ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠬᠠᠶᠢᠷ᠎ᠠ ᠰᠡᠳᠭᠢᠯ ᠤᠨ ᠠᠷᠭᠠᠮᠵᠢᠶ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-12-20
     ᠨᠢᠭᠡ᠂ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ    — ᠡᠯᠦᠨᠴᠡ ᠡᠪᠦᠭᠡ ᠶᠢᠨ ᠨᠦᠢᠷᠰᠤᠭᠰᠠᠨ ᠦᠨᠢ ᠮᠦᠩᠭᠡ ᠶᠢᠨ ᠮᠠᠩᠬ᠎ᠠ    ᠡᠷᠪᠡᠢ ᠪᠡᠶ᠎ᠡ ᠶᠢ ᠮᠢᠨᠢ ᠦᠯᠦᠭᠡᠶᠢᠳᠡᠭᠰᠡᠨ ᠡᠩᠭᠦᠷᠡᠢ ᠵᠦᠭᠡᠯᠡᠨ ᠮᠠᠩᠬ᠎ᠠ    ᠦᠨᠢᠳᠡ ᠴᠡᠭᠡᠵᠢᠨ᠎ᠡ ᠦᠭᠡᠶᠢᠯᠡᠭᠳᠡᠬᠦ ᠲᠤᠷᠠᠰᠤᠯ ᠤᠨ ᠴᠠᠭᠠᠨ ᠮᠠᠩᠬ᠎ᠠ    ᠮᠢᠨᠦ ᠡᠯᠦᠨᠴᠡ ᠡᠪᠦᠭᠡ᠂ ᠡᠯᠦᠨᠴᠡ ᠡᠮᠡᠭᠡ ᠪᠠ ᠡᠪᠦᠭᠡ᠂ ᠡᠮᠡᠭᠡ ᠶᠢᠨ ᠤᠩᠭᠤᠨ ᠮᠠᠨ ᠤ ᠠᠶᠢᠯ ᠤᠨ ᠵᠡᠭᠦᠨ ᠡᠮᠦᠨ᠎ᠡ ᠲᠦᠷᠪᠡ ᠲᠠᠪᠤᠨ ᠭᠠᠵᠠᠷ ᠤᠨ ᠵᠠᠢ ᠲᠠᠢ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬᠠᠨ ᠤ ᠡᠭᠡᠪᠦᠷ ᠲᠤ ᠪᠠᠶᠢᠳᠠᠭ᠃ ᠠᠭᠤᠯᠠᠨ ᠤ ᠵᠠᠪᠢ ᠳᠤ ᠠᠭᠤᠯᠠ ᠰᠢᠬ ᠴᠠᠭᠠᠨ ᠮᠠᠩᠬ᠎ᠠ ᠪᠠᠶᠢᠳᠠᠭ ᠪᠦᠭᠡᠳ ᠠᠭᠤᠯᠠᠰ ᠢᠶᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠲᠤᠯᠠ ᠮᠠᠩᠬᠠᠨ ᠤ ᠨᠡᠭᠦᠬᠦ ᠨᠢ ᠪᠠᠭ᠎ᠠ᠃ ᠨᠠᠮ᠎ᠠ ᠶᠢ ᠮᠡᠳᠡᠭᠡ ᠤᠷᠤᠭᠰᠠᠨ ᠴᠠᠭ ᠠᠴᠠ ᠡᠳᠦᠭᠡ ᠪᠤᠯᠳᠠᠯ᠎ᠠ ᠲᠡᠷᠡ ᠴᠠᠭᠠᠨ ᠮᠠᠩᠬ᠎ᠠ ᠲᠡᠷᠡ ᠯᠠ ᠶᠠᠩᠵᠤ ᠪᠠᠷ ᠢᠶᠠᠨ ᠪᠦᠭᠡᠳ ᠮᠢᠨᠦ ᠡᠯᠦᠨᠴᠡ ᠡᠪᠦᠭᠡ ᠠᠴᠠ ᠡᠬᠢᠯᠡᠭᠡᠳ ᠮᠢᠨᠦ ᠲᠡᠭᠡᠳᠦᠰ ᠲᠡᠨᠳᠡ ᠠᠮᠤᠷᠯᠢᠩᠭᠤᠢ ᠨᠦᠢᠷᠰᠤᠵᠤ ᠪᠠᠶᠢᠳᠠᠭ᠃ ᠠᠪᠤ ᠮᠢᠨᠢ ᠡᠳᠡᠭᠡᠷ ᠪᠤᠩᠬᠤᠨ ᠤ ᠲᠡᠷᠭᠡᠳᠡᠭᠦᠷ ᠬᠠᠶᠢᠯᠠᠰᠤᠨ ᠮᠤᠳᠤ ᠵᠠᠶᠢᠯᠠᠭᠰᠠᠨ ᠨᠢ ᠡᠳᠡᠭᠡᠴᠢᠭᠡᠭᠡᠳ ᠠᠶᠠᠭᠠᠠ ᠬᠢᠷᠢ ᠪᠦᠳᠦᠭᠦᠨ ᠪᠤᠯᠤᠭᠠᠳ ᠪᠠᠶᠢᠨ᠎ᠠ᠃ ᠠᠪᠤ ᠤᠩᠭᠤᠨ ᠢ ᠮᠠᠩᠬᠠᠨ ᠳᠤ ᠲᠠᠷᠤᠭᠳᠠᠬᠤ ᠠᠴᠠ ᠠᠶᠤᠭᠠᠳ ᠮᠤᠳᠤ ᠵᠠᠶᠢᠯᠠᠭᠰᠠᠨ ᠴᠦ ᠪᠤᠯᠪᠠ ᠤᠤ⁈ ᠶᠠᠭᠤᠨ ᠳᠤ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠭᠡᠵᠦ ᠲᠠᠭᠤᠳᠠᠬᠤ ᠶᠢ ᠪᠤᠤ ᠮᠡᠳᠡ᠂ ᠮᠠᠩᠬ᠎ᠠ ᠶᠢ ᠬᠦᠷᠢᠶᠡᠯᠡᠭᠰᠡᠨ ᠵᠢᠵᠢᠭᠬᠡᠨ ᠠᠭᠤᠯᠠᠨ ᠤ ᠨᠡᠷ᠎ᠡ ᠨᠢ ᠴᠠᠭᠠᠨ ᠬᠢᠯᠢᠩ ᠭᠡᠳᠡᠭ ᠤᠤ⁈ ᠡᠰᠡᠭᠦᠯ᠎ᠡ ᠬᠢᠯᠢᠩ ᠲᠤᠷᠭ᠎ᠠ ᠰᠢᠬ ᠵᠦᠭᠡᠯᠡᠨ ᠮᠠᠩᠬ᠎ᠠ ᠶᠢ ᠴᠠᠭᠠᠨ ᠬᠢᠯᠢᠩ ᠭᠡᠵᠦ ᠨᠡᠷᠡᠯᠡᠪᠡ ᠤᠤ⁈ ᠶᠠᠭᠤ ᠴᠦ ᠭᠡᠰᠡᠨ ᠲᠡᠷᠡ ᠨᠢᠭᠡ ᠬᠡᠰᠡᠭ ᠭᠠᠵᠠᠷ ᠢ ᠴᠠᠭᠠᠨ ᠬᠢᠯᠢᠩ ᠭᠡᠵᠦ᠂ ᠴᠠᠭᠠᠨ ᠬᠢᠯᠢᠩ ᠤᠨ ᠠᠭᠤᠯᠠ ᠪᠤᠶᠤ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠭᠡᠵᠦ ᠯᠠ ᠨᠡᠷᠡᠯᠡᠭᠰᠡᠭᠡᠷ ᠢᠷᠡᠵᠡᠢ᠃    ᠡᠪᠡᠰᠦ ᠪᠡᠯᠴᠢᠭᠡᠷ ᠰᠠᠶᠢᠳᠠᠢ᠂ ᠬᠠᠩᠭᠠᠢ ᠨᠤᠳᠤᠭ ᠲᠤ ᠮᠢᠨᠢ ᠭᠡᠨᠡᠳᠳᠡ ᠰᠠᠶᠢᠵᠠᠳᠠᠭᠰᠠᠨ ᠰᠢᠬ ᠨᠠᠷᠢᠯᠢᠭ ᠴᠠᠭᠠᠨ ᠮᠠᠩᠬ᠎ᠠ ᠪᠠᠶᠢᠳᠠᠭ ᠨᠢ ᠮᠢᠨᠦ ᠪᠠᠭ᠎ᠠ ᠪᠠᠯᠴᠢᠷ ᠤᠢ ᠤᠬᠠᠭᠠᠨ ᠳᠤ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠰᠤᠨᠢᠨ ᠰᠠᠶᠢᠬᠠᠨ ᠰᠠᠨᠠᠭᠳᠠᠵᠠᠢ ᠃ ᠲᠡᠷᠡ ᠦᠶ᠎ᠡ ᠳᠤ ᠪᠤᠷᠤᠭᠠᠨ ᠬᠤᠷ᠎ᠠ ᠲᠡᠭᠰᠢ᠂ ᠠᠶᠢᠯ ᠤᠨ ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠵᠦᠯᠭᠡᠨ ᠲᠡᠭᠡᠷ᠎ᠡ ᠬᠤᠷᠠᠭ᠎ᠠ ᠲᠤᠭᠤᠯ ᠬᠠᠷᠢᠭᠤᠯᠳᠠᠭ ᠪᠦᠭᠡᠳ ᠡᠮᠦᠨᠡᠰᠢ ᠪᠠᠷᠠᠯᠠᠪᠠᠯ ᠬᠠᠷᠠᠭᠠᠨ ᠤ ᠦᠵᠦᠭᠦᠷ ᠲᠤ ᠲᠡᠭᠷᠢ ᠭᠠᠵᠠᠷ ᠨᠡᠶᠢᠯᠡᠭᠡᠳ᠂ ᠲᠡᠷᠡ ᠵᠦᠭ ᠲᠤ ᠶᠠᠪᠤᠭᠠᠳ ᠯᠠ ᠪᠠᠶᠢᠪᠠᠯ ᠲᠡᠭᠷᠢ ᠳᠤ ᠴᠦ ᠭᠠᠷᠴᠤ ᠪᠤᠯᠤᠨ᠎ᠠ ᠭᠡᠵᠦ ᠪᠢ ᠪᠤᠳᠤᠳᠠᠭ ᠪᠠᠶᠢᠵᠠᠢ᠃ ᠴᠡᠬᠤᠮ ᠬᠡᠴᠢᠨᠡᠨ ᠬᠤᠯᠠ ᠶᠠᠪᠤᠪᠠᠯ ᠲᠡᠭᠷᠢ ᠳᠤ ᠭᠠᠷᠴᠤ ᠲᠡᠶᠢᠯᠳᠡᠭ ᠪᠤᠯ︖ ᠭᠡᠵᠦ ᠨᠢᠯᠬ᠎ᠠ ᠤᠶᠤᠨ ᠳᠤ ᠪᠠᠨ ᠲᠠᠭᠠᠮᠠᠭᠯᠠᠭᠠᠳ ᠂ ᠪᠢᠴᠢᠭ ᠰᠤᠶᠤᠯ ᠦᠵᠡᠭᠡᠳ ᠯᠠ ᠪᠠᠶᠢᠪᠠᠯ ᠲᠡᠷᠡ ᠭᠠᠵᠠᠷ ᠲᠤ ᠬᠦᠷᠴᠦ ᠲᠡᠶᠢᠯᠳᠡᠭ ᠪᠠᠶᠢᠬ᠎ᠠ ᠭᠡᠵᠦ ᠰᠤᠯᠤᠩᠭᠠᠨ ᠮᠦᠷᠦᠭᠡᠳᠦᠯ ᠬᠦᠪᠦᠷᠡᠬᠦᠯᠵᠦ ᠪᠠᠶᠢᠵᠠᠢ᠃ ᠠᠶᠢᠯ ᠤᠨ ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠵᠢᠵᠢᠭᠬᠡᠨ ᠠᠭᠤᠯᠠ ᠶᠢᠨ ᠡᠩᠭᠡᠷ ᠠᠴᠠ ᠪᠤᠳᠠ ᠮᠠᠯ ᠢᠶᠠᠨ ᠲᠤᠰᠴᠤ ᠠᠪᠴᠢᠷᠠᠳᠠᠭ ᠪᠦᠭᠡᠳ ᠪᠠᠯ ᠲᠦᠭᠦᠷᠡᠩ ᠤᠷᠭᠤᠭᠰᠠᠨ ᠰᠠᠷᠠᠯᠠᠩ ᠬᠤᠸᠠᠷ ᠢ ᠲᠡᠭᠦᠵᠦ ᠪᠠᠶᠢᠭᠰᠠᠨ᠃ ᠰᠠᠷᠠᠯᠠᠩ ᠬᠤᠸᠠᠷ ᠤᠨ ᠢᠶᠠᠨ ᠵᠠᠷᠢᠮ ᠢ ᠨᠢ ᠠᠮᠳᠠᠯᠠᠵᠤ᠂ ᠵᠠᠷᠢᠮ ᠢ ᠨᠢ ᠲᠤᠯᠤᠭᠠᠢ ᠲᠡᠭᠡᠷ᠎ᠡ ᠪᠠᠨ ᠵᠡᠭᠦᠴᠢᠭᠡᠭᠡᠳ ᠲᠤᠭᠯᠠᠵᠤ ᠬᠦᠭᠡᠷᠴᠦ ᠪᠠᠶᠢᠭᠰᠠᠨ᠃ ᠵᠢᠯ ᠪᠦᠷᠢ ᠶᠢᠨ ᠬᠠᠩᠰᠢ ᠪᠤᠯᠤᠭᠰᠠᠭᠠᠷ ᠠᠪᠤ ᠪᠠ ᠠᠪᠠᠭ᠎ᠠ ᠨᠠᠷ ᠬᠡᠦᠬᠡᠳ ᠰᠢᠦᠬᠠᠳ ᠢᠶᠠᠨ ᠲᠠᠭᠠᠭᠤᠯᠵᠣ᠂ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠶᠢ ᠴᠢᠭᠯᠡᠳᠡᠭ᠃ ᠮᠢᠨᠦ ᠤᠢ ᠤᠬᠠᠭᠠᠨ ᠳᠤ ᠪᠦᠦᠷ ᠲᠦᠦᠷ ᠴᠡᠭᠡᠵᠢᠯᠡᠵᠦ ᠪᠠᠶᠢᠬᠤ ᠪᠠᠷ ᠴᠠᠭᠠᠨ ᠬᠢᠯᠢᠩ ᠳᠤ ᠠᠩᠬᠠᠨ ᠳᠤ ᠪᠠᠨ ᠮᠤᠷᠢᠨ ᠲᠡᠷᠭᠡ ᠪᠠᠷ ᠤᠴᠢᠵᠦ ᠪᠠᠶᠢᠭᠰᠠᠨ᠂ ᠬᠤᠵᠢᠮ ᠨᠢ ᠲᠦᠷᠪᠡᠨ ᠬᠦᠷᠳᠦᠳᠦ ᠲᠷᠠᠺᠲ᠋ᠤᠷ ᠢᠶᠠᠷ ᠤᠴᠢᠬᠤ ᠪᠤᠯᠤᠭᠰᠠᠨ᠃ ᠵᠠᠷᠢᠮ ᠭᠡᠷ ᠤᠨ ᠬᠢᠨ ᠪᠤᠯᠠᠰᠢᠨ ᠲᠡᠭᠡᠷ᠎ᠡ ᠰᠢᠷᠤᠢ ᠨᠡᠮᠡᠬᠦ ᠪᠠᠷ ᠤᠴᠢᠬᠤ ᠳᠠᠭᠠᠨ ᠬᠡᠦᠬᠡᠨ ᠬᠦᠮᠦᠨ ᠢ ᠲᠠᠭᠠᠭᠤᠯᠳᠠᠭ ᠦᠭᠡᠢ᠃ ᠭᠡᠳᠡᠯ᠎ᠡ ᠮᠠᠨ ᠤ ᠭᠡᠷ ᠲᠤ ᠲᠡᠶᠢᠮᠦ ᠴᠡᠭᠡᠷ ᠪᠠᠶᠢᠳᠠᠭ ᠦᠭᠡᠢ᠂ ᠪᠢᠳᠡ ᠪᠦᠬᠦᠳᠡᠭᠡᠷ ᠢᠶᠠᠨ ᠲᠡᠭᠡᠳᠦᠰ ᠤᠨ ᠤᠩᠭᠤᠨ ᠳᠠᠭᠠᠨ ᠰᠢᠷᠤᠢ ᠨᠡᠮᠡᠵᠦ ᠮᠦᠷᠭᠦᠬᠦ ᠪᠠᠷ ᠤᠴᠢᠳᠠᠭ᠃ ᠲᠡᠨᠳᠡ ᠬᠦᠷᠦᠭᠰᠡᠨ ᠤ ᠰᠡᠭᠦᠯᠡᠷ ᠶᠡᠬᠡᠴᠦᠦᠯ ᠨᠢ ᠬᠦᠷᠵᠡ ᠪᠠᠷᠢᠵᠤ᠂ ᠰᠢᠷᠤᠢ ᠤᠯᠠᠯᠠᠵᠤ ᠰᠢᠨᠡᠬᠡᠨ ᠰᠢᠷᠤᠢ ᠶᠢ ᠲᠡᠷᠭᠡ ᠪᠠᠷ ᠲᠡᠭᠡᠭᠡᠵᠦ ᠠᠪᠴᠢᠷᠠᠭᠠᠳ ᠪᠤᠩᠬᠤᠨ ᠲᠡᠭᠡᠷ᠎ᠡ ᠨᠡᠮᠡᠳᠡᠭ᠃ ᠬᠡᠦᠬᠡᠳ ᠤᠳ ᠨᠢ ᠮᠠᠩᠬᠠᠨ ᠠᠭᠤᠯᠠᠨ ᠲᠡᠭᠡᠷ᠎ᠡ ᠨᠢ ᠬᠦᠷᠴᠦ᠂ ᠴᠢᠨᠠᠭᠰᠠᠨ ᠦᠨᠳᠡᠭᠡ ᠪᠠᠨ ᠲᠤᠷᠤᠭᠰᠢ ᠭᠤᠯᠭᠤᠭᠤᠯᠵᠤ ᠨᠠᠭᠠᠳᠳᠠᠭ᠃ ᠪᠠᠰᠠ ᠮᠠᠩᠬ᠎ᠠ ᠤᠷᠤᠭᠤ ᠪᠦᠮᠪᠦᠷᠢᠵᠦ ᠨᠠᠭᠠᠳᠳᠠᠭ᠃ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠲᠦᠢᠯ ᠤᠨ ᠨᠠᠷᠢᠯᠢᠭ ᠪᠠᠶᠢᠳᠠᠭ᠂ ᠶᠠᠮᠠᠷ ᠴᠦ ᠴᠢᠯᠠᠭᠤ ᠬᠠᠶᠢᠷ ᠪᠠᠶᠢᠳᠠᠭ ᠦᠭᠡᠢ᠃ ᠪᠢᠳᠡᠨ ᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠪᠦᠷ ᠡ᠊ᠨᠳᠡᠬᠢ ᠮᠠᠩᠬ᠎ᠠ ᠪᠠᠷ ᠦᠯᠦᠭᠡᠶᠢᠳᠡᠭᠰᠡᠨ ᠪᠠᠶᠢᠳᠠᠭ᠃    ᠠᠪᠤ ᠰᠢᠷᠤᠢ ᠨᠡᠮᠡᠵᠦ ᠪᠠᠷᠠᠭᠠᠳ ᠲᠦᠯᠡᠰᠢ ᠲᠤᠶ᠋ᠢᠩ ᠦᠭᠬᠦ ᠦᠶᠡᠰ ᠪᠢᠳᠡᠨ ᠢ ᠲᠠᠭᠤᠳᠠᠳᠠᠭ᠃ ᠲᠡᠭᠡᠪᠡᠯ ᠪᠢᠳᠡ ᠠᠭᠤᠯᠠᠨ ᠲᠡᠭᠡᠷ᠎ᠡ ᠠᠴᠠ ᠬᠠᠳᠠᠭᠰᠠᠨ ᠬᠠᠷᠠᠭᠠᠨ᠎ᠠ ᠶᠢᠨ ᠮᠤᠳᠤ᠂ ᠪᠤᠳᠠᠷᠭᠠᠨ᠎ᠠ ᠲᠡᠭᠦᠵᠦ ᠠᠪᠴᠢᠷᠠᠭᠠᠳ ᠲᠦᠯᠡᠰᠢ ᠦᠭᠬᠦ ᠳᠤ ᠬᠠᠮᠵᠢᠳᠠᠭ᠃ ᠶᠠᠷᠢᠶᠠᠨ ᠦᠭᠡᠢ ᠠᠪᠤ ᠭᠡᠷ ᠠᠴᠠ ᠬᠠᠭᠤᠷᠠᠢ ᠮᠤᠳᠤᠨ ᠲᠦᠯᠡᠭᠡ ᠪᠠᠰᠠ ᠠᠪᠴᠢᠷᠠᠭᠰᠠᠨ ᠪᠠᠶᠢᠳᠠᠭ᠃ ᠠᠪᠤ ᠲᠦᠯᠡᠰᠢ ᠶᠢᠨ ᠵᠦᠢᠯ ᠢᠶᠠᠨ ᠰᠢᠳᠠᠭᠠᠬᠤ ᠶᠢᠨ ᠲᠠᠭᠠᠤ᠄ ︽ᠡᠪᠦᠭᠡ᠂ ᠡᠮᠡᠭᠡ᠂ ᠠᠪᠤ ᠡ᠂ ᠲᠠ ᠨᠠᠷ ᠲᠤ ᠢᠳᠡᠬᠦ ᠵᠦᠢᠯ᠂ ᠡᠮᠦᠰᠬᠦ ᠬᠤᠪᠴᠠᠰᠤ᠂ ᠵᠠᠷᠤᠬᠤ ᠵᠤᠭᠤᠰ ᠢ ᠴᠢᠨᠢ ᠦᠭᠴᠦ ᠪᠠᠶᠢᠨ᠎ᠠ ᠁︾ ᠭᠡᠵᠦ ᠠᠮᠠᠨ ᠳᠠᠭᠠᠨ ᠤᠪᠤᠷ ᠲᠤᠪᠤᠷ ᠶᠠᠷᠢᠵᠤ ᠲᠦᠷᠡᠯᠵᠡᠭᠰᠡᠨ ᠭᠠᠯ ᠲᠡᠭᠡᠷ᠎ᠡ ᠠᠪᠴᠢᠷᠠᠭᠰᠠᠨ ᠬᠦᠵᠢ᠂ ᠮᠢᠬ᠎ᠠ᠂ ᠪᠤᠤᠪᠤ ᠪᠤᠭᠤᠷᠰᠤᠭ᠂ ᠦᠨᠳᠡᠭᠡ᠂ ᠴᠠᠢ᠂ ᠠᠷᠢᠬᠢ᠂ ᠲᠠᠮᠠᠬᠢ᠂ ᠴᠢᠪᠠᠭ᠎ᠠ᠂ ᠪᠦᠰ ᠤᠨ ᠦᠭᠡᠳᠡᠰᠦ᠂ ᠲᠦᠯᠡᠰᠢ ᠶᠢᠨ ᠴᠠᠭᠠᠰᠤ ᠵᠡᠷᠭᠡ ᠲᠤᠶ᠋ᠢᠩ ᠢᠶᠠᠨ ᠰᠢᠳᠠᠭᠠᠵᠤ ᠦᠭᠳᠡᠭ᠃ ᠪᠠᠰᠠ ᠠᠷᠢᠬᠢᠨ ᠲᠠᠭᠯᠠᠭ᠎ᠠ ᠪᠠᠨ ᠨᠡᠭᠡᠭᠡᠵᠦ᠂ ᠲᠡᠭᠷᠢ ᠭᠠᠵᠠᠷ ᠲᠤ ᠰᠡᠷᠵᠢᠮ ᠡᠷᠭᠦᠭᠡᠭᠡᠳ᠂ ᠲᠠᠬᠢᠨ ᠲᠦᠯᠡᠰᠢ ᠶᠢᠨ ᠭᠠᠯ ᠳᠤ ᠡᠷᠭᠦᠳᠡᠭ᠃ ᠪᠢᠳᠡ ᠠᠪᠤ᠂ ᠠᠪᠠᠭ᠎ᠠ ᠨᠠᠷ ᠢ ᠲᠠᠭᠠᠵᠦ ᠲᠦᠰ ᠲᠦᠰ ᠮᠦᠷᠭᠦᠳᠡᠭ᠃ ᠲᠦᠯᠡᠰᠢ ᠶᠢᠨ ᠵᠦᠢᠯ ᠠᠴᠠ ᠪᠤᠭᠤᠷᠰᠤᠭ ᠪᠠ ᠭᠤᠸᠠᠨᠲᠸᠤ ᠦᠯᠡᠳᠡᠭᠡᠵᠦ ᠪᠢᠳᠡᠨ ᠳᠤ ᠵᠢᠭᠠᠬᠠᠨ ᠵᠤᠭᠤᠬᠠᠨ ᠬᠤᠪᠢᠶᠠᠵᠤ ᠦᠭᠳᠡᠭ᠃    ᠵᠢᠯ ᠪᠦᠷᠢ ᠶᠢᠨ ᠬᠠᠩᠰᠢ ᠪᠤᠯᠤᠭᠰᠠᠭᠠᠷ ᠪᠢᠳᠡ ᠲᠦᠯᠡᠰᠢ ᠲᠤᠶ᠋ᠢᠩ ᠤᠨ ᠵᠦᠢᠯ ᠢᠶᠠᠨ ᠰᠠᠭᠰᠤᠨ ᠳᠤ ᠬᠢᠵᠦ᠂ ᠬᠦᠷᠵᠡ ᠪᠠᠨ ᠲᠡᠭᠡᠭᠡᠳ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠶᠢ ᠴᠢᠭᠯᠡᠭᠰᠡᠭᠡᠷ ᠁ ᠨᠢᠭᠡ ᠮᠡᠳᠡᠬᠦ ᠳᠤ ᠪᠤᠩᠬᠤᠨ ᠨᠡᠮᠡᠭᠳᠡᠴᠢᠭᠡᠭᠰᠡᠨ᠂ ᠪᠠᠭ᠎ᠠ ᠡᠪᠦᠭᠡ ᠲᠡᠭᠷᠢ ᠳᠤ ᠬᠠᠯᠢᠴᠢᠬᠠᠭᠰᠠᠨ᠂ ᠡᠭᠡᠴᠢ ᠮᠢᠨᠢ ᠴᠦ ᠦᠨᠢᠳᠡ ᠶᠠᠪᠤᠴᠢᠬᠠᠭᠰᠠᠨ᠂ ᠡᠮᠡᠭᠡ ᠴᠦ ᠬᠠᠯᠢᠴᠢᠬᠠᠭᠰᠠᠨ᠂ ᠠᠪᠠᠭ᠎ᠠ ᠴᠦ ᠨᠠᠰᠤ ᠪᠠᠷᠠᠴᠢᠬᠠᠭᠰᠠᠨ ᠪᠠᠶᠢᠨ᠎ᠠ᠃ ᠪᠢ ᠬᠤᠯᠠ ᠭᠠᠵᠠᠷ ᠬᠡᠳᠦᠨ ᠵᠢᠯ ᠰᠤᠷᠤᠯᠴᠠᠬᠤ ᠳᠠᠭᠠᠨ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬᠠᠨ ᠳᠤ ᠢᠷᠡᠵᠦ ᠲᠡᠭᠡᠳᠦᠰ ᠲᠡᠭᠡᠨ ᠰᠢᠷᠤᠢ ᠨᠡᠮᠡᠵᠦ ᠮᠦᠷᠭᠦᠵᠦ ᠲᠡᠶᠢᠯᠦᠭᠰᠡᠨ ᠦᠭᠡᠢ᠂ ᠪᠠᠰᠠ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬᠠᠨ ᠲᠡᠭᠡᠷ᠎ᠡ ᠢᠷᠡᠵᠦ ᠨᠠᠭᠠᠳᠤᠭᠰᠠᠨ ᠦᠭᠡᠢ ᠪᠦᠭᠡᠳ ᠨᠠᠭᠠᠳᠴᠤ ᠲᠤᠭᠯᠠᠬᠤ ᠨᠠᠰᠤ ᠴᠦ ᠨᠠᠳᠠ ᠠᠴᠠ ᠬᠤᠯᠠᠳᠠᠴᠢᠬᠠᠯ᠎ᠠ᠃ ᠬᠤᠵᠢᠮ ᠨᠢ ᠠᠵᠢᠯ ᠳᠤ ᠭᠠᠷᠴᠤ᠂ ᠠᠶᠢᠯ ᠡᠷᠦᠬᠡ ᠪᠤᠰᠬᠠᠵᠤ᠂ ᠬᠡᠦᠬᠡᠳ ᠲᠠᠢ ᠪᠤᠯᠴᠢᠬᠠᠭᠰᠠᠨ ᠠᠴᠠ ᠨᠡᠩ ᠴᠦᠬᠡᠨ ᠢᠷᠡᠬᠦ ᠪᠤᠯᠪᠠ᠃ ᠡᠮᠡᠭᠡ ᠨᠠᠰᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠵᠢᠯ ᠨᠢ ᠪᠢ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬᠠᠨ ᠳᠤ ᠢᠷᠡᠭᠰᠡᠨ᠃ ᠪᠢ ᠬᠤᠰᠢᠭᠤᠨ ᠲᠦᠪ ᠤᠨ ᠭᠡᠷ ᠠᠴᠠ ᠪᠠᠨ ᠮᠠᠰᠢᠨ ᠢᠶᠠᠷ ᠡᠷᠳᠡ ᠭᠠᠷᠤᠭᠰᠠᠨ ᠲᠤᠯᠠ ᠠᠪᠤ᠂ ᠠᠬ᠎ᠠ ᠨᠠᠷ ᠢᠷᠡᠬᠦ ᠠᠴᠠ ᠡᠮᠦᠨ᠎ᠡ ᠲᠡᠨᠳᠡ ᠬᠦᠷᠪᠡ᠃ ᠲᠡᠭᠡᠭᠡᠳ ᠴᠠᠭᠠᠨ ᠮᠠᠩᠬ᠎ᠠ ᠶᠢ ᠡᠩᠭᠦᠷᠡᠶᠢᠯᠡᠨ ᠢᠯᠪᠢᠵᠦ᠂ ᠲᠡᠷᠭᠡᠳᠡᠬᠢ ᠵᠢᠵᠢᠭᠬᠡᠨ ᠠᠭᠤᠯᠠᠨ ᠲᠡᠭᠡᠷ᠎ᠡ ᠭᠠᠷᠪᠠ᠃ ᠴᠠᠭᠠᠨ ᠮᠠᠩᠬ᠎ᠠ ᠮᠦᠨ ᠯᠠ ᠲᠡᠶᠢᠮᠦ ᠵᠦᠭᠡᠯᠡᠨ ᠢᠶᠠᠷ ᠢᠶᠠᠨ᠃ ᠦᠯᠦᠭᠡᠢ ᠳᠤ ᠪᠠᠶᠢᠬᠤ ᠳᠤ ᠨᠠᠮ᠎ᠠ ᠶᠢ ᠬᠠᠭᠤᠷᠠᠶᠢᠯᠠᠵᠤ᠂ ᠦᠰᠴᠤ ᠲᠤᠮᠤᠭᠠᠵᠢᠬᠤ ᠳᠤ ᠲᠤᠭᠯᠠᠵᠤ ᠨᠠᠭᠠᠳᠴᠤ ᠪᠠᠶᠢᠭᠰᠠᠨ ᠦᠨᠢ ᠶᠢᠨ ᠲᠤᠷᠠᠳᠬᠠᠯᠳᠤ ᠡᠯᠡᠰᠦ ᠮᠠᠩᠬ᠎ᠠ ᠮᠢᠨᠢ︕ ᠬᠤᠷᠤᠭᠤᠨ ᠤ ᠰᠠᠯᠠᠭ᠎ᠠ ᠪᠠᠷ ᠭᠤᠭᠤᠵᠢᠬᠤ ᠡᠯᠡᠰᠦ ᠮᠠᠩᠬ᠎ᠠ ᠶᠠᠭ ᠯᠠ ᠦᠩᠭᠡᠷᠡᠵᠦ ᠤᠳᠤᠭᠰᠠᠨ ᠡᠳᠦᠷ ᠬᠤᠨᠤᠭ ᠰᠢᠬ ᠰᠠᠨᠠᠭᠳᠠᠬᠤᠯᠠᠷ ᠪᠢ ᠦᠪᠡᠷ ᠤᠨ ᠡᠷᠭᠡ ᠦᠭᠡᠢ ᠦᠪᠡᠷ ᠤᠨ ᠪᠢᠴᠢᠭᠰᠡᠨ ᠬᠡᠳᠦᠨ ᠮᠦᠷ ᠰᠢᠯᠦᠭ ᠢᠶᠠᠨ ᠰᠠᠨᠠᠭᠠᠨ ᠳᠤ ᠤᠷᠤᠪᠠ᠃    ︽ᠡᠳᠦᠷ ᠬᠤᠨᠤᠭ    ᠤᠷᠭ᠎ᠠ ᠶᠢᠨ ᠡᠰᠢ ᠰᠢᠭ ᠤᠷᠳᠤ ᠪᠦᠭᠡᠳᠡᠯ᠎ᠡ ᠤᠬᠤᠷ    ᠤᠯᠠᠷᠢᠯ ᠤᠨ ᠰᠤᠯᠢᠭᠳᠠᠯ    ᠦᠷᠯᠦᠭᠡ ᠦᠳᠡᠰᠢ ᠶᠢᠨ ᠰᠢᠭᠦᠳᠡᠷᠢ ᠮᠡᠳᠦ ᠡᠮᠵᠡᠭᠬᠡᠨ    ᠡᠳᠦᠷ ᠰᠦᠨᠢ ᠪᠠᠷ ᠡᠮᠵᠢᠶᠡᠷᠢᠯᠡᠭᠰᠡᠨ    ᠡᠪᠦᠯ ᠵᠤᠨ ᠬᠠᠪᠤᠷ ᠨᠠᠮᠤᠷ ᠢᠶᠠᠷ ᠦᠶᠡᠯᠡᠭᠰᠡᠨ    ᠡᠨᠡᠦᠬᠡᠨ ᠨᠠᠰᠤᠨ ᠤ ᠮᠦᠴᠡ ᠪᠦᠷᠢ    ᠡᠩᠭᠦᠷᠡᠢ ᠬᠤᠷᠤᠭᠤᠳ ᠤᠨ ᠵᠠᠪᠰᠠᠷ ᠢᠶᠠᠷ ᠭᠤᠭᠤᠵᠢᠬᠤ ᠡᠯᠡᠰᠦ ᠮᠡᠳᠦ ᠁︾    ᠠᠭᠤᠯᠠᠨ ᠲᠡᠭᠡᠷ᠎ᠡ ᠭᠠᠷᠬᠤ ᠳᠤ ᠪᠤᠳᠠᠷᠭᠠᠨ᠎ᠠ ᠬᠦᠬᠡᠷᠡᠵᠦ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠦᠩᠭᠡᠷᠡᠭᠰᠡᠨ ᠠᠴᠠ ᠨᠡᠯᠢᠶᠡᠳ ᠮᠠᠭᠤᠵᠢᠷᠠᠭᠰᠠᠨ ᠴᠦ ᠠᠯᠤᠰ ᠤᠨ ᠬᠦᠬᠡ ᠤᠨᠢᠶᠠᠷ ᠵᠡᠷᠭᠡᠯᠭᠡᠨᠳᠤᠵᠤ᠂ ᠡᠮᠡᠭᠡ ᠶᠢᠨ ᠮᠢᠨᠢ ᠡᠨᠡᠷᠢᠩᠭᠦᠢ ᠲᠦᠷᠢ ᠡᠭᠦᠯᠡᠨ ᠲᠠᠯᠳᠠ ᠠᠴᠠ ᠬᠠᠷᠠᠭᠳᠠᠮᠠᠷ ᠰᠠᠨᠠᠭᠳᠠᠬᠤ ᠳᠤ ᠨᠢᠳᠤᠨ ᠳᠤ ᠮᠢᠨᠢ ᠵᠠᠶᠢᠷ ᠬᠦᠶᠦᠪᠡ᠃    ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠭᠤᠴᠢᠭᠠᠳ ᠤᠨ ᠤ ᠦᠶ᠎ᠡ ᠳᠤ ᠮᠢᠨᠦ ᠡᠯᠦᠨᠴᠡ ᠡᠪᠦᠭᠡ᠂ ᠡᠯᠦᠨᠴᠡ ᠡᠮᠡᠭᠡ ᠶᠢ ᠪᠠᠭᠳᠠᠭᠠᠭᠰᠠᠨ ᠨᠢᠭᠡ ᠪᠦᠯᠦᠭ ᠬᠦᠮᠦᠰ ᠬᠠᠷᠠᠴᠢᠨ ᠠᠴᠠ ᠲᠠᠮᠨᠠᠭᠤᠷ ᠢᠶᠠᠷ ᠨᠡᠭᠦᠵᠦ ᠢᠷᠡᠭᠡᠳ ᠡᠨᠡ ᠭᠠᠵᠠᠷ ᠲᠤ ᠨᠤᠳᠤᠭᠯᠠᠭᠰᠠᠨ ᠠᠴᠠ ᠲᠠᠷᠢᠶᠠᠨ ᠲᠤᠪᠤ ᠪᠠᠶᠢᠭᠰᠠᠨ ᠭᠠᠵᠠᠷ ᠠᠶᠢᠯ ᠲᠤᠰᠬᠤᠨ ᠪᠤᠯᠵᠤ᠂ ᠦᠷᠡᠵᠢᠨ ᠲᠦᠯᠵᠢᠭᠰᠭᠡᠷ ᠡᠳᠦᠭᠡ ᠵᠠᠭᠤ ᠢᠯᠡᠬᠦᠦ ᠡᠷᠦᠬᠡ ᠲᠠᠢ ᠪᠤᠯᠪᠠ᠃ ᠡᠮᠡᠭᠡ ᠮᠢᠨᠢ ᠪᠢᠳᠡᠨ ᠳᠤ ᠲᠡᠭᠡᠳᠦᠰ ᠤᠨ ᠦᠯᠢᠭᠡᠷ ᠢ ᠲᠠᠩᠳᠠ ᠶᠠᠷᠢᠵᠤ ᠦᠭᠳᠡᠭ᠃ ᠡᠮᠡᠭᠡ ᠭᠤᠴᠢᠭᠠᠳ ᠨᠠᠰᠤᠨ ᠠᠴᠠ ᠪᠠᠨ ᠪᠡᠯᠪᠡᠰᠦᠷᠡᠵᠦ᠂ ᠬᠡᠳᠦᠨ ᠲᠦᠷᠦ ᠶᠢ ᠡᠯᠡᠭᠡᠵᠦ ᠬᠠᠯᠠ ᠵᠤᠪᠠᠯᠠᠩ ᠢ ᠬᠠᠨᠳᠠᠯ᠎ᠠ ᠠᠮᠰᠠᠭᠰᠠᠨ ᠪᠤᠯᠪᠠᠴᠤ ᠪᠡᠶ᠎ᠡ ᠴᠢᠬᠢᠷᠠᠭ᠂ ᠤᠬᠠᠭᠠᠨ ᠰᠠᠷᠠᠭᠤᠯ᠂ ᠶᠡᠷᠡᠨ ᠨᠠᠰᠤ ᠶᠢ ᠬᠦᠷᠦᠭᠰᠡᠨ ᠪᠤᠭᠤᠷᠤᠯ᠃ ᠲᠡᠶᠢᠮᠦ ᠳᠡᠭᠡᠨ ᠪᠢᠳᠡᠨ ᠳᠤ ᠦᠩᠭᠡᠷᠡᠭᠰᠡᠨ ᠤ ᠴᠠᠭ ᠲᠦᠷᠦ ᠶᠢᠨ ᠤᠷᠤᠭ᠎ᠠ ᠪᠤᠰᠬᠠᠭ᠎ᠠ ᠪᠠ ᠡᠯᠦᠨᠴᠡ ᠡᠪᠦᠭᠡ ᠶᠢᠨ ᠤᠴᠢᠷ ᠶᠠᠪᠤᠳᠠᠯ ᠤᠳ ᠢ ᠶᠠᠷᠢᠵᠦ ᠦᠭᠳᠡᠭ᠃ ︽ᠡᠯᠦᠨᠴᠡ ᠡᠪᠦᠭᠡ ᠴᠢᠨᠢ ᠪᠡᠭᠡᠵᠢᠩ ᠳᠤ ᠪᠢᠴᠢᠭᠡᠴᠢ ᠪᠠᠶᠢᠭᠰᠠᠨ ᠬᠦᠮᠦᠨ᠂ ᠪᠤᠰᠤᠳ ᠤᠨ ᠤᠴᠢᠷ ᠲᠤ ᠬᠤᠯᠪᠤᠭᠳᠠᠵᠤ ᠵᠡᠷᠭᠡ ᠲᠤᠰᠢᠶᠠᠯ ᠢᠶᠠᠨ ᠤᠷᠬᠢᠭᠠᠳ ᠬᠠᠷᠢᠵᠤ ᠢᠷᠡᠭᠰᠡᠨ ᠁ ᠡ᠊ᠨᠳᠡ ᠢᠷᠡᠭᠡᠳ ᠪᠠᠰᠠ ᠪᠠᠭᠰᠢᠯᠠᠵᠤ ᠪᠠᠶᠢᠭᠰᠠᠨ ᠁ ᠲᠠᠨ ᠤ ᠠᠶᠢᠮᠠᠭ ᠤᠭᠰᠠᠭ᠎ᠠ ᠪᠢᠴᠢᠭ ᠢ ᠲᠡᠭᠡᠳᠦᠯᠡᠳᠡᠭ ᠰᠢᠦ︕︾᠂ ︽ᠪᠢ ᠲᠠᠪᠤᠨ ᠨᠠᠰᠤ ᠲᠠᠢ ᠢᠷᠡᠭᠰᠡᠨ᠂ ᠡᠨᠡ ᠠᠶᠢᠯ ᠤᠨ ᠶᠠᠮᠠᠷ ᠤᠴᠢᠷ ᠢ ᠮᠡᠳᠡᠬᠦ ᠦᠭᠡᠢ ᠪᠤᠢ ᠁︾ ᠭᠡᠵᠦ ᠬᠠᠭᠤᠴᠢᠯᠠᠳᠠᠭ᠃    ᠤᠳᠤ ᠡᠮᠡᠭᠡ ᠮᠢᠨᠢ ᠪᠤᠷᠬᠠᠨ ᠤ ᠤᠷᠤᠨ ᠳᠤ ᠤᠳᠤᠭᠠᠳ ᠠᠷᠪᠠᠭᠠᠳ ᠢᠯᠡᠭᠦᠦ ᠵᠢᠯ ᠪᠤᠯᠪᠠ᠃ ᠪᠢ ᠲᠠᠩᠳᠠ ᠡᠮᠡᠭᠡ ᠪᠠᠨ ᠵᠡᠭᠦᠳᠦᠯᠡᠳᠡᠭ᠂ ᠡᠮᠡᠭᠡ ᠶᠢᠨ ᠮᠢᠨᠢ ᠶᠠᠷᠢᠵᠤ ᠦᠭᠴᠦ ᠪᠠᠶᠢᠭᠰᠠᠨ ᠮᠠᠩᠭᠤᠰ ᠤᠨ ᠦᠯᠢᠭᠡᠷ᠂ ᠶᠠᠪᠠᠭᠠᠨ ᠦᠯᠢᠭᠡᠷ ᠤᠳ ᠮᠢᠨᠦ ᠨᠢᠯᠬ᠎ᠠ ᠤᠶᠤᠨ ᠢ ᠰᠢᠮᠡᠵᠢᠭᠦᠯᠦᠭᠰᠡᠨ᠃    ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠴᠠᠭᠠᠨ ᠰᠢᠷᠭᠠᠯ ᠢᠶᠠᠷ ᠢᠶᠠᠨ᠂ ᠨᠠᠰᠤᠨ ᠦᠭᠡᠳᠡ ᠪᠤᠯᠤᠭᠰᠠᠨ ᠲᠤᠳᠤᠨᠤ ᠬᠦᠮᠦᠰ ᠤᠨ ᠰᠦᠨᠡᠰᠦ ᠠᠯᠢ ᠬᠡᠳᠦ᠋ᠢᠨ ᠪᠦᠷ ᠲᠦᠷᠦᠯ ᠢᠶᠠᠨ ᠤᠯᠵᠤ ᠰᠠᠶᠢᠬᠠᠨ ᠠᠵᠤ ᠲᠦᠷᠦᠵᠦ ᠪᠠᠶᠢᠬ᠎ᠠ᠃    ︽ᠤᠤᠭᠤᠭᠰᠠᠨ ᠤᠰᠤ ᠷᠠᠰᠢᠶᠠᠨ᠂ ᠤᠨᠠᠭᠰᠠᠨ ᠰᠢᠷᠤᠢ ᠠᠯᠳᠠ︾ ᠭᠡᠳᠡᠭ ᠵᠢᠷᠦᠬᠡᠨ ᠠᠴᠠ ᠤᠶᠠᠭᠠᠳᠠᠢ ᠦᠭᠡ ᠶᠢ ᠪᠤᠳᠤᠮᠠᠭᠴᠠ ᠪᠢ ᠠᠶᠢᠯ ᠤᠨ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠵᠢᠵᠢᠭᠬᠡᠨ ᠭᠤᠤᠯ ᠪᠠ ᠠᠶᠢᠯ ᠤᠨ ᠵᠠᠭᠦᠨ ᠡᠮᠦᠨ᠎ᠡ ᠪᠠᠶᠢᠭ᠎ᠠ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠪᠠᠨ ᠪᠤᠳᠤᠵᠤ ᠤᠯᠳᠠᠭ᠃ ᠮᠢᠨᠦ ᠤᠬᠠᠭᠠᠨ ᠤ ᠲᠡᠯᠡᠬᠡᠢ᠂ ᠲᠡᠭᠡᠳᠦᠰ ᠤᠨ ᠱᠠᠷᠢᠯ ᠨᠦᠢᠷᠰᠤᠭᠰᠠᠨ ᠭᠠᠵᠠᠷ᠂ ᠰᠢᠷᠭᠠᠯ ᠴᠠᠭᠠᠨ ᠮᠠᠩᠬ᠎ᠠ ᠮᠢᠨᠢ᠂ ᠴᠠᠭᠠᠨ ᠬᠢᠯᠢᠩ ᠤᠨ ᠮᠠᠩᠬ᠎ᠠ ᠮᠢᠨᠢ᠂ ᠲᠤᠷᠠᠰᠤᠯ ᠤᠨ ᠴᠠᠭᠠᠨ ᠮᠠᠩᠬ᠎ᠠ ᠮᠢᠨᠢ᠂ ᠬᠠᠩᠰᠢ ᠪᠤᠯᠵᠤ ᠬᠠᠭᠳᠠ ᠬᠦᠬᠡᠷᠡᠬᠦ ᠪᠠᠷ ᠪᠢ ᠲᠡᠭᠦᠨ ᠲᠡᠶᠢᠰᠢ ᠵᠤᠷᠢᠨ᠎ᠠ︕ ᠬᠡᠭᠦᠳᠡᠭ ᠴᠡᠭᠡᠵᠢᠨ ᠤ ᠪᠤᠬᠢᠨᠢᠳᠤᠯ ᠭᠤᠨᠢᠭ ᠢᠶᠠᠨ ᠬᠡᠬᠡᠷ᠎ᠡ ᠶᠢᠨ ᠰᠠᠯᠬᠢᠨ ᠳᠤ ᠰᠢᠪᠡᠨᠡᠨ᠎ᠡ᠃ ᠬᠡᠨ ᠳᠤ ᠴᠤ ᠬᠡᠯᠡᠳᠡᠭ ᠦᠭᠡᠢ ᠰᠡᠳᠬᠢᠯ ᠤᠨ ᠦᠭᠡ ᠪᠠᠨ ᠮᠠᠩᠬᠠᠨ ᠲᠡᠭᠡᠷ᠎ᠡ ᠪᠢᠴᠢᠭᠯᠡᠨ᠎ᠡ᠃ ᠡᠭᠦᠯᠡᠨ ᠲᠠᠯᠳᠠ ᠤᠷᠤᠭᠰᠠᠨ ᠡᠮᠡᠭᠡ ᠳᠡᠭᠡᠨ ᠪᠠᠰᠠ ᠤᠯᠠᠨ ᠦᠭᠡ ᠶᠠᠷᠢᠨ᠎ᠠ ᠁      ᠬᠤᠶᠠᠷ᠂ ᠤᠵᠤᠭᠤᠷ ᠰᠤᠶᠤᠯ ᠤᠨ ᠰᠢᠮ᠎ᠡ ᠶᠢ ᠬᠦᠷᠳᠡᠭᠰᠡᠨ ᠤᠨᠠᠭᠠᠨ ᠨᠠᠰᠤᠨ ᠤ ᠲᠤᠷᠠᠰᠤᠮᠵᠢ    ︽ᠦᠨᠢᠷ ᠪᠠᠶᠠᠨ    ᠡᠬᠡ ᠬᠡᠯᠡᠨ ᠤ ᠪᠠᠨ ᠭᠦᠨ ᠲᠠᠯᠠᠢ ᠳᠤ    ᠡᠪᠴᠢᠭᠦᠨ ᠵᠠᠪᠢ ᠰᠢᠭ᠋    ᠰᠡᠯᠢᠵᠦ ᠰᠤᠷᠤᠭᠰᠠᠨ ᠳᠠᠭᠠᠨ ᠪᠢ ᠪᠠᠭ᠋ᠠᠷᠬᠠᠳᠠᠭ︾ ᠭᠡᠬᠦ ᠪ᠊᠂ ᠶᠠᠪᠤᠭᠤᠬᠤᠯᠠᠨ ᠤ ᠰᠢᠯᠦᠭ ᠢᠶᠠᠷ ᠪᠠᠭ᠋ᠠᠷᠬᠠᠳᠠᠭ᠃ ᠮᠤᠩᠭᠤᠯ ᠡᠬᠡ ᠶᠢᠨ ᠠᠷᠢᠭᠤᠨ ᠴᠠᠭᠠᠨ ᠰᠦ ᠶᠢ ᠰᠢᠮᠡᠵᠦ᠂ ᠮᠤᠩᠭᠤᠯ ᠰᠤᠶᠤᠯ ᠤᠨ ᠲᠠᠷᠬᠠᠨ ᠦᠪ ᠢᠶᠠᠷ ᠬᠦᠮᠦᠨ ᠪᠤᠯᠤᠭᠰᠠᠨ ᠪᠢ ᠡᠬᠡ ᠤᠷᠤᠨ᠂ ᠨᠤᠳᠤᠭ ᠤᠰᠤ᠂ ᠡᠵᠢ ᠠᠪᠤ ᠳᠤ ᠪᠠᠨ ᠬᠡᠵᠢᠶᠡᠳᠡ ᠲᠠᠯᠠᠷᠬᠠᠳᠠᠭ᠃    ᠮᠢᠨᠦ ᠦᠰᠴᠦ ᠲᠦᠷᠦᠭᠰᠡᠨ ᠭᠡᠷ ᠪᠦᠯᠢ᠂ ᠨᠤᠳᠤᠭ ᠤᠰᠤ ᠲᠡᠷᠡ ᠴᠢᠭ ᠢᠶᠠᠷ ᠢᠶᠠᠨ ᠤᠵᠤᠭᠤᠷ ᠰᠤᠶᠤᠯ ᠤᠨ ᠦᠩ ᠰᠢᠮᠡᠯᠢᠭ ᠬᠦᠷᠦᠰᠦ ᠰᠢᠷᠤᠢ ᠪᠠᠶᠢᠭᠰᠠᠨ᠃ ᠡᠮᠡᠭᠡ ᠮᠢᠨᠢ ᠨᠡᠷ᠎ᠡ ᠪᠠᠨ ᠪᠢᠴᠢᠵᠦ ᠴᠢᠳᠠᠳᠠᠭ ᠦᠭᠡᠢ ᠴᠦ ᠦᠯᠢᠭᠡᠷ ᠲᠤᠮᠤᠭ ᠤᠯᠠᠨ ᠮᠡᠳᠡᠳᠡᠭ᠃ ᠪᠢᠳᠡᠨ ᠢ ᠪᠠᠭ᠎ᠠ ᠪᠠᠶᠢᠬᠤ ᠳᠤ ᠡᠮᠡᠭᠡ ᠪᠢᠳᠡᠨ ᠳᠤ ᠮᠠᠩᠭᠤᠰ ᠤᠨ ᠦᠯᠢᠭᠡᠷ᠂ ᠪᠠᠯᠭᠠᠨᠰᠠᠩ ᠤᠨ ᠦᠯᠢᠭᠡᠷ᠂ ᠲᠠᠯᠠᠨ ᠬᠤᠳᠠᠯᠴᠢ ᠶᠢᠨ ᠦᠯᠢᠭᠡᠷ ᠵᠡᠷᠭᠡ ᠠᠷᠠᠳ ᠤᠨ ᠠᠮᠠᠨ ᠦᠯᠢᠭᠡᠷ ᠢ ᠦᠷᠬᠦᠯᠵᠢ ᠶᠠᠷᠢᠵᠦ ᠦᠭᠳᠡᠭ᠃ ᠡᠮᠡᠭᠡ ᠶᠢᠨ ᠢᠶᠠᠨ ᠬᠠᠯᠠᠭᠤᠨ ᠡᠪᠦᠷ ᠲᠤ ᠠᠳᠤᠷᠢᠵᠤ᠂ ᠠᠮᠠᠨ ᠦᠯᠢᠭᠡᠷ ᠢ ᠨᠢ ᠰᠤᠨᠤᠰᠴᠤ ᠵᠡᠭᠦᠳᠦᠨ ᠶᠢᠷᠳᠢᠨᠴᠦ ᠳᠤ ᠤᠷᠤᠬᠤ ᠨᠢ ᠲᠡᠶᠢᠮᠦ ᠯᠠ ᠵᠢᠷᠭᠠᠯᠳᠠᠢ ᠪᠠᠶᠢᠭᠰᠠᠨ᠃    ᠠᠪᠤ ᠮᠢᠨᠢ ᠠᠷᠪᠠᠨ ᠬᠤᠶᠠᠷᠳᠠᠢ ᠠᠪᠤ ᠪᠠᠨ ᠠᠯᠳᠠᠵᠤ᠂ ᠲᠦᠩᠭᠡᠵᠦ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠶᠢᠨ ᠲᠦᠷᠪᠡᠳᠦᠭᠡᠷ ᠤᠨ ᠲᠡᠭᠦᠰᠦᠭᠰᠡᠨ ᠪᠤᠯᠪᠠᠴᠤ ᠨᠤᠮ ᠪᠢᠴᠢᠭ ᠤᠷᠪᠠᠭᠤᠯᠬᠤ ᠲᠤᠷᠠᠳᠠᠢ ᠲᠤᠯᠠ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠪᠠᠨ ᠨᠡᠯᠢᠶᠡᠳ ᠪᠢᠴᠢᠭ ᠲᠠᠢ ᠬᠦᠮᠦᠨ ᠳᠤ ᠪᠠᠨ ᠪᠠᠭᠳᠠᠨ᠎ᠠ᠃ ᠠᠪᠤ ᠮᠢᠨᠢ ᠠᠵᠢᠯᠴᠢ ᠬᠦᠳᠡᠯᠮᠦᠷᠢᠴᠢ᠂ ᠦᠰᠦᠭ ᠪᠢᠴᠢᠭ ᠮᠡᠳᠡᠳᠡᠭ ᠲᠤᠯᠠ ᠪᠠᠷᠢᠭᠠᠳᠠ ᠶᠢᠨ ᠲᠠᠷᠤᠭ᠎ᠠ ᠶᠢᠨ ᠡᠭᠦᠷᠭᠡ ᠶᠢ ᠬᠠᠷᠢᠭᠤᠴᠠᠵᠤ᠂ ᠮᠠᠨ ᠤ ᠠᠶᠢᠯ ᠳᠤ ᠪᠠᠨ ᠬᠦᠨᠳᠦᠳᠭᠡᠯᠳᠡᠢ ᠶᠠᠪᠤᠭᠰᠠᠨ᠃ ᠨᠡᠩ ᠨᠤᠮ ᠲᠡᠪᠳᠡᠷ ᠤᠷᠪᠠᠭᠤᠯᠬᠤ ᠵᠠᠩ ᠢᠶᠠᠨ ᠨᠠᠰᠤᠨ ᠲᠤᠷᠰᠢ ᠬᠠᠶᠠᠭᠰᠠᠨ ᠦᠭᠡᠢ ᠪᠦᠭᠡᠳ ᠬᠡᠦᠬᠡᠳ ᠤᠮᠪᠤᠯᠤ ᠪᠠᠨ ᠪᠦᠷ ᠪᠢᠴᠢᠭ ᠰᠤᠶᠤᠯ ᠲᠠᠢ ᠬᠦᠮᠦᠨ ᠪᠤᠯᠭᠠᠨ ᠬᠦᠮᠦᠵᠢᠭᠦᠯᠦᠭᠰᠡᠨ ᠶᠤᠮ᠃ ᠠᠪᠤ ᠮᠢᠨᠢ ᠦᠷᠬᠦᠯᠵᠢ ᠦᠯᠢᠭᠡᠷ ᠤᠨ ᠲᠡᠪᠳᠡᠷ ᠤᠩᠰᠢᠳᠠᠭ ᠠᠴᠠ ᠮᠠᠨ ᠤ ᠭᠡᠷ ᠲᠤ ᠲᠠᠪᠤᠨ ᠵᠤᠸᠠᠨ ᠤ ᠱᠠᠰᠳᠢᠷ᠂ ︽ᠬᠦᠬᠡ ᠰᠤᠳᠤᠷ︾᠂ ︽ᠰᠡᠬᠢᠭᠤᠯᠰᠤᠨ ᠡᠷᠭᠦᠮᠵᠢᠯᠡᠭᠰᠡᠨ ᠦᠯᠢᠭᠡᠷ︾᠂ ︽ᠤᠯᠠᠭᠠᠨ ᠠᠰᠠᠷ ᠤᠨ ᠵᠡᠭᠦᠳᠦᠨ︾ ᠵᠡᠷᠭᠡ ᠤᠯᠠᠨ ᠨᠤᠮ ᠪᠠᠶᠢᠭᠰᠠᠨ ᠃ ᠪᠢ ᠦᠰᠦᠭ ᠨᠢᠳᠦᠯᠡᠵᠦ ᠡᠬᠢᠯᠡᠭᠰᠡᠨ ᠠᠴᠠ ᠠᠪᠤ ᠶᠢᠨ ᠤᠩᠰᠢᠳᠠᠭ ᠲᠡᠳᠡᠭᠡᠷ ᠦᠯᠢᠭᠡᠷ ᠤᠨ ᠨᠤᠮ ᠢ ᠤᠩᠰᠢᠵᠤ ᠡᠬᠢᠯᠡᠪᠡ᠃ ᠪᠠᠰᠠ ᠠᠬ᠎ᠠ ᠨᠠᠷ ᠤᠨ ᠬᠢᠴᠢᠶᠡᠯ ᠤᠨ ᠪᠢᠴᠢᠭ᠂ ᠵᠢᠷᠤᠭᠳᠤ ᠲᠡᠪᠳᠡᠷ ᠢ ᠨᠢ ᠦᠵᠡᠵᠦ ᠪᠠᠬ᠎ᠠ ᠰᠤᠨᠢᠷᠬᠠᠯ ᠬᠦᠷᠴᠦ ᠪᠠᠶᠢᠪᠠ᠃    ᠮᠢᠨᠦ ᠡᠵᠢ ᠠᠵᠢᠯᠴᠢ ᠬᠦᠳᠡᠯᠮᠦᠴᠢ᠂ ᠭᠠᠷ ᠤᠷᠠᠨ᠂ ᠪᠤᠰᠢᠭᠤ ᠱᠠᠯᠠᠮᠠᠭᠠᠢ ᠪᠦᠭᠡᠳ ᠠᠷᠠᠳ ᠤᠨ ᠲᠠᠭᠤᠤ ᠶᠢ ᠰᠠᠶᠢᠬᠠᠨ ᠲᠠᠭᠤᠯᠠᠳᠠᠭ᠃ ᠡᠵᠢ ᠲᠠᠢ ᠬᠠᠮᠳᠤ ᠬᠡᠬᠡᠷ᠎ᠡ ᠭᠠᠷᠬᠤ ᠪᠤᠶᠤ ᠠᠶᠠᠨ ᠵᠠᠮ ᠬᠦᠬᠡᠬᠡᠬᠦ ᠳᠤ ᠡᠵᠢ ᠮᠢᠨᠢ ᠠᠷᠠᠳ ᠤᠨ ᠲᠠᠭᠤᠤ ᠶᠢ ᠬᠠᠩᠭᠢᠨᠠᠳᠠᠯ᠎ᠠ ᠲᠠᠭᠤᠯᠠᠳᠠᠭ ᠪᠠᠶᠢᠭᠰᠠᠨ᠃ ᠬᠦᠭᠡᠷᠦᠬᠦᠢ᠂ ᠲᠡᠷᠡ ᠦᠶ᠎ᠡ ᠳᠤ ᠡᠵᠢ ᠮᠢᠨᠢ ᠨᠠᠭᠠᠴᠤ ᠡᠪᠦᠭᠡ᠂ ᠨᠠᠭᠠᠴᠤ ᠡᠮᠡᠭᠡ ᠶᠢ ᠰᠠᠨᠠᠵᠤ ᠪᠠᠶᠢᠭᠰᠠᠨ ᠰᠡᠳᠬᠢᠯ ᠤᠨ ᠢᠶᠠᠨ ᠭᠤᠨᠢᠭ ᠢ ᠲᠠᠭᠤᠤ ᠪᠠᠷ ᠢᠯᠡᠳᠭᠡᠵᠦ ᠪᠠᠶᠢᠭᠰᠠᠨ ᠪᠠᠶᠢᠪᠠ ᠤᠤ᠃ ᠡᠵᠢ ᠶᠢᠨ ᠮᠢᠨᠢ ᠲᠠᠭᠤᠯᠠᠳᠠᠭ ᠠᠷᠠᠳ ᠤᠨ ᠲᠠᠭᠤᠨ ᠳᠤ ᠤᠶᠠᠩᠭ᠎ᠠ ᠰᠡᠳᠬᠢᠯ ᠢᠶᠠᠨ ᠤᠶᠠᠷᠠᠭᠤᠯᠵᠤ ᠪᠠᠶᠢᠭᠰᠠᠨ᠃    ᠮᠢᠨᠦ ᠪᠠᠭ᠎ᠠ ᠶᠢᠨ ᠦᠶ᠎ᠡ ᠳᠤ ᠮᠠᠨ ᠤ ᠠᠶᠢᠯ ᠳᠤ ᠴᠠᠬᠢᠯᠭᠠᠨ ᠭᠡᠵᠦ ᠪᠠᠶᠢᠬᠤ ᠦᠭᠡᠢ᠃ ᠦᠳᠡ ᠤᠷᠤᠢ ᠳᠤ ᠪᠠᠨ ᠷᠠᠳᠢᠣ᠋ ᠪᠠᠨ ᠲᠠᠯᠪᠢᠵᠤ ᠬᠤᠭᠤᠷ ᠤᠨ ᠦᠯᠢᠭᠡᠷ ᠰᠤᠨᠤᠰᠳᠠᠭ᠃ ᠦᠳᠡ ᠶᠢᠨ 12 ᠴᠠᠭ ᠠᠴᠠ 1 ᠴᠠᠭ ᠪᠤᠯᠳᠠᠯ᠎ᠠ ᠬᠤᠭᠤᠷ ᠤᠨ ᠦᠯᠢᠭᠡᠷ ᠰᠤᠨᠤᠰᠳᠠᠭ᠃ ᠮᠢᠨᠦ ᠭᠡᠷ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠠᠴᠠ ᠵᠠᠭᠤᠬᠠᠨ ᠮᠧᠳ᠋ᠷ ᠬᠤᠯᠠ ᠪᠠᠶᠢᠳᠠᠭ ᠲᠤᠯᠠ ᠦᠯᠢᠭᠡᠷ ᠢᠶᠠᠨ ᠰᠤᠨᠤᠰᠴᠤ ᠪᠠᠷᠠᠮᠠᠭᠴᠠ ᠰᠤᠷᠭᠠᠭᠤᠯᠢ ᠵᠦᠭ ᠢᠶᠠᠨ ᠨᠢᠰᠬᠦ ᠮᠡᠳᠦ ᠲᠤᠪᠳᠤᠯᠳᠠᠭ᠃ ᠮᠠᠨ ᠤ ᠭᠡᠷ ᠤᠨ ᠬᠡᠨ ᠨᠢᠭᠡ ᠨᠢ ᠶᠠᠮᠠᠷ ᠨᠢᠭᠡᠨ ᠶᠠᠪᠤᠳᠠᠯ ᠢᠶᠠᠷ ᠦᠨᠦᠳᠦᠷ ᠤᠨ ᠬᠤᠭᠤᠷ ᠤᠨ ᠦᠯᠢᠭᠡᠷ ᠢ ᠰᠤᠨᠤᠰᠴᠤ ᠠᠮᠵᠢᠭᠰᠠᠨ ᠦᠭᠡᠢ ᠪᠤᠯ ᠪᠢᠳᠡ ᠠᠬ᠎ᠠ ᠲᠡᠭᠦᠦ ᠬᠡᠳᠦᠭᠦᠯᠡ ᠤᠷᠤᠯᠳᠤᠵᠤ ᠪᠠᠶᠢᠮᠠᠨ ᠶᠠᠷᠢᠵᠤ ᠦᠭᠳᠡᠭ᠃ ᠪᠠᠰᠠ ᠵᠠᠷᠢᠮ ᠤᠷᠤᠢ ᠳᠤ ᠪᠠᠨ ᠠᠶᠢᠯ ᠤᠨ ᠵᠠᠯᠠᠭᠤᠴᠤᠳ ᠢᠳᠡᠷᠴᠦᠳ ᠬᠡᠨ ᠨᠢᠭᠡᠨ ᠤ ᠳᠤ ᠨᠢ ᠴᠤᠭᠯᠠᠷᠠᠵᠤ ᠬᠤᠯᠪᠤᠭ᠎ᠠ ᠬᠡᠯᠡᠵᠦ ᠲᠠᠭᠤᠤ ᠲᠠᠭᠤᠯᠠᠳᠠᠭ᠃     ᠬᠠᠮᠤᠭ ᠤᠨ ᠢᠳᠡ ᠲᠠᠢ ᠨᠢ ᠲᠠᠭᠠᠷᠢᠯᠴᠠᠭ᠎ᠠ ᠬᠤᠯᠪᠤᠭ᠎ᠠ ᠪᠤᠯᠤᠨ᠎ᠠ᠃ ᠨᠢᠭᠡ ᠨᠢ ︽ᠰᠢᠳᠦ ᠦᠭᠡᠢ ᠮᠡᠭᠡᠵᠢ ᠨᠢ᠂ ᠰᠢᠰᠢ ᠶᠢᠨ ᠪᠤᠤᠪᠤ ᠳᠤ ᠲᠤᠷᠠᠯᠠᠵᠠᠢ᠂ ᠰᠢᠯᠦᠭ ᠮᠡᠳᠡᠬᠦ ᠦᠭᠡᠢ ᠪᠠᠶᠢᠭᠠᠳ ᠴᠢ᠂ ᠨᠠᠳᠠ ᠲᠠᠢ ᠬᠡᠯᠡᠯᠴᠡᠬᠦ ᠶᠢ ᠲᠤᠷᠠᠯᠠᠵᠠᠢ ᠃ ᠠᠷᠠᠭ᠎ᠠ ᠦᠭᠡᠢ ᠮᠡᠭᠡᠵᠢ ᠨᠢ᠂ ᠠᠭ᠎ᠠ ᠶᠢᠨ ᠪᠤᠤᠪᠤ ᠳᠤ ᠲᠤᠷᠠᠯᠠᠵᠠᠢ᠂ ᠠᠷᠭ᠎ᠠ ᠪᠠᠨ ᠪᠠᠷᠠᠭᠰᠠᠨ ᠴᠢ ᠳ᠋ᠧ᠂ ᠬᠤᠯᠪᠤᠭ᠎ᠠ ᠬᠡᠯᠡᠯᠴᠡᠬᠦ ᠶᠢ ᠲᠤᠷᠠᠯᠠᠵᠠᠢ︾ ᠭᠡᠬᠦ ᠳᠤ ᠨᠦᠭᠦᠭᠡ ᠨᠢ ᠤᠭᠳᠤᠵᠤ ᠠᠪᠤᠭᠠᠳ ︽ᠠᠯᠳᠠᠨ ᠬᠠᠶᠢᠷᠴᠠᠭ ᠢᠶᠠᠨ ᠨᠡᠭᠡᠭᠡᠶ᠎ᠡ ᠪᠢ᠂ ᠤᠭᠤᠳᠠᠨ ᠰᠠᠶᠢᠯᠤ ᠮᠤᠩᠳᠠᠢ ᠳ᠋ᠠ᠂ ᠠᠶᠤᠤᠯᠢᠬᠠᠢ ᠴᠡᠭᠡᠵᠢ ᠪᠠᠨ ᠨᠡᠭᠡᠭᠡᠶ᠎ᠡ ᠪᠢ᠂ ᠰᠢᠯᠦᠭ ᠤᠨ ᠰᠠᠶᠢᠯᠤ ᠮᠤᠩᠳᠠᠢ ᠳ᠋ᠠ︾ ᠭᠡᠬᠦ ᠮᠡᠳᠦ ᠪᠠᠷ ᠪᠤᠯᠢᠶᠠᠯᠴᠠᠵᠤ ᠲᠠᠭᠠᠷᠢᠯᠴᠠᠭ᠎ᠠ ᠬᠤᠯᠪᠤᠭ᠎ᠠ ᠬᠡᠯᠡᠳᠡᠭ᠃ ᠬᠠᠶᠠ ᠵᠠᠷᠢᠮ ᠳᠠᠭᠠᠨ ᠶᠡᠭᠡ ᠠᠬ᠎ᠠ ᠶᠢᠨ ᠦᠶ᠎ᠡ ᠬᠤᠷᠠᠭᠴᠤᠤᠯ ᠨᠢ ᠭᠡᠷ ᠲᠤ ᠢᠷᠡᠪᠡᠯ ᠬᠠᠨ᠎ᠠ ᠲᠡᠭᠡᠷ᠎ᠡ ᠡᠯᠭᠦᠵᠦ ᠪᠠᠶᠢᠬᠤ ᠲᠠᠮᠠᠬᠢᠨ ᠤᠭᠤᠳᠠ ᠶᠢ ᠰᠦᠢᠷᠠᠴᠢᠬᠠᠭᠠᠳ ︽ᠨᠠᠢᠮᠠᠨ ᠫᠢᠶᠤᠤᠳᠠᠢ ᠲᠠᠢ ᠤᠭᠤᠳᠠ ᠪᠠᠨ ᠨᠠᠷᠠᠨ ᠤ ᠬᠠᠯᠠᠭᠤᠨ ᠳᠤ ᠪᠠᠨ ᠤᠶᠤᠭᠰᠠᠨ ᠶᠤᠮ ᠡ ᠁︾ ᠭᠡᠵᠦ ᠨᠠᠬᠢᠯᠵᠠᠨ ᠲᠠᠭᠤᠯᠠᠵᠤ ᠪᠦᠵᠢᠭᠯᠡᠭᠡᠳ ᠪᠢᠳᠡᠨ ᠢ ᠢᠨᠢᠶᠡᠯᠭᠡᠳᠡᠭ᠃ ᠪᠠᠰᠠ ᠬᠡᠨ ᠨᠢᠭᠡ ᠨᠢ ᠰᠢᠨ᠎ᠡ ᠭᠡᠷ ᠲᠤ ᠤᠷᠤᠬᠤ ᠳᠤ ᠢᠷᠦᠭᠡᠯ ᠤᠩᠰᠢᠵᠤ ᠮᠢᠯᠢᠶᠠᠯᠭ᠎ᠠ ᠬᠢᠳᠡᠭ᠃    ᠡᠮᠡᠭᠡ᠂ ᠠᠪᠤ ᠡᠵᠢ ᠪᠦᠷ ᠲᠤᠮ ᠰᠢᠪᠰᠢᠯᠭᠡ ᠶᠢᠨ ᠦᠭᠡ ᠶᠢ ᠵᠦᠩᠳᠡᠭᠡᠨ ᠬᠡᠯᠡᠳᠡᠭ᠃ ᠲᠤᠬᠠᠶᠢᠯᠠᠪᠠᠯ᠂ ᠪᠢ ᠪᠦᠳᠦᠷᠢᠵᠦ ᠤᠨᠠᠭᠠᠳ ᠡᠪᠤᠳᠦᠭ ᠢᠶᠠᠨ ᠰᠢᠯᠪᠤᠯᠠᠪᠠᠯ ᠡᠵᠢ ᠮᠢᠨᠢ ︽ᠬᠤᠤᠷ ᠪᠤᠤ ᠲᠤᠭᠳᠠ᠂ ᠬᠤᠭ ᠪᠤᠤ ᠨᠠᠭᠠᠯᠳᠤ︾ ᠭᠡᠵᠦ ᠰᠢᠷᠬᠠᠳᠤᠭᠰᠠᠨ ᠭᠠᠵᠠᠷ ᠢ ᠦᠯᠢᠶᠡᠵᠦ ᠦᠭᠳᠡᠭ᠃ ᠭᠠᠭ᠋ᠠᠢ ᠶᠢᠨ ᠲᠤᠯᠤᠭᠠᠢ ᠴᠢᠨᠠᠪᠠᠯ᠂ ᠡᠵᠢ ᠮᠢᠨᠢ ᠲᠠᠩᠨᠠᠢ ᠪᠠᠷ ᠨᠢ ᠮᠢᠨᠦ ᠭᠠᠷ ᠤᠨ ᠠᠯᠠᠭ᠎ᠠ ᠶᠢ ᠲᠤᠪᠰᠢᠭᠠᠳ ︽ᠤᠷᠠᠨ ᠬᠡᠯᠡ ᠲᠠᠢ ᠪᠤᠯ᠂ ᠤᠯᠤᠰ ᠤᠨ ᠮᠠᠩᠯᠠᠢ ᠪᠤᠯ︾ ᠭᠡᠵᠦ ᠰᠢᠪᠰᠢᠳᠡᠭ᠃ ᠡᠮᠡᠭᠡ ᠮᠢᠨᠢ ᠪᠢᠳᠡᠨ ᠳᠤ ︽ᠤᠷᠤᠢ ᠬᠢᠮᠤᠰᠤ ᠠᠪᠤᠪᠠᠯ ᠬᠤᠯᠠᠭᠠᠶᠢᠴᠢ ᠪᠤᠯᠤᠨ᠎ᠠ︾᠂ ︽ᠬᠤᠸᠠᠷ ᠴᠡᠴᠡᠭ ᠢ ᠲᠠᠰᠤᠳᠠᠪᠠᠯ ᠵᠢᠰᠤ ᠴᠢᠨᠢ ᠮᠠᠭᠤᠬᠠᠢ ᠪᠤᠯᠤᠨ᠎ᠠ︾᠂ ︽ᠭᠠᠯ ᠢᠶᠠᠷ ᠨᠠᠭᠠᠳᠪᠠᠯ ᠲᠡᠪᠢᠰᠭᠡᠷ ᠲᠡᠭᠡᠷ᠎ᠡ ᠪᠠᠨ ᠰᠢᠭᠡᠭᠡᠨ᠎ᠡ︾ ᠭᠡᠬᠦ ᠮᠡᠳᠦ ᠶᠢᠨ ᠤᠯᠠᠨ ᠤᠯᠠᠨ ᠤᠯᠠᠮᠵᠢᠯᠠᠯᠳᠤ ᠴᠡᠭᠡᠷ ᠶᠤᠰᠤ ᠶᠢ ᠶᠠᠷᠢᠵᠤ ᠪᠢᠳᠡᠨ ᠢ ᠶᠤᠰᠤ ᠨᠤᠮ ᠲᠠᠢ ᠬᠡᠦᠬᠡᠳ ᠪᠤᠯ ᠭᠡᠵᠦ ᠴᠢᠩᠳᠠᠯᠠᠨ ᠰᠤᠷᠭᠠᠳᠠᠭ᠃    ᠪᠢ ᠲᠤᠰᠠ ᠳᠤ ᠤᠷᠤᠮᠠᠭᠴᠠ ᠠᠪᠠᠭ᠎ᠠ᠂ ᠠᠬ᠎ᠠ ᠨᠠᠷ ᠢ ᠲᠠᠭᠠᠵᠤ ᠵᠤᠨ ᠤ ᠦᠳᠡᠰᠢ ᠬᠦᠯᠭᠡ ᠶᠢᠨ ᠦᠭᠡᠷ ᠠᠳᠤᠭᠤᠯᠳᠠᠭ᠃ ᠲᠡᠭᠡᠭᠡᠳ ᠦᠬᠡᠷ ᠢᠶᠠᠨ ᠪᠡᠯᠴᠢᠭᠡᠷᠯᠡᠭᠦᠯᠪᠡᠯ ᠪᠦᠬᠦᠳᠡᠭᠡᠷ ᠨᠦᠢᠳᠠᠨ ᠰᠢᠷᠠᠯᠵᠢ ᠶᠢ ᠦᠭᠳᠡᠭᠡᠨ ᠠᠪᠴᠢᠷᠠᠵᠤ᠂ ᠤᠳᠤᠭ᠎ᠠ ᠪᠠᠭᠠᠬᠢᠭᠤᠯᠤᠨ ᠪᠠᠳᠠᠭᠠᠨ᠎ᠠ ᠰᠢᠮᠠᠭᠤᠯ ᠢ ᠦᠯᠳᠡᠵᠦ᠂ ᠭᠠᠯ ᠢ ᠲᠤᠭᠤᠷᠢᠵᠤ ᠰᠠᠭᠤᠭᠠᠳ ᠠᠪᠠᠭ᠎ᠠ ᠨᠠᠷ ᠤᠨ ᠶᠠᠷᠢᠬᠤ ᠶᠠᠪᠠᠭᠠᠨ ᠦᠯᠢᠭᠡᠷ ᠢ ᠠᠮᠳᠠᠷᠬᠠᠨ ᠰᠤᠨᠤᠰᠳᠠᠭ᠃    ᠮᠠᠨ ᠤ ᠠᠶᠢᠯ ᠳᠤ ᠭᠠᠭᠴᠠᠬᠠᠨ ᠬᠢᠳᠡᠳ ᠡᠷᠦᠬᠡ ᠰᠠᠭᠤᠷᠢᠰᠢᠳᠠᠭ᠃ ᠲᠡᠳᠡᠨ ᠤ ᠬᠡᠦᠬᠡᠳ ᠨᠢ ᠪᠦᠷ ᠮᠤᠩᠭᠤᠯ ᠪᠢᠴᠢᠭ ᠦᠵᠡᠳᠡᠭ᠃ ᠲᠡᠶᠢᠮᠦ ᠠᠴᠠ ᠪᠢ ᠰᠤᠷᠭᠠᠭᠤᠯᠢ ᠰᠤᠶᠤᠯ ᠤᠨ ᠮᠦᠷ ᠢ ᠬᠦᠭᠡᠭᠡᠳᠡᠯ᠎ᠡ ᠬᠢᠳᠠᠳ ᠦᠭᠡ ᠶᠢ ᠪᠠᠷᠤᠭ ᠤᠯᠵᠤ ᠰᠤᠨᠤᠰᠤᠭᠰᠠᠨ ᠴᠦ ᠦᠭᠡᠢ᠃ ᠮᠠᠨ ᠤ ᠰᠤᠮᠤᠨ ᠲᠦᠪ ᠲᠤ ᠬᠤᠳᠠᠯᠳᠤᠭ᠎ᠠ ᠡᠷᠬᠢᠯᠡᠳᠡᠭ ᠬᠤᠶᠠᠷ ᠡᠷᠦᠬᠡ ᠨᠢ ᠯᠠ ᠬᠢᠳᠡᠳ ᠬᠦᠮᠦᠨ᠃ ᠪᠢ ᠬᠢᠳᠠᠳ ᠦᠭᠡ ᠶᠢ ᠬᠢᠴᠢᠶᠡᠯ ᠤᠨ ᠲᠠᠩᠭᠢᠮ ᠪᠠ ᠬᠢᠳᠠᠳ ᠬᠡᠯᠡᠨ ᠤ ᠪᠠᠭᠰᠢ ᠠᠴᠠ ᠪᠠᠨ ᠯᠠ ᠰᠤᠷᠤᠭᠰᠠᠨ ᠶᠤᠮ᠃ ᠡᠶᠢᠮᠦ ᠤᠷᠴᠢᠨ ᠠᠬᠤᠢ ᠳᠤ ᠦᠰᠦᠭᠰᠡᠨ ᠪᠢ ᠤᠵᠤᠭᠤᠷ ᠰᠤᠶᠤᠯ ᠤᠨ ᠢᠶᠠᠨ ᠲᠠᠯᠠᠢ ᠶᠡᠭᠡ ᠪᠠᠶᠠᠨ ᠰᠠᠩ ᠳᠤ ᠪᠠᠶᠢᠵᠠᠢ ᠭᠡᠳᠡᠭ ᠢᠶᠠᠨ ᠬᠤᠵᠢᠮ ᠦᠭᠡᠯᠡᠢ ᠪᠤᠯᠤᠭᠠᠳ ᠰᠠᠶ᠋ᠢ ᠤᠬᠠᠭᠠᠭᠰᠠᠨ ᠶᠤᠮ᠃      ᠭᠤᠷᠪᠠ᠂ ᠰᠠᠶᠢᠬᠠᠨ ᠡᠭᠡᠴᠢ     ᠰᠠᠶᠢᠬᠠᠨ ᠡᠭᠡᠴᠢ ᠶᠢᠨ ᠨᠡᠷ᠎ᠡ ᠨᠢ ᠦᠷᠡᠵᠢᠮᠢᠰ ᠭᠡᠳᠡᠭ᠃ ᠶᠡᠷᠦᠳᠡᠭᠡᠨ ᠶᠠᠭᠠᠨ ᠬᠠᠨᠳᠠᠭᠠᠵᠠ᠂ ᠬᠦᠬᠡ ᠦᠮᠦᠳᠦ᠂ ᠬᠠᠷ᠎ᠠ ᠪᠦᠰ ᠱᠠᠬᠠᠢ ᠡᠮᠦᠰᠴᠦ᠂ ᠤᠷᠳᠤ ᠬᠠᠷ᠎ᠠ ᠭᠡᠵᠢᠭᠡ ᠪᠠᠨ ᠬᠤᠶᠠᠷ ᠰᠠᠯᠠᠭᠠᠯᠠᠨ ᠬᠦᠷᠦᠵᠦ ᠶᠠᠪᠤᠳᠠᠭ᠃ ᠪᠢ ᠡᠮᠡᠭᠳᠡᠢ ᠬᠦᠮᠦᠨ ᠤ ᠭᠤᠸ᠎ᠠ ᠰᠠᠶᠢᠬᠠᠨ ᠢ ᠰᠠᠶᠢᠬᠠᠨ ᠡᠭᠡᠴᠢ ᠪᠠᠷ ᠪᠠᠷᠢᠶᠠᠮᠵᠢᠯᠠᠨ ᠦᠵᠡᠳᠡᠭ᠃ ᠰᠠᠶᠢᠬᠠᠨ ᠡᠭᠡᠴᠢ ᠪᠢᠴᠢᠭ ᠰᠤᠶᠤᠯ ᠲᠠᠢ᠂ ᠦᠨᠳᠦᠷ ᠲᠤᠮᠳᠠᠳᠤ ᠲᠡᠭᠦᠰᠭᠡᠭᠰᠡᠨ ᠶᠤᠮ᠃ ᠠᠵᠢᠯᠴᠢ ᠬᠦᠳᠡᠯᠮᠦᠷᠢᠴᠢ᠂ ᠭᠠᠷ ᠤᠷᠠᠨ᠂ ᠴᠡᠭᠡᠵᠢ ᠰᠡᠷᠭᠡᠢ᠂ ᠲᠡᠭᠡᠬᠦ ᠳᠤ ᠪᠠᠨ ᠨᠠᠮᠤ ᠲᠠᠷᠤᠤᠬᠠᠨ ᠵᠠᠩ ᠲᠠᠢ᠂ ᠦᠭᠡ ᠬᠡᠯᠡᠬᠦ ᠨᠢ ᠡᠶᠡᠯᠳᠡᠭ᠂ ᠬᠦᠳᠡᠯᠵᠦ ᠪᠠᠷᠢᠬᠤ ᠨᠢ ᠭᠦᠩᠭᠡᠨ ᠱᠦᠩᠭᠡᠨ᠃ ᠲᠡᠭᠰᠢ ᠴᠠᠭᠠᠨ ᠰᠢᠳᠦ ᠪᠠᠨ ᠢᠷᠠᠯᠵᠠᠳᠠᠯ᠎ᠠ ᠢᠨᠢᠶᠡᠬᠦ ᠨᠢ ᠪᠠᠬ᠎ᠠ ᠶᠢ ᠲᠠᠳᠠᠮ᠎ᠠ᠃    ᠪᠢ ᠠᠯᠴᠠᠷ ᠪᠠᠯᠴᠠᠷ ᠠᠯᠬᠤᠮᠠᠭᠴᠠ ᠵᠡᠭᠦᠨ ᠭᠡᠷ ᠤᠨ ᠰᠠᠶᠢᠬᠠᠨ ᠡᠭᠡᠴᠢ ᠶᠢᠨ ᠢᠶᠠᠨ ᠰᠤᠷᠭᠠᠭᠤᠯᠢ ᠠᠴᠠ ᠪᠠᠨ ᠬᠠᠷᠢᠵᠤ ᠢᠷᠡᠭᠡᠳ ᠨᠤᠭᠤᠭᠠᠨ ᠪᠤᠭᠴᠤᠨ ᠠᠴᠠ ᠪᠠᠨ ᠨᠤᠮ ᠲᠡᠪᠳᠡᠷ ᠢᠶᠠᠨ ᠭᠠᠷᠭᠠᠵᠤ ᠱᠠᠭᠠᠶᠢᠵᠤ ᠪᠠᠶᠢᠬᠤ ᠶᠢ ᠤᠯᠵᠤ ᠦᠵᠡᠭᠰᠡᠨ᠃ ᠰᠠᠶᠢᠬᠠᠨ ᠡᠭᠡᠴᠢ ᠬᠤᠷᠠᠭ᠎ᠠ ᠲᠤᠭᠤᠯ ᠬᠠᠷᠢᠭᠤᠯᠬᠤ ᠪᠤᠶᠤ ᠬᠡᠬᠡᠷ᠎ᠡ ᠵᠢᠮᠢᠰ ᠲᠡᠭᠦᠬᠦ ᠪᠠᠷ ᠭᠠᠷᠬᠤ ᠭᠡᠪᠡᠯ ᠪᠢ ᠬᠤᠷᠮᠤᠢ ᠡᠩᠭᠡᠷ ᠠᠴᠠ ᠨᠢ ᠵᠠᠭᠤᠷᠠᠵᠤ᠂ ︽ᠪᠢ ᠪᠠᠰᠠ ᠲᠠᠭᠠᠨ᠎ᠠ︾ ᠭᠡᠵᠦ ᠤᠬᠢᠯᠠᠵᠤ ᠪᠠᠶᠢᠭᠰᠠᠨ ᠮᠢᠨᠢ ᠪᠦᠦᠷ ᠲᠦᠦᠷ ᠰᠠᠨᠠᠭᠳᠠᠨ᠎ᠠ᠃ ᠰᠠᠶᠢᠬᠠᠨ ᠡᠭᠡᠴᠢ ᠬᠡᠳᠦᠨ ᠬᠦᠦ ᠲᠡᠭᠦᠦ ᠲᠠᠢ ᠪᠠᠶᠢᠭᠰᠠᠨ ᠠᠴᠠ ᠪᠤᠯᠪᠠ ᠤᠤ᠂ ᠨᠠᠳᠠ ᠶᠢ ᠬᠡᠦᠬᠡᠨ ᠲᠡᠭᠦᠦ ᠭᠡᠵᠦ ᠡᠩᠭᠦᠷᠡᠶᠢᠯᠡᠨ ᠰᠠᠨᠠᠳᠠᠭ ᠪᠦᠭᠡᠳ ᠭᠠᠭᠴᠠ ᠬᠤᠶᠠᠷ ᠤᠯᠤᠭᠰᠠᠨ ᠰᠢᠬᠢᠷ ᠠᠴᠠ ᠪᠠᠨ ᠨᠠᠳᠠ ᠰᠡᠮᠡᠭᠡᠷ ᠦᠭᠳᠡᠭ ᠪᠠᠶᠢᠪᠠ᠃ ᠰᠠᠶᠢᠬᠠᠨ ᠡᠭᠡᠴᠢ ᠨᠠᠳᠠ ᠲᠡᠶᠢᠮᠦ ᠯᠠ ᠰᠠᠶᠢᠬᠠᠨ ᠬᠠᠨᠳᠤᠳᠠᠭ ᠪᠦᠭᠡᠳ ᠮᠢᠨᠦ ᠰᠡᠳᠬᠢᠯ ᠳᠤ ᠦᠵᠡᠰᠭᠦᠯᠡᠩ ᠰᠠᠶᠢᠬᠠᠨ ᠤ ᠪᠦᠷᠢᠯᠸ᠎ᠠ ᠰᠢᠭ ᠰᠠᠨᠠᠭᠳᠠᠳᠠᠭ ᠲᠤᠯᠠ ᠪᠢ ᠶᠡᠷᠦ ᠠᠴᠠ ᠰᠠᠶᠢᠬᠠᠨ ᠡᠭᠡᠴᠢ ᠶᠢ ᠨᠡᠷ᠎ᠡ ᠪᠠᠷ ᠨᠢ ᠲᠠᠭᠤᠳᠠᠳᠠᠭ ᠦᠭᠡᠢ᠂ ︽ᠭᠠ ᠭᠠ ᠡᠭᠡᠴᠢ︾᠂ ︽ᠰᠠᠶᠢᠬᠠᠨ ᠡᠭᠡᠴᠢ︾ ᠭᠡᠵᠦ ᠲᠠᠭᠤᠳᠠᠭᠰᠠᠭᠠᠷ ᠵᠠᠩᠰᠢᠴᠢᠬᠠᠵᠠᠢ᠃    ᠨᠢᠭᠡᠨ ᠵᠤᠨ ᠤ ᠠᠮᠠᠷᠠᠯᠳᠠ ᠠᠴᠠ ᠰᠠᠶᠢᠬᠠᠨ ᠡᠭᠡᠴᠢ ᠦᠨᠳᠦᠷ ᠲᠤᠮᠳᠠᠳᠤ ᠪᠠᠨ ᠲᠡᠭᠦᠰᠭᠡᠴᠢᠭᠡᠭᠰᠡᠨ ᠭᠡᠨ᠎ᠡ᠂ ᠲᠠᠬᠢᠵᠤ ᠰᠤᠷᠭᠠᠭᠤᠯᠢ ᠳᠤ ᠤᠴᠢᠬᠤ ᠦᠭᠡᠢ ᠯᠠᠢ ᠭᠡᠨ᠎ᠡ᠃ ᠪᠢ ᠲᠤᠩ ᠪᠠᠶᠠᠷᠯᠠᠪᠠ᠃ ᠰᠠᠶᠢᠬᠠᠨ ᠡᠭᠡᠴᠢ ᠬᠡᠳᠦᠨ ᠲᠡᠭᠦᠦ ᠨᠠᠷ ᠢᠶᠠᠨ ᠪᠢᠴᠢᠭ ᠦᠵᠡᠭᠦᠯᠬᠦ ᠶᠢ ᠪᠤᠳᠤᠵᠤ ᠦᠪᠡᠷ ᠢᠶᠠᠨ ᠲᠠᠪᠳᠠᠨ ᠰᠤᠷᠤᠯᠴᠠᠭᠰᠠᠨ ᠦᠭᠡᠢ᠂ ᠬᠦᠳᠡᠭᠡ ᠶᠢᠨ ᠪᠤᠷᠤ ᠠᠵᠢᠯ ᠳᠤ ᠪᠠᠨ ᠵᠢᠳᠭᠦᠪᠡ᠃ ᠰᠠᠶᠢᠬᠠᠨ ᠡᠭᠡᠴᠢ ᠤᠳᠠᠯ ᠦᠭᠡᠢ ᠤᠶᠤᠳᠠᠯ ᠬᠢᠳᠡᠯ ᠰᠣᠷᠴᠤ᠂ ᠠᠶᠢᠯ ᠠᠶᠢᠮᠠᠭ ᠲᠤ ᠪᠠᠨ ᠭᠠᠷ ᠤᠷᠠᠨ᠂ ᠠᠵᠢᠯᠴᠢ᠂ ᠤᠬᠠᠭᠠᠨ ᠲᠠᠢ ᠬᠡᠦᠬᠡᠨ ᠭᠡᠵᠦ ᠪᠢᠰᠢᠷᠡᠭᠳᠡᠬᠦ ᠪᠤᠯᠪᠠ᠃ ᠰᠠᠶᠢᠬᠠᠨ ᠡᠭᠡᠴᠢ ᠶᠢᠨ ᠬᠤᠸᠠᠷ ᠤᠷᠠᠯᠠᠬᠤ᠂ ᠱᠠᠬᠠᠢ ᠤᠶᠤᠬᠤ ᠶᠢ ᠨᠢ ᠪᠢ ᠶᠡᠬᠡᠳᠡ ᠦᠵᠡᠬᠦ ᠲᠤᠷᠠᠳᠠᠢ᠃ ᠡᠭᠡᠴᠢ ᠮᠢᠨᠢ ᠠᠯᠢ ᠵᠠᠪ ᠢᠶᠠᠷ ᠢᠶᠠᠨ ᠸᠠᠳᠧᠩ ᠲᠦᠭᠦᠷᠡᠩ ᠱᠠᠬᠠᠢ ᠤᠶᠤᠴᠢᠬᠠᠭᠰᠠᠨ ᠢ ᠪᠤᠤ ᠮᠡᠳᠡ᠃ ᠪᠢ ᠭᠡᠷ ᠲᠤ ᠪᠠᠨ ᠬᠠᠷᠢᠭᠠᠳ ᠡᠵᠢ ᠳᠤ ᠪᠠᠨ᠄ ︽ᠰᠠᠶᠢᠬᠠᠨ ᠡᠭᠡᠴᠢ ᠲᠡᠶᠢᠮᠦ ᠠᠷᠪᠢᠨ ᠱᠠᠬᠠᠢ ᠤᠶᠤᠭᠠᠳ ᠶᠠᠭᠠᠬᠢᠬᠤ ᠭᠡᠰᠡᠨ ᠪᠤᠢ︖︾ ᠭᠡᠰᠡᠨ ᠳᠤ ᠡᠵᠢ᠄ ︽ᠬᠠᠷᠢ ᠳᠤ ᠮᠤᠷᠳᠠᠬᠤ ᠦᠶᠡᠰ ᠬᠠᠳᠠᠮ ᠤᠨ ᠭᠠᠵᠠᠷ ᠲᠤ ᠪᠠᠨ ᠠᠪᠠᠴᠢᠬᠤ ᠭᠡᠵᠦ ᠪᠠᠶᠢᠨ᠎ᠠ ᠰᠢᠳᠡ ︾ ᠭᠡᠪᠡ᠃ ᠪᠢ᠄ ︽ᠰᠠᠶᠢᠬᠠᠨ ᠡᠭᠡᠴᠢ ᠬᠦᠷᠭᠡᠨ ᠴᠦ ᠦᠭᠡᠢ ᠪᠠᠶᠢᠭᠠᠳ ᠶᠠᠭᠤᠨ ᠳᠤ ᠶᠠᠭᠠᠷᠠᠭᠠᠳ ᠲᠡᠶᠢᠮᠦ ᠠᠷᠪᠢᠨ ᠱᠠᠬᠠᠢ ᠤᠶᠤᠬᠤ ᠪᠤᠢ︖︾ ᠭᠡᠰᠡᠨ ᠳᠤ ᠡᠵᠢ᠄ ︽ᠬᠤᠷᠢ ᠬᠦᠷᠴᠢᠭᠡᠭᠰᠡᠨ ᠬᠡᠦᠬᠡᠨ ᠬᠦᠮᠦᠨ᠂ ᠱᠠᠬᠠᠢ ᠤᠶᠤᠵᠤ ᠲᠠᠯᠪᠢᠬᠤ ᠦᠭᠡᠢ ᠶᠠᠭᠠᠬᠢᠬᠤᠪ᠂ ᠬᠡᠦᠬᠡᠨ ᠬᠦᠮᠦᠨ ᠬᠠᠳᠠᠮ ᠳᠤ ᠤᠴᠢᠬᠤ ᠳᠤ ᠪᠠᠨ ᠬᠠᠳᠠᠮ ᠤᠨ ᠢᠶᠠᠨ ᠭᠡᠷ ᠤᠨ ᠬᠦᠮᠦᠨ ᠨᠢᠭᠡᠪᠦᠷᠢ ᠳᠤ ᠱᠠᠬᠠᠢ ᠶᠢᠨ ᠪᠡᠯᠡᠭ ᠲᠠᠢ ᠤᠴᠢᠳᠠᠭ ᠰᠢᠦ︕ ᠠᠢ᠂ ᠦᠷᠡᠵᠢᠮᠢᠰ ᠬᠡᠳᠦᠨ ᠲᠡᠭᠦᠦ ᠳᠤ ᠪᠠᠨ ᠱᠠᠬᠠᠢ ᠤᠶᠤᠵᠤ ᠦᠭᠭᠦᠭᠡᠳ ᠪᠠᠰᠠ ᠬᠠᠷᠢᠯᠠᠬᠤ ᠦᠶ᠎ᠡ ᠶᠢᠨ ᠱᠠᠬᠠᠢ ᠪᠠᠨ ᠪᠡᠯᠡᠳᠭᠡᠵᠦ ᠪᠠᠶᠢᠬᠤ ᠠᠵᠢᠯ ᠲᠠᠢ ᠤᠬᠠᠭᠠᠨ ᠲᠠᠢ ᠬᠡᠦᠬᠡᠨ ᠰᠢᠦ᠂ ᠠᠯᠢ ᠭᠡᠷ ᠤᠨ ᠪᠤᠶᠠᠨ ᠲᠠᠢ ᠬᠦᠦ ᠨᠢ ᠤᠯᠳᠠᠭ ᠪᠤᠯ︖︾ ᠭᠡᠯ᠎ᠡ᠃ ᠪᠢ ᠰᠠᠶᠢᠬᠠᠨ ᠡᠭᠡᠴᠢ ᠪᠠᠨ ᠬᠠᠶᠢᠷᠠᠯᠠᠵᠤ᠄ ︽ᠪᠢ ᠰᠠᠶ᠋ᠢ ᠬᠤᠵᠢᠮ ᠱᠠᠬᠠᠢ ᠤᠶᠤᠵᠤ ᠬᠤᠷᠤᠭᠤ ᠬᠢᠮᠤᠰᠤ ᠪᠠᠨ ᠪᠠᠷᠠᠬᠤ ᠦᠭᠡᠢ᠂ ᠬᠠᠷ᠎ᠠ ᠶᠠᠷᠰᠢᠭ᠂ ᠪᠠᠰᠠ ᠬᠦᠮᠦᠨ ᠪᠦᠷᠢ ᠳᠤ ᠨᠢᠭᠡ ᠵᠦᠢᠷᠡᠢ ᠤᠶᠤᠬᠤ ᠭᠡᠨ᠎ᠡ᠂ ᠪᠢ ᠯᠠ ᠤᠶᠤᠬᠤ ᠦᠭᠡᠢ︾ ᠭᠡᠵᠦ ᠤᠷᠤᠭᠤᠯ ᠴᠤᠷᠪᠤᠶᠢᠯᠭᠠᠬᠤ ᠳᠤ ᠡᠵᠢ ᠮᠢᠨᠢ᠄ ︽ᠲᠡᠨᠡᠭ ᠬᠡᠦᠬᠡᠨ ᠳ᠋ᠠ︕ ᠬᠤᠵᠢᠮ ᠪᠢᠴᠢᠭ ᠨᠤᠮ ᠢᠶᠠᠨ ᠰᠠᠶᠢᠨ ᠰᠤᠷᠴᠤ ᠶᠠᠪᠤ︕︾ ᠭᠡᠵᠦ ᠨᠠᠳᠠ ᠶᠢ ᠦᠭᠦᠭᠡᠷᠳᠡᠨ ᠦᠨᠦᠰᠴᠦ ᠪᠢᠯᠡ᠃    ᠬᠠᠷᠠᠵᠤ ᠪᠠᠶᠢᠳᠠᠯ᠎ᠠ ᠪᠢ ᠨᠠᠢᠮᠠᠨ ᠨᠠᠰᠤ ᠬᠦᠷᠴᠦ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠯ᠎ᠠ᠃ ᠪᠢ ᠡᠳᠦᠷ ᠤᠨ ᠰᠤᠷᠤᠭᠰᠠᠨ ᠢᠶᠠᠨ ᠰᠠᠶᠢᠬᠠᠨ ᠡᠭᠡᠴᠢ ᠳᠤ ᠤᠩᠰᠢᠵᠤ ᠦᠭᠪᠡᠯ ᠰᠠᠶᠢᠬᠠᠨ ᠡᠭᠡᠴᠢ ᠮᠢᠨᠢ᠄ ︽ᠮᠢᠨᠦ ᠮᠠᠭᠤ ᠭᠤᠯᠤ᠂ ᠪᠢᠴᠢᠭ ᠢᠶᠠᠨ ᠰᠠᠶᠢᠨ ᠰᠤᠷᠴᠤ᠂ ᠬᠤᠵᠢᠮ ᠬᠤᠯᠠ ᠶᠠᠪᠤᠨ᠎ᠠ ᠰᠢᠦ︾ ᠭᠡᠳᠡᠭ᠃ ᠰᠠᠶᠢᠬᠠᠨ ᠡᠭᠡᠴᠢ ᠮᠢᠨᠢ ᠭᠡᠨᠡᠳᠳᠡ ᠡᠪᠡᠳᠴᠦ᠂ ᠵᠡᠭᠦᠨ ᠭᠡᠷ ᠤᠨ ᠠᠪᠠᠭ᠎ᠠ ᠬᠤᠳᠠ ᠳᠤ ᠠᠪᠠᠴᠢᠵᠦ ᠦᠵᠡᠭᠦᠯᠦᠭᠰᠡᠨ ᠪᠤᠯᠪᠠᠴᠤ ᠲᠤᠰᠠ ᠪᠤᠯᠤᠭᠰᠠᠨ ᠦᠭᠡᠢ ᠂ ᠪᠢᠳᠡ ᠪᠦᠬᠦᠨ ᠢ ᠤᠬᠢᠯᠠᠭᠤᠯᠵᠤ ᠶᠢᠷᠳᠢᠨᠴᠦ ᠠᠴᠠ ᠠᠩᠭᠢᠵᠢᠷᠠᠯ᠎ᠠ᠃ ᠪᠢ ᠨᠢᠭᠡᠨ ᠵᠡᠷᠭᠡ ᠦᠨᠦᠴᠢᠷᠡᠭᠰᠡᠨ ᠰᠢᠭ ᠭᠤᠨᠢᠭᠰᠠᠨ ᠪᠤᠯᠪᠠᠴᠤ ᠤᠳᠠᠯ ᠦᠭᠡᠢ ᠮᠠᠷᠳᠠᠴᠢᠬᠠᠵᠠᠢ᠃ ᠰᠤᠷᠭᠠᠭᠤᠯᠢ ᠰᠤᠶᠤᠯ ᠤᠨ ᠮᠦᠷ ᠢ ᠬᠦᠭᠡᠭᠡᠵᠦ᠂ ᠤᠯᠠᠨ ᠬᠠᠮᠳᠤ ᠨᠠᠶᠢᠵᠠ ᠲᠠᠢ ᠪᠤᠯᠵᠤ᠂ ᠭᠡᠷ ᠨᠤᠳᠤᠭ ᠠᠴᠠ ᠪᠠᠨ ᠰᠠᠯᠵᠤ ᠡᠷᠳᠡᠮ ᠤᠨ ᠠᠶᠠᠨ ᠳᠤ ᠮᠤᠷᠳᠠᠯ᠎ᠠ᠃    ᠪᠢ ᠪᠠᠭᠰᠢ ᠶᠢᠨ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠬᠤ ᠦᠶ᠎ᠡ ᠳᠤ᠂ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠡᠨ ᠤ ᠭᠤᠤᠯᠳᠤ ᠪᠤᠷᠤ ᠶᠢᠨ ᠠᠩᠭᠢᠯᠤᠮ᠎ᠠ ᠦᠨᠦᠷ ᠢ ᠤᠯᠵᠤ ᠦᠨᠦᠷᠳᠦᠬᠦ ᠦᠶ᠎ᠡ ᠳᠤ ᠦᠪᠡᠷ ᠤᠨ ᠡᠷᠬᠡ ᠦᠭᠡᠢ ᠰᠠᠶᠢᠬᠠᠨ ᠡᠭᠡᠴᠢ ᠪᠠᠨ ᠪᠤᠳᠤᠵᠤ ᠤᠯᠪᠠ᠃ ᠤᠴᠢᠷ ᠨᠢ ᠭᠤᠤᠯᠳᠤ ᠪᠤᠷᠤ ᠶᠢᠨ ᠠᠩᠭᠢᠯᠤᠮ᠎ᠠ ᠦᠨᠦᠷ ᠨᠢ ᠰᠠᠶᠢᠬᠠᠨ ᠡᠭᠡᠴᠢ ᠶᠢᠨ ᠮᠢᠨᠢ ᠲᠦᠷᠭᠢᠵᠦ ᠪᠠᠶᠢᠭᠰᠠᠨ ᠡᠩᠭᠡᠰᠭᠡ ᠶᠢᠨ ᠦᠨᠦᠷ ᠲᠠᠢ ᠡᠭᠡᠭᠡ ᠠᠳᠠᠯᠢᠬᠠᠨ ᠠᠩᠭᠢᠯᠤᠮ᠎ᠠ ᠱᠠᠩᠳᠠᠭᠤᠨ᠃    ᠰᠠᠶᠢᠬᠠᠨ ᠡᠭᠡᠴᠢ ᠮᠢᠨᠢ ᠡᠨᠡ ᠦᠶ᠎ᠡ ᠳᠤ ᠲᠦᠷᠦᠯ ᠤᠯᠤᠭᠠᠳ ᠪᠠᠰᠠ ᠨᠡᠯᠢᠶᠡᠳ ᠲᠤᠮᠤ ᠪᠤᠯᠴᠢᠬᠠᠭᠰᠠᠨ ᠪᠠᠶᠢᠬ᠎ᠠ ᠃ ᠰᠠᠶᠢᠬᠠᠨ ᠡᠭᠡᠴᠢ ᠶᠢ ᠬᠦᠭᠡᠭᠡᠴᠡᠯᠳᠦᠵᠦ ᠪᠠᠶᠢᠭᠰᠠᠨ ᠠᠶᠢᠯ ᠤᠨ ᠬᠦᠦᠴᠦᠦᠯ ᠠᠴᠠ ᠲᠡᠷᠡ ᠸᠠᠳᠧᠩ ᠲᠦᠭᠦᠷᠡᠩ ᠱᠠᠬᠠᠢ ᠠᠴᠠ ᠨᠢᠬᠡ ᠵᠦᠢᠷᠡᠢ ᠶᠢ ᠨᠢ ᠴᠤ ᠤᠯᠵᠤ ᠬᠦᠷᠳᠡᠭᠰᠡᠨ ᠦᠭᠡᠢ᠃ ᠰᠠᠶᠢᠬᠠᠨ ᠡᠭᠡᠴᠢ ᠮᠢᠨᠢ ᠬᠠᠷ᠎ᠠ ᠬᠦᠦ ᠶᠢᠨ ᠬᠠᠶᠢᠷ᠎ᠠ ᠶᠢ ᠴᠤ ᠮᠡᠳᠡᠷᠡᠭᠡ ᠦᠭᠡᠢ ᠪᠠᠷ ᠬᠤᠷᠸ᠎ᠠ ᠠᠴᠠ ᠠᠩᠭᠢᠵᠢᠷᠠᠴᠢᠬᠠᠯ᠎ᠠ᠃ ᠪᠢ ᠰᠠᠶᠢᠬᠠᠨ ᠡᠭᠡᠴᠢ ᠪᠠᠨ ᠡᠩᠰᠡᠷᠡᠳᠡᠯ᠎ᠡ ᠰᠠᠨᠠᠪᠠ᠃    ᠪᠢ ᠦᠪᠡᠰᠦᠪᠡᠨ ᠬᠡᠦᠬᠡᠨ ᠲᠠᠢ ᠪᠤᠯᠤᠭᠠᠳ ᠬᠦᠷᠰᠢ ᠶᠢᠨ ᠠᠪᠠᠭ᠎ᠠ ᠪᠠ ᠠᠪᠠᠭ᠎ᠠ ᠡᠵᠢ ᠶᠢᠨ ᠰᠠᠶᠢᠬᠠᠨ ᠡᠭᠡᠴᠢ ᠶᠢ ᠠᠯᠳᠠᠭᠰᠠᠨ ᠤ ᠲᠠᠷᠠᠭᠠᠬᠢ ᠭᠦᠨ ᠭᠤᠨᠢᠭ ᠢ ᠵᠢᠷᠦᠬᠡ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠮᠡᠳᠡᠷᠡᠪᠡ᠃    ᠰᠠᠶᠢᠬᠠᠨ ᠡᠭᠡᠴᠢ ᠮᠢᠨᠢ ᠤᠳᠤ ᠴᠦ ᠭᠡᠰᠡᠨ ᠮᠢᠨᠦ ᠰᠡᠳᠬᠢᠯ ᠳᠤ ᠭᠤᠸ᠎ᠠ ᠰᠠᠶᠢᠬᠠᠨ ᠤ ᠲᠠᠭᠢᠨᠢ ᠰᠢᠬ ᠪᠤᠳᠤᠭᠳᠠᠭᠰᠠᠭᠠᠷ ᠁ ᠪᠢ ᠲᠠᠨ ᠢ ᠪᠠᠨ ᠲᠤᠷᠠᠳᠬᠠᠵᠤ ᠠᠩᠬ᠎ᠠ ᠲᠡᠮᠳᠡᠭᠯᠡᠵᠦ ᠲᠠᠯᠪᠢᠬᠤ ᠳᠤ ᠪᠠᠨ ᠰᠤᠷᠮᠤᠤᠰᠤ ᠮᠢᠨᠢ ᠴᠢᠬᠢᠭᠳᠦᠪᠡ ᠁     ᠵᠣᠬᠢᠶᠠᠭᠴᠢ᠄ ᠴᠢ᠊᠂ ᠲᠤᠯᠭᠢᠶᠠᠨ    ᠵᠤᠬᠢᠶᠠᠬᠴᠢ ᠶᠢᠨ ᠬᠠᠶ᠋ᠢᠭ᠄ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠪᠠᠶᠠᠨᠬᠤᠰᠢᠭᠤ ᠵᠢᠷᠭᠤᠳᠤᠭᠠᠷ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ
  
ᠢᠷᠡᠯᠲᠡ᠄ ᠬᠢᠩᠭᠠᠨ ᠤ ᠮᠤᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠵᠤᠨ ᠤ ᠮᠦᠷᠦᠭᠡᠳᠦᠯ
ᠬᠦᠭᠵᠢᠵᠤ ᠪᠠᠶᠢᠭ᠎ᠠ ᠬᠦᠷᠠᠯ ᠮᠢᠨᠢ
ᠡᠪᠦᠯᠵᠢᠶᠡᠨ ᠳᠤ ᠣᠴᠢᠶᠣ
ᠮᠢᠨᠤ ᠨᠤᠳᠤᠭ ᠤᠨ ᠵᠤᠨ ᠤ ᠥᠳᠡᠰᠢ ᠰᠠᠶᠢᠬᠠᠨ
ᠵᠠᠰᠠᠭᠳᠣ ᠴᠠᠭᠠᠨ ᠠᠳᠣᠭᠤᠳ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号