ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠲᠦᠰᠢᠶᠡᠳᠦ ᠶᠢᠨ ᠲᠤᠬᠠᠢ ᠬᠠᠯᠠᠭᠤᠨ ᠵᠤᠭᠤᠭ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/3/11
   ● ᠪᠣᠣ ᠱᠥ ᠴᠢᠨ     ᠰᠢᠭᠤᠢ ᠰᠠᠷᠠᠪᠴᠢᠳᠦ ᠰᠢᠷᠤᠢ ᠭᠡᠷ᠂ ᠴᠠᠭᠠᠰᠤ ᠪᠠᠷ ᠨᠠᠭᠠᠭᠰᠠᠨ ᠮᠤᠳᠤᠨ ᠴᠤᠩᠬᠤ᠂ ᠰᠢᠷᠳᠡᠭ ᠦᠭᠡᠢ ᠴᠢᠬᠢᠷᠡᠰᠦᠨ ᠬᠠᠨᠵᠤ᠂ ᠨᠦᠭᠦᠭᠡᠰᠦ ᠲᠠᠢ ᠲᠡᠪᠡᠯ ᠴᠤᠭᠤᠷᠬᠠᠢ ᠭᠤᠳᠤᠯ ᠁ ᠲᠡᠷᠡ ᠨᠢ ᠮᠠᠨ ᠤ ᠪᠠᠭ᠎ᠠ ᠶᠢᠨ ᠠᠮᠢᠳᠤᠷᠠᠯ᠂ ᠪᠠᠯᠴᠢᠷ ᠨᠠᠰᠤᠨ ᠤ ᠲᠤᠷᠠᠳᠬᠠᠯ ᠡ᠃ ᠭᠡᠪᠡᠴᠦ᠂ ᠲᠡᠷᠡ ᠦᠶ᠎ᠡ ᠳᠤ ᠪᠢᠳᠡ ᠪᠦᠷ ᠪᠠᠶᠠᠷ ᠪᠠᠶᠠᠰᠤᠯ ᠲᠠᠢ ᠂ ᠪᠦᠷ ᠯᠡ ᠶᠠᠳᠠᠭᠤ ᠠᠴᠠ ᠪᠠᠨ ᠠᠩᠬᠢᠵᠢᠷᠠᠨ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠠᠮᠢᠳᠤᠷᠠᠬᠤ ᠭᠡᠵᠦ ᠰᠠᠶᠢᠨ ᠰᠠᠶᠢᠬᠠᠨ ᠢ ᠬᠦᠰᠡᠨ ᠮᠦᠷᠦᠭᠡᠳᠦᠨ ᠬᠠᠮᠳᠤ ᠪᠠᠷ ᠢᠶᠠᠨ ᠴᠢᠷᠮᠠᠶᠢᠳᠠᠭ ᠪᠠᠶᠢᠭᠰᠠᠨ᠃ ᠤᠳᠤᠬᠠᠨ᠂ ᠦᠳᠡᠯᠤᠬᠡ ᠪᠢᠳᠡ ᠦᠶ᠎ᠠ ᠬᠤᠷᠠᠭ ᠨᠠᠰᠤᠨ ᠤ ᠬᠢ ᠪᠠᠷ ᠢᠶᠠᠨ ᠵᠤᠭᠤᠭᠳᠠᠬᠤ ᠪᠦᠷᠢ ᠶᠠᠳᠠᠭᠤ ᠪᠠᠶᠢᠭᠰᠠᠨ ᠢᠶᠠᠨ ᠰᠠᠨᠠᠭᠠᠯᠵᠠᠨ᠂ ᠪᠠᠶᠠᠨ ᠠᠮᠢᠳᠤᠷᠠᠯ ᠢᠶᠠᠨ ᠬᠠᠶᠢᠷᠠᠯᠠᠬᠤ ᠪᠤᠳᠤᠯ ᠲᠦᠷᠦᠭᠳᠡᠳᠡᠭ᠃ ᠲᠡᠷᠡ ᠦᠶ᠎ᠠ ᠶᠠᠳᠠᠭᠤᠬᠠᠨ ᠪᠠᠶᠢᠭᠰᠠᠨ ᠴᠦ ᠪᠠᠶᠠᠰᠤᠯᠳᠠᠶᠢᠬᠠᠨ᠂ ᠶᠠᠭᠠᠷᠠᠤ ᠪᠠᠶᠢᠭᠰᠠᠨ ᠴᠦ ᠵᠢᠷᠭᠠᠯᠳᠠᠶᠢᠬᠠᠨ ᠪᠠᠶᠢᠭᠰᠠᠨ᠃ ᠡᠨᠡ ᠨᠢ ᠮᠢᠨᠦ ᠲᠦᠰᠢᠶᠡᠳᠦ ᠳᠤ ᠵᠠᠶᠠᠭᠠᠭᠳᠠᠭᠰᠠᠨ ᠤ ᠵᠤᠯ ᠵᠠᠪᠰᠢᠶᠠᠨ ᠭᠡᠵᠦ ᠤᠮᠤᠭᠰᠢᠨ ᠪᠤᠳᠤᠳᠠᠭ᠃   ᠬᠢᠴᠢᠶᠡᠯ ᠤᠨ ᠪᠢᠴᠢᠭ ᠦᠭᠡᠢ ᠰᠤᠷᠤᠯᠴᠠᠯᠭ᠎ᠠ᠂ ᠰᠢᠷᠡᠭᠡ ᠰᠠᠨᠳᠠᠯᠢ ᠦᠭᠡᠢ ᠬᠢᠴᠢᠶᠡᠯᠯᠡᠭᠡ᠂ ᠲᠤᠰᠤᠨ ᠳ᠋ᠸᠡᠭ ᠤᠨ ᠲᠤᠤᠷᠠᠬᠢ ᠲᠠᠰᠬᠠᠯ᠂ ᠭᠡᠷ ᠲᠤ ᠪᠠᠨ ᠬᠠᠮᠵᠢᠳᠠᠭ ᠪᠤᠯᠪᠠᠰᠤᠷᠠᠯ᠂ ᠬᠤᠪᠢᠨ ᠤ ᠶᠠᠪᠤᠳᠠᠯ ᠢᠶᠠᠨ ᠬᠤᠪᠢ ᠪᠠᠷ ᠢᠶᠠᠨ ᠰᠢᠢᠳᠪᠦᠷᠢᠯᠡᠬᠦ ᠠᠮᠢᠳᠤᠷᠠᠯ᠃ ᠪᠠᠭᠰᠢ ᠪᠠᠨ ᠦᠵᠡᠪᠡᠯ ᠶᠤᠰᠤᠯᠠᠨ᠎ᠠ᠂ ᠠᠬᠠᠮᠠᠳ ᠢ ᠦᠵᠡᠪᠡᠯ ᠮᠡᠨᠳᠦᠴᠢᠯᠡᠨ᠎ᠡ ᠁ ᠲᠡᠷᠡ ᠪᠤᠯ ᠮᠢᠨᠦ ᠰᠤᠷᠤᠭᠴᠢ ᠶᠢᠨ ᠦᠶ᠎ᠡ᠂ ᠲᠡᠷᠡ ᠪᠤᠯ ᠮᠠᠨ ᠤ ᠠᠮᠢᠳᠤᠷᠠᠯ ᠤᠨ ᠲᠠᠳᠬᠠᠯ᠃ ᠲᠡᠷᠡ ᠦᠶ᠎ᠡ ᠪᠠᠨ ᠲᠤᠷᠠᠰᠬᠤ ᠪᠦᠷᠢ ᠪᠢᠳᠡ ᠤᠮᠤᠭᠰᠢᠳᠠᠭ᠂ ᠲᠡᠷᠡ ᠦᠶ᠎ᠡ ᠪᠠᠨ ᠵᠤᠭᠤᠭᠳᠠᠬᠤ ᠪᠦᠷᠢ ᠪᠢᠳᠡ ᠪᠠᠶᠠᠰᠳᠠᠭ᠃ ᠬᠦᠴᠢᠷᠳᠡᠶᠢᠬᠡᠨ ᠪᠠᠶᠢᠭᠰᠠᠨ ᠴᠦ ᠪᠠᠶᠠᠰᠤᠯᠳᠠᠶᠢᠬᠠᠨ ᠪᠠᠶᠢᠭᠰᠠᠨ᠂ ᠵᠦᠳᠡᠭᠦᠷᠢᠳᠡᠶᠢᠬᠡᠨ ᠪᠠᠶᠢᠭᠰᠠᠨ ᠴᠦ ᠵᠢᠷᠭᠠᠯᠳᠠᠶᠢᠬᠠᠨ ᠪᠠᠶᠢᠭᠰᠠᠨ ᠪᠠᠭ᠎ᠠ ᠨᠠᠰᠤ ᠪᠡᠯᠴᠢᠷ ᠦᠶ᠎ᠡ ᠪᠠᠨ ᠵᠤᠭᠤᠭᠳᠠᠬᠤ ᠪᠦᠷᠢ ᠭᠡᠭᠦᠳᠡᠭ ᠲᠦᠭᠦᠷᠠᠩ ᠪᠠᠭ᠋ᠠᠳᠤᠯ᠂ ᠬᠢᠵᠠᠭᠠᠷ ᠦᠭᠡᠢ ᠵᠢᠷᠭᠠᠯᠳᠠᠢ ᠰᠠᠨᠠᠭᠳᠠᠨ᠎ᠠ᠃     ᠤᠯᠤᠰ ᠤᠨ ᠰᠢᠯᠭᠠᠯᠳᠠ ᠳᠤ ᠰᠢᠯᠢᠭᠳᠡᠨ᠂ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠡᠯᠰᠡᠭᠳᠡᠯ᠎ᠡ ᠭᠡᠬᠦ ᠳᠤ ᠭᠡᠷ ᠲᠦᠭᠦᠷᠡᠩ ᠬᠦᠮᠦᠰ ᠴᠤᠭᠯᠠᠷᠠᠨ ᠪᠠᠶᠠᠷ ᠬᠦᠷᠭᠡᠬᠦ ᠳᠤ ᠠᠶᠠᠭ᠎ᠠ ᠴᠠᠢ ᠴᠦ ᠭᠠᠷᠳᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠭᠠᠴᠢᠭᠳᠠᠵᠤ ᠪᠠᠶᠢᠭᠰᠠᠨ ᠡᠵᠢ᠂ ᠶᠠᠭᠤ ᠬᠡᠯᠡᠬᠦ ᠪᠠᠨ ᠤᠯᠬᠤ ᠦᠭᠡᠢ ᠪᠦᠱᠦᠭᠦᠷᠭᠡᠵᠦ ᠪᠠᠶᠢᠭᠰᠠᠨ ᠪᠢ᠂ ︽ᠦᠮᠡᠭᠡᠢ ᠰᠢᠪᠡᠷ ᠠᠴᠠ ᠦᠩᠭᠡᠳᠦ ᠯᠢᠩᠬᠸ᠎ᠡ ᠲᠡᠯᠭᠡᠷᠡᠨ᠎ᠡ︾ ᠭᠡᠬᠦ ᠬᠦᠭᠰᠢᠳ ᠤᠨ ᠦᠭᠡᠨ ᠳᠤ ᠡᠪ ᠦᠭᠡᠶᠢᠷᠡᠵᠦ ᠪᠠᠶᠢᠭᠰᠠᠨ᠂ ︽ᠰᠤᠷᠤᠯᠭ᠎ᠠ ᠪᠠᠨ ᠲᠡᠭᠦᠰᠭᠡᠪᠡᠯ ᠵᠠᠪᠠᠯ ᠠᠶᠢᠯ ᠳᠤ ᠪᠠᠨ ᠢᠷ᠎ᠡ᠂ ᠤᠯᠠᠨ ᠪᠢᠴᠢᠭᠳᠡᠨ ᠢ ᠠᠶᠢᠯ ᠠᠴᠠ ᠪᠠᠨ ᠬᠦᠮᠦᠵᠢᠭᠦᠯ︾ ᠭᠡᠬᠦ ᠨᠠᠰᠤᠳᠠᠳ ᠤᠨ ᠦᠭᠡᠨ ᠳᠤ ᠵᠦᠪᠭᠡᠨ ᠲᠤᠯᠤᠭᠠᠢ ᠲᠤᠬᠢᠵᠤ ᠪᠠᠶᠢᠭᠰᠠᠨ ᠮᠢᠨᠢ ᠦᠴᠦᠭᠡᠳᠦᠷᠬᠡᠨ ᠰᠢᠭ ᠤᠶᠢᠷ᠎ᠠ ᠲᠤᠳᠤᠨᠤᠬᠠᠨ ᠰᠠᠨᠠᠭᠳᠠᠨ᠎ᠠ᠃ ︽ᠬᠦᠨᠵᠢᠯᠡ ᠪᠠᠨ ᠦᠵᠡᠨ ᠬᠦᠯ ᠢᠶᠠᠨ ᠰᠤᠩᠭ᠎ᠠ︾ ᠭᠡᠵᠦ ᠬᠤᠷᠢᠭᠯᠠᠵᠤ ᠪᠠᠶᠢᠭᠰᠠᠨ ᠬᠦᠮᠦᠰ ᠬᠤᠷᠤᠭᠤ ᠭᠤᠵᠦ᠋ᠢᠯᠭᠠᠨ ᠮᠠᠭᠳᠠᠬᠤ ᠪᠤᠯᠵᠤ᠂ ︽ᠪᠢ ᠪᠠᠰᠠ ᠬᠡᠦᠬᠡᠳ ᠢᠶᠠᠨ ᠪᠢᠴᠢᠭ ᠦᠵᠡᠭᠦᠯᠦᠨ᠎ᠡ︾ ᠭᠡᠬᠦ ᠠᠶᠢᠯ ᠤᠨ ᠡᠪᠤᠭᠡᠳ ᠤᠨ ᠬᠡᠯᠡᠬᠦ ᠨᠢ ᠴᠦ ᠤᠳᠤ ᠮᠦᠨᠴᠤ ᠴᠢᠬᠢᠨ ᠳᠤ ᠰᠤᠨᠤᠰᠳᠠᠬᠤ ᠠᠳᠠᠯᠢᠬᠠᠨ ᠡ᠃ ᠡᠳᠡᠭᠡᠷ ᠤᠯᠠᠨ ᠵᠤᠭᠤᠭ ᠤᠳ ᠦᠯᠢᠭᠡᠷ ᠰᠢᠭ ᠰᠠᠨᠠᠭᠳᠠᠨ᠎ᠠ᠂ ᠲᠤᠮᠤᠭ ᠴᠦ ᠬᠡᠮᠡᠷ ᠲᠤᠷᠠᠰᠤᠭᠳᠠᠨ᠎ᠠ᠃ ᠠᠯᠳᠠᠨ ᠦᠯᠦᠭᠡᠢ ᠲᠦᠰᠢᠶᠡᠳᠦ ᠳᠤ ᠲᠦᠷᠦᠵᠦ ᠦᠰᠦᠭᠰᠡᠨ ᠮᠢᠨᠢ ᠬᠢᠵᠠᠭᠠᠷ ᠦᠭᠡᠢ ᠤᠮᠤᠭᠰᠢᠯ ᠲᠠᠢ ᠰᠠᠨᠠᠭᠳᠠᠨ᠎ᠠ᠃     ᠪᠠᠯᠪᠠᠷᠬᠠᠢ ᠡᠭᠦᠳᠡ ᠲᠠᠢ ᠬᠤᠨᠤᠭ ᠤᠨ ᠪᠠᠶᠢᠷᠢ᠂ ᠪᠠᠭᠰᠢᠷᠠᠨ ᠰᠢᠬᠠᠯᠳᠤᠭᠰᠠᠨ ᠬᠤᠭᠤᠯᠠᠨ ᠭᠡᠷ᠂ ᠬᠠᠪᠳᠠᠰᠤ ᠪᠠᠷ ᠵᠡᠷᠭᠡᠯᠡᠭᠰᠡᠨ ᠤᠨᠳᠠᠬᠤ ᠤᠷᠤ᠂ ᠬᠠᠯᠠᠭᠤᠯᠠᠠ ᠲᠤᠯᠠᠭᠠᠯᠠᠳᠠᠭ ᠲᠡᠮᠦᠷ ᠬᠢᠰᠡ ᠁ ︽ᠲᠦᠰᠢᠶᠡᠳᠦ ᠭᠠᠵᠠᠷ ᠤᠨ ᠶᠠᠳᠠᠭᠤ ᠭᠡᠵᠦ ᠡ︕ ᠶᠠᠮᠠᠷᠬᠠᠨ ᠮᠠᠭᠤᠬᠠᠢ ᠭᠠᠵᠠᠷ ᠶᠤᠮ ᠪᠤᠢ︖︾ ᠭᠡᠬᠦ ᠪᠤᠰᠤᠳ ᠭᠠᠵᠠᠷ ᠠᠴᠠ ᠢᠷᠡᠭᠰᠡᠨ ᠬᠠᠮᠳᠤ ᠰᠤᠷᠤᠯᠭᠠᠳᠠᠳ ᠲᠤᠤᠷᠠᠰᠢᠶᠠᠬᠤ ᠳᠤ ᠪᠢ ᠬᠡᠴᠡᠭᠦᠦ ᠲᠤᠷ᠎ᠠ ᠦᠭᠡᠶᠢᠴᠡᠬᠦ ᠳᠤ ᠪᠠᠨ ︽ᠲᠦᠰᠢᠶᠡᠳᠦ ᠭᠡᠵᠦ ᠰᠠᠶᠢᠬᠠᠨ ᠭᠠᠵᠠᠷ ᠶᠤᠮ ᠰᠢᠦ᠂ ᠠᠯᠭᠤᠷ ᠲᠤ ᠪᠠᠨ ᠰᠠᠶᠢᠬᠠᠨ ᠢ ᠨᠢ ᠤᠯᠵᠤ ᠤᠶᠢᠯᠠᠭᠠᠬᠤ ᠶᠤᠮ︾ ᠭᠡᠳ ᠲᠠᠶᠢᠳᠬᠤᠷᠠᠭᠤᠯᠬᠤ ᠠᠳᠠᠯᠢ᠂ ᠲᠤᠷ᠎ᠠ ᠦᠭᠡᠶᠢᠴᠡᠬᠦ ᠴᠦ ᠠᠳᠠᠯᠢ ᠶᠠᠷᠢᠵᠦ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠪᠤᠰᠤᠳ ᠭᠠᠵᠠᠷ ᠠᠴᠠ ᠢᠷᠡᠭᠰᠡᠨ ᠬᠠᠮᠳᠤ ᠰᠤᠷᠤᠯᠭᠠᠳᠠᠳ ᠢᠶᠠᠨ ᠲᠠᠭᠠᠭᠤᠯᠤᠨ ᠦᠯᠢᠭᠡᠷ ᠤᠨ ᠭᠡᠷ ᠢᠶᠠᠷ ᠲᠤᠭᠤᠷᠢᠭᠤᠯᠤᠨ ᠰᠤᠨᠢᠷᠬᠠᠭᠤᠯᠵᠤ᠂ ︽ᠬᠤᠭᠤᠷ ᠤᠨ ᠦᠯᠢᠭᠡᠷ︾᠂ ︽ᠠᠷᠠᠳ ᠤᠨ ᠲᠠᠭᠤᠤ︾ ᠵᠡᠷᠭᠡ ᠶᠢ ᠲᠠᠨᠢᠭᠤᠯᠬᠤ ᠶᠢᠨ ᠬᠠᠮᠳᠤ ︽ᠪᠦᠷᠢᠨᠪᠠᠶᠠᠷ︾ ᠰᠢᠭ ᠰᠠᠶᠢᠨ ᠬᠡᠯᠡᠳᠡᠭ ᠬᠤᠭᠤᠷᠴᠢ ᠨᠠᠷ ᠲᠠᠢ ᠤᠴᠠᠷᠠᠭᠤᠯᠤᠨ ᠲᠦᠰᠢᠶᠡᠳᠦ ᠨᠤᠳᠤᠭ ᠤᠨ ᠰᠤᠶᠤᠯ ᠤᠨ ᠦᠪ ᠢ ᠭᠠᠶᠢᠬᠠᠭᠤᠯᠵᠤ ᠪᠠᠶᠢᠭᠰᠠᠨ ᠮᠢᠨᠢ ᠪᠤᠳᠤᠭᠳᠠᠨ᠎ᠠ᠃     ᠲᠡᠭᠡᠭᠡᠳ ᠪᠢᠳᠡ ᠵᠠᠯᠭᠠᠨ ︽ᠤᠪᠤᠭᠠᠨ ᠲᠡᠭᠡᠷᠡᠬᠢ ᠠᠭᠤᠯᠵᠠᠯᠳᠠ︾᠂ ︽ᠭᠠᠳᠠ ᠮᠠᠶᠢᠷᠠᠨ︾᠂ ︽ᠯᠦᠩ ᠮᠸᠢ︾ ᠭᠡᠬᠦ ᠮᠡᠳᠦ ᠶᠢᠨ ᠠᠷᠠᠳ ᠤᠨ ᠲᠠᠭᠤᠤ ᠶᠢ ᠲᠠᠭᠤᠯᠠᠵᠤ ᠰᠤᠷᠬᠤ ᠪᠤᠯᠤᠭᠰᠠᠨ ᠪᠦᠭᠡᠤᠨ ︽ᠲᠦᠰᠢᠶᠡᠳᠦ ᠭᠡᠵᠦ ᠰᠠᠶᠢᠬᠠᠨ ᠭᠠᠵᠠᠷ ᠪᠠᠶᠢᠨ᠎ᠠ᠂ ᠤᠯᠠᠨ ᠠᠷᠪᠢᠨ ᠠᠷᠠᠳ ᠤᠨ ᠲᠠᠭᠤᠤ ᠡᠭᠦᠰᠦᠭᠰᠡᠨ ᠤᠷᠤᠨ ᠪᠦᠭᠡᠳ ᠤᠯᠠᠨ ᠠᠷᠪᠢᠨ ᠬᠤᠭᠤᠷᠴᠢ ᠲᠠᠭᠤᠴᠢᠳ ᠪᠠᠶᠢᠬᠤ ᠭᠠᠵᠠᠷ ᠡ︾ ᠭᠡᠵᠦ ᠬᠠᠮᠳᠤ ᠰᠤᠷᠤᠯᠭᠠᠳᠠᠨ ᠨᠠᠷ ᠪᠠᠰᠠ ᠪᠠᠶᠠᠷᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠶᠠᠭ ᠯᠡ ᠪᠢ ᠶᠠᠮᠠᠷ ᠨᠢᠭᠡ ᠰᠠᠶᠢᠨ ᠶᠠᠪᠤᠳᠠᠯ ᠬᠢᠭᠰᠡᠨ ᠰᠢᠭ ᠪᠤᠳᠤᠭᠳᠠᠭᠠᠳ ᠪᠠᠶᠠᠰᠴᠦ ᠪᠠᠶᠢᠭᠰᠠᠨ ᠁     ᠭᠠᠷᠠᠭ ᠤᠨ ᠵᠢᠷᠭᠤᠭᠠᠨ ᠤ ᠤᠷᠤᠢ ᠪᠤᠯᠭᠠᠨ ᠠᠩᠭᠢ ᠪᠠᠷ ᠢᠶᠠᠨ ᠠᠷᠠᠳ ᠤᠨ ᠲᠠᠭᠤᠤ ᠰᠤᠷᠴᠤ ᠪᠠᠶᠢᠭᠰᠠᠨ ᠨᠢ ᠤᠳᠤ ᠪᠤᠳᠤᠪᠠᠯ ᠲᠦᠴᠢᠭᠡᠳ ᠵᠢᠯ ᠰᠢᠬᠠᠭᠰᠠᠨ ᠪᠤᠯᠪᠠᠴᠤ ᠡᠬᠡᠭᠡ ᠯᠡ ᠦᠨᠦᠭᠡᠨ ᠰᠢᠭ ᠯᠡ ᠰᠠᠨᠠᠭᠳᠠᠨ᠎ᠠ᠃ ᠭᠡᠳᠦᠭᠦᠯᠡ ᠪᠠᠨ ᠵᠤᠭᠤᠭᠳᠠᠬᠤ ᠪᠦᠷᠢ ᠡᠳᠡᠭᠡᠷ ᠵᠤᠭᠤᠭ ᠤᠳ ᠬᠠᠷᠢᠨ ᠮᠠᠨ ᠤ ᠵᠤᠭᠤᠭ ᠤᠨ ᠭᠤᠤᠯ ᠰᠡᠳᠦᠪ ᠪᠤᠯᠵᠤ ᠲᠡᠯᠭᠡᠭᠳᠡᠨ᠎ᠡ᠃ ᠭᠠᠮᠳᠠᠢ ᠭᠡᠳᠦ ᠨᠢ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠲᠡᠮᠳᠡᠭᠯᠡᠯ ᠢᠶᠠᠨ ᠲᠡᠯᠭᠡᠵᠦ ᠰᠦᠯᠵᠢᠶ᠎ᠡ ᠪᠠᠷ ᠲᠠᠮᠵᠢᠨ ᠬᠠᠮᠳᠤ ᠪᠠᠷ ᠢᠶᠠᠨ ᠲᠠᠭᠤᠯᠠᠬᠤ ᠤᠳᠠᠭ᠎ᠠ ᠴᠦ ᠭᠠᠷᠳᠠᠭ᠃ ᠨᠡᠩ ᠤᠯᠠᠩᠬᠢ ᠳᠤ ᠪᠠᠨ ᠮᠠᠨ ᠤ ᠬᠠᠮᠳᠤ ᠰᠤᠷᠤᠯᠭᠠᠳᠠᠨ ᠪᠦᠭᠦᠳᠡᠭᠡᠷ ᠢᠶᠠᠨ ᠲᠦᠰᠢᠶᠡᠳᠦ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠭᠰᠠᠨ ᠤᠨ ᠵᠢᠯ ᠤᠳ ᠢᠶᠠᠨ ᠲᠤᠷᠠᠰᠤᠨ ᠰᠠᠨᠠᠭᠠᠯᠵᠠᠵᠤ᠂ ᠲᠦᠰᠢᠶᠡᠳᠦ ᠶᠢᠨ ᠲᠤᠬᠠᠢ ᠵᠤᠭᠤᠭ ᠤᠳ ᠢᠶᠠᠨ ᠲᠡᠯᠭᠡᠨ ᠵᠤᠭᠤᠭᠳᠠᠵᠤ ᠪᠠᠶᠠᠷᠯᠠᠨ ᠪᠠᠶᠠᠰᠤᠭᠰᠠᠨ ᠰᠡᠳᠭᠢᠯᠭᠡ ᠪᠠᠨ ᠢᠯᠡᠳᠭᠡᠳᠡᠭ᠃     ᠲᠦᠰᠢᠶᠡᠳᠦ ᠭᠡᠵᠦ ᠰᠠᠶᠢᠬᠠᠨ ᠤᠷᠤᠨ ᠶᠤᠮ︕ ᠲᠦᠰᠢᠶᠡᠳᠦ ᠳᠤ ᠲᠦᠷᠦᠵᠦ ᠦᠰᠦᠭᠰᠡᠨ᠂ ᠲᠦᠰᠢᠶᠡᠳᠦ ᠳᠤ ᠰᠤᠷᠤᠯᠴᠠᠨ᠂ ᠲᠦᠰᠢᠶᠡᠳᠦ ᠳᠤ ᠪᠠᠨ ᠠᠵᠢᠯᠯᠠᠵᠤ᠂ ᠲᠦᠰᠢᠶᠡᠳᠦ ᠶᠢᠨ ᠢᠶᠠᠨ ᠰᠤᠶᠤᠯ ᠬᠦᠮᠦᠵᠢᠯ ᠤᠨ ᠲᠦᠯᠦᠭᠡ ᠵᠠᠯᠠᠭᠤ ᠨᠠᠰᠤ᠂ ᠬᠦᠴᠦᠨ ᠴᠢᠳᠠᠯ ᠢᠶᠠᠨ ᠡᠷᠭᠦᠵᠦ ᠶᠠᠪᠤᠭᠰᠠᠨ ᠮᠢᠨᠢ ᠴᠠᠭᠯᠠᠰᠢ ᠦᠭᠡᠢ ᠤᠮᠤᠭᠰᠢᠯ ᠪᠤᠯᠵᠤ᠂ ᠲᠦᠰᠢᠶᠡᠳᠦ ᠶᠢᠨ ᠢᠶᠠᠨ ᠬᠠᠯᠠᠭᠤᠨ ᠡᠯᠢᠭᠡᠨ ᠳᠤ ᠪᠦᠪᠠᠶᠢᠯᠡᠭᠳᠡᠨ ᠷᠠᠰᠢᠶᠠᠨ ᠪᠤᠯᠠᠭ ᠢᠶᠠᠷ ᠨᠢ ᠤᠮᠳᠠᠯᠠᠭᠤᠯᠬᠤ ᠭᠡᠵᠤ ᠬᠢᠵᠠᠭᠠᠷ ᠦᠭᠡᠢ ᠪᠤᠶᠠᠨ ᠵᠠᠪᠰᠢᠶᠠᠨ ᠪᠠᠶᠢᠭ᠎ᠠ᠃ ᠲᠦᠰᠢᠶᠡᠳᠦ ᠶᠢᠨ ᠮᠢᠨᠢ ᠠᠭᠤᠯᠠ ᠤᠰᠤ ᠰᠠᠶᠢᠬᠠᠨ ᠭᠡᠬᠦ ᠳᠤ ᠲᠦᠰᠢᠶᠡᠳᠦ ᠶᠢᠨ ᠮᠢᠨᠢ ᠬᠦᠮᠦᠰ ᠨᠢ ᠨᠠᠩ ᠰᠠᠶᠢᠬᠠᠨ ᠡ᠂ ᠠᠰᠪᠤᠷᠢ ᠴᠠᠶᠢᠯᠭᠠᠨ ᠰᠡᠳᠭᠢᠯ ᠲᠠᠢ ᠲᠦᠰᠢᠶᠡᠳᠦ ᠶᠢᠨ ᠬᠦᠮᠦᠰ᠂ ᠠᠵᠢᠯ ᠠᠯᠪᠠ ᠳᠤ ᠪᠠᠨ ᠭᠠᠷᠮᠠᠭᠠᠶᠢᠯᠠᠳᠠᠭ ᠲᠦᠰᠢᠶᠡᠳᠦ ᠶᠢᠨ ᠮᠢᠨᠢ ᠤᠳᠤᠷᠢᠳᠤᠯᠭ᠎ᠠ ᠺᠠᠳ᠋ᠷ᠂ ᠤᠯᠠᠨ ᠲᠦᠮᠡᠨ ᠁ ᠪᠦᠷ ᠯᠡ ᠠᠷᠢᠭᠤᠨ ᠰᠠᠨᠠᠭᠠᠳᠤ᠂ ᠰᠢᠯᠤᠭᠤᠨ ᠰᠢᠳᠤᠷᠭᠤ ᠬᠦᠮᠦᠰ ᠡ︕ ᠦᠯᠢᠭᠡᠷᠳᠦ ᠲᠠᠭᠤᠤ᠂ ᠦᠯᠢᠭᠡᠷ ᠲᠡᠦᠬᠡ᠂ ᠦᠪ ᠰᠤᠶᠤᠯ ᠨᠢ ᠨᠠᠩ ᠰᠠᠶᠢᠬᠠᠨ᠃ ᠲᠦᠰᠢᠶᠡᠳᠦ ᠮᠢᠨᠢ ᠲᠦᠴᠢᠭᠡᠳ ᠵᠢᠯ ᠤᠨ ᠡᠮᠦᠨᠡᠬᠢ ᠲᠦᠰᠢᠶᠡᠳᠦ ᠲᠠᠢ ᠠᠳᠠᠯᠢ ᠦᠭᠡᠢ ᠪᠤᠯᠵᠠᠢ᠂ ᠲᠦᠰᠢᠶᠡᠳᠦ ᠤᠤᠯ ᠤᠨ ᠬᠢ ᠰᠢᠭ ᠶᠠᠳᠠᠭᠤ ᠬᠤᠭᠤᠰᠤᠨ ᠤᠷᠤᠨ ᠪᠢᠰᠢ ᠂ ᠬᠠᠷᠢᠨ ᠠᠷᠠᠳ ᠨᠢ ᠪᠠᠶᠠᠵᠢᠨ ᠴᠢᠨᠡᠭᠡᠯᠢᠭᠵᠢᠵᠦ᠂ ᠤᠷᠤᠨ ᠨᠤᠳᠤᠭ ᠨᠢ ᠬᠦᠭᠵᠢᠨ ᠴᠡᠴᠡᠭᠯᠡᠭᠡᠳ᠂ ᠶᠠᠳᠠᠭᠤ ᠬᠤᠭᠤᠰᠤᠨ ᠠᠴᠠ ᠪᠠᠨ ᠠᠩᠭᠢᠵᠢᠷᠠᠵᠠᠢ᠃ ᠲᠦᠰᠢᠶᠡᠳᠦ ᠮᠢᠨᠢ ᠠᠷᠠᠳ ᠤᠨ ᠲᠠᠭᠤᠤ ᠶᠢᠨ ᠦᠯᠦᠭᠡᠢ᠂ ᠬᠤᠭᠤᠷ ᠤᠨ ᠦᠯᠢᠭᠡᠷ ᠤᠨ ᠦᠯᠦᠭᠡᠢ᠂ ᠮᠤᠷᠢᠨ ᠰᠤᠶᠤᠯ ᠤᠨ ᠦᠯᠦᠭᠡᠢ᠂ ᠪᠠᠳᠤᠴᠠᠭᠠᠨ ᠤ ᠦᠯᠦᠭᠡᠢ᠂ ᠤᠷᠠᠨ ᠬᠠᠳᠬᠤᠮᠠᠯᠴᠢᠳ ᠤᠨ ᠦᠯᠦᠭᠡᠢ ᠪᠤᠯᠵᠠᠢ ᠁ ᠲᠦᠰᠢᠶᠡᠳᠦ ᠶᠢᠨ ᠲᠤᠬᠠᠢ ᠵᠤᠭᠤᠭ ᠪᠤᠯ ᠮᠢᠨᠦ ᠡᠭᠦᠷᠢᠳᠡ ᠶᠢᠨ ᠲᠤᠷᠠᠰᠤᠮᠵᠢ ᠪᠤᠯᠤᠨ᠎ᠠ᠃ ᠬᠠᠮᠢᠭ᠎ᠠ ᠬᠦᠷᠴᠦ ᠠᠯᠢ ᠭᠠᠵᠠᠷ ᠶᠠᠪᠤᠭᠰᠠᠨ ᠴᠦ ᠪᠢ ᠡᠳᠡᠭᠡᠷ ᠵᠤᠭᠤᠭ ᠢᠶᠠᠨ ᠲᠡᠯᠭᠡᠨ᠂ ︽ᠪᠢ ᠪᠤᠯ ᠲᠦᠰᠢᠶᠡᠳᠦ ᠶᠢᠨ ᠬᠦᠮᠦᠨ︾ ᠭᠡᠵᠦ ᠤᠮᠤᠭᠰᠢᠨ ᠬᠡᠯᠡᠳᠡᠭ᠃ ᠲᠦᠰᠢᠶᠡᠳᠦ ᠮᠢᠨᠢ ᠨᠡᠩ ᠰᠠᠶᠢᠬᠠᠨ ᠢᠶᠠᠷ ᠦᠷᠨᠢᠨ ᠬᠦᠭᠵᠢᠵᠦ᠂ ᠤᠶᠠᠩᠭ᠎ᠠ ᠲᠠᠭᠤᠤ ᠲᠠᠢ ᠪᠠᠨ ᠠᠳᠠᠯᠢᠬᠠᠨ᠂ ᠶᠢᠰᠤᠨ ᠴᠠᠭᠠᠨ ᠬᠦᠰᠡᠯ ᠲᠠᠢ ᠮᠢᠨᠢ ᠵᠡᠷᠭᠡ ᠪᠠᠷ ᠨᠡᠩ ᠤᠶᠠᠩᠭᠠᠯᠢᠭ᠂ ᠨᠡᠩ ᠭᠤᠶᠤᠬᠠᠨ᠂ ᠨᠡᠩ ᠬᠦᠴᠦᠷᠭᠡᠭ ᠢᠶᠠᠷ ᠬᠦᠭᠵᠢᠬᠦ ᠪᠤᠯᠳᠤᠭᠠᠢ᠃     ᠲᠦᠰᠢᠶᠡᠳᠦ ᠶᠢᠨ ᠡᠳᠡᠭᠡᠷ ᠵᠤᠭᠤᠭ ᠤᠳ᠂ ᠮᠢᠨᠦ ᠦᠨᠢᠳᠡ ᠶᠢᠨ ᠲᠤᠷᠠᠰᠤᠮᠵᠢ ᠪᠤᠯᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠨᠡᠩ ᠤᠯᠠᠨ ᠬᠦᠮᠤᠨ ᠤ ᠰᠤᠨᠤᠷ ᠲᠤ ᠰᠤᠨᠤᠷᠳᠠᠬᠳᠠᠬᠤ ᠪᠤᠯᠳᠤᠭᠠᠢ︕    ᠵᠤᠬᠢᠶᠠᠬᠴᠢ ᠶᠢᠨ ᠬᠠᠶ᠋ᠢᠬ᠄ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠲᠦᠷᠤᠯᠵᠢ ᠭᠤᠤᠯ ᠪᠠᠭ᠎ᠠ ᠰᠤᠷᠭᠠᠭᠤᠯᠢ
 
ᠢᠷᠡᠯᠲᠡ᠄ ᠬᠢᠩᠭᠠᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠰᠢᠯᠢ ᠭᠤᠪᠢ ᠶᠢᠨ ᠦᠨᠦᠷ ᠲᠠᠢ ᠰᠢᠯᠦᠭ
ᠵᠠᠯᠠᠭᠤ ᠨᠠᠰᠤᠨ ᠳᠤ ᠪᠠᠨ
ᠲᠠᠶᠢᠴᠢᠨ ᠵᠤᠬᠢᠶᠠᠯᠴᠢ ᠮ᠊ · ᠠᠰᠠᠷ
​ᠭᠡᠷᠪᠡ ᠪᠢ ᠨᠢᠭᠡᠨ ᠪᠤᠯᠵᠤᠮᠤᠷ ᠪᠤᠯᠤᠬᠰᠠᠨ ᠪᠤᠯ
ᠮᠠᠩᠬᠠᠨ ᠤᠳᠠᠨ ᠤ ᠦᠴᠢᠯ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号