦᠨ ᠰᠠᠭᠤᠵᠠᠢ᠃ ᠬᠠᠶᠠ ᠪᠠᠶᠢᠨ ᠦᠳᠡᠰᠢ ᠶᠢᠨ ᠰᠠᠶᠢᠬᠠᠨ ᠠᠯᠢᠰᠣᠨ ᠪᠣᠬᠠᠯ ᠤᠨ ᠢᠶᠠᠨ ᠭᠠᠩᠭᠠᠩ ᠪᠠᠶᠢᠭᠠᠯᠢ ᠳᠠᠭᠠᠨ ᠰᠣᠭᠳᠣᠭᠤᠷᠠᠵᠣ ᠪᠠᠶᠢᠳᠠᠯ᠎ᠠ ᠭᠡᠨᠡᠳᠳᠡ ᠪᠠᠷᠠᠭᠤᠨ ᠠᠭᠤᠯᠠ ᠶᠢᠨ ᠪᠢᠳᠡᠭᠦᠥ ᠬᠦᠪᠴᠢ ᠠᠴᠠ ᠪᠢᠷᠠᠭᠤᠨ ᠪᠣᠬ᠎ᠠ ᠶᠢᠨ ᠮᠦᠭᠡᠷᠡᠯ ᠲᠣᠭᠤᠯᠳᠠᠪᠠ᠂᠂       — ᠪᠣᠬ᠎ᠠ ᠶᠢᠨ ᠮᠦᠭᠡᠷᠡᠯ ᠪᠢᠰᠢ ᠰᠢᠣ᠂ ᠪᠣᠭᠤ ᠶᠢᠨ ᠣᠷᠣᠮᠳᠠᠯ ᠪᠣᠯᠣᠨ᠎ᠠ ᠳ᠋ᠠ︕ ᠭᠡᠵᠣ ᠡᠪᠦᠭᠡ ᠮᠢᠨᠢ ᠪᠣᠭᠤ ᠶᠢᠨ ᠲᠣᠬᠠᠢ ᠨᠠᠮ ᠲᠠᠭᠤ ᠪᠠᠷ ᠨᠠᠮ᠎ᠠ ᠳᠤ ᠣᠴᠢᠷᠯᠠᠵᠣ ᠪᠠᠶᠢᠳᠠᠯ᠎ᠠ᠂ ᠦᠳᠡᠰᠢ ᠰᠦᠨᠢ ᠶᠢᠨ ᠠᠵᠢᠨ ᠲᠦᠵᠢᠨ ᠢ ᠡᠪᠳᠡᠨ ᠡᠯᠡᠰᠥᠨ ᠭᠤᠪᠢ ᠶᠢᠨ ᠲᠡᠮᠡᠭᠡᠨ ᠵᠢᠩ ᠮᠡᠳᠥ᠂ ᠨᠢᠭᠡ ᠴᠣᠪᠣᠭ᠎ᠠ ᠠᠩᠭᠢ ᠴᠡᠷᠢᠭ ᠤᠨ ᠡᠩᠨᠡᠭᠡ ᠴᠤ ᠠᠳᠠᠯᠢ ᠮᠦᠷ ᠮᠦᠷ ᠢᠶᠠᠨ ᠮᠦᠰᠭᠢᠭᠰᠡᠨ᠂ ᠶᠡᠭᠡ ᠪᠠᠭ᠎ᠠ ᠨᠢ ᠠᠳᠠᠯᠢ ᠪᠣᠰᠣ ᠲᠠᠪᠣᠨ ᠪᠣᠭᠤ ᠠᠯᠢᠰᠣᠨ ᠪᠣᠬᠠᠯ ᠢ ᠵᠣᠷᠢᠨ ᠨᠠᠭᠠᠰᠢᠯᠠᠨ᠎ᠠ᠃ ᠡᠪᠦᠭᠡ ᠪᠢᠳᠡ ᠬᠤᠶᠠᠷ ᠭᠠᠶᠢᠬᠠᠯ ᠰᠣᠴᠢᠷᠳᠠᠯ ᠳᠤ ᠨᠠᠮ ᠴᠣᠬᠢᠭᠤᠯᠵᠣ᠂ ᠪᠦᠬᠦ ᠠᠩᠬᠠᠷᠣᠯ ᠢᠶᠠᠨ ᠲᠦᠪᠯᠡᠷᠡᠭᠦᠯᠥᠨ᠂ ᠪᠣᠭᠤ ᠶᠢᠨ ᠰᠦᠷᠥᠭ ᠢ ᠯᠠᠪᠯᠠᠪᠠᠯ᠂ ᠬᠠᠭᠰᠢᠶᠠᠯ ᠮᠣᠳᠣ ᠡᠭᠦᠷᠥᠭᠰᠡᠨ ᠮᠡᠳᠥ ᠣᠯᠠᠨ ᠰᠠᠯᠠᠭᠠᠳᠣ ᠡᠪᠡᠷ ᠲᠠᠢ ᠲᠣᠮᠣ ᠪᠣᠭᠤ ᠲᠦᠷᠥᠭᠦᠯᠡᠵᠥ᠂ ᠲᠡᠪᠬᠡᠶᠢᠭᠰᠡᠨ ᠲᠠᠰᠢᠶ᠎ᠠ ᠲᠠᠢ᠂ ᠭᠤᠨᠠᠯᠵᠠᠭᠰᠠᠨ ᠰᠠᠶᠢᠬᠠᠨ ᠠᠯᠬᠤᠳᠠᠯ ᠲᠠᠢ ᠬᠤᠶᠠᠷ ᠰᠣᠭᠤ᠂ ᠠᠰ ᠲᠣᠰ ᠤᠨ ᠨᠦᠷᠥᠭᠡ ᠪᠠᠨ ᠠᠷᠣ ᠠᠷᠣ ᠠᠴᠠ ᠪᠠᠨ ᠲᠠᠭᠠᠭᠤᠯᠵᠣ ᠶᠠᠪᠣᠬᠤ ᠨᠢ ᠦᠨᠡᠬᠡᠷ ᠦᠩᠭᠡ ᠬᠤᠷᠸ᠎ᠠ ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠡᠷᠳᠡᠨᠢ ᠶᠢᠨ ᠵᠢᠮᠰᠡᠭ ᠮᠡᠳᠥ᠃ ᠪᠣᠭᠤ ᠶᠢᠨ ᠰᠦᠷᠥᠭ ᠵᠦᠷᠢᠭ ᠴᠣᠪᠣᠭ᠎ᠠ ᠪᠠᠨ ᠪᠠᠷᠢᠨ ᠨᠠᠭᠠᠰᠢᠯᠠᠭᠰᠠᠭᠠᠷ᠃ ᠪᠣᠭᠤ ᠶᠢᠨ ᠰᠦᠷᠥᠭ ᠡᠪᠦᠭᠡ ᠪᠢᠳᠡ ᠬᠤᠶᠠᠷ ᠤᠨ ᠰᠠᠶ᠋ᠢᠬᠠᠨ ᠬᠤᠷᠢᠶᠠᠭᠰᠠᠨ ᠲᠡᠷᠡᠬᠦ ᠰᠠᠭᠤᠷᠢ ᠠᠯᠢᠰᠣᠨ ᠪᠣᠬᠠᠯ ᠳᠤ ᠬᠠᠯᠴᠠ ᠲᠣᠯᠭᠠᠷᠠᠵᠣ ᠬᠦᠷᠥᠭᠡᠳ᠂ ᠪᠦᠴᠡᠭᠡᠳ ᠠᠪᠣᠭᠰᠠᠨ ᠨᠢ ᠠᠳᠠᠪᠠᠰᠢ ᠭᠠᠶᠢᠬᠠᠯᠳᠠᠢ᠃ ᠲᠦᠷᠥᠭᠦᠯᠡᠵᠥ ᠢᠷᠡᠭᠰᠡᠨ ᠡᠯᠵᠢᠭᠡᠨ ᠠᠴᠠ ᠪᠦᠳᠥᠭᠦᠨ ᠦᠯ ᠠᠯᠠᠭ ᠪᠣᠭᠤ ᠠᠴᠠ ᠡᠬᠢᠯᠡᠨ᠂ ᠠᠯᠢᠰᠣᠨ ᠪᠣᠬᠠᠯ ᠢ ᠠᠷᠪᠠᠭᠠᠷ ᠲᠣᠮᠣ ᠡᠪᠡᠷ ᠢᠶᠠᠷ ᠢᠶᠠᠨ ᠠᠴᠠᠳᠠᠵᠣ᠂ ᠠᠷᠪᠠ ᠲᠠᠪᠣᠨ ᠠᠯᠬᠤᠮ ᠤᠨ ᠴᠠᠭᠠᠨ᠎ᠠ ᠬᠦᠭᠯᠡᠷᠡᠭᠦᠯᠵᠣ ᠬᠠᠶᠠᠬᠤ ᠨᠢ ᠨᠡᠩ ᠭᠡᠴᠡᠭᠦᠥ ᠦᠵᠡᠮᠥᠷᠢ ᠪᠣᠯᠪᠠ᠃ ᠬᠤᠶᠠᠷ ᠰᠣᠭᠤ ᠴᠤ ᠮᠣᠯᠳᠤᠭ ᠲᠣᠯᠣᠭᠠᠢ ᠪᠠᠨ ᠲᠠᠮᠤᠷᠳᠠᠭᠤᠯᠵᠣ᠂ ᠠᠯᠢᠰᠣᠨ ᠪᠣᠬᠠᠯ ᠢ ᠬᠤᠷᠣᠰᠣᠯᠳᠠᠶᠢᠬᠠᠨ ᠮᠦᠷᠭᠦᠨ ᠰᠡᠭᠴᠢᠵᠥ ᠪᠠᠶᠢᠨ᠎ᠠ᠃ ᠬᠠᠷᠢᠨ ᠬᠤᠶᠠᠷ ᠨᠦᠷᠥᠭᠡ ᠨᠢ ᠬᠡᠳᠥ ᠣᠮᠳᠠᠭᠠᠰᠣᠭᠰᠠᠨ ᠪᠣᠯᠣᠯᠳᠠᠢ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣᠨ ᠵᠦᠭ ᠰᠢᠨᠣᠯᠳᠠᠶᠢᠬᠠᠨ ᠬᠠᠷᠠᠵᠣ᠂ ᠣᠰᠣᠨ ᠤ ᠦᠨᠥᠷ ᠢ ᠬᠠᠮᠠᠷ ᠱᠣᠣᠭᠢᠨᠠᠭᠤᠯᠣᠨ ᠬᠠᠨᠣᠮᠵᠢᠳᠠᠶᠢᠬᠠᠨ ᠦᠨᠥᠷᠯᠡᠵᠥ ᠵᠣᠭᠰᠣᠪᠠ᠃ ᠵᠡᠭᠦᠳᠥ ᠰᠣᠪᠢᠩ ᠳᠤ ᠴᠤ ᠪᠠᠭᠤᠮ᠎ᠠ ᠦᠭᠡᠢ ᠨᠢᠳᠥᠨ ᠡᠮᠥᠨ᠎ᠡ ᠪᠣᠯᠵᠣ ᠪᠠᠶᠢᠭ᠎ᠠ ᠪᠣᠭᠤ ᠭᠥᠷᠥᠭᠡᠰᠥᠨ ᠤ ︽ᠬᠢᠳᠡᠯ ᠶᠠᠪᠣᠳᠠᠯ︾ ᠢ ᠵᠦᠪᠳᠡᠭᠡᠵᠥ᠂ ᠪᠠᠶᠢᠭᠠᠯᠢ ᠲᠡᠯᠡᠬᠡᠢ ᠶᠢᠨ ᠠᠯᠢᠪᠠ ᠪᠦᠬᠦᠨ ᠢ ᠦᠪᠡᠷ ᠤᠨ ᠢᠶᠠᠨ ᠪᠣᠯᠭᠠᠵᠣ ᠰᠠᠶᠢᠷᠬᠠᠬᠤ ᠬᠦᠮᠥᠨ ᠲᠦᠷᠥᠯᠬᠢᠳᠡᠨ ᠭᠡᠵᠢ ᠳ᠋ᠡ︕ ᠭᠡᠵᠣ ᠡᠪᠦᠭᠡ ᠮᠢᠨᠢ ᠠᠮᠠᠨ ᠳᠠᠭᠠᠨ ᠲᠦᠳᠥᠨᠡᠭᠰᠡᠭᠡᠷ ᠪᠣᠭᠤ ᠶᠢᠨ ᠰᠦᠷᠥᠭ ᠤᠨ ︽ᠠᠵᠢᠯ︾ ᠤᠨ ᠪᠦᠳᠥᠮᠵᠢ ᠶᠢ ᠦᠨᠳᠥᠷ ᠲᠦᠪᠰᠢᠨ ᠳᠤ ᠬᠦᠷᠦᠬᠦᠯᠦᠭᠰᠡᠨ ᠳᠡᠭᠡᠨ ᠰᠡᠳᠬᠢᠯ ᠮᠠᠰᠢ ᠬᠠᠩᠬᠤᠯᠣᠭᠤᠨ᠃       ᠮᠠᠨ ᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠱᠣᠷᠤᠭ ᠵᠢᠭᠠᠰᠣᠨ ᠤ ᠲᠣᠬᠠᠢ ᠠᠬᠠᠮᠠᠳ ᠲᠣᠮᠣᠭᠠᠳᠠᠳ ᠠᠴᠠ ᠣᠰᠣ ᠣᠷᠣᠨ ᠢᠶᠠᠨ ᠭᠤᠯᠣᠭᠰᠠᠨ ᠲᠣᠮᠣ ᠱᠣᠷᠤᠭ ᠵᠢᠭᠠᠰᠣ ᠦᠳᠡᠰᠢ ᠰᠦᠨᠢ ᠶᠢᠨ ᠰᠢᠭᠦᠳᠡᠷᠢ ᠶᠢᠨ ᠣᠰᠣ ᠶᠢ ᠪᠠᠷᠢᠵᠣ᠂ ᠲᠠᠪᠤ ᠲᠣᠯᠣᠭᠠᠨ ᠭᠠᠵᠠᠷ ᠵᠠᠶᠢᠳᠠᠢ ᠪᠠᠶᠢᠬᠤ ᠦᠭᠡᠷ᠎ᠡ ᠨᠢᠭᠡ ᠭᠤᠣᠯ ᠣᠰᠣᠨ ᠳᠤ ᠨᠡᠭᠦᠴᠢᠭᠡᠳᠡᠭ ᠶᠣᠮᠰᠠᠨ ᠭᠡᠵᠥ ᠬᠠᠭᠤᠴᠢᠯᠠᠳᠠᠭ ᠪᠠᠶᠢᠭᠰᠠᠨ᠃ ᠲᠣᠮᠤᠭ ᠦᠨᠡᠨ ᠤ ᠬᠤᠭᠤᠷᠣᠨᠳᠣᠬᠢ ᠶᠠᠷᠢᠶ᠎ᠠ ᠬᠦᠭᠡᠷᠥᠭᠡ ᠶᠢ ᠰᠣᠨᠣᠰᠣᠭᠠᠳ᠂ ᠱᠠᠯ ᠢᠳᠡᠭᠡᠭᠰᠡᠨ ᠪᠢ ᠴᠢᠨᠢ ᠠᠯᠢᠰᠣᠨ ᠪᠣᠬᠠᠯ ᠤᠨ ᠮᠢᠨᠢ ᠵᠢᠭᠠᠰᠣ ᠪᠢᠳᠡᠭᠡᠢ ᠨᠡᠭᠦᠭᠡᠰᠡᠢ ᠳ᠋ᠠ︕ ᠭᠡᠵᠥ ᠬᠤᠨᠤᠭ ᠤᠨ ᠭᠦᠨ ᠳᠡᠭᠡᠨ ᠪᠣᠳᠣᠯ ᠮᠠᠨᠠᠭᠰᠠᠭᠠᠷ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠵᠢᠭᠠᠰᠣ ᠪᠦᠬᠦᠨ ᠢᠶᠠᠷ ᠢᠶᠠᠨ ᠨᠡᠭᠦᠴᠢᠭᠡᠭᠰᠡᠨ ᠭᠡᠵᠥ ᠵᠡᠭᠦᠳᠥ ᠪᠠᠷ ᠢᠶᠠᠨ ᠣᠬᠢᠯᠠᠵᠣ ᠪᠠᠶᠢᠭᠰᠠᠨ᠃    ᠦᠷᠯᠥᠭᠡ ᠡᠷᠳᠡ ᠶᠢᠨ ᠨᠠᠮ ᠰᠡᠯᠡᠬᠦᠨ ᠢ ᠡᠪᠳᠡᠵᠣ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠬᠤᠯᠣᠰᠣ ᠵᠡᠭᠡᠰᠥᠨ ᠳᠤ ᠡᠭᠦᠷᠯᠡᠭᠰᠡᠨ᠂ ᠭᠠᠯᠠᠭᠤ ᠨᠣᠭᠤᠰᠣ ᠭᠠᠩᠭᠠᠨᠠᠯᠳᠣᠨ ᠨᠢᠰᠥᠯᠳᠥᠬᠦ ᠳᠤ᠂ ᠠᠷᠯᠠᠬᠤ ᠣᠰᠣᠨ ᠤ ᠲᠡᠭᠡᠭᠦᠷ ᠦᠩᠭᠡ ᠶᠢᠨ ᠰᠠᠶᠢᠬᠠᠨ ᠴᠠᠬᠤᠯᠠᠢ ᠰᠢᠪᠠᠭᠤ ᠵᠢᠭᠠᠰᠣ ᠦᠭᠶᠥᠭᠡᠯᠡᠵᠥ ᠶᠠᠭᠠᠷᠠᠯᠳᠣᠨ᠎ᠠ᠃       ᠠᠯᠢᠰᠣᠨ ᠪᠣᠬᠠᠯ ᠤᠨ ᠮᠦᠷᠭᠦᠴᠡᠭ ᠡᠷᠭᠢ᠂ ᠰᠠᠶᠢᠷ ᠲᠠᠩ ᠤᠨ ᠲᠠᠯᠠᠩ ᠵᠢᠴᠢ ᠣᠨᠠᠭᠠᠨ ᠲᠣᠭᠤᠷᠠᠢ ᠭᠤᠷᠪᠠ ᠨᠢ ᠶᠣᠰᠣᠳᠠᠢ ᠲᠣᠰ ᠣᠰᠣᠨ ᠳᠠᠬᠢ ᠵᠢᠰᠥᠨ ᠵᠥᠢᠯ ᠤᠨ ᠠᠮᠢᠳᠠᠳ ᠤᠨ ᠣᠷᠣᠰᠢᠯ ᠣᠷᠣᠩᠨᠠᠯ᠂ ᠦᠷᠡᠵᠢᠯ ᠲᠦᠯᠵᠢᠯ ᠵᠢᠴᠢ ᠭᠤᠣᠯ ᠴᠡᠩᠬᠡᠬᠦᠨ ᠤ ᠣᠷᠣᠨ ᠨᠢ ᠪᠣᠯᠵᠣ ᠲᠠᠭᠠᠷᠠᠵᠠᠢ᠃ ᠵᠣᠨ ᠤ ᠨᠠᠷᠠᠨ ᠳᠤ ᠠᠯᠢᠰᠣᠨ ᠪᠣᠬᠠᠯ ᠤᠨ ᠡᠷᠭᠢ ᠳᠤ ᠪᠦᠭᠳᠦ᠋ᠢᠨ ᠣᠷᠭᠤᠭᠰᠠᠨ ᠪᠦᠳᠥᠭᠦᠨ ᠣᠳᠠ᠂ ᠡᠩᠭᠡᠯᠵᠡᠭᠦᠷ ᠲᠣᠣᠷᠠᠬᠢ ᠣᠭ᠍ᠶᠣ ᠨᠣᠭᠤᠭᠠᠨ ᠣᠰᠣᠨ ᠳᠤ ᠪᠠᠨ ᠪᠠᠷᠠᠭᠠᠨ ᠰᠡᠭᠦᠳᠡᠷ ᠢᠶᠠᠨ ᠰᠢᠬᠦᠷᠯᠡᠬᠦ ᠳᠤ ᠲᠣᠯᠣᠨ ᠵᠢᠭᠠᠰᠣ᠂ ᠬᠤᠯᠳᠣᠣ᠂ ᠵᠢᠪᠡᠭᠡ᠂ ᠮᠡᠳᠥ ᠶᠢᠨ ᠲᠣᠮᠣ ᠲᠣᠮᠣ ᠵᠢᠭᠠᠰᠣ ᠶᠠᠭ ᠯᠡ ᠵᠣᠰᠠᠯᠠᠩ ᠳᠤ ᠪᠠᠨ ᠪᠠᠭᠤᠭᠰᠠᠨ ᠰᠢᠭ᠋ ᠬᠡᠳᠥ ᠬᠡᠳᠥ ᠪᠠᠷ ᠢᠶᠠᠨ ᠴᠦᠷᠭᠦᠯᠡᠨ ᠢᠷᠡᠵᠣ᠂ ᠲᠠᠪᠠᠳᠠᠢ ᠰᠠᠶᠢᠬᠠᠨ ᠰᠡᠷᠢᠭᠦᠴᠡᠵᠥ ᠵᠣᠭᠰᠣᠬᠤ ᠨᠢ ᠲᠠᠯᠠᠢ ᠲᠠᠩᠬᠢᠰ ᠤᠨ ᠠᠮᠢᠯᠠᠭᠰᠠᠨ ᠵᠢᠷᠤᠭ ᠮᠡᠳᠣ ᠨᠢᠳᠣᠨ ᠳᠤ ᠲᠠᠭᠠᠳᠠᠢ ᠨᠢ ᠠᠷᠭ᠎ᠠ ᠦᠭᠡᠢ᠃ ᠵᠢᠭᠠᠰᠣᠨ ᠮᠢᠬᠠᠨ ᠳᠤ ᠬᠤᠪᠣᠰᠣᠭᠰᠠᠨ ᠠᠪᠤ ᠮᠢᠨᠢ᠂ ᠣᠰᠣᠨ ᠤ ᠨᠢᠭᠤᠷ ᠱᠣᠳᠣᠷᠴᠣ ᠣᠷᠭᠤᠭᠰᠠᠨ ᠣᠳᠠᠨ ᠰᠠᠯᠠᠭᠠᠨ ᠳᠤ ᠵᠣᠭᠰᠣᠵᠣ᠂ ᠪᠣᠷᠭᠠᠰᠣᠨ ᠤ ᠨᠠᠷᠢᠨ ᠦᠵᠥᠭᠦᠷ ᠲᠤ ᠲᠠᠮᠣᠵᠣ ᠵᠡᠭᠡᠭᠰᠡᠨ ᠬᠢᠯᠭᠠᠰᠣᠨ ᠣᠷᠠᠬ᠎ᠠ ᠪᠠᠨ ᠣᠰᠣ ᠣᠷᠣᠭᠤ ᠵᠠᠯᠠᠵᠣ᠂ ᠠᠯᠢ ᠢᠳᠡᠬᠦ ᠲᠣᠷᠠᠳᠠᠢ ᠨᠢᠭᠡ ᠪᠦᠳᠥᠭᠦᠨ ᠵᠢᠭᠠᠰᠣᠨ ᠤ ᠵᠠᠪᠠᠵᠢ ᠵᠠᠭᠠᠯᠮᠠᠢ ᠪᠠᠷ ᠣᠷᠠᠠᠬᠯᠠᠨ᠎ᠠ᠃ ᠦᠭᠡᠷ᠎ᠡ ᠵᠢᠭᠠᠰᠥ ᠨᠤᠭᠤᠳ ᠯᠠᠪ ᠦᠭᠶᠥᠭᠡ ᠬᠦᠭᠡᠭᠡᠵᠥ ᠪᠠᠶᠢᠬ᠎ᠠ ᠭᠡᠵᠣ ᠡ᠊ᠨᠳᠡᠭᠦᠷᠡᠨ ᠣᠰᠣᠨ ᠲᠦᠪᠰᠢᠨ ᠦᠭᠡᠳᠡ ᠣᠷᠣᠭᠤᠯ ᠱᠠᠮᠪᠢᠭᠠᠨᠠᠭᠤᠯᠣᠨ ᠲᠡᠮᠡᠴᠡᠵᠡᠭᠡᠨ᠎ᠡ᠃ ᠭᠡᠪᠡᠴᠥ ᠠᠪᠤ ᠮᠢᠨᠢ ᠢᠳᠡᠵᠣ ᠬᠦᠷᠬᠦ ᠬᠡᠮᠵᠢᠶ᠎ᠡ ᠪᠠᠷ ᠢᠶᠠᠨ ᠨᠢᠭᠡ ᠬᠤᠶᠠᠷ ᠵᠢᠭᠠᠰᠣ ᠣᠷᠠᠬᠠᠯᠠᠬᠤ ᠠᠴᠠ ᠪᠢᠰᠢ᠂ ᠣᠯᠠᠨ ᠵᠢᠭᠠᠰᠣ ᠣᠷᠠᠬᠠᠯᠠᠬᠤ ᠲᠣᠷᠠᠰᠢᠯ ᠬᠦᠷᠬᠦ ᠦᠭᠡᠢ ᠪᠠᠶᠢᠪᠠ᠃       ᠠᠶ᠎ᠠ᠂ ᠠᠮᠢᠨ ᠣᠰᠣᠨ ᠪᠣᠯᠣᠭᠰᠠᠨ ᠠᠯᠢᠰᠣᠨ ᠪᠣᠬᠠᠯ ᠳᠤ ᠮᠢᠨᠢ᠂ ᠠᠶᠣᠩᠭᠤᠷᠢ ᠶᠢᠨ ᠪᠠᠷᠠᠭᠠᠨ ᠬᠠᠷ᠎ᠠ ᠲᠦᠷᠥᠳᠡᠰᠥ᠂ ᠠᠮᠢᠳᠠᠨ ᠤ ᠠᠶᠣᠯᠳᠣ ᠴᠦᠪ ᠢᠪ ᠲᠠᠷᠣᠵᠣ ᠪᠠᠭᠤᠭᠰᠠᠨ ᠢ ᠬᠡᠨ ᠠᠩᠵᠠᠷᠠᠯ᠎ᠠ ᠳ᠋ᠠ᠃ ᠨᠢᠭᠡᠨ ᠡᠳᠥᠷ ᠠᠶᠢᠯ ᠠᠶᠢᠮᠠᠭ ᠲᠤ ᠪᠠᠨ ︽ᠬᠤᠳᠣᠭᠴᠢᠨ︾ ᠬᠤᠴᠢ ᠲᠠᠢ ᠵᠠᠮᠢᠶᠠᠨ ᠭᠤᠸᠠᠢ᠂ ᠬᠦᠯ ᠨᠢ ᠦᠨᠳᠥᠷ᠂ ᠨᠢᠷᠣᠭᠤ ᠨᠢ ᠪᠣᠭᠤᠨᠢ ᠬᠠᠨ ᠣᠪᠣᠭᠳᠣ ᠵᠢᠭᠠᠰᠣᠴᠢᠨ ᠢ ᠬᠡᠳᠥᠨ ᠬᠠᠮᠰᠠᠭᠠᠳᠠᠨ ᠲᠠᠢ ᠨᠢ ᠬᠠᠮᠳᠣ ᠲᠠᠭᠠᠭᠤᠯᠵᠣ᠂ ᠭᠤᠣᠯ ᠣᠰᠣ ᠶᠢ ᠦᠨᠴᠥᠭ ᠪᠣᠯᠣᠩ ᠦᠯᠡᠳᠡᠭᠡᠯ ᠦᠭᠡᠢ ᠱᠦᠭᠦᠭᠰᠡᠭᠡᠷ ᠴᠢᠪ ᠬᠡᠮᠡᠨ ᠲᠡᠳᠡᠨ ᠤ ᠡᠷᠢᠯ ᠤᠨ ᠭᠦᠨ ᠳᠤ ᠨᠢᠭᠤᠭᠳᠠᠭᠰᠠᠨ᠂ ᠠᠯᠢᠰᠣᠨ ᠪᠣᠬᠠᠯ ᠳᠤ ᠮᠢᠨᠢ ᠬᠦᠷᠴᠥ ᠢᠷᠡᠭᠡᠳ᠂ ᠪᠦᠳᠥᠭᠦᠨ ᠨᠠᠷᠢᠨ ᠵᠢᠭᠠᠰᠣᠨ ᠠᠯᠭ᠎ᠠ ᠶᠢ ᠲᠠᠷᠠᠭ᠎ᠠ ᠮᠦᠷ ᠲᠠᠢ ᠬᠠᠶᠠᠵᠣ᠂ ᠪᠠᠰᠠ ᠵᠠᠯᠭᠢᠬᠤ ᠶᠢ ᠨᠢ ᠰᠡᠷᠭᠡᠶᠢᠯᠡᠵᠥ ᠬᠦᠵᠥᠭᠦᠥ ᠶᠢ ᠨᠢ ᠬᠦᠩᠬᠡᠨ ᠪᠣᠭᠤᠭᠰᠠᠨ᠂ ᠬᠡᠭᠡᠷ᠎ᠡ ᠶᠢᠨ ᠬᠠᠷ᠎ᠠ ᠨᠣᠭᠤᠰᠣ ᠮᠡᠳᠥ ᠵᠢᠭᠠᠰᠣᠨ ᠰᠢᠪᠠᠭᠤ ᠶᠢ ᠠᠷᠪᠠᠭᠠᠳ ᠢᠯᠡᠭᠦᠥ ᠬᠦᠪᠥᠭᠦᠯᠵᠥ ᠵᠢᠭᠠᠰᠣ ᠠᠩᠨᠠᠵᠠᠢ᠃ ᠬᠠᠨ ᠢᠷᠭᠡᠨ ᠬᠡᠳᠦ᠋ᠢᠪᠡᠷ ᠠᠯᠢᠰᠣᠨ ᠪᠣᠬᠠᠯ ᠤᠨ ᠵᠢᠭᠠᠰᠣ ᠪᠠᠷ ᠰᠠᠪᠠ ᠰᠠᠭᠠᠯᠢ ᠪᠠᠨ ᠲᠦᠭᠦᠷᠭᠡᠵᠥ ᠪᠣᠴᠠᠭᠰᠠᠨ ᠴᠤ ᠶᠣᠯᠣ ᠰᠢᠪᠠᠭᠤᠨ ᠤ ᠭᠡᠳᠡᠰᠥ ᠮᠡᠳᠥ ᠴᠠᠳᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠣᠯᠣᠭᠰᠠᠨ ᠲᠡᠷᠡ ᠲᠠᠮᠰᠢᠭ᠂ ᠲᠡᠮᠡᠢ ᠬᠤᠶᠠᠷ ᠡᠳᠥᠷ ᠪᠣᠯᠤᠭ᠎ᠠ ᠦᠭᠡᠢ ᠬᠠᠮᠰᠠᠭᠠᠳᠠᠨ ᠢᠶᠠᠨ ᠲᠠᠭᠠᠭᠤᠯᠵᠣ᠂ ᠠᠯᠢᠰᠣᠨ ᠪᠣᠬᠠᠯ ᠳᠤ ᠲᠠᠬᠢᠨ ᠢᠷᠡᠵᠣ᠂ ᠬᠢᠮᠢ ᠶᠢᠨ ᠡᠮ ᠢᠶᠠᠷ ᠨᠠᠶᠢᠷᠠᠵᠣ ᠵᠣᠬᠢᠶᠠᠭᠰᠠᠨ᠂ ᠬᠡᠳᠥ ᠬᠡᠳᠥᠨ ᠲᠡᠯᠪᠡᠴᠢᠬᠦ ᠪᠦᠮᠪᠦᠭᠡ ᠪᠠᠷ ᠠᠯᠢᠰᠣᠨ ᠪᠣᠬᠠᠯ ᠤᠨ ᠣᠰᠣ ᠶᠢ ᠬᠠᠶᠢᠷ᠎ᠠ ᠨᠠᠶᠢᠷ ᠦᠭᠡᠢ ᠲᠡᠯᠪᠡᠴᠢᠵᠡᠢ᠃ ᠲᠡᠯᠪᠡᠴᠢᠬᠦ ᠪᠦᠮᠪᠦᠭᠡ ᠶᠢᠨ ᠨᠦᠰᠡᠷ ᠲᠡᠯᠪᠡᠷᠢᠯᠳᠡ ᠳᠤ ᠶᠡᠭᠡ ᠪᠠᠭ᠎ᠠ ᠵᠢᠭᠠᠰᠣ ᠵᠢᠷᠠᠭᠠᠬᠠᠢ ᠶᠢᠨ ᠦᠩᠬᠦᠯᠴᠡᠭ ᠫᠣᠣᠵᠢᠩ ᠬᠠᠭᠠᠷᠠᠵᠣ᠂ ᠣᠰᠣᠨ ᠨᠢᠭᠤᠷ ᠲᠤ ᠴᠠᠶᠢᠯᠵᠠᠨ ᠲᠡᠭᠳᠡᠬᠦ ᠨᠢ ᠶᠠᠭ ᠲᠣᠮᠣ ᠲᠣᠭᠤᠭᠠᠨ ᠳᠤ ᠣᠶᠢᠵᠣ ᠪᠣᠯᠭᠤᠭᠰᠠᠨ ᠴᠠᠭᠠᠨ ᠭᠤᠯᠢᠷ ᠤᠨ ᠪᠠᠩᠰᠢ ᠮᠡᠳᠥ ᠬᠠᠷᠠᠭᠳᠠᠨ᠎ᠠ᠃ ᠬᠠᠨ ᠢᠷᠭᠡᠨ ᠲᠣᠮᠣ ᠵᠢᠵᠢᠭ ᠵᠢᠭᠠᠰᠤ ᠶᠢ ᠲᠡᠷᠭᠡ ᠬᠦᠰᠬᠡ ᠪᠠᠨ ᠲᠦᠬᠦᠷᠳᠡᠯ᠎ᠡ ᠰᠢᠬᠦᠭᠰᠡᠨ ᠪᠤᠯᠪᠠᠴᠤ᠂ ᠡ᠊ᠨᠳᠡᠬᠢ ᠲᠤᠮᠤ ᠲᠤᠯᠤᠨ ᠵᠢᠭᠠᠰᠤ ᠶᠢ ᠤᠯᠵᠠᠯᠠᠭᠰᠠᠨ ᠦᠬᠡᠢ ᠳᠤ ᠪᠠᠨ ᠰᠡᠳᠬᠢᠯ ᠨᠢᠬᠡ ᠯᠡ ᠬᠦᠨᠳᠡᠬᠦᠷ ᠪᠤᠴᠠᠪᠠ᠃       ᠬᠠᠶᠠᠭ᠎ᠠ ᠬᠢᠷᠬᠠᠭ ᠦᠭᠡᠢ ᠬᠤᠪᠳᠤᠭ ᠰᠠᠨᠠᠭᠠᠳᠣ ᠬᠠᠨ ᠢᠷᠭᠡᠨ᠂ ᠭᠤᠷᠪᠠᠳᠣᠭᠠᠷ ᠣᠳᠠᠭ᠎ᠠ ᠠᠯᠢᠰᠣᠨ ᠪᠣᠬᠠᠯ ᠳᠤ ᠬᠦᠷᠴᠥ ᠢᠷᠡᠬᠦ ᠳᠤ ᠨᠢᠭᠡᠨᠳᠡ ᠦᠳᠡᠰᠢ ᠶᠢᠨ ᠨᠠᠷᠠᠨ ᠤ ᠡᠴᠥᠰ ᠤᠨ ᠲᠣᠶᠠᠭ᠎ᠠ ᠡᠪᠬᠡᠭᠳᠡᠵᠣ᠂ ᠪᠣᠭᠤᠷᠣᠯ ᠰᠠᠭᠠᠷᠠᠯ ᠰᠦᠨᠢ ᠶᠢᠨ ᠬᠦᠰᠢᠭᠡ ᠠᠯᠭᠤᠷ ᠠᠭᠠᠵᠢᠮ ᠢᠶᠠᠷ ᠨᠠᠭᠠᠰᠢᠯᠠᠵᠣ ᠪᠠᠶᠢᠭᠰᠠᠨ ᠦᠶ᠎ᠡ ᠪᠠᠶᠢᠪᠠ᠃ ᠲᠡᠷᠡ ᠲᠣᠰ ᠣᠳᠠᠭ᠎ᠠ ᠠᠯᠢᠰᠣᠨ ᠪᠣᠬᠠᠯ ᠳᠤ ᠬᠦᠷᠴᠥ ᠢᠷᠡᠬᠦ ᠳᠤ ᠪᠠᠨ ᠬᠠᠨᠢ ᠬᠠᠮᠰᠠᠭᠠᠳᠠᠨ ᠢᠶᠠᠨ ᠴᠤ ᠲᠠᠭᠠᠭᠤᠯᠣᠭᠰᠠᠨ ᠦᠭᠡᠢ᠃ ᠵᠦᠪᠬᠡᠨ ᠰᠠᠷᠠᠯ ᠡᠯᠵᠢᠭᠡ ᠬᠦᠯᠥᠭᠰᠡᠨ ᠲᠡᠷᠭᠡᠨ ᠲᠡᠭᠡᠷ᠎ᠡ ᠪᠠᠨ ᠬᠦᠩᠬᠡᠨ ᠵᠡᠪᠢ᠂ ᠲᠣᠯᠬᠤ ᠰᠢᠷᠤᠭ ᠪᠠ ᠪᠠᠭ᠎ᠠ ᠰᠠᠭ᠎ᠠ ᠬᠡᠷᠡᠭᠯᠡᠭᠡᠨ ᠤ ᠵᠥᠢᠯ ᠢᠶᠠᠨ ᠲᠡᠭᠡᠭᠡᠭᠰᠡᠨ ᠲᠡᠳᠦ᠋ᠢᠯᠡ᠃ ᠬᠠᠨ ᠢᠷᠭᠡᠨ ᠬᠦᠩᠬᠡᠨ ᠵᠡᠪᠢ ᠪᠠᠨ ᠲᠡᠷᠭᠡᠨ ᠠᠴᠠ ᠪᠠᠨ ᠪᠠᠭᠤᠯᠭᠠᠵᠣ ᠣᠰᠣᠨ ᠳᠤ ᠣᠷᠣᠭᠤᠯᠵᠣ ᠰᠡᠯᠢᠭᠰᠡᠭᠡᠷ᠂ ᠠᠯᠢᠰᠣᠨ ᠪᠣᠬᠠᠯ ᠢ ᠪᠦᠳᠥᠨ ᠨᠢᠭᠡ ᠲᠣᠭᠤᠷᠢᠬᠤ ᠪᠠᠷ ᠪᠡᠯᠡᠳᠭᠡᠵᠣ ᠠᠪᠴᠢᠷᠠᠭᠰᠠᠨ ᠯᠣᠩᠬᠤ ᠲᠠᠢ ᠬᠤᠣᠷ᠎ᠠ ᠡᠮ ᠢᠶᠠᠨ ᠪᠦᠬᠦᠨ ᠢ ᠣᠰᠣᠨ ᠳᠤ ᠶᠡᠭᠦᠯᠡᠵᠥ ᠠᠮᠵᠢᠵᠠᠢ᠃ ᠲᠡᠭᠡᠭᠡᠳ ᠲᠡᠷᠡ ᠬᠤᠣᠷ ᠡᠮ ᠤᠨ ᠢᠶᠠᠨ ᠣᠰᠣᠨ ᠳᠤ ᠠᠭᠤᠰᠣᠨ᠂ ᠠᠮᠢᠳᠠᠨ ᠢ ᠬᠤᠣᠷᠳᠠᠭᠤᠯᠬᠤ ᠴᠠᠭ ᠵᠠᠢ ᠶᠢ ᠬᠦᠯᠢᠶᠡᠨ᠂ ᠣᠰᠣᠨ ᠤ ᠬᠦᠪᠡᠭᠡᠨ ᠳᠤ ᠲᠠᠮᠠᠭᠢᠯᠠᠵᠣ ᠰᠠᠭᠤᠬᠤ ᠳᠠᠭᠠᠨ ︽ᠡᠷᠭᠢ ᠶᠢᠨ ᠣᠰᠣᠨ ᠳᠤ ᠰᠢᠷᠭᠤᠭᠰᠠᠨ ᠲᠣᠮᠣ ᠲᠣᠯᠣᠨ ᠴᠢᠨᠣ ᠴᠠᠭ ᠴᠢᠨᠢ ᠲᠣᠯᠵᠣ ᠴᠢᠪᠠᠭ᠎ᠠ ᠴᠢᠨᠢ ᠣᠯᠠᠶᠢᠨ᠎ᠠ ᠳ᠋ᠠ︾ ᠭᠡᠵᠣ ᠮᠠᠷᠰᠠᠶᠢᠨ ᠢᠨᠢᠶᠡᠨ᠎ᠡ᠃ ᠭᠡᠪᠡᠴᠥ ᠲᠡᠷᠡ ᠬᠡᠴᠢᠨᠡᠨ ᠬᠦᠯᠢᠶᠡᠭᠰᠡᠨ ᠴᠤ ᠲᠣᠮᠣ ᠲᠣᠯᠣᠨ ᠵᠢᠭᠠᠰᠣᠨ ᠤ ᠬᠤᠣᠷᠳᠠᠭᠳᠠᠭᠠᠳ᠂ ᠣᠯᠪᠠᠭ᠎ᠠ ᠲᠠᠳᠠᠬᠤ ᠪᠠᠶᠢᠳᠠᠯ ᠣᠭᠳᠣ ᠬᠠᠷᠠᠭᠳᠠᠬᠤ ᠦᠭᠡᠢ ᠳᠤ ᠪᠠᠭ᠋ᠠᠨ ᠵᠣᠷᠢᠭ ᠴᠦᠭᠦᠭᠰᠡᠨ ᠢᠶᠠᠨ ᠪᠦᠷ ᠰᠡᠭᠦᠯ ᠳᠤ ᠨᠢ ᠵᠡᠪᠢ ᠳᠤ ᠪᠠᠨ ᠭᠠᠷᠴᠥ᠂ ᠬᠦᠨᠳᠡᠢ ᠬᠠᠷ᠎ᠠ ᠡᠷᠭᠢ ᠣᠷᠣᠭᠤ ᠣᠶᠢᠷᠠᠳᠣᠳᠠᠯ᠎ᠠ᠂ ᠣᠰᠣᠨ ᠤ ᠨᠢᠭᠤᠷ ᠲᠤ ᠭᠡᠨᠡᠳᠳᠡ ᠬᠠᠷ᠎ᠠ ᠬᠤᠢ ᠬᠤᠶᠢᠯᠠᠷᠠᠨ ᠪᠣᠰᠴᠣ᠂ ᠵᠢᠵᠢᠭ ᠵᠡᠪᠢ ᠶᠢ ᠨᠢ ᠬᠠᠮᠣᠷᠪᠠ᠃ ᠬᠤᠢ ᠰᠠᠯᠬᠢᠨ ᠳᠤ ᠬᠠᠮᠣᠭᠳᠠᠭᠰᠠᠨ ᠬᠠᠨ ᠢᠷᠭᠡᠨ ᠤ ᠵᠡᠪᠢ ᠂ ᠰᠣᠷᠭᠢᠷᠠᠢ ᠮᠡᠳᠥ ᠣᠷᠣᠨ ᠳᠠᠭᠠᠨ ᠬᠡᠳᠥ ᠡᠷᠭᠢᠨ ᠵᠠᠶᠢᠮᠣᠭᠰᠠᠭᠠᠷ᠂ ᠪᠦᠷ ᠰᠡᠭᠦᠯ ᠳᠤ ᠨᠢ ᠦᠩᠭᠡᠶᠢᠭᠰᠡᠨ ᠦᠨᠳᠥᠷ ᠬᠠᠷ᠎ᠠ ᠡᠷᠭᠢ ᠳᠤ ᠴᠢᠨᠡᠭᠡ ᠮᠡᠳᠡᠨ ᠰᠠᠪᠠᠭᠳᠠᠪᠠ᠃ ᠦᠬᠦᠬᠦ ᠡᠯᠵᠢᠭᠡ ᠴᠢᠨ᠋ᠸ᠎ᠠ ᠶᠢᠨ ᠠᠮᠠᠨ ᠳᠤ ᠭᠡᠳᠡᠭ ᠢᠶᠠᠷ᠂ ᠣᠳᠠᠭᠠᠨ ᠵᠢᠯ ᠤᠨ ᠡᠯᠡᠯᠳᠡ ᠳᠤ ᠠᠶᠠᠨᠳᠠᠭᠠᠨ ᠨᠣᠷᠠᠮᠠᠷ ᠪᠣᠯᠣᠭᠰᠠᠨ ᠭᠦᠨ ᠵᠣᠵᠠᠭᠠᠨ ᠬᠦᠷᠥᠰᠥᠨ ᠡᠷᠭᠢ᠂ ᠶᠠᠭ ᠬᠠᠨ ᠢᠷᠭᠡᠨ ᠢ ᠪᠣᠯᠵᠣᠨ ᠬᠦᠯᠢᠶᠡᠵᠥ ᠪᠠᠶᠢᠭᠰᠠᠨ ᠰᠢᠭ᠋ ᠬᠦᠷ ᠭᠢᠳᠡᠯ᠎ᠡ ᠶᠡᠭᠦᠷᠡᠨ ᠪᠠᠭᠤᠵᠣ᠂ ᠲᠡᠭᠦᠨ ᠢ ᠵᠢᠵᠢᠭ ᠵᠡᠪᠢ ᠲᠠᠢ ᠨᠢ ᠬᠠᠮᠳᠣ᠂ ᠰᠣᠮᠣᠨ ᠲᠠᠯᠠᠩ ᠤᠨ ᠦᠵᠥᠭᠦᠷ ᠲᠣᠰᠢᠶ᠎ᠠ᠂ ᠨᠣᠭᠤᠭᠠᠨ ᠴᠡᠭᠡᠯ ᠤᠨ ᠭᠦᠨ ᠬᠦᠪ ᠲᠤ ᠪᠠᠷ᠎ᠠ ᠲᠣᠷᠣ ᠦᠭᠡᠢ ᠪᠣᠯᠭᠠᠵᠠᠢ᠃       ᠠᠯᠢᠰᠣᠨ ᠪᠣᠬᠠᠯ ᠤᠨ ᠬᠦᠪᠡᠭᠡᠨ ᠳᠠᠬᠢ᠂ ᠣᠯᠠᠭᠠᠨ ᠮᠣᠳᠣᠨ ᠠᠴᠠ ᠣᠶᠠᠭᠰᠠᠨ ᠬᠠᠨ ᠢᠷᠭᠡᠨ ᠤ ᠰᠠᠷᠠᠯ ᠡᠯᠵᠢᠭᠡ᠂ ᠪᠠᠳᠠᠭᠠᠨ᠎ᠠ ᠰᠢᠮᠠᠭᠤᠯ ᠳᠤ ᠱᠠᠪᠠᠭᠳᠠᠭᠰᠠᠭᠠᠷ᠂ ᠲᠡᠰᠪᠥᠷᠢ ᠲᠡᠪᠴᠢᠶᠡᠷᠢ ᠠᠯᠳᠠᠨ ᠲᠡᠯᠴᠢᠯᠡᠭᠰᠡᠭᠡᠷ ᠪᠠᠶᠢᠵᠣ᠂ ᠨᠣᠭᠳᠣ ᠴᠣᠯᠪᠣᠭᠤᠷ ᠢᠶᠠᠨ ᠮᠣᠯᠳᠣᠯᠵᠣ᠂ ᠬᠤᠪᠳᠤᠭ ᠰᠠᠨᠠᠭᠠᠳᠣ ᠴᠢᠨᠥ ᠠᠰᠢᠭ ᠤᠨ ᠲᠣᠯᠣᠮ ᠴᠢᠨᠢ ᠲᠦᠭᠦᠷᠬᠦ ᠦᠭᠡᠢ ᠴᠤ ᠨᠢᠭᠦᠯ ᠤᠨ ᠰᠠᠪᠠ ᠴᠢᠨᠢ ᠲᠦᠭᠦᠷᠥᠭᠰᠡᠨ ᠴᠢᠨᠢ ᠪᠣᠯᠵᠠᠢ ᠭᠡᠰᠡᠨ ᠰᠢᠭ ᠢᠷᠡᠭᠰᠡᠨ ᠮᠦᠷ ᠢᠶᠠᠷ ᠢᠶᠠᠨ ᠡᠷᠭᠢᠵᠥ ᠬᠠᠷᠠᠯ ᠦᠭᠡᠢ ᠵᠢᠷᠣᠭᠠᠯᠠᠪᠠ᠃       ᠠᠯᠢᠰᠣᠨ ᠪᠣᠬᠠᠯ ᠲᠦᠢᠯ ᠤᠨ ᠨᠠᠮ ᠵᠢᠮ ᠪᠣᠯᠪᠠ᠃ ᠭᠠᠭᠴᠠ ᠬᠦ ᠲᠡᠭᠦᠨ ᠳᠤ ᠡᠬᠢ ᠣᠰᠣᠨ ᠪᠣᠯᠵᠣ ᠣᠨᠳᠣᠷᠤᠭ᠎ᠠ᠂ ᠪᠠᠭᠠᠬᠠᠨ ᠬᠠᠷᠠᠵᠠ ᠪᠣᠯᠠᠭ ᠪᠠ ᠲᠡᠭᠦᠨ ᠢ ᠰᠠᠬᠢᠭᠰᠠᠨ ᠴᠠᠭᠠᠨ ᠡᠷᠢᠶᠡᠨ ᠮᠣᠭᠠᠢ᠂ ᠠᠯᠢᠰᠣᠨ ᠪᠣᠬᠠᠯ ᠤᠨ ᠢᠶᠠᠨ ᠢᠷᠡᠬᠦ ᠮᠠᠷᠭᠠᠰᠢ ᠶᠢᠨ ᠲᠦᠯᠥᠭᠡ ᠰᠠᠨᠠᠭᠠᠰᠢᠷᠠᠵᠣ᠂ ᠠᠮᠢ ᠠᠮᠢᠵᠢᠷᠠᠯ ᠤᠨ ᠪᠦᠷᠢᠨ ᠣᠬᠠᠭᠠᠨ ᠢ ᠨᠣᠮᠴᠢᠯᠠᠵᠣ ᠪᠠᠶᠢᠭ᠎ᠠ ᠮᠡᠳᠥ ᠰᠠᠨᠠᠭᠳᠠᠭᠤᠯᠣᠨ᠎ᠠ᠃         ᠵᠣᠬᠢᠶᠠᠭᠴᠢ᠄ ᠬᠠᠰᠳᠠᠯᠠᠢ         ᠵᠤᠬᠢᠶᠠᠬᠴᠢ ᠶᠢᠨ ᠬᠠᠶ᠋ᠢᠭ᠄ ᠬᠢᠩᠭᠠᠨ ᠠᠶᠢᠮᠠᠭ ᠤᠨ ᠵᠠᠯᠠᠶᠢᠳ ᠬᠤᠰᠢᠭᠤᠨ ᠤ ᠠᠯᠳᠠᠷᠳᠣ ᠭᠤᠣᠯ ᠰᠣᠷᠭᠠᠭᠤᠯᠢ
  
ᠢᠷᠡᠯᠲᠡ᠄ ᠬᠢᠩᠭᠠᠨ ᠤ ᠡᠳᠦᠷ ᠤᠨ ᠰᠣᠨᠢᠨ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠡᠵᠢ ᠪᠠᠨ ᠬᠠᠶᠢᠷᠠᠯᠠᠭᠠᠷᠠᠢ
ᠨᠣᠭᠤᠭᠠᠨ ᠳᠤ ᠪᠣᠳᠣᠭᠰᠢᠭᠰᠠᠨ ᠬᠦᠳᠡᠭᠡ
ᠮᠤᠩᠭᠤᠯ ᠦᠬᠢᠨ
ᠮᠤᠩᠭᠤᠯ ᠰᠤᠷᠭᠠᠭᠤᠯᠢ
ᠮᠦᠷᠤᠭᠡᠳᠤᠯ ᠳᠤ ᠰᠦᠮᠡᠯᠵᠡᠳᠡᠭ ᠨᠤᠳᠤᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号