ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠴᠢᠮᠬᠢᠭᠦᠷ ᠲᠤ ᠬᠦᠷᠦᠶᠤ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-09-06
   ︵ᠬᠦᠤᠷᠨᠢᠭ᠍ᠰᠡᠨ ᠨᠠᠶᠢᠷᠠᠭᠤᠯᠤᠯ︶      ᠲᠦᠯ ᠳᠠᠭᠤᠰᠴᠤ᠂ ᠲᠠᠮᠢᠷ ᠰᠡᠯᠪᠢᠬᠦ ᠬᠤᠨᠢᠳ ᠰᠢᠯᠢ ᠶᠢᠨ ᠨᠦᠮᠦᠷᠢ᠂ ᠭᠤᠤᠯ ᠤᠨ ᠨᠤᠭᠤ ᠳᠠᠭᠠᠤ ᠴᠣᠬᠤᠶᠢᠭᠰᠠᠨ ᠬᠦᠬᠡ ᠨᠣᠭᠤᠭ᠎ᠠ ᠶᠢᠨ ᠦᠨᠦᠷ ᠲᠤ ᠲᠠᠳᠠᠭᠳᠠᠵᠤ᠂ ᠡᠶᠢᠰᠢ ᠲᠡᠶᠢᠰᠢ ᠬᠤᠰᠢᠭᠤ ᠳᠣᠷᠪᠤᠭᠤᠨᠠᠵᠤ ᠭᠦᠶᠦᠯᠳᠦᠨ᠎ᠡ᠃    ᠬᠠᠪᠤᠷ ᠤᠨ ᠵᠡᠷᠭᠡᠯᠭᠡᠨ ᠤ ᠬᠠᠴᠠᠷ ᠢ ᠢᠯᠪᠢᠬᠦ ᠬᠠᠯᠠᠭᠤᠨ ᠠᠮᠢᠰᠬᠤᠯ ᠳᠤ ᠬᠠᠪᠤᠩᠨᠠᠭᠰᠠᠨ ᠨᠣᠤᠰᠤ ᠨᠢᠯᠭᠠᠷᠳᠠᠭᠰᠠᠨ ᠨᠣᠤᠯᠤᠷ ᠢᠶᠠᠨ ᠴᠢᠳᠠᠨ ᠶᠠᠳᠠᠨ ᠠᠴᠢᠵᠤ ᠶᠠᠪᠤᠭ᠎ᠠ ᠬᠤᠨᠢᠨ ᠰᠦᠷᠦᠭ ᠬᠠᠬᠢᠷ ᠬᠦᠢᠳᠡᠨ ᠠᠴᠠ ᠵᠠᠶᠢᠳᠠᠵᠤ᠂ ᠬᠠᠭᠳᠠᠯᠠᠬᠤ ᠬᠠᠪᠤᠷ ᠤᠨ ᠬᠠᠩᠬᠤᠯᠤᠭᠤᠨ ᠴᠠᠭ ᠲᠤ ᠡᠰᠡᠨ ᠮᠡᠨᠳᠦ ᠣᠷᠤᠭᠰᠠᠨ ᠳᠠᠭᠠᠨ ᠣᠪᠤᠭᠠᠨᠠᠵᠤ᠂ ᠲᠦᠯ ᠢᠶᠠᠨ ᠬᠠᠶᠠ ᠬᠠᠷᠠᠨ ᠵᠣᠭᠰᠤᠭᠠᠳ᠂ ᠲᠦᠬᠦᠵᠦ ᠢᠷᠡᠬᠦ ᠵᠦᠭᠡᠯᠡᠨ ᠵᠦᠯᠭᠡᠨ ᠳᠤ ᠴᠤᠮᠴᠦ᠋ᠢᠨ ᠬᠠᠪᠢᠳᠠᠨ᠎ᠠ᠃    ᠬᠠᠰᠢᠷ ᠬᠤᠨᠢᠴᠢᠨ ᠬᠤᠤᠰᠪᠠᠶᠠᠷ ᠬᠤᠨᠢ ᠪᠠᠨ ᠬᠤᠮᠢᠵᠦ ᠬᠡᠪᠳᠡᠷᠢ ᠵᠦᠭ ᠨᠢ ᠲᠠᠭᠤᠬᠤ ᠵᠠᠪᠰᠡᠷ ᠴᠢᠮᠬᠢᠭᠦᠷ ᠶᠣᠪᠤᠷᠤᠨ ᠢᠷᠡᠬᠦ ᠶᠢ ᠪᠣᠳᠤᠨ᠎ᠠ᠃    ᠬᠤᠤᠰᠪᠠᠶᠠᠷ ᠤᠨ ᠬᠢᠨ ᠬᠦᠷᠦᠩᠭᠡ ᠵᠤᠵᠠᠭᠠᠨ᠂ ᠬᠡᠤᠬᠡᠳ ᠰᠢᠣᠬᠠᠳ ᠣᠯᠠᠨᠳᠠᠢ ᠭᠡᠷ ᠪᠦᠯᠢ᠃ ᠬᠦᠷᠢᠶᠡᠨ ᠡᠭᠦᠳᠡᠨ ᠳᠡᠭᠡᠨ ᠬᠦᠷᠴᠤ ᠢᠷᠡᠬᠦ ᠲᠠᠢ ᠵᠡᠷᠭᠡ ᠬᠦᠭᠰᠢᠨ ᠨᠢ ᠢᠮᠠᠭᠠᠨ ᠮᠢᠬ᠎ᠠ ᠬᠠᠯᠠᠭᠤᠨ ᠳᠠᠭᠠᠨ ᠰᠠᠶᠢᠨ ᠭᠡᠭᠰᠡᠭᠡᠷ ᠪᠣᠭᠳᠤᠭᠤᠰᠤ ᠴᠢᠮᠦᠭᠡ᠂ ᠪᠤᠷᠳᠤᠭᠰᠠᠨ ᠭᠡᠳᠡᠰᠦ᠂ ᠪᠣᠭᠤᠷᠰᠤᠭ ᠪᠣᠷᠠᠮ ᠭᠠᠷᠭᠠᠵᠤ᠂ ᠱᠦᠯᠦ ᠠᠶᠠᠭᠠᠯᠠᠭᠠᠳ ᠰᠦᠬᠦᠷᠡᠨ ᠰᠠᠭᠤᠨ᠎ᠠ᠃    — ᠬᠦᠢ᠂ ᠬᠦᠭᠰᠢᠨ ᠡ᠂ ᠴᠢᠮᠬᠢᠭᠦᠷ ᠰᠢᠬᠠᠵᠤ᠂ ᠴᠡᠭᠡᠷᠯᠡᠬᠦ ᠵᠦᠢᠯᠡᠰ ᠢᠶᠠᠨ ᠴᠡᠭᠡᠵᠢᠯᠡᠵᠤ ᠪᠠᠶᠢᠭᠠᠷᠠᠢ᠂ ᠪᠢᠯᠢᠭ ᠲᠠᠢ ᠰᠠᠭᠤᠵᠤ ᠪᠡᠯᠭᠡ ᠲᠠᠢ ᠦᠭᠡ ᠶᠠᠷᠢᠵᠤ ᠪᠠᠶᠢᠭᠠᠰᠠᠢ ᠭᠡᠳ ᠬᠠᠯᠠᠭᠤᠨ ᠱᠦᠯᠦ ᠣᠤᠭᠤᠵᠤ᠂ ᠬᠢᠳᠤᠭ᠎ᠠ ᠳᠠᠷᠤᠨ ᠮᠢᠬ᠎ᠠ ᠢᠳᠡᠨ᠎ᠡ᠃    — ᠡᠪᠦᠭᠡ ᠡ᠂ ᠴᠢᠮᠬᠢᠭᠦᠷ ᠭᠡᠳᠡᠭ ᠴᠢᠨᠢ ᠴᠢᠮᠬᠢᠵᠦ ᠲᠠᠳᠠᠬᠤ ᠶᠠᠪᠤᠳᠠᠯ ᠢ ᠬᠡᠯᠡᠵᠤ ᠪᠠᠶᠢᠨ᠎ᠠ ᠤᠤ︖ ᠭᠡᠵᠤ ᠬᠤᠶᠠᠳᠤᠭᠠᠷ ᠣᠨ ᠤ ᠬᠤᠨᠤᠭ ᠤᠨ ᠪᠠᠶᠢᠷᠢ ᠳᠤ ᠰᠠᠭᠤᠭ᠎ᠠ ᠦᠭᠡᠯᠡᠢ ᠣᠮᠪᠤᠯᠤ ᠨᠢ ᠤᠷᠤᠭᠤᠯ ᠳᠦᠷᠦᠨ ᠠᠰᠠᠭᠤᠨ᠎ᠠ᠃    — ᠲᠡᠶᠢᠮᠦ ᠭᠡᠳ ᠣᠶᠢᠷ᠎ᠠ ᠨᠢ ᠣᠴᠦ᠋ᠢᠵᠤ ᠰᠠᠭᠤᠨ ᠤᠷᠤᠭᠤᠯ ᠣᠮᠤᠯᠵᠠᠬᠤ ᠣᠮᠪᠤᠯᠤ ᠶᠢᠨ ᠢᠶᠠᠨ ᠤᠨᠵᠢᠢᠭᠰᠠᠨ ᠪᠦᠭᠡᠷ᠎ᠡ ᠶᠢ ᠬᠠᠷᠠᠩᠭᠤᠳᠠ ᠪᠣᠷᠤᠭᠤ ᠭᠠᠷ ᠢᠶᠠᠷ ᠲᠡᠮᠳᠡᠷᠬᠢᠯᠡᠵᠤ᠂ ᠪᠣᠭᠳᠤᠰ ᠰᠢᠯᠪᠢ ᠱᠤᠯᠤᠵᠤ ᠪᠠᠶᠢᠭ᠎ᠠ ᠬᠢᠳᠤᠭ᠎ᠠ ᠪᠠᠨ ᠬᠦᠨᠳᠡᠯᠡᠨ ᠪᠠᠷᠢᠵᠦ᠂ ︽ᠰᠡᠷ︾ ᠭᠡᠳᠡᠯ᠎ᠡ ᠲᠠᠰᠤᠯᠬᠤ ᠬᠦᠳᠡᠯᠦᠯ ᠪᠠᠷᠢᠯ ᠭᠠᠷᠭᠠᠭᠰᠠᠨ ᠳᠤ ᠵᠢᠭᠡ ᠣᠮᠪᠤᠯᠤ ᠬᠦᠤ ᠶᠢᠨ ᠬᠢᠨ ᠴᠢᠷᠠᠢ ᠴᠦᠭᠳᠦ᠋ᠢᠨ᠂ ᠰᠢᠨᠠ ᠲᠠᠭᠠᠨ ᠬᠦᠯᠦᠰᠦ ᠴᠢᠬᠠᠷᠠᠵᠤ᠂ ᠵᠠᠬ᠎ᠠ ᠳᠤᠨᠢ ᠪᠠᠶᠢᠭ᠎ᠠ ᠤᠮᠪᠤᠯᠤ ᠦᠬᠢᠨ ᠤ ᠬᠢᠨ ᠨᠢᠳᠦ ᠬᠠᠯᠢᠷᠠᠪᠠ᠃    — ᠬᠡᠤᠬᠡᠳ ᠡ᠂ ᠦᠨᠢ ᠡᠭᠦᠷᠢᠳᠡ ᠴᠡᠭᠡᠵᠢᠯᠡᠵᠤ ᠪᠠᠶᠢᠭᠠᠷᠠᠢ᠂ ᠤᠯᠠᠮᠵᠢᠯᠠᠵᠤ ᠶᠠᠪᠤᠭᠠᠷᠠᠢ᠃ ᠪᠠᠶᠠᠨ ᠦᠩᠰᠢᠭ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠡᠳ᠋ᠯᠡᠵᠤ ᠰᠠᠭᠤᠭ᠎ᠠ ᠪᠢᠳᠡ ᠠᠯᠠᠰᠢᠨ ᠢᠳᠡᠭᠡᠨ᠂ ᠤᠨᠤᠯᠭ᠎ᠠ ᠳᠡᠭᠦᠷᠭᠡ᠂ ᠠᠴᠢᠶ᠎ᠠ ᠲᠡᠭᠡᠭᠡᠪᠤᠷᠢ ᠳᠡᠭᠡᠨ ᠬᠡᠷᠡᠭᠰᠡᠬᠦ ᠮᠠᠯ ᠤᠨᠤᠭ᠎ᠠ ᠵᠢᠴᠢ ᠰᠦᠷᠦᠭ ᠤᠨ ᠲᠡᠩᠴᠡᠭᠦᠷᠢ᠂ ᠪᠡᠯᠴᠢᠭᠡᠷ ᠤᠨ ᠪᠠᠭᠳᠠᠭᠠᠮᠵᠢ ᠶᠢ ᠪᠠᠨ ᠪᠣᠳᠤᠯᠬᠢᠯᠠᠵᠤ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤᠨ ᠢᠶᠠᠨ ᠡᠷ᠎ᠡ ᠬᠦᠢᠰᠦᠳᠡᠨ ᠢ ᠲᠦᠯᠦᠪᠯᠡᠨ ᠵᠠᠰᠠᠵᠤ ᠶᠠᠪᠤᠳᠠᠭ ᠵᠠᠩᠰᠢᠯ ᠲᠠᠢ ᠰᠠᠨ᠃ ᠮᠤᠩᠭᠤᠯ ᠤᠨ ᠮᠤᠨᠳᠠᠭ ᠶᠡᠭᠡ ᠦᠭᠡᠰ ᠤᠨ ᠰᠠᠩ ᠳᠤ᠂ ᠦᠷᠢᠶ᠎ᠡ ᠶᠢ ᠡᠰᠭᠡᠬᠦ᠂ ᠬᠠᠭᠠᠷᠢᠬᠤ᠂ ᠵᠠᠰᠠᠬᠤ ᠭᠡᠵᠤ᠂ ᠡᠷ᠎ᠡ ᠪᠢᠷᠠᠭᠤ ᠶᠢ ᠠᠭᠳᠠᠯᠠᠬᠤ᠂ ᠴᠠᠭᠠᠯᠠᠬᠤ᠂ ᠪᠦᠴᠦᠬᠦ ᠂ ᠬᠤᠨᠢ ᠶᠢ ᠴᠢᠮᠬᠢᠬᠦ᠂ ᠬᠦᠩᠭᠡᠯᠡᠬᠦ᠂ ᠴᠢᠪᠢᠯᠡᠬᠦ ᠁ ᠵᠡᠷᠭᠡ ᠠᠮᠢᠳᠠᠨ ᠠᠳᠤᠭᠤᠰᠤ ᠶᠢ ᠲᠤᠰᠬᠠᠶᠢᠯᠠᠨ ᠨᠡᠷᠡᠯᠡᠭᠰᠡᠨ ᠤᠷᠭᠤᠭ᠎ᠠ ᠬᠡᠯᠡᠯᠭᠡ᠂ ᠠᠮᠢᠳᠦ ᠪᠣᠰᠤᠭ᠎ᠠ ᠦᠭᠡᠰ ᠠᠯᠢ ᠣᠯᠠᠨ ᠪᠠᠶᠢᠳᠠᠭ ᠰᠢᠤ᠃ ᠬᠤᠨᠢ᠂ ᠪᠡᠴᠢ᠂ ᠨᠣᠬᠠᠢ ᠡᠳᠦᠷ ᠢ ᠬᠡᠰᠢᠭ ᠡᠳᠦᠷ ᠭᠡᠵᠤ ᠬᠤᠷᠠᠭ᠎ᠠ ᠢᠰᠢᠭᠡ ᠶᠢ ᠴᠢᠮᠬᠢᠬᠦ ᠦᠭᠡᠢ ᠬᠤᠷᠢᠭ᠎ᠠ ᠴᠡᠭᠡᠷ ᠲᠠᠢ ᠶᠠᠪᠤᠳᠠᠭ ᠮᠦᠷᠳᠡᠭᠡᠨ ᠲᠠᠬᠢᠶ᠎ᠠ ᠡᠳᠦᠷ ᠪᠣᠯᠤᠨ ᠲᠠᠤᠯᠠᠢ ᠡᠳᠦᠷ ᠢ ᠰᠤᠩᠭᠤᠨ ᠴᠢᠮᠬᠢᠭᠦᠷ ᠢᠶᠠᠨ ᠶᠠᠪᠤᠭᠳᠠᠭᠤᠯᠳᠠᠭ ᠤᠯᠠᠮᠵᠢᠯᠠᠯ ᠲᠠᠢ᠃ ᠤᠴᠢᠷ ᠨᠢ ᠲᠠᠬᠢᠶ᠎ᠠ ᠪᠣᠯ ᠬᠤᠷᠤᠬᠠᠢ ᠰᠢᠪᠠᠵᠢ ᠢᠳᠡᠳᠡᠭ᠂ ᠲᠠᠤᠯᠠᠢ ᠪᠣᠯ ᠬᠦᠩᠭᠡᠨ ᠰᠤᠪᠳᠠᠭ ᠭᠦᠶᠦᠳᠡᠭ ᠲᠤᠯᠠ ᠪᠡᠯᠭᠡ ᠲᠡᠮᠪᠡᠷᠢᠯ ᠲᠠᠢ ᠭᠡᠵᠤ ᠦᠵᠡᠨ᠂ ᠴᠢᠮᠬᠢᠭᠳᠡᠭᠰᠡᠨ ᠰᠣᠮᠠᠯ ᠤᠭᠤᠳᠠ ᠨᠢ ᠰᠣᠶᠤᠩᠭᠠᠳᠤᠬᠤ ᠦᠭᠡᠢ᠂ ᠦᠳᠦ ᠲᠦᠷᠦᠬᠦ ᠦᠭᠡᠢ᠂ ᠬᠦᠯ ᠬᠦᠩᠭᠡᠨ ᠪᠤᠶᠢᠵᠢᠬᠤ ᠶᠢ ᠪᠡᠯᠭᠡᠰᠢᠶᠡᠵᠤ᠂ ᠴᠢᠬᠢᠭᠯᠢᠭ ᠡᠳᠦᠷ ᠴᠢᠮᠬᠢᠵᠤ ᠰᠠᠭᠤᠳᠠᠭ᠃    ᠦᠤᠭᠡ ᠲᠡᠤᠬᠡ ᠠᠴᠠ ᠡᠰᠢ ᠲᠠᠢ᠂ ᠦᠳᠡᠷᠢ ᠲᠠᠢ ᠨᠣᠮ ᠳᠤ ᠲᠡᠮᠳᠡᠭᠯᠡᠵᠦ ᠢᠷᠡᠭᠰᠡᠨ ᠠᠭᠤᠣ ᠮᠣᠩᠭᠤᠯ ᠤᠨ ᠮᠠᠯᠵᠢᠬᠤ ᠰᠣᠶᠤᠯ ᠤᠨ ᠦᠪ᠂ ᠮᠠᠷᠳᠠᠭᠳᠠᠰᠢ ᠦᠭᠡᠢ ᠪᠣᠯᠪᠠᠰᠤᠨ ᠠᠮᠢᠳᠤᠷᠠᠯ ᠭᠡᠭᠴᠢ ᠡᠨᠡ ᠠᠪᠠᠢ᠃    ᠲᠡᠭᠷᠢ ᠴᠡᠯᠮᠡᠩᠬᠡᠨ ᠴᠢᠭᠢᠭ ᠲᠠᠳᠠᠭᠰᠠᠨ ᠲᠤᠩᠭᠠᠯᠠᠭ ᠨᠠᠮᠵᠢᠭᠤ ᠨᠢᠭᠡᠨ ᠡᠳᠦᠷ ᠤᠨ ᠬᠠᠷ᠎ᠠ ᠦᠷᠯᠦᠭᠡ ᠬᠤᠯᠪᠤᠭ᠎ᠠ ᠴᠢᠮᠡᠭᠡ ᠠᠪᠤᠭᠰᠠᠨ ᠬᠠᠪᠤᠷᠵᠢᠶ᠎ᠠ ᠬᠠᠪᠢ ᠶᠢᠨ ᠬᠢᠨ᠂ ᠬᠠᠨᠢ ᠨᠠᠶᠢᠵᠠ ᠨᠠᠷ ᠨᠢ ᠬᠢᠳᠤᠭ᠎ᠠ ᠡᠰᠭᠡᠭᠦᠷ ᠠᠪᠤᠨ᠂ ᠬᠤᠣᠰᠪᠠᠶᠠᠷ ᠤᠨ ᠬᠤᠨᠢᠨ ᠬᠡᠪᠳᠡᠷᠢ ᠶᠢᠨ ᠬᠠᠪᠢ ᠬᠤᠷᠠᠨ ᠴᠤᠭᠯᠠᠷᠠᠵᠤ᠂ ᠬᠤᠷᠠᠭ᠎ᠠ ᠢᠰᠢᠭᠡ ᠶᠢ ᠴᠢᠮᠬᠢᠬᠦ ᠠᠳᠠᠯ ᠬᠢᠳᠡᠯ ᠳᠤ ᠪᠦᠵᠢᠭᠯᠡᠨ ᠰᠢᠷᠭᠤᠪᠠᠢ᠃    ᠴᠤᠭ ᠵᠤᠯᠢ ᠪᠠᠳᠠᠷᠠᠭᠰᠠᠨ ᠡᠰᠭᠡᠭᠦᠷᠴᠢᠳ ᠮᠠᠨᠢ ᠡᠷ᠎ᠡ ᠬᠤᠷᠠᠭ᠎ᠠ ᠡᠷᠡᠮᠡᠭ ᠢᠰᠢᠭᠡ ᠨᠦᠭᠦᠳ ᠢ ᠵᠠᠬ᠎ᠠ ᠳᠠᠷᠠᠭᠠᠯᠠᠨ ᠠᠪᠤᠨ ᠳᠣᠤᠷ᠎ᠠ ᠨᠢ ᠲᠠᠷᠤᠵᠤ ᠪᠠᠷᠢᠨ᠂ ᠲᠣᠷᠭᠠᠨ ᠢᠷᠳᠦ ᠡᠰᠭᠡᠭᠦᠷ ᠢᠶᠠᠷ ᠪᠦᠭᠡᠷᠡᠨ ᠠᠷᠠᠰᠤ ᠶᠢ ᠡᠰᠭᠡᠵᠤ᠂ ᠬᠦᠬᠡᠷᠡᠨ ᠴᠠᠶᠢᠷᠠᠭᠠᠳ ᠪᠤᠮᠪᠠᠯᠵᠠᠨ ᠭᠠᠷᠬᠤ ᠦᠨᠳᠡᠭᠡ ᠶᠢ ᠦᠨᠳᠦᠰᠦ ᠲᠠᠢ ᠨᠢ ᠰᠤᠭᠤ ᠲᠠᠳᠠᠨ ᠠᠪᠴᠤ᠂ ᠰᠠᠯᠬᠢᠨ ᠳᠤ ᠰᠡᠪᠳᠦᠬᠦ ᠠᠴᠠ ᠪᠣᠯᠭᠤᠮᠵᠢᠯᠡᠨ ᠢᠤᠳ᠋ ᠡᠮ ᠢ ᠲᠦᠷᠬᠢᠨ ᠲᠦᠷᠬᠢᠭᠡᠳ ᠲᠠᠯᠪᠢᠵᠤ ᠶᠠᠪᠤᠭᠤᠯᠤᠨ᠎ᠠ᠃ ᠬᠤᠤᠰᠪᠠᠶᠠᠷ ᠭᠤᠸᠠᠢ᠄    — ᠤᠤᠬᠠᠢ᠂ ᠡᠨᠡ ᠣᠷᠤᠢ ᠶᠢᠨ ᠠᠷᠢᠬᠢᠨ ᠳᠤ ᠣᠷᠬᠤᠳᠠᠢ ᠬᠡᠮᠡᠷ ᠰᠢᠮ᠎ᠡ ᠲᠡᠵᠢᠭᠡᠯ ᠲᠠᠢ ᠵᠠᠭᠤᠰᠢ ᠭᠠᠷᠭᠠᠨ᠎ᠠ ᠰᠢᠤ ᠭᠡᠮᠡᠨ ᠰᠠᠪᠠ ᠲᠦᠭᠦᠷᠡᠩ ᠰᠢᠨᠠᠭᠠᠨ ᠬᠤᠷᠤᠬᠠᠢ ᠰᠢᠭ᠋ ᠪᠦᠭᠡᠷᠡᠩᠬᠡᠢ ᠦᠨᠳᠡᠭᠡ ᠶᠢ ᠬᠠᠷᠠᠭᠠᠳ ᠮᠢᠰᠢᠪᠡᠯᠵᠡᠨ᠎ᠡ᠃ ᠰᠢᠷᠡᠭᠡ ᠵᠠᠰᠠᠭᠰᠠᠨ ᠰᠦᠨᠢ ᠶᠢᠨ ᠳᠠᠶᠢᠯᠠᠯᠭ᠎ᠠ ᠳᠤ᠂ ᠰᠣᠭᠳᠤᠭᠤ ᠨᠢᠳᠦ ᠪᠠᠷ ᠰᠠᠶᠢᠮᠠᠶᠢᠨ ᠬᠠᠷᠠᠬᠤ ᠰᠤᠮᠢᠶ᠎ᠠ᠄    — ᠮᠠᠷᠭᠠᠰᠢ ᠬᠠᠷᠢᠨ ᠮᠠᠰᠢᠵᠠᠪ ᠤᠨ ᠪᠣᠯᠪᠠ ᠭᠡᠰᠡᠨ ᠦᠭᠡᠨ ᠳᠤ ᠭᠠᠷ ᠦᠵᠦᠭᠦᠷ ᠵᠠᠷᠤᠭᠳᠠᠬᠤ ᠵᠠᠯᠠᠭᠤ ᠪᠡᠷᠢᠶᠡᠳ ᠣᠴᠢᠷ ᠤᠨ ᠭᠤᠭᠴᠤᠭ᠎ᠠ᠂ ᠣᠨᠢᠰᠤᠭ᠎ᠠ ᠶᠢᠨ ᠣᠭᠤᠰᠤᠷ ᠢ ᠣᠯᠬᠤ ᠦᠭᠡᠢ ᠡᠭᠡᠳᠡᠢ ᠪᠤᠣᠳᠠᠢ ᠪᠣᠯᠵᠤ᠂ ᠭᠡᠨᠡᠳᠳᠡ ᠨᠢᠳᠦ ᠲᠣᠳᠦ᠋ᠢᠵᠤ ᠠᠮᠠ ᠨᠢ ᠠᠩᠭᠠᠯᠵᠠᠭᠰᠠᠨ ᠳᠤ᠂ ᠬᠤᠤᠰᠪᠠᠶᠠᠷ ᠡᠪᠦᠭᠡᠨ ᠦᠭᠡ ᠶᠢᠨ ᠵᠢᠯᠤᠭᠤ ᠶᠢ ᠵᠠᠯᠠᠵᠤ᠂ ᠦᠭᠦᠯᠡᠪᠤᠷᠢ ᠶᠢᠨ ᠤᠳᠬ᠎ᠠ ᠶᠢ ᠵᠠᠰᠠᠨ᠂ ᠮᠠᠰᠢᠵᠠᠪ ᠤᠨ ᠬᠢᠨ ᠡᠨᠡ ᠬᠠᠪᠤᠷ ᠡᠷ᠎ᠡ ᠬᠤᠷᠠᠭ᠎ᠠ ᠬᠡᠳᠦᠢ ᠲᠤᠰᠪᠠ ︖ ᠭᠡᠪᠡᠯ᠄    — ᠭᠤᠷᠪᠠᠨ ᠵᠠᠭᠤ ᠭᠠᠷᠤᠢ ᠬᠤᠳᠠᠯᠠᠪᠠ ᠭᠡᠯ᠎ᠡ᠃    ᠠᠷᠢᠬᠢ ᠴᠤ ᠠᠬᠤ ᠶᠠᠪᠤᠭᠳᠠᠵᠤ᠂ ᠠᠳᠠᠯ ᠴᠤ ᠠᠭᠠᠵᠢᠮ ᠰᠢᠯᠤᠭᠤᠬᠠᠨ ᠢᠷᠡᠪᠡ᠃ ᠨᠠᠩᠵᠢᠳ ᠲᠤ ᠠᠪᠢᠶᠠᠰ ᠲᠠᠢ ᠨᠢᠭᠡ ᠨᠢ ᠠᠪᠤᠨ ᠠᠪᠤᠨ ᠬᠦᠨᠳᠦᠷᠴᠤ᠂ ᠨᠠᠷᠢᠨ ᠬᠢᠴᠡ ᠲᠠᠢ ᠵᠠᠭᠤᠰᠢᠨ ᠳᠤ ᠠᠪᠬᠠᠯᠵᠢ ᠰᠠᠶᠢᠳᠠᠢ ᠨᠢ ᠰᠢᠮᠡᠨ ᠰᠢᠮᠡᠨ ᠲᠠᠮᠰᠢᠶᠠᠯᠠᠨ ᠭᠦᠵᠡᠭᠡᠯᠡᠨ᠎ᠡ᠃    ᠡᠷᠳᠡᠨ ᠠᠴᠠ ᠪᠢᠷᠠᠭᠤ᠂ ᠬᠤᠷᠠᠭ᠎ᠠ ᠶᠢᠨ ᠪᠦᠭᠡᠷ᠎ᠡ ᠶᠢ ᠤᠰᠤ ᠪᠣᠶᠤ ᠰᠦ ᠳᠤ ᠴᠢᠨᠠᠵᠤ ᠪᠤᠯᠭᠤᠭᠰᠠᠨ ᠱᠦᠯᠦ ᠰᠦᠮᠦᠰᠦ ᠶᠢ ᠪᠦᠯᠢᠶᠡᠨ ᠪᠠᠶᠢᠬᠤ ᠳᠤᠨᠢ ᠰᠢᠷᠭᠤᠯᠵᠢ ᠶᠢᠨ ᠡᠭᠦᠷ ᠤᠨ ᠠᠮᠠᠰᠠᠷ ᠰᠦᠷᠴᠢᠵᠤ᠂ ᠬᠤᠨᠢᠨ ᠰᠦᠷᠦᠭ ᠢᠶᠠᠨ ᠰᠢᠷᠭᠤᠯᠵᠢ ᠰᠢᠭ᠋ ᠦᠢ ᠣᠯᠠᠨ ᠦᠷᠡᠵᠢᠬᠦ ᠶᠢ ᠪᠡᠯᠭᠡᠳᠡᠬᠦ ᠤᠯᠠᠮᠵᠢᠯᠠᠯ ᠢ ᠣᠢ ᠲᠤᠢ ᠳᠠᠭᠠᠨ ᠲᠣᠭᠳᠠᠭᠠᠵᠤ ᠢᠷᠡᠭᠰᠡᠨ ᠬᠤᠨᠢᠴᠢᠳ ᠪᠤᠢ ᠮᠦᠷᠳᠡᠭᠡᠨ ᠴᠢᠨᠠᠭᠠᠳ ᠠᠭᠰᠢᠵᠤ ᠠᠪᠴᠢᠭᠰᠠᠨ ᠬᠤᠨᠢ᠂ ᠪᠢᠷᠠᠭᠤᠨ ᠪᠦᠭᠡᠷ᠎ᠡ ᠶᠢ ᠬᠠᠯᠠᠭᠤᠨ ᠨᠣᠭᠤᠭ᠎ᠠ ︵ᠯᠠᠵᠤᠣ︶ ᠶᠢᠨ ᠨᠤᠨᠳᠠᠭ ᠲᠤ ᠲᠦᠷᠦᠵᠦ ᠢᠳᠡᠳᠡᠭ ᠤᠵᠤᠭᠤᠷ ᠤᠨ ᠵᠤᠷᠰᠢᠯ ᠪᠠᠶᠢᠳᠠᠭ ᠡ ᠭᠡᠵᠤ ᠰᠡᠴᠡᠷᠬᠡᠤ ᠨᠢᠭᠡᠨ ᠤ ᠬᠠᠭᠤᠴᠢᠯᠠᠬᠤ ᠶᠢ ᠰᠣᠨᠤᠰᠤᠮᠠᠷ ᠨᠢᠭᠡ ᠨᠢ ᠰᠡᠳᠭᠢᠯ ᠲᠠᠯᠪᠢᠨ ᠰᠣᠨᠤᠰᠤᠨ᠎ᠠ᠃    ᠰᠦᠷᠦᠭ ᠤᠨ ᠢᠶᠠᠨ ᠳᠡᠷᠭᠡᠳᠡ ᠢᠰᠭᠢᠷᠦᠭᠰᠡᠨ ᠮᠠᠯᠴᠢᠨ ᠬᠦᠮᠦᠨ ᠤ ᠪᠡᠯᠡᠨ ᠰᠡᠴᠡᠷᠬᠡᠯ ᠳᠤᠭᠤᠯᠳᠠᠬᠤ ᠳᠤ᠂ ᠰᠦᠨ ᠤ ᠲᠦᠰᠦᠷᠭᠡ ᠱᠠᠭᠢᠭᠤᠯᠤᠭᠰᠠᠨ ᠰᠠᠭᠠᠯᠢᠴᠢᠨ ᠪᠦᠰᠡᠭᠦᠢ ᠶᠢᠨ ᠪᠠᠭ᠋ᠠᠷᠬᠠᠯ ᠤᠨ ᠤᠶᠠᠩᠭ᠎ᠠ ᠵᠠᠯᠭᠠᠯᠳᠦᠨ ᠢᠷᠡᠨᠡᠮ᠃    ᠨᠠᠶᠢᠷ ᠨᠠᠮᠪᠠᠭ᠎ᠠ ᠲᠠᠢ ᠶᠠᠪᠤᠭᠳᠠᠵᠤ᠂ ᠨᠠᠭᠠᠨ᠎ᠠ ᠨᠢ ᠨᠠᠩᠰᠠᠯᠮ᠎ᠠ ᠪᠦᠰᠡᠭᠦᠢ ᠶᠢᠨ ᠨᠠᠮᠪᠠ ᠲᠠᠢ ᠬᠤᠭᠤᠯᠠᠢ ᠪᠠᠷ ᠡᠷᠭᠦᠵᠦ ᠡᠯᠭᠦᠭᠰᠡᠨ ︽ᠬᠠᠪᠤᠷ ᠴᠠᠭ ᠤᠨ ᠬᠠᠯᠢᠭᠤᠨ ᠭᠠᠯᠠᠭᠤ︾ ᠭᠡᠬᠦ ᠠᠷᠠᠳ ᠤᠨ ᠳᠠᠭᠤᠣ ᠨᠠᠶᠢᠷ ᠲᠤ ᠬᠦᠭ ᠨᠡᠮᠡᠵᠤ᠂ ᠨᠠᠩᠵᠢᠳ ᠲᠤ ᠬᠦᠴᠦ ᠨᠠᠮᠡᠭᠳᠡᠨ ᠴᠣᠤᠷᠢᠶᠠᠳᠤᠨ᠎ᠠ᠃ ᠬᠠᠪᠤᠷ ᠤᠨ ᠬᠢᠨ ᠤ ᠴᠠᠭ ᠲᠤᠨᠢ ᠬᠤᠩᠭᠤᠷ ᠬᠠᠯᠢᠭᠤᠨ ᠭᠠᠯᠠᠭᠤ ᠬᠠᠩᠭᠢᠨᠠᠳᠠᠯ᠎ᠠ ᠳᠣᠩᠭᠤᠳᠤᠬᠤᠶ᠎ᠠ ᠠ ᠬᠦᠢ ᠰᠣᠨᠤᠰᠤᠯᠳᠠᠢ ᠰᠠᠶᠢᠬᠠᠨ ᠪᠣᠢ ᠬᠠᠨᠢ ᠨᠦᠬᠦᠷ ᠤᠨ ᠠᠬ᠎ᠠ ᠲᠡᠭᠦᠤ ᠬᠠᠯᠠᠮᠵᠢᠳᠠᠢ ᠶᠠᠪᠤᠬᠤ ᠨᠢ ᠰᠠᠶᠢᠬᠠᠨ ᠡᠨᠡ ᠮᠡᠳᠦ ᠨᠠᠶᠢᠷ ᠢ ᠦᠵᠡᠯᠳᠠᠢ ᠶᠤ᠋ ᠰᠠᠶᠢᠬᠠᠨ ᠪᠣᠢ᠃ ᠵᠤᠨ ᠤ ᠬᠢᠨ ᠤ ᠴᠠᠭ ᠲᠤᠨᠢ ᠵᠦᠯᠭᠡᠨ ᠤ ᠨᠣᠭᠤᠭᠠᠨ ᠦᠩᠭᠡ ᠵᠤᠭᠠᠴᠠᠵᠤ ᠨᠠᠭᠠᠳᠪᠠᠰᠤ ᠵᠢᠷᠭᠠᠯᠳᠠᠢ ᠶᠤ᠋ ᠰᠠᠶᠢᠬᠠᠨ ᠪᠣᠢ᠃ ᠵᠢᠷᠦᠮ ᠶᠣᠰᠤᠨ ᠤ ᠠᠬ᠎ᠠ ᠲᠡᠭᠦᠤ ᠨᠠᠶᠢᠷᠯᠠᠬᠤᠶ᠎ᠠ ᠰᠠᠶᠢᠬᠠᠨ ᠡᠨᠡ ᠮᠡᠳᠦ ᠵᠢᠷᠭᠠᠯ ᠨᠠᠶᠢᠷ ᠢ ᠦᠵᠡᠯᠳᠡᠢ ᠶᠤ᠋ ᠰᠠᠶᠢᠬᠠᠨ ᠪᠣᠢ᠃᠂᠂᠂᠂     — ᠬᠦᠭᠰᠢᠨ ᠡ ᠪᠣᠯᠵᠠᠢ ᠭᠡᠬᠦ ᠶᠢ ᠬᠦᠯᠢᠶᠡᠯ ᠦᠭᠡᠢ᠂ ᠬᠦᠯᠴᠦᠭᠦᠷᠡᠵᠦ ᠢᠷᠡᠨ᠎ᠡ᠂ ᠬᠦᠯᠦᠷᠡᠵᠤ ᠶᠠᠪᠤᠨ᠎ᠠ᠂ ᠭᠡᠷ ᠤᠨ ᠡᠵᠡᠨ ᠬᠤᠤᠰᠪᠠᠶᠠᠷ ᠨᠢ ᠰᠣᠭᠳᠤᠴᠢᠬᠠᠪᠠ᠃ ᠬᠦᠰᠡᠷ ᠲᠦᠭᠦᠷᠡᠩ ᠬᠦᠨᠳᠡᠯᠡᠨ ᠬᠡᠪᠳᠡᠭᠡ ᠰᠠᠭᠰᠠᠭᠤ ᠠᠷᠢᠬᠢᠴᠢᠨ᠂ ᠬᠦᠷᠢᠶ᠎ᠡ ᠪᠠᠭᠳᠠᠮ᠎ᠠ ᠦᠭᠡᠢ ᠤᠬᠰᠢᠯᠭ᠎ᠠ ᠶᠢᠨ ᠲᠠᠭᠤᠨ᠂ ᠬᠦᠰᠡᠷ ᠲᠦᠭᠦᠷᠡᠩ ᠵᠠᠵᠢᠯᠪᠤᠷᠢ᠂ ᠪᠦᠭᠡᠯᠵᠢᠰᠦ ᠶᠢᠨ ᠦᠨᠦᠷ ᠰᠡᠩᠭᠢᠨᠡᠭᠦᠯᠦᠭᠰᠡᠨ ᠰᠤᠭᠳᠣᠭᠤ ᠡᠷᠡᠰ ᠣᠨᠳᠤᠢ ᠰᠤᠨᠳᠤᠢ᠃    ᠮᠠᠷᠭᠠᠰᠢ ᠨᠢ ᠤᠯᠠᠪᠢᠷ ᠲᠤᠶᠠᠭ᠎ᠠ ᠶᠢᠨ ᠰᠣᠪᠤᠷᠠᠯ ᠢᠶᠠᠷ ᠬᠠᠨᠢ ᠪᠤᠯᠭᠠᠭᠰᠠᠨ᠂ ᠬᠦᠯᠦᠰᠦᠨ ᠳᠤᠨᠢ ᠰᠫᠢᠷᠲ ᠰᠢᠩᠭᠡᠭᠰᠡᠨ ᠡᠰᠭᠡᠭᠦᠷᠴᠢᠳ ᠪᠣᠯᠵᠤᠭ᠎ᠠ ᠣᠷᠬᠢᠭᠰᠠᠨ ᠶᠣᠰᠤᠭᠠᠷ ᠬᠠᠮᠵᠢᠵᠤ ᠡᠯᠭᠦᠬᠦ ᠬᠠᠪᠰᠤᠷᠤᠭ᠎ᠠ ᠬᠦᠴᠦ ᠵᠠᠯᠭᠠᠬᠤ ᠪᠠᠷ ᠮᠠᠰᠢᠵᠠᠪ ᠤᠨ ᠳᠤ ᠪᠦᠭᠡᠮᠨᠡᠷᠡᠪᠡ᠃      ᠮᠠᠰᠢᠵᠠᠪ ᠤᠨ ᠭᠡᠷᠭᠡᠢ ᠠᠵᠢᠭ ᠪᠠᠵᠢᠭ ᠠᠯᠳᠠᠵᠤ᠄    — ᠴᠢᠮᠡᠭᠡ ᠴᠤ ᠦᠭᠡᠢ᠂ ᠢᠮᠡᠭᠡ ᠴᠤ ᠦᠭᠡᠢ ᠭᠡᠳ ᠮᠠᠰᠢᠵᠠᠪ ᠢᠶᠠᠨ ᠬᠠᠷᠠᠨ ᠭᠠᠷ ᠨᠣᠬᠤᠯᠠᠨ ᠵᠤᠭᠰᠤᠨ᠎ᠠ᠃      ᠮᠠᠰᠢᠵᠠᠪ᠄    — ᠬᠤᠨᠢᠨ ᠪᠦᠭᠡᠷ᠎ᠡ ᠠᠪᠬᠤ ᠳᠤ ᠬᠤᠷᠸ᠎ᠠ ᠶᠢ ᠳᠣᠷᠭᠢᠭᠤᠯᠤᠨ᠎ᠠ ᠤᠤ︖ ᠬᠤᠷᠳᠤᠨ ᠴᠠᠢ ᠲᠠᠯᠪᠢᠵᠤ᠂ ᠬᠠᠪᠢᠷᠭ᠎ᠠ ᠭᠠᠷᠭ᠎ᠠ︕ ᠬᠤᠮᠢᠵᠦ ᠲᠡᠭᠦᠰᠪᠡᠯ ᠪᠦᠭᠦᠳᠡ ᠶᠢ ᠬᠤᠨᠢᠨ ᠤᠭᠤᠴᠠᠨ ᠳᠤ ᠰᠠᠭᠤᠯᠭᠠᠶ᠎ᠠ᠃ ᠬᠡᠤᠬᠡᠳ ᠢ ᠭᠠᠴᠠᠭᠠᠨ ᠤ ᠴᠢᠯᠦᠭᠡᠳᠦ ᠲᠡᠯᠭᠡᠭᠦᠷ ᠲᠤ ᠶᠠᠪᠤᠭᠤᠯᠵᠤ᠂ ᠬᠤᠷᠴᠠ ᠠᠮᠳᠠᠳᠠᠢ ᠬᠠᠭᠤᠷᠤᠯᠭ᠎ᠠ ᠶᠢᠨ ᠨᠣᠭᠤᠭ᠎ᠠ᠂ ᠬᠤᠷᠳᠤᠨ ᠬᠠᠯᠠᠰᠠᠬᠤ ᠬᠦᠴᠦᠳᠡᠢ ᠠᠷᠢᠬᠢ ᠠᠴᠠ ᠨᠢᠵᠢᠭᠡᠳ ᠰᠢᠯ ᠠᠪᠴᠢᠷᠠᠭᠤᠯ︕    — ᠠᠮᠳᠠᠳᠤ ᠫᠢᠸᠣ᠋ ᠠᠪᠬᠤ ᠪᠠᠨ ᠮᠠᠷᠳᠠᠴᠢᠬᠠᠪᠡᠤ︖ ᠭᠡᠪᠡᠯ᠄    — ᠠᠶᠢᠷᠠᠭ ᠪᠠᠶᠢᠭᠰᠠᠨ ᠴᠠᠭ ᠲᠤ ᠶᠠᠭᠤᠨ ᠤ ︽ᠨᠣᠮᠤᠬᠠᠨ ᠰᠢᠷ᠎ᠠ︾᠂ ︽ᠵᠦᠭᠡᠯᠡᠨ ᠴᠠᠭᠠᠨ︾ ᠭᠡᠳᠡᠭ ᠴᠢᠨᠢ ᠬᠡᠷᠡᠭ ᠴᠤ ᠦᠭᠡᠢ ᠤᠮᠳᠠ᠂ ᠬᠡᠪᠡᠯᠢ ᠳᠤ ᠰᠢᠩᠭᠡᠬᠦ ᠦᠭᠡᠢ ᠤᠮᠳᠠᠭᠠᠨ᠃    — ᠡᠯᠳᠡᠪ ᠤᠨ ᠦᠭᠡ ᠪᠠᠨ ᠡᠪ ᠢ ᠨᠢ ᠠᠵᠢᠵᠤ ᠶᠠᠩᠰᠢᠵᠤ ᠪᠠᠢ ᠭᠡᠳ ᠮᠠᠰᠢᠵᠠᠪ ᠭᠤᠸᠠᠢ ᠰᠡᠩᠳᠡᠭᠦᠤ ᠮᠡᠩᠳᠡᠭᠦᠤ ᠬᠤᠷᠮᠤᠢ ᠰᠢᠭᠤᠵᠤ ᠬᠠᠨᠴᠤᠢ ᠰᠢᠮᠠᠯᠠᠨ ᠭᠠᠷᠪᠠ᠃    ᠬᠤᠷᠠᠭ᠎ᠠ ᠢᠰᠢᠭᠡ ᠶᠢ ᠬᠠᠰᠢᠶᠠᠯᠠᠵᠤ ᠠᠮᠵᠢᠪᠠ᠃ ᠬᠤᠷᠴᠠ ᠡᠰᠭᠡᠭᠦᠷ ᠭᠢᠯᠠᠯᠵᠠᠵᠤ ᠢᠷᠡᠪᠡ᠃ ᠬᠤᠷᠠᠭ᠎ᠠ ᠨᠤᠭᠤᠳ ᠬᠦᠮᠦᠬᠡᠢ ᠵᠠᠭᠤᠵᠤ ᠲᠡᠰᠴᠤ ᠶᠠᠳᠠᠨ᠂ ᠢᠰᠢᠭᠡ ᠨᠦᠭᠦᠳ ᠡᠷ᠎ᠡ ᠶᠢᠨ ᠬᠢᠷᠢ ᠪᠠᠷ ᠳᠠᠭᠤ ᠠᠯᠳᠠᠪᠠ᠃     — ᠪᠠᠷᠠᠭᠰᠠᠨ ᠬᠡᠷᠡᠭ ᠡ᠂ ᠪᠠᠶᠢᠭᠰᠠᠨ ᠢᠶᠠᠨ ᠠᠯᠳᠠᠴᠢᠬᠠᠪᠠ ᠭᠡᠳ ᠡᠷ᠎ᠡ ᠪᠣᠯᠤᠭᠰᠠᠨ ᠳᠠᠭᠠᠨ ᠭᠡᠮᠰᠢᠵᠤ᠂ ᠡᠷᠯᠢᠰᠡ ᠬᠤᠪᠢᠯᠤᠭᠰᠠᠨ ᠳᠠᠭᠠᠨ ᠭᠤᠮᠤᠷᠬᠠᠨ᠎ᠠ᠃    ᠬᠤᠨᠤᠭᠰᠢᠵᠤ ᠪᠦᠳᠦᠭᠦᠷᠡᠭᠰᠡᠨ ᠬᠤᠷᠠᠭ᠎ᠠ᠂ ᠬᠤᠩᠬᠢᠯᠵᠠᠵᠤ ᠠᠯᠢᠶᠠᠷᠬᠠᠭᠰᠠᠨ ᠢᠰᠢᠭᠡ ᠨᠦᠭᠦᠳ ᠢ ᠳᠠᠩᠴᠤ ᠬᠦᠭᠡᠷᠦᠬᠦ᠋ᠢᠯᠡᠵᠦ᠂ ᠲᠠᠩᠳᠠ ᠦᠷᠦ ᠡᠪᠡᠳᠴᠤ ᠰᠠᠭᠤᠮᠠᠷ ᠡ᠃ ᠶᠣᠰᠤᠳᠠᠢ᠂ ᠪᠦᠭᠡᠷ᠎ᠡ ᠶᠢ ᠪᠠᠨ ᠪᠦᠯᠢᠭᠦᠷᠴᠢᠨ ᠳᠤ ᠲᠤᠰᠢᠶᠠᠵᠤ᠂ ᠪᠦᠬᠦᠯᠢ ︵ᠰᠢᠭᠦᠰᠦ︶ ᠶᠢ ᠪᠠᠨ ᠪᠦᠭᠦᠳᠡ ᠳᠤ ᠡᠷᠭᠦᠬᠦ ᠭᠡᠭᠴᠢ ᠡᠭᠦᠨ ᠢ ᠬᠡᠯᠡᠬᠦ ᠠᠵᠤᠭᠤ᠃    ᠭᠢᠯᠠᠯᠵᠠᠮ᠎ᠠ ᠦᠰᠦ᠂ ᠭᠠᠷᠠᠬᠠᠨ ᠨᠢᠳᠦ ᠲᠠᠢ᠂ ᠭᠠᠷ ᠲᠤ ᠠᠮᠠᠷ ᠪᠠᠷᠢᠭᠳᠠᠬᠤ ᠦᠭᠡᠢ ᠬᠤᠷᠠᠭ᠎ᠠ ᠢᠰᠢᠭᠡ ᠶᠢ ᠬᠤᠴᠠ᠂ ᠤᠬᠤᠨ᠎ᠠ ᠪᠠᠷ ᠲᠠᠯᠪᠢᠵᠤ᠂ ᠬᠤᠷ ᠲᠠᠷᠭᠤ ᠠᠪᠤᠭᠤᠯᠵᠤ ᠬᠤᠨᠢᠨ ᠰᠦᠷᠦᠭ ᠢᠶᠠᠨ ᠦᠨᠢᠷᠰᠢᠭᠦᠯᠦᠨ ᠦᠷᠡᠵᠢᠭᠦᠯᠬᠦ ᠪᠠᠷ ᠦᠯᠡᠳᠡᠭᠡᠨ᠎ᠡ᠃    ᠴᠢᠮᠬᠢᠭᠦᠷ ᠤᠷᠤᠭᠰᠢᠳᠠᠢ ᠶᠠᠪᠤᠭᠳᠠᠵᠤ᠂ ᠳᠣᠭᠤᠶᠢᠯᠠᠨ ᠵᠠᠰᠠᠭᠰᠠᠨ ᠴᠠᠭᠠᠨ ᠢᠳᠡᠭᠡ ᠲᠠᠢ ᠴᠠᠢ ᠶᠢᠨ ᠰᠢᠷᠡᠭᠡ ᠠᠴᠠ ᠲᠣᠭᠠᠳᠠᠢ ᠰᠦᠩ ᠲᠦᠰᠢᠭᠰᠡᠨ ᠳᠦᠷᠢᠮᠳᠦ ᠳᠠᠶᠢᠯᠠᠯᠭ᠎ᠠ ᠶᠢᠨ ᠰᠢᠷᠡᠭᠡᠨ ᠳᠤ ᠡᠳᠦᠷᠵᠢᠨ ᠲᠡᠪᠵᠢᠵᠤ ᠴᠦᠬᠦᠭᠰᠡᠨ ᠡᠰᠭᠡᠭᠦᠷᠴᠢᠳ ᠮᠢᠨᠢ ᠮᠠᠬᠠᠷᠠᠨ ᠮᠠᠭᠰᠢᠪᠠ᠃ᠵᠣᠬᠢᠶᠠᠭᠴᠢ᠄ ᠄ ● ᠪᠠᠶᠠᠨᠬᠦᠤᠵᠤᠬᠢᠶᠠᠭᠴᠢ ᠶᠢᠨ ᠬᠠᠶ᠋ᠢᠭ᠄ ᠡᠮᠦᠨᠡᠳᠦ ᠬᠤᠰᠢᠭᠤᠨ ᠤ ᠪᠠᠭᠰᠢ ᠶᠢᠨ ᠲᠠᠪᠳᠡᠨ ᠪᠤᠯᠪᠠᠰᠤᠷᠠᠬᠤ ᠰᠤᠷᠭᠠᠭᠤᠯᠢ
  
ᠢᠷᠡᠯᠲᠡ᠄ ᠬᠢᠩᠭᠠᠨ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠪᠠᠭᠰᠢ ᠶᠢᠨ ᠮᠢᠨᠢ ᠵᠣᠭᠰᠣᠭᠠᠯ
ᠮᠤᠩᠭᠤᠯ ᠮᠤᠷᠢ
ᠮᠢᠨᠤ ᠨᠤᠳᠤᠭ ᠲᠦᠩᠯᠢᠶᠤᠤ
ᠡᠵᠢ ᠶᠢᠨ ᠬᠠᠶᠢᠷ᠎ᠠ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号