| ︵ᠦᠬᠦᠯᠡᠯᠭᠡ︶ | ᠨᠠᠷᠠ ᠪᠠᠷᠠᠭᠤᠨᠰᠢ ᠬᠡᠯᠪᠠᠶᠢᠵᠦ ᠠᠭᠤᠯᠠᠨ ᠲᠤᠯᠤᠭᠠᠢ ᠳᠤ ᠲᠠᠯᠳᠠᠷᠢᠬᠤ ᠳᠤ ᠬᠤᠳᠠ ᠬᠤᠷᠤᠭᠠ ᠶᠢᠨ ᠰᠡᠭᠦᠳᠡᠷ | ᠰᠤᠨᠤᠨ ᠰᠤᠨᠤᠭᠰᠠᠭᠠᠷ ᠯᠠ ᠪᠠᠶᠢᠯᠠ᠃ ᠭᠠᠯᠠᠭᠤᠨ ᠮᠠᠩᠨᠠᠶᠢᠳᠤ ᠭᠠᠯᠰᠠᠩ ᠭᠤᠸᠠᠢ ᠬᠤᠨᠢᠳ ᠢᠶᠠᠨ ᠬᠤᠳᠠᠯᠠᠭᠠᠳ | ᠬᠤᠶᠢᠮᠤᠷ ᠲᠠᠭᠠᠨ ᠰᠠᠭᠤᠵᠦ ᠭᠠᠩᠰᠠᠨ ᠳᠤ ᠪᠠᠨ ᠲᠠᠮᠠᠬᠢ ᠨᠡᠷᠡᠵᠦ ᠫᠤᠭ ᠫᠤᠭ ᠰᠤᠷᠤᠭᠠᠳ ᠤᠳᠤᠭᠠ ᠭᠠᠷᠭᠠᠨ | ᠦᠯᠢᠶᠡᠭᠡᠳ ᠤᠷᠳᠤᠬᠠᠨ ᠭᠡᠭᠴᠢ ᠰᠡᠭᠦᠷᠡᠰᠦᠯᠡᠨ ᠰᠠᠭᠤᠨᠠ᠃ ᠲᠡᠭᠦᠨ ᠤ ᠤᠷᠳᠤᠬᠠᠨ ᠭᠡᠭᠴᠢ ᠰᠡᠭᠦᠷᠡᠰᠦᠯᠡᠭᠰᠡᠨ ᠨᠢ | ᠤᠴᠢᠷ ᠲᠠᠢ ᠶᠤᠮ᠂ ᠭᠠᠯᠰᠠᠩ ᠭᠡᠳᠡᠭ ᠬᠦᠮᠦᠨ ᠶᠡᠷᠦᠳᠡᠭᠡᠨ ᠵᠤᠪᠠᠵᠤ ᠵᠦᠳᠡᠵᠦ ᠪᠠᠶᠢᠬᠤ ᠪᠠᠨ ᠭᠠᠳᠠᠨᠠ ᠪᠠᠨ | ᠮᠡᠳᠡᠭᠳᠡᠳᠡᠭ ᠦᠭᠡᠢ ᠵᠢᠷᠦᠬᠡᠨ ᠳᠤ ᠪᠠᠨ ᠲᠠᠮᠢᠷ ᠲᠠᠢ ᠬᠦᠮᠦᠨ ᠪᠤᠯᠬᠤ ᠶᠢ ᠨᠠᠰᠤ ᠪᠠᠷ ᠢᠶᠠᠨ ᠰᠡᠭᠦᠳᠡᠷ ᠨᠢ ᠰᠢᠭ | ᠰᠡᠭᠦᠯᠳᠡᠵᠦ ᠠᠮᠢᠳᠤᠷᠠᠭᠰᠠᠨ ᠨᠠᠭᠠᠯᠢᠩᠬᠠᠢ ᠨᠠᠷᠠ ᠲᠤᠳᠤᠷᠯᠠᠵᠤ ᠪᠠᠶᠢᠳᠠᠭ ᠪᠤᠯᠬᠤᠷ ᠪᠠᠶᠢᠨ ᠪᠠᠶᠢᠨ ᠠᠷᠭᠠ ᠪᠠᠷᠠᠨ | ᠵᠠᠵᠢᠨ ᠦᠰᠦ ᠪᠠᠨ ᠠᠷᠤᠨᠰᠢ ᠪᠠᠨ ᠢᠯᠢᠳᠡᠭ ᠪᠠᠶᠢᠭᠰᠠᠨ᠂ ᠨᠠᠭᠠᠯᠢᠩᠬᠠᠢ ᠨᠠᠷᠠ ᠶᠢᠨ ᠤᠬᠠᠭᠠᠨ ᠲᠤᠮᠤᠭᠠ ᠭᠡᠵᠦ | ᠬᠡᠴᠡᠭᠦᠤ ᠯᠠ ᠨᠡᠷᠡᠳᠡᠢ ᠰᠠᠨ︕ ᠲᠡᠷᠡ ᠴᠢᠷᠠᠢ ᠲᠡᠭᠡᠷᠡ ᠪᠠᠨ ᠢᠨᠢᠶᠡᠵᠦ ᠪᠠᠶᠢᠪᠠᠴᠤ ᠴᠢᠨᠠᠳᠤ ᠪᠤᠳᠤᠯ ᠳᠠᠭᠠᠨ | ᠠᠮᠢᠳᠤᠷᠠᠯ ᠤᠨ ᠠᠯᠢ ᠤᠯᠠᠨ ᠤᠴᠢᠷ ᠲᠤ ᠤᠷᠢᠶᠠᠭᠳᠠᠵᠤ ᠰᠠᠨᠠᠭᠠ ᠰᠡᠳᠭᠢᠯ ᠨᠢ ᠰᠠᠮᠠᠭᠤᠷᠠᠵᠤ ᠪᠠᠶᠢᠭᠠ ᠲᠤᠯᠠ ᠵᠠᠵᠢᠨ | ᠦᠰᠦ ᠪᠠᠨ ᠢᠯᠢᠵᠦ ᠲᠤᠳᠤᠷᠠ ᠪᠤᠳᠤᠯ ᠢᠶᠠᠨ ᠠᠭᠤᠵᠢᠷᠠᠭᠤᠯᠳᠠᠭ ᠪᠠᠶᠢᠭᠰᠠᠨ᠃ ᠲᠡᠷᠡ᠄ | — ᠪᠢᠳᠡ ᠬᠤᠶᠠᠭᠤᠯᠠ ᠨᠠᠰᠤ ᠪᠠᠷ ᠢᠶᠠᠨ ᠬᠤᠨᠢ ᠬᠠᠷᠢᠭᠤᠯᠵᠤ ᠨᠠᠷᠠ ᠲᠠᠭᠤᠳᠠᠭ ᠶᠤᠮ ᠪᠤᠯ ᠦᠦ ᠭᠡᠵᠦ | ᠠᠮᠠᠨ ᠳᠤ ᠪᠠᠨ ᠲᠦᠳᠦᠨᠡᠨ ᠶᠠᠷᠢᠨᠠ᠃ | ᠨᠠᠭᠠᠯᠢᠩᠬᠠᠢ ᠨᠠᠷᠠ ᠭᠡᠵᠦ ᠨᠤᠳᠤᠭ ᠤᠰᠤᠨ ᠳᠤ ᠪᠠᠨ ᠨᠡᠯᠢᠶᠡᠳ ᠨᠡᠷᠡ ᠲᠦᠷᠦ ᠲᠠᠢ ᠲᠤᠳᠤᠷ ᠪᠠᠶᠠᠨ ᠡᠯᠵᠢᠭᠡ | ᠨᠢᠮᠠ ᠶᠢᠨ ︽ᠠᠮᠠᠨ ᠳᠤ ᠬᠢᠪᠡᠯ ᠬᠠᠶᠢᠯᠤᠮᠠᠷ᠂ ᠠᠯᠠᠭᠠᠨ ᠳᠤ ᠪᠠᠨ ᠲᠠᠯᠪᠢᠪᠠᠯ ᠪᠦᠮᠪᠦᠷᠢᠮᠡᠷ︾ ᠬᠠᠶᠢᠷᠠᠯᠠᠵᠤ | ᠦᠰᠭᠡᠭᠰᠡᠨ ᠦᠷᠡ ᠶᠢᠨ ᠭᠠᠭᠴᠠ ᠦᠬᠢᠨ ᠨᠢ ᠪᠤᠯᠵᠤ ᠵᠠᠶᠠᠭᠠᠭᠰᠠᠨ᠃ ᠭᠡᠳᠡᠯᠡ ᠭᠠᠯᠠᠭᠤᠨ ᠮᠠᠩᠨᠠᠶᠢᠳᠤ ᠭᠠᠯᠰᠠᠩ ᠤᠨ | ᠭᠠᠯᠵᠠᠭᠤᠷᠠᠯ ᠤᠨ ᠤᠷᠬᠠᠨ ᠠᠴᠠ ᠮᠤᠯᠳᠤᠷᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠠᠶᠠᠯᠳᠤᠨ ᠲᠠᠭᠠᠭᠠᠳ ᠡᠴᠦᠰ ᠲᠡᠭᠡᠨ ︽ | ᠴᠤᠣᠳᠤ ᠦᠬᠢᠨ ᠬᠤᠷᠢᠮ ᠦᠭᠡᠢ︾ ᠰᠠᠨ᠃ | ᠡᠯᠵᠢᠭᠡ ᠨᠢᠮᠠ ᠶᠠᠮᠠᠷ ᠲᠠᠭᠠᠨ ᠡᠯᠵᠢᠭᠡ ᠲᠠᠢ ᠲᠦᠰᠳᠠᠢ ᠪᠤᠯᠤᠭᠠᠳ ᠡᠯᠵᠢᠭᠡ ᠨᠢᠮᠠ ᠪᠤᠯᠤᠭᠰᠠᠨ ᠪᠢᠰᠢ᠂ ᠬᠠᠷᠢᠨ | ᠨᠢᠭᠡ ᠵᠦᠷᠢᠭᠦᠳ ᠨᠢ ᠬᠦᠳᠡᠯᠪᠡᠯ ᠬᠡᠳᠦᠨ ᠠᠭᠳᠠ ᠪᠠᠷ ᠲᠠᠳᠠᠭᠤᠯᠪᠠᠴᠤ ᠲᠠᠰᠤᠷᠠᠬᠤ ᠠᠴᠠ ᠪᠢᠰᠢ ᠨᠤᠭᠤᠷᠠᠳᠠᠭ ᠦᠭᠡᠢ | ᠲᠠᠰᠤᠷᠠᠬᠠᠢ ᠡᠷᠡ ᠪᠤᠯᠬᠤᠷ ᠡᠯᠵᠢᠭᠡ ᠨᠢᠮᠠ ᠭᠡᠵᠦ ᠬᠤᠴᠢᠯᠠᠭᠳᠠᠭᠰᠠᠨ᠃ ᠭᠡᠪᠡᠴᠤ ︽ᠴᠢᠬᠢ ᠪᠠᠨ ᠠᠪᠳᠠᠭᠳᠠᠭᠰᠠᠨ | ᠨᠤᠬᠠᠢ ᠡᠵᠡᠨ ᠳᠤ ᠪᠠᠨ ᠠᠮᠠᠷᠠᠭ︾ ᠭᠡᠳᠡᠭᠴᠢᠯᠡᠨ ᠭᠠᠯᠰᠠᠩ ᠤᠨ ᠠᠪᠤ ᠲᠦᠯᠡᠢ ᠲᠤᠨᠳᠤᠭ ᠢ ᠦᠵᠡᠪᠡᠯ ᠶᠠᠮᠠᠷ ᠨᠢᠭᠡᠨ | ᠲᠤᠳᠤᠷ ᠲᠡᠪᠡᠯ ᠢᠶᠠᠨ ᠲᠡᠮᠳᠡᠷᠢᠭᠳᠡᠭᠰᠡᠨ ᠶᠤᠮᠰᠢᠭ ᠴᠢᠬᠢ ᠬᠤᠯᠢᠢᠬᠰᠠᠨ ᠡᠯᠵᠢᠭᠡ ᠰᠢᠭ ᠨᠤᠮᠤᠬᠠᠷᠠᠴᠢᠬᠠᠳᠠᠭ ᠰᠠᠨ᠃ | ᠡᠯᠵᠢᠭᠡ ᠨᠢᠮᠠ ᠠᠴᠠ ᠲᠦᠯᠡᠢ ᠲᠤᠨᠳᠤᠭ ᠢ ᠦᠵᠡᠪᠡᠯ ᠨᠤᠮᠤᠬᠠᠷᠠᠴᠢᠬᠠᠳᠠᠭ ᠨᠢ ᠪᠠᠰᠠ ᠦᠯᠢᠭᠡᠷ ᠲᠠᠢ ᠶᠤᠮ᠃ | ᠪᠠᠷᠢᠭᠠᠳᠠ ᠶᠢᠨ ᠬᠠᠷᠢᠭᠤᠴᠠᠯᠭᠠ ᠶᠢᠨ ᠲᠦᠷᠢᠮ ᠳᠤ ᠮᠠᠯ ᠪᠠ ᠨᠤᠳᠤᠭ ᠪᠡᠯᠴᠢᠭᠡᠷ ᠢ ᠬᠤᠪᠢ ᠳᠤ ᠲᠠᠭᠠᠭᠠᠴᠢᠯᠠᠬᠤ | ᠦᠶᠡᠰ ᠡᠯᠵᠢᠭᠡ ᠨᠢᠮᠠ᠂ ᠡᠷᠭᠢᠬᠦᠤ ᠰᠠᠨᠳᠠᠭ ᠲᠠᠢ ᠪᠡᠯᠴᠢᠭᠡᠷ ᠪᠤᠯᠢᠶᠠᠯᠳᠤᠵᠤ ᠵᠠᠷᠭᠤ ᠵᠠᠷᠭᠤᠯᠳᠤᠭᠠᠨ ᠪᠤᠯᠬᠤ ᠳᠤ | ᠲᠦᠯᠡᠢ ᠲᠤᠨᠳᠤᠭ ᠬᠦᠵᠦᠭᠦᠤ ᠪᠠᠨ ᠲᠠᠯᠪᠢᠵᠤ ᠭᠡᠷᠡᠴᠢ ᠪᠤᠯᠵᠤ ᠢᠯᠠᠭᠰᠠᠨ ᠭᠡᠳᠡᠭ᠃ ᠡᠭᠦᠨ ᠠᠴᠠ ᠠᠪᠤᠭᠠᠳ ᠡᠨᠡ | ᠬᠤᠶᠠᠷ ᠭᠡᠷ ᠮᠢᠨᠦ ᠴᠢᠨᠦ ᠦᠭᠡᠢ᠂ ᠠ ᠡ ᠭᠡᠬᠦ ᠦᠭᠡᠢ ᠠᠮᠢ ᠨᠢᠭᠡᠳᠡᠢ ᠬᠦᠮᠦᠨ ᠪᠤᠯᠵᠤ ᠶᠠᠪᠤᠯᠴᠠᠭᠰᠠᠨ ᠭᠡᠯᠴᠡᠳᠡᠭ᠃ | ᠨᠢᠮᠠ᠂ ᠲᠤᠨᠳᠤᠭ ᠬᠤᠶᠠᠷ ᠲᠤᠰᠪᠤᠷᠢ ᠨᠢᠭᠡ ᠰᠦᠷᠦᠭ ᠬᠤᠨᠢ ᠶᠢ ᠲᠠᠭᠠᠭᠠᠴᠢᠯᠠᠵᠤ᠂ ᠬᠤᠯᠤᠰᠤᠳᠠᠢ ᠶᠢᠨ | ᠵᠢᠯᠠᠭᠠᠨ ᠳᠤ ᠤᠳᠤᠷᠯᠠᠵᠤ ᠰᠠᠭᠤᠭᠰᠠᠨ ᠭᠡᠳᠡᠭ᠃ ᠵᠡᠭᠦᠨ ᠪᠠᠷᠠᠭᠤᠨ ᠠᠭᠤᠯᠠᠨ ᠬᠢᠷᠠ ᠳᠤ ᠪᠠᠷᠠ ᠪᠠᠷᠠ ᠪᠠᠨ | ᠬᠠᠷᠠᠯᠴᠠᠵᠤ ᠰᠠᠭᠤᠭᠰᠠᠨ ᠬᠤᠶᠠᠷ ᠤᠳᠤᠷ ᠤᠨ ᠬᠤᠭᠤᠷᠤᠨᠳᠤ ᠬᠤᠶᠠᠷ ᠵᠠᠯᠠᠭᠤ ᠨᠠᠰᠢ ᠴᠠᠰᠢ ᠨᠡᠭᠦᠳᠡᠯ ᠪᠠᠷᠢᠳᠠᠯ ᠭᠡᠳ | ᠮᠤᠩᠭᠠᠨᠢᠵᠤ ᠶᠠᠪᠤᠭᠠ ᠡᠯᠵᠢᠭᠡ ᠨᠢᠮᠠ ᠶᠢᠨ ᠦᠬᠢᠨ ᠨᠠᠷᠠ᠂ ᠲᠦᠯᠡᠢ ᠲᠤᠨᠳᠤᠭ ᠤᠨ ᠬᠦᠤ ᠭᠠᠯᠰᠠᠩ ᠬᠡᠨ | ᠠᠯᠢᠨ ᠳᠤ ᠪᠠᠨ ᠬᠠᠨᠢ ᠪᠤᠯᠵᠤ ᠡᠳᠦᠷ ᠤᠳᠠᠭᠠᠨ ᠵᠤᠵᠠᠭᠠᠨ ᠬᠤᠨᠤᠭ ᠲᠠᠭᠠᠨ ᠢᠨᠠᠭ ᠤᠨ ᠰᠤᠶᠤᠭᠠ ᠨᠢ ᠴᠤᠬᠤᠶᠢᠵᠤ | ᠡᠬᠢᠯᠡᠭᠰᠡᠨ ᠰᠠᠨ᠃ | ᠬᠠᠷᠭᠠᠨᠠᠳᠤ ᠶᠢᠨ ᠠᠶᠢᠯ ᠤᠨ ᠬᠤᠶᠠᠷ ᠲᠠᠰᠤᠯᠭᠠ ᠰᠢᠪᠠᠷ ᠪᠠᠶᠢᠰᠢᠩ ᠳᠤ ᠰᠢᠪᠠᠷ ᠤᠨ ᠰᠠᠨᠳᠠᠯᠢ᠂ ᠮᠤᠳᠤᠨ | ᠬᠠᠪᠳᠠᠰᠤᠨ ᠰᠢᠷᠡᠭᠡᠨ ᠲᠡᠭᠡᠷᠡ ᠪᠢᠴᠢᠭ ᠰᠤᠶᠤᠯ ᠤᠨ ᠮᠦᠷ ᠢ ᠠᠷᠠᠢ ᠬᠤᠶᠠᠳᠤᠭᠠᠷ ᠤᠨ ᠢᠶᠠᠨ ᠲᠡᠭᠦᠰᠭᠡᠵᠦ | ᠲᠡᠶᠢᠯᠦᠭᠡ ᠦᠭᠡᠢ ᠪᠠᠷ ᠰᠤᠷᠤᠯᠭᠠ ᠵᠤᠭᠰᠤᠵᠤ᠂ ᠠᠷᠤ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠬᠤᠨᠢᠨ ᠰᠦᠷᠦᠭ ᠲᠠᠭᠤᠵᠤ ᠬᠤᠷᠢᠨ | ᠨᠠᠰᠤ ᠲᠦᠬᠦᠭᠰᠡᠨ ᠨᠢ ᠡᠨᠡ ᠪᠠᠶᠢᠵᠠᠢ᠃ ᠬᠤᠯᠤᠰᠤᠳᠠᠢ ᠶᠢᠨ ᠵᠢᠯᠠᠭᠠᠨ ᠤ ᠬᠤᠯᠤᠰᠤᠨ ᠤ ᠨᠠᠶᠢᠭᠤᠭᠠᠨ ᠳᠤ ᠭᠠᠯᠰᠠᠩ | ᠨᠠᠷᠠ ᠬᠤᠶᠠᠷ ᠵᠠᠯᠠᠭᠤ ᠶᠢᠨ ᠢᠨᠠᠭ ᠤᠨ ᠭᠠᠯ ᠨᠢ ᠲᠦᠷᠡᠯᠵᠡᠵᠦ ᠠᠷᠠᠢ ᠯᠠ ᠬᠤᠯᠤᠰᠤ ᠶᠢ ᠨᠢ ᠪᠦᠷ ᠯᠠ ᠨᠤᠬᠤᠴᠠᠵᠤ | ᠬᠠᠶᠠᠭᠰᠠᠨ ᠦᠭᠡᠢ᠃ ᠦᠵᠡᠵᠦ ᠪᠠᠶᠢᠳᠠᠯᠠ ᠡᠳᠦᠷ ᠰᠠᠷᠠ ᠵᠢᠷᠪᠢᠯᠵᠡᠨ ᠤᠳᠴᠤ ᠦᠬᠢᠨ ᠨᠠᠷᠠ ᠡᠨᠡ ᠪᠡᠶᠡ ᠪᠠᠨ | ᠭᠡᠮᠳᠦᠭᠡᠵᠦ᠂ ᠬᠦᠰᠢᠭᠦᠷᠡᠭᠰᠡᠨ ᠳᠤ ᠡᠯᠵᠢᠭᠡ ᠨᠢᠮᠠ ᠶᠢᠨ ᠡᠮᠰᠢᠭᠡᠷ ᠬᠦᠭᠰᠢᠨ ᠨᠢ ᠬᠠᠮᠠᠷ ᠭᠠᠷᠮᠠ ᠬᠡᠳᠦ᠋ᠢᠨᠠᠢ | ᠭᠠᠳᠠᠷᠯᠠᠭᠠᠳ ᠡᠪᠦᠭᠡᠨ ᠳᠤ ᠪᠠᠨ᠄ | — ᠬᠦᠢ︕ ᠡᠪᠦᠭᠡᠨ ᠡ᠂ ᠪᠤᠣ ᠠᠭᠤᠷᠯᠠ︕ ᠶᠠᠭᠤ ᠴᠦ ᠭᠡᠰᠡᠨ ᠶᠠᠪᠤᠳᠠᠯ ᠤᠴᠢᠷ ᠡᠶᠢᠮᠦ ᠪᠤᠯᠴᠢᠬᠠᠭᠰᠠᠨ | ᠶᠤᠮ ᠴᠢᠨᠢ ᠁ ᠭᠡᠵᠦ ᠬᠠᠭᠠᠰ ᠲᠤᠳᠠᠭᠤ ᠶᠠᠷᠢᠪᠠ᠃ ᠡᠯᠵᠢᠭᠡ ᠨᠢᠮᠠ ᠵᠦᠷᠢᠬᠦᠤ ᠨᠢ ᠵᠦᠷᠢᠬᠦᠤ ᠪᠤᠯᠪᠠᠴᠤ | ᠬᠦᠮᠦᠨ ᠤ ᠠᠴᠢ ᠶᠢ ᠮᠠᠷᠳᠠᠳᠠᠭ ᠦᠭᠡᠢ ᠮᠦᠷᠳᠡᠭᠡᠨ ᠬᠠᠷᠢᠭᠤᠯᠬᠤ ᠭᠡᠳ ᠴᠢᠷᠮᠠᠶᠢᠵᠤ ᠶᠠᠪᠤᠳᠠᠭ ᠯᠠ ᠬᠦᠮᠦᠨ ᠤᠴᠢᠷ | ᠦᠬᠢᠨ ᠤ ᠪᠠᠨ ᠤᠴᠢᠷ ᠢ ᠤᠴᠢᠷ ᠪᠤᠯᠭᠠᠭᠰᠠᠨ ᠦᠭᠡᠢ᠂ ᠬᠤᠶᠠᠷ ᠬᠡᠦᠬᠡᠳ ᠲᠤᠷᠠ ᠲᠠᠢ ᠪᠤᠯ ᠮᠠᠨ ᠳᠤ ᠠᠰᠠᠭᠤᠳᠠᠯ | ᠦᠭᠡᠢ ᠭᠡᠳ ᠬᠤᠶᠠᠷ ᠭᠡᠷ ᠢᠶᠠᠷ ᠢᠶᠠᠨ ᠬᠡᠯᠡᠯᠴᠡᠵᠦ ᠨᠢᠭᠡ ᠦᠨᠢᠶᠡ᠂ ᠲᠦᠷᠪᠡᠨ ᠢᠮᠠᠭᠠ ᠠᠪᠤᠭᠠᠳ ᠬᠤᠷᠢᠮ ᠢᠶᠠᠨ | ᠲᠦᠭᠦᠮ ᠲᠦᠳᠡ ᠬᠢᠭᠰᠡᠨ ᠶᠤᠮ᠃ | ᠠᠶᠢᠯ ᠤᠰᠤᠨ ᠤ ᠬᠢᠨ ︽ᠬᠠᠶᠢᠷᠠᠨ ᠨᠢᠭᠡ ᠪᠤᠳᠠ ᠰᠤᠷᠭᠤᠭ ᠴᠡᠴᠡᠭ ᠢ ᠠᠷᠭᠠᠯ ᠤᠨ ᠤᠪᠤᠭᠠᠨ ᠳᠤ | ᠬᠠᠳᠬᠤᠴᠢᠬᠠᠯᠠ︾ ᠭᠡᠬᠦ ᠴᠤᠣᠷᠬᠠᠯ ᠭᠤᠷᠪᠠᠨ ᠡᠳᠦᠷ ᠲᠡᠭᠷᠢ ᠲᠤᠯᠤᠮᠠ ᠪᠦᠵᠢᠭᠡᠳ ᠨᠠᠮᠬᠠᠷᠠᠵᠤ ᠠᠷᠢᠯᠪᠠ᠃ ᠶᠠᠭᠤ | ᠪᠤᠯᠤᠭᠰᠠᠨ ᠴᠦ ᠭᠤᠷᠪᠠᠨ ᠡᠳᠦᠷ ᠤᠨ ᠴᠤᠣᠷᠬᠠᠯ ᠢ ᠴᠢᠬᠢᠨ ᠰᠠᠯᠠᠭᠠᠨ ᠳᠤ ᠪᠠᠨ ᠠᠪᠤᠭᠰᠠᠨ ᠦᠭᠡᠢ ᠭᠠᠯᠠᠭᠤᠨ | ᠮᠠᠩᠨᠠᠶᠢᠳᠤ ᠭᠠᠯᠰᠠᠩ ᠮᠠᠨᠢ ᠠᠮᠠ ᠲᠠᠷᠪᠠᠶᠢᠵᠤ ᠪᠠᠶᠢᠭᠠᠳ ᠯᠠ ᠦᠩᠭᠡᠷᠡᠭᠰᠡᠨ᠃ ᠨᠠᠷᠠ ᠭᠡᠵᠦ ᠬᠡᠳᠦ᠋ᠢᠪᠡᠷ ᠦᠩᠭᠡ | ᠵᠢᠰᠤ ᠤᠯᠠᠨ ᠠᠴᠠ ᠴᠤᠭᠤᠷᠬᠠᠢ᠂ ᠦᠭᠡ ᠲᠠᠭᠤ ᠴᠦᠬᠡᠨ ᠮᠦᠷᠳᠡᠭᠡᠨ ᠤᠬᠠᠭᠠᠨ ᠰᠠᠨᠠᠭᠠ ᠰᠡᠷᠭᠡᠭ ᠬᠦᠮᠦᠨ | ᠪᠤᠯᠪᠠᠴᠤ ︽ᠭᠤᠶᠤ ᠬᠡᠦᠬᠡᠨ ᠬᠤᠪᠳᠤᠭ ᠴᠢᠨ᠋ᠸᠠ ᠠᠴᠠ ᠠᠶᠤᠨᠠ︾ ᠭᠡᠳᠡᠭ ᠢᠶᠠᠷ ︽ᠤᠰᠤᠨ ᠵᠦᠯᠭᠦᠭᠦᠷ ᠲᠤᠰᠤᠨ | ᠪᠢᠯᠭᠦᠭᠦᠷ︾ ᠰᠠᠶᠢᠨ ᠤᠬᠠᠭᠠᠨ ᠢ ᠰᠠᠷᠠ ᠳᠠᠭᠠᠨ ᠪᠤᠳᠤᠵᠤ ᠤᠯᠳᠠᠭ ᠦᠭᠡᠢ᠂ ᠰᠠᠮᠠᠭᠤᠨ ᠤᠬᠠᠭᠠᠨ ᠢ ᠰᠠᠮᠵᠠᠨ | ᠨᠢᠳᠦ ᠪᠠᠨ ᠲᠤᠷᠮᠤᠰ ᠭᠡᠪᠡᠯ ᠤᠷᠭᠤᠭᠤᠯᠴᠢᠬᠠᠳᠠᠭ ᠤᠢ ᠲᠠᠢ ᠭᠠᠯᠰᠠᠩ ᠮᠠᠨᠢ ᠲᠡᠭᠡᠭᠡᠳ ᠨᠠᠷᠠ ᠲᠠᠢ ᠪᠠᠨ ᠵᠤᠯ | ᠵᠢᠷᠭᠠᠯ ᠤᠨ ᠵᠤᠣᠵᠠᠢ ᠶᠢ ᠬᠤᠯᠪᠤᠵᠤ ᠠᠮᠢᠳᠤᠷᠠᠯ ᠤᠨ ᠤᠷᠳᠤ ᠠᠶᠠᠨ ᠢᠶᠠᠨ ᠡᠯᠭᠦᠭᠰᠡᠨ ᠰᠠᠨ︕ | ᠬᠤᠷᠢᠮᠯᠠᠭᠠᠳ ᠬᠤᠷᠢ ᠬᠤᠨᠤᠭᠰᠠᠨ ᠦᠭᠡᠢ ᠪᠠᠷ ︽ᠪᠠᠶᠠᠷ ᠲᠡᠭᠡᠷᠡ ᠪᠠᠶᠠᠷ᠂ ᠪᠠᠮᠪᠠᠷ ᠲᠡᠭᠡᠷᠡ ᠴᠠᠬᠢᠭᠤᠷ︾ ᠭᠡᠵᠦ | ᠪᠤᠬᠠᠨ ᠴᠠᠭᠠᠨ ᠬᠦᠤ ᠲᠠᠢ ᠪᠤᠯᠵᠤ ᠪᠦᠭᠦᠳᠡ ᠤᠯᠠᠨ ᠢᠶᠠᠷ ᠢᠶᠠᠨ ᠬᠦᠭᠡᠷᠦᠬᠦ᠋ᠢᠯᠡᠵᠦ ︽ᠮᠤᠯᠤᠷ︾ ᠭᠡᠳᠡᠭ ᠨᠡᠷᠡ | ᠬᠠᠶᠢᠷᠠᠯᠠᠭᠰᠠᠨ︕ ᠲᠡᠭᠡᠭᠡᠳ ᠯᠠ ᠭᠠᠯᠰᠠᠩ᠂ ᠨᠠᠷᠠ ᠬᠤᠶᠠᠭᠤᠯᠠ ᠬᠠᠷᠭᠠᠨᠠᠳᠤ ᠶᠢᠨ ᠨᠤᠳᠤᠭ ᠲᠠᠭᠠᠨ ᠬᠡᠨ ᠠᠴᠠ ᠴᠦ | ᠲᠤᠳᠠᠭᠤ ᠦᠭᠡᠢ ᠤᠭᠰᠤᠯᠵᠠᠵᠤ ᠶᠠᠪᠤᠭᠰᠠᠨ᠃ ᠭᠠᠯᠰᠠᠩ ᠲᠠᠭᠠᠭᠠᠴᠢᠯᠠᠭᠰᠠᠨ ᠬᠤᠨᠢᠳ ᠢᠶᠠᠨ ᠵᠢᠯ ᠤᠨ ᠲᠦᠷᠪᠡᠨ | ᠤᠯᠠᠷᠢᠯ ᠳᠤ ᠪᠡᠯᠴᠢᠭᠡᠷ ᠢ ᠰᠢᠯᠵᠢᠭᠦᠯᠵᠦ᠂ ᠲᠠᠪᠤᠰᠤᠯᠠᠬᠤ᠂ ᠡᠮᠨᠡᠬᠦ᠂ ᠵᠠᠰᠠᠬᠤ ᠲᠠᠯᠠ ᠪᠠᠷ ᠤᠪᠤᠭᠠ ᠵᠦᠭᠡᠷ ᠪᠠᠶᠢᠳᠠᠭ᠃ | ᠡᠨᠡ ᠨᠢ ᠲᠡᠭᠦᠨ ᠤ ᠡᠴᠢᠭᠡ ᠲᠦᠯᠡᠢ ᠲᠤᠨᠳᠤᠭ ᠤᠨ ᠲᠡᠭᠡᠳᠦ ᠶᠢᠨ ᠦᠶᠡ ᠠᠴᠠ ᠪᠠᠨ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠭᠠᠷ | ᠡᠷᠳᠡᠮ ᠤᠨ ᠠᠴᠢ ᠪᠠᠷ ᠲᠡᠭᠦᠨ ᠤ ᠬᠤᠨᠢᠳ ᠨᠢ ᠵᠢᠯ ᠠᠴᠠ ᠵᠢᠯ ᠦᠨᠢᠷ ᠦᠰᠴᠤ ᠬᠠᠭᠠᠰ ᠨᠠᠰᠤ ᠪᠠᠨ ᠨᠠᠷᠠ ᠶᠢ | ᠲᠠᠭᠤᠵᠤ ᠠᠮᠢᠳᠤᠷᠠᠭᠰᠠᠨ ᠨᠢ ᠭᠠᠭᠴᠠ ᠬᠦᠤ ᠮᠤᠯᠤᠷ ᠢᠶᠠᠨ ᠨᠠᠰᠤ ᠪᠠᠷ ᠢᠶᠠᠨ ᠬᠠᠯᠠᠭᠤᠨ ᠨᠠᠷᠠᠨ ᠳᠤ ᠰᠢᠷᠬᠠᠳᠤᠬᠤ | ᠦᠭᠡᠢ᠂ ᠬᠠᠷᠠ ᠬᠦᠴᠦ ᠪᠠᠨ ᠰᠢᠪᠬᠠᠬᠤ ᠦᠭᠡᠢ ᠪᠠᠷ ᠶᠠᠰᠤ ᠠᠮᠠᠷ ᠤᠨᠳᠤᠷᠤᠭᠤᠯᠬᠤ ᠶᠢᠨ ᠲᠦᠯᠦᠭᠡ ᠦᠪᠡᠷ ᠢᠶᠠᠨ | ᠨᠠᠷᠠ ᠶᠢ ᠲᠠᠭᠤᠵᠤ ᠶᠠᠪᠤᠭᠰᠠᠨ᠂ ᠬᠦᠰᠡᠵᠦ ᠪᠤᠳᠤᠭᠰᠠᠨ ᠢᠶᠠᠷ ᠨᠢ ᠬᠦᠮᠦᠨ ᠤ ᠬᠦᠤ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠶᠡᠭᠡ | ᠰᠤᠷᠭᠠᠭᠤᠯᠢ ᠪᠠᠨ ᠲᠡᠭᠦᠰᠭᠡᠭᠡᠳ ᠢᠷᠡᠬᠦ ᠦᠶᠡᠰ ᠲᠤ ᠪᠠᠨ ᠲᠠᠷᠢᠶᠠᠯᠠᠩ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠠᠴᠠ ᠲᠡᠭᠦᠰᠦᠭᠰᠡᠨ | ᠡᠮᠡᠭᠳᠡᠢ ᠨᠠᠶᠢᠵᠠ ᠪᠠᠨ ᠲᠠᠭᠠᠭᠤᠯᠤᠭᠠᠳ ᠢᠷᠡᠭᠰᠡᠨ ᠭᠡᠯᠳᠡᠢ︕ | ᠲᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠬᠦᠤ ᠮᠤᠯᠤᠷ ᠨᠢ ᠬᠤᠰᠢᠭᠤᠨ ᠤ ᠮᠠᠯ ᠠᠵᠤ ᠠᠬᠤᠢ ᠶᠢᠨ ᠲᠤᠪᠴᠢᠶᠠᠨ ᠳᠤ ᠠᠵᠢᠯ | ᠬᠤᠪᠢᠶᠠᠷᠢᠯᠠᠭᠳᠠᠨ ᠠᠵᠢᠯᠯᠠᠵᠤ᠂ ᠡᠮᠡᠭᠳᠡᠢ ᠨᠠᠶᠢᠵᠠ ᠨᠢ ᠲᠠᠷᠢᠶᠠᠯᠠᠩ ᠤᠨ ᠲᠤᠪᠴᠢᠶᠠᠨ ᠳᠤ ᠠᠵᠢᠯ ᠤᠨ ᠭᠠᠷᠤᠭᠠ ᠪᠠᠨ | ᠠᠪᠴᠠᠢ᠃ ᠭᠠᠯᠰᠠᠩ ᠭᠤᠸᠠᠢ ᠬᠦᠤ ᠠᠴᠠ ᠪᠠᠨ ︽ᠬᠦᠤ ᠮᠢᠨᠢ︕ ᠲᠠᠨ ᠤ ᠲᠡᠷᠡ ᠡᠮᠡᠭᠳᠡᠢ ᠨᠠᠶᠢᠵᠠ ᠴᠢᠨᠢ | ᠬᠠᠮᠢᠭᠠᠬᠢ ᠬᠦᠮᠦᠨ ᠪᠤᠢ︖ ᠶᠠᠮᠠᠷ ᠤᠪᠤᠭ ᠲᠠᠢ ᠪᠤᠢ︖︾ ᠭᠡᠵᠦ ᠰᠡᠵᠢᠭ ᠠᠵᠢᠭ ᠲᠠᠢ ᠠᠰᠠᠭᠤᠬᠤ ᠳᠤ ᠬᠦᠤ ᠨᠢ | ᠮᠤᠯᠤᠷ ︽ᠮᠢᠨᠦ ᠡᠮᠡᠭᠳᠡᠢ ᠨᠠᠶᠢᠵᠠ ᠶᠢᠨ ᠨᠡᠷᠡ ᠨᠢ ᠰᠠᠷᠠ ᠭᠡᠳᠡᠭ᠂ ᠪᠢᠳᠡ ᠬᠤᠶᠠᠭᠤᠯᠠ ᠬᠦᠷᠰᠢ ᠵᠡᠷᠭᠡᠯᠡᠳᠡᠭᠡ ᠬᠤᠶᠠᠷ | ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠬᠤ ᠳᠠᠭᠠᠨ ᠭᠠᠷᠤᠨ ᠤᠷᠤᠨ ᠲᠠᠨᠢᠯᠴᠠᠭᠠᠳ ᠶᠠᠪᠤᠯᠴᠠᠭᠠᠳ ᠰᠡᠳᠭᠢᠯ | ᠰᠡᠳᠭᠢᠯ ᠢᠶᠠᠨ ᠤᠯᠤᠯᠴᠠᠭᠠᠳ ᠢᠨᠠᠭᠯᠠᠵᠤ ᠪᠠᠶᠢᠭᠠ ᠰᠢᠦ︕ ᠠᠪᠤ ᠬᠦᠮᠦᠨ ᠪᠠᠶᠢᠭᠠᠳ ᠡᠵᠢ ᠬᠦᠮᠦᠨ ᠠᠴᠠ ᠢᠯᠡᠭᠦᠤ | ᠤᠬᠤᠴᠢᠯᠠᠭᠠᠳ ᠪᠠᠶᠢᠳᠠᠭ ᠨᠢ ᠶᠠᠭᠤ ᠪᠤᠢ︖︾ ᠭᠡᠵᠦ ᠲᠤᠷᠠ ᠮᠠᠭᠤᠳᠠᠢ ᠬᠠᠷᠢᠭᠤᠯᠬᠤ ᠳᠠᠭᠠᠨ ᠪᠠᠰᠠ ︽ | ᠰᠠᠷᠠ ᠶᠢᠨ ᠡᠵᠢ ᠨᠢ ᠬᠤᠷᠢ ᠭᠠᠷᠤᠢ ᠵᠢᠯ ᠤᠨ ᠡᠮᠦᠨᠡ ᠪᠠᠰᠠ ᠮᠠᠨ ᠤ ᠨᠤᠳᠤᠭ ᠲᠤ ᠰᠡᠭᠡᠭᠡᠳᠡᠨ ᠢᠶᠠᠷ ᠪᠠᠭᠤᠭᠰᠠᠨ | ᠭᠡᠳᠡᠭ︾ ᠭᠡᠳ ᠭᠠᠷᠴᠤ ᠤᠳᠪᠠ᠃ | ᠭᠠᠯᠰᠠᠩ ᠭᠠᠯ ᠲᠤᠭᠤᠭᠠᠨ ᠳᠤ ᠰᠢᠷᠠᠭᠳᠤᠭᠰᠠᠨ ᠰᠢᠬ ᠪᠤᠯᠵᠤ ᠤᠨᠳᠠᠵᠤ ᠤᠷᠤᠬᠤ ᠦᠭᠡᠢ᠂ ᠬᠡᠪᠳᠡᠵᠦ ᠤᠷᠤᠬᠤ | ᠦᠭᠡᠢ ᠲᠦᠷᠦᠬᠦ ᠭᠡᠵᠦ ᠪᠠᠶᠢᠭᠠ ᠡᠮᠡ ᠲᠠᠬᠢᠶᠠ ᠰᠢᠬ ᠬᠤᠨᠢᠨ ᠳᠠᠭᠠᠨ ᠶᠠᠪᠤᠪᠠᠯ ᠤᠭᠤᠳᠠ ᠲᠠᠮᠠᠬᠢ ᠲᠦᠭᠦᠷᠭᠡᠭᠡᠳ | ᠤᠷᠤᠢ ᠪᠤᠯᠳᠠᠯᠠ ᠲᠠᠭᠤᠰᠬᠠᠭᠠᠳ ᠪᠠᠶᠢᠳᠠᠭ ᠬᠡᠪ ᠤᠨ ᠪᠤᠰᠤ ᠪᠠᠶᠢᠳᠠᠯ ᠲᠠᠢ ᠪᠤᠯᠤᠭᠰᠠᠨ ᠢ ᠬᠦᠭᠰᠢᠨ ᠨᠢ ᠨᠠᠷᠠ ᠬᠡᠳᠦᠢ | ᠭᠠᠳᠠᠷᠯᠠᠭᠰᠠᠨ ᠪᠤᠯᠪᠠᠴᠤ ᠲᠤᠳᠤᠷᠠ ᠪᠠᠨ ᠬᠠᠳᠠᠭᠠᠯᠠᠭᠠᠳ ᠦ ᠰᠡᠪ ᠭᠡᠵᠦ ᠤᠭᠳᠤ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ ᠪᠠᠷ ︽ | ᠮᠤᠳᠤ ᠰᠠᠬᠢᠵᠤ ᠲᠠᠦᠯᠠᠢ ᠬᠦᠯᠢᠶᠡᠵᠦ︾ ᠪᠠᠶᠢᠪᠠ᠃ ᠲᠤᠬᠠᠢ ᠶᠢᠨ ᠦᠶᠡᠰ ᠨᠤᠳᠤᠭ ᠪᠡᠯᠴᠢᠭᠡᠷ ᠤᠨ ᠵᠢᠭᠤᠷᠠᠭᠠᠨ ᠤ | ᠦᠶᠡᠰ ᠲᠤ ᠡᠷᠭᠢᠬᠦᠤ ᠰᠠᠨᠳᠠᠭ ᠤᠨ ᠤᠭᠰᠤᠯᠵᠠᠵᠤ ᠪᠠᠶᠢᠭᠰᠠᠨ ᠤ ᠨᠢᠭᠡ ᠰᠢᠯᠳᠠᠭᠠᠨ ᠨᠢ ᠦᠶᠡᠯᠢᠳ ᠲᠡᠭᠦᠤ ᠨᠢ | ᠲᠡᠭᠡᠳᠦ ᠱᠠᠳᠤᠨ ᠠᠴᠠ ᠪᠠᠭᠤᠯᠭᠠᠭᠰᠠᠨ ᠺᠠᠳ᠋ᠷ ᠪᠤᠯᠤ ᠶᠢᠨ ᠢᠶᠠᠨ ︽ᠦᠨᠡᠭᠡ ᠪᠠᠷᠰ ᠤᠨ ᠰᠦᠷ︾ ᠲᠤ ᠠᠭᠠᠰᠢᠯᠠᠵᠤ | ᠪᠠᠶᠢᠪᠠ᠃ ᠭᠡᠳᠡᠯᠡ ᠦᠨᠡᠨ ᠶᠤᠰᠤ ᠠᠯᠢᠪᠠ ᠶᠢ ᠢᠯᠠᠳᠠᠭ ᠨᠢ ᠵᠠᠶᠢᠯᠠᠰᠢ ᠦᠭᠡᠢ᠂ ᠡᠴᠦᠰ ᠲᠡᠭᠡᠨ ︽ᠪᠠᠷᠳᠠᠮ ᠳᠤ | ᠰᠠᠶᠢᠨ ᠦᠭᠡᠢ ᠱᠠᠯᠳᠠᠩ ᠳᠤ ᠲᠤᠯᠠᠭᠠᠨ ᠦᠭᠡᠢ︾ ᠭᠡᠳᠡᠭ ᠢᠶᠠᠷ ᠨᠢᠮᠠ ᠳᠤ ᠢᠯᠠᠭᠳᠠᠭᠰᠠ ᠮᠦᠷᠳᠡᠭᠡᠨ ᠦᠶᠡᠯᠢᠳ | ᠵᠢᠭᠡ ᠦᠬᠢᠨ ᠨᠢ ᠲᠤᠭᠤᠷ ᠨᠢ ᠴᠦ ᠭᠠᠯᠰᠠᠩ ᠤᠨ ᠭᠠᠷ ᠠᠴᠠ ᠭᠠᠷᠴᠤ ᠲᠡᠶᠢᠯᠦᠭᠰᠡᠨ ᠦᠭᠡᠢ ᠪᠤᠯᠬᠤᠷ ᠡᠨᠡ ᠬᠡᠦᠬᠡᠨ | ᠮᠢᠨᠦᠬᠢ ᠪᠤᠯᠪᠠ ᠦᠦ ᠭᠡᠬᠦ ᠤᠨᠢᠰᠤᠭᠠ ᠪᠤᠯᠵᠤ ᠵᠤᠪᠠᠭᠰᠠᠨ ᠰᠠᠨ᠃ | ᠡᠷᠭᠢᠬᠦᠤ ᠰᠠᠨᠳᠠᠭ᠂ ᠡᠯᠵᠢᠭᠡ ᠨᠢᠮᠠ ᠲᠠᠢ ᠨᠤᠳᠤᠭ ᠪᠡᠯᠴᠢᠭᠡᠷ ᠪᠤᠯᠢᠶᠠᠯᠳᠤᠭᠠᠳ ᠡᠨᠡ ᠭᠠᠵᠠᠷ ᠤᠷᠤᠰᠢᠨ | ᠲᠤᠭᠳᠠᠨᠢᠬᠤ ᠶᠢᠨ ᠠᠷᠭᠠ ᠦᠭᠡᠢ ᠪᠤᠯᠤᠭᠠᠳ ᠭᠡᠷ ᠨᠤᠳᠤᠭ ᠢᠶᠠᠨ ᠬᠤᠳᠠᠯᠳᠤᠭᠠᠳ ᠨᠡᠭᠦᠨ ᠶᠠᠪᠤᠭᠰᠠᠨ ᠭᠡᠯᠳᠡᠢ︕ | ᠲᠡᠷᠡ ᠦᠵᠦᠮᠦᠴᠢᠨ ᠨᠤᠳᠤᠭ ᠠᠴᠠ ᠪᠠᠨ ᠪᠠᠷᠭᠤ ᠶᠢᠨ ᠲᠠᠯᠠ ᠨᠤᠳᠤᠭ ᠲᠤ ᠤᠴᠢᠵᠤ ᠬᠤᠶᠠᠷ ᠬᠡᠦᠬᠡᠨ ᠢᠶᠠᠨ | ᠲᠦᠰᠢᠵᠤ ᠡᠨᠡ ᠨᠠᠰᠤ ᠪᠠᠨ ᠨᠦᠭᠴᠢᠭᠡᠭᠰᠡᠨ ᠭᠡᠨᠡ᠃ ᠦᠭᠡᠯᠠᠢ ᠬᠡᠤᠬᠡᠨ ᠨᠢ ᠬᠡᠦᠬᠡᠳ ᠦᠭᠡᠢ᠂ ᠪᠠᠭᠠ | ᠬᠡᠤᠬᠡᠨ ᠠᠴᠠ ᠨᠢ ᠰᠠᠷᠠ ᠭᠡᠬᠦ ᠭᠠᠭᠴᠠ ᠦᠬᠢᠨ ᠲᠠᠢ᠂ ᠰᠠᠷᠠ ᠬᠠᠷᠠᠬᠠᠨ ᠪᠠᠭᠠ ᠠᠴᠠ ᠪᠠᠨ ᠰᠡᠴᠡᠨ ᠰᠡᠷᠭᠦᠯᠡᠩ᠂ | ᠤᠬᠠᠭᠠᠨ ᠰᠠᠨᠠᠭᠠ ᠲᠠᠢ ᠬᠡᠦᠬᠡᠨ ᠪᠤᠯᠬᠤᠷ ᠲᠠᠷᠢᠶᠠᠯᠠᠩ ᠤᠨ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠰᠤᠷᠤᠯᠴᠠᠭᠠᠳ ᠲᠡᠭᠦᠰᠬᠦ | ᠬᠤᠭᠤᠴᠠᠭᠠᠨ ᠳᠤ ᠪᠠᠨ ᠮᠤᠯᠤᠷ ᠲᠠᠢ ᠲᠠᠨᠢᠯᠴᠠᠵᠤ ᠢᠨᠠᠭᠯᠠᠭᠰᠠᠨ ᠪᠢᠯᠡ᠃ ᠭᠠᠯᠰᠠᠩ ᠶᠠᠭᠤ ᠴᠦ ᠭᠡᠰᠡᠨ ᠡᠨᠡ | ᠦᠬᠢᠨ ᠤ ᠭᠠᠷᠤᠯ ᠢ ᠠᠰᠠᠭᠤᠬᠤ ᠦᠭᠡᠢ ᠪᠤᠯ ᠲᠤᠳᠤᠷᠠ ᠨᠢ ︽ᠪᠦᠯᠡᠭᠡ ᠵᠠᠯᠭᠢᠭᠰᠠᠨ ᠮᠡᠯᠡᠬᠡᠢ︾ ᠰᠢᠭ ᠲᠡᠭᠡᠭᠯᠡᠵᠦ | ᠪᠠᠶᠢᠯᠠ᠃ ᠲᠡᠭᠡᠭᠡᠳ ᠬᠦᠭᠰᠢᠨ ᠨᠠᠷᠠ ᠳᠤ ᠪᠠᠨ ︽ᠬᠦᠢ︕ ᠬᠦᠭᠰᠢᠨ ᠡ᠂ ᠭᠠᠷᠤᠯ ᠢ ᠨᠢ ᠮᠡᠳᠡᠬᠦ ᠦᠭᠡᠢ | ᠬᠦᠮᠦᠨ ᠤ ᠬᠡᠦᠬᠡᠳ ᠢ ᠠᠪᠴᠤ ᠪᠤᠯᠳᠠᠭ ᠦᠭᠡᠢ ᠰᠢᠦ︕ ᠮᠠᠨ ᠢ ᠪᠠᠭᠠ ᠪᠠᠶᠢᠬᠤ ᠳᠤ ᠭᠠᠷᠤᠯ ᠮᠠᠭᠤᠳᠠᠢ ᠬᠦᠮᠦᠰ ᠢ | ᠦᠨᠳᠦᠷ ᠮᠠᠯᠠᠭᠠᠢ ᠵᠡᠭᠦᠯᠭᠡᠵᠦ ᠪᠤᠷᠤᠭᠤᠰᠢᠶᠠᠨ ᠰᠢᠭᠦᠮᠵᠢᠯᠡᠵᠦ ᠭᠤᠳᠤᠮᠵᠢ ᠪᠠᠷ ᠲᠤᠭᠤᠷᠢᠭᠤᠯᠳᠠᠭ ᠪᠢᠰᠢ ᠦᠦ︖︾ | ᠭᠡᠬᠦ ᠳᠤ ᠬᠦᠭᠰᠢᠨ ᠨᠢ ︽ᠡᠨᠡ ᠴᠢᠨᠢ ᠰᠢᠨᠡ ᠴᠠᠭ ᠡᠷᠡᠨ ᠡ︕ ᠬᠡᠦᠬᠡᠳ ᠲᠤᠷᠠᠳᠠᠢ ᠪᠤᠯ ᠦᠪᠡᠷ ᠢᠶᠠᠨ ᠮᠡᠳᠡᠭ︕ | ︾ ᠭᠡᠵᠦ ᠲᠦᠳᠦᠨᠡᠨᠡ᠃ | ᠠᠮᠠᠷᠠᠯᠳᠠ ᠶᠢᠨ ᠨᠢᠭᠡ ᠡᠳᠦᠷ ᠮᠤᠯᠤᠷ ᠬᠦᠤ ᠠᠮᠠᠷᠠᠭ ᠬᠤᠩᠭᠤᠷ ᠰᠠᠷᠠ ᠪᠠᠨ ᠲᠠᠭᠠᠭᠤᠯᠵᠤ ᠠᠪᠤ ᠡᠵᠢ ᠪᠠᠨ | ᠡᠷᠭᠢᠵᠦ ᠦᠵᠡᠬᠦ ᠪᠠᠷ ᠢᠷᠡᠯᠡ᠃ ᠰᠠᠷᠠ ᠬᠡᠦᠬᠡᠨ ᠴᠦ ᠰᠢᠭᠤᠳ ᠰᠢᠯᠤᠭᠤᠨ ᠠᠰᠪᠤᠷ ᠴᠠᠭᠠᠪᠤᠷ ᠬᠦᠮᠦᠨ ᠤᠴᠢᠷ | ᠦᠪᠡᠷ ᠤᠨ ᠪᠤᠳᠤᠵᠤ ᠰᠠᠨᠠᠭᠰᠠᠨ ᠵᠦᠢᠯ ᠢᠶᠠᠨ ᠢᠯᠠᠨ ᠲᠠᠯᠠᠨ ᠦᠭᠡᠢ ᠶᠠᠷᠢᠴᠢᠬᠠᠳᠠᠭ ᠶᠤᠮ ᠪᠠᠶᠢᠨᠠ᠃ ᠲᠡᠭᠡᠭᠡᠳ | ᠪᠤᠳᠠᠭᠠᠨ ᠰᠢᠷᠡᠭᠡᠨ ᠲᠡᠭᠡᠷᠡ ︽ᠮᠢᠨᠦ ᠨᠠᠭᠠᠴᠤ ᠡᠪᠦᠭᠡ ᠪᠠᠰᠠ ᠡᠨᠡ ᠬᠠᠷᠭᠠᠨᠠᠳᠤ ᠨᠤᠳᠤᠭ ᠲᠤ ᠠᠮᠢᠳᠤᠷᠠᠵᠤ | ᠪᠠᠶᠢᠭᠰᠠᠨ ᠭᠡᠳᠡᠭ︾ ᠭᠡᠪᠡ᠃ ᠭᠠᠯᠰᠠᠩ᠄ ︽ᠬᠡᠦᠬᠡ ᠡ︕ ᠨᠠᠭᠠᠴᠤ ᠡᠪᠦᠭᠡ ᠴᠢᠨᠢ ᠬᠡᠨ ᠭᠡᠳᠡᠭ︖︾ ᠭᠡᠬᠦ ᠳᠤ | ︽ᠮᠢᠨᠦ ᠨᠠᠭᠠᠴᠤ ᠡᠪᠦᠭᠡ ᠰᠠᠨᠳᠠᠭ ᠭᠡᠵᠦ ᠡ᠊ᠨᠳᠡᠬᠢ ᠶᠠᠮᠠᠷ ᠨᠢᠭᠡᠨ ᠡᠯᠵᠢᠭᠡ ᠰᠢᠭ ᠵᠦᠷᠢᠭᠦᠳ ᠬᠦᠮᠦᠨ ᠲᠠᠢ ᠨᠤᠳᠤᠭ | ᠪᠡᠯᠴᠢᠭᠡᠷ ᠤᠨ ᠲᠤᠬᠠᠢ ᠮᠠᠭᠤᠳᠠᠯᠴᠠᠭᠠᠳ ᠬᠤᠶᠠᠷ ᠦᠬᠢᠨ ᠲᠠᠢ ᠪᠠᠨ ᠪᠠᠷᠭᠤ ᠨᠤᠳᠤᠭ ᠲᠤ ᠨᠡᠭᠦᠵᠦ ᠶᠠᠪᠤᠭᠰᠠᠨ ᠢᠶᠠᠨ | ᠡᠵᠢ ᠨᠠᠳᠠ ᠳᠤ ᠬᠡᠯᠡᠵᠦ ᠦᠭᠪᠡ︾ ᠭᠡᠵᠦ ᠬᠡᠯᠡᠵᠦ ᠪᠠᠷᠠᠬᠤ ᠲᠠᠢ ᠵᠡᠷᠭᠡ ᠨᠠᠷᠠ ᠭᠡᠵᠦ ᠰᠡᠷ ᠭᠡᠪᠡᠯ ᠵᠢᠷ ᠭᠡᠬᠦ ᠶᠢ | ᠠᠨᠳᠤᠬᠤ ᠦᠭᠡᠢ ᠬᠦᠮᠦᠨ ᠴᠢᠨᠢ᠄ ︽ᠦ ᠁ ᠰᠤᠨᠤᠰᠤᠭᠰᠠᠨ ᠴᠤᠬᠤᠮ ᠬᠦᠮᠦᠨ ᠤ ᠰᠠᠶᠢᠨ ᠬᠦᠮᠦᠨ ᠭᠡᠳᠡᠭ︾ | ᠭᠡᠵᠦ ᠦᠭᠡ ᠶᠢ ᠨᠢ ᠲᠠᠰᠤᠯᠪᠠ᠃ | ᠨᠢᠭᠡ ᠴᠠᠭ ᠤᠨ ᠬᠤᠭᠤᠯᠠ ᠪᠠᠨ ᠠᠮᠳᠠ ᠶᠢ ᠨᠢ ᠮᠡᠳᠡᠭᠰᠡᠨ ᠦᠭᠡᠢ ᠮᠦᠷᠳᠡᠭᠡᠨ ᠰᠦᠰᠦ ᠲᠤᠯᠢᠶᠠᠭᠰᠠᠨ ᠰᠢᠬ | ᠵᠤᠭᠤᠭᠯᠠᠭᠰᠠᠨ ᠭᠠᠯᠰᠠᠩ ᠡᠪᠦᠭᠡᠨ ᠬᠦᠤ ᠪᠠᠨ ᠲᠠᠭᠤᠳᠠᠨ᠄ ︽ᠲᠠ ᠡᠨᠡ ᠦᠬᠢᠨ ᠤ ᠭᠠᠷᠤᠯ ᠢ ᠨᠢ ᠠᠰᠠᠭᠤᠵᠤ | ᠦᠩᠭᠡᠷᠡᠪᠡᠦ︖ ᠲᠡᠷᠡ ᠪᠤᠯ ᠮᠠᠨ ᠤ ᠭᠡᠷ ᠤᠨ ᠦᠰᠢᠶᠡᠳᠡᠢ ᠬᠦᠮᠦᠨ ᠰᠠᠨᠳᠠᠭ ᠤᠨ ᠵᠢᠭᠡ ᠤᠮᠪᠤᠯᠤ ᠦᠬᠢᠨ ᠰᠢᠦ︕ | ᠮᠠᠯ ᠡ︕︾ ᠭᠡᠪᠡ᠃ ᠮᠤᠯᠤᠷ᠄ ︽ᠠᠪᠤ ᠡ︕ ᠤᠳᠤ ᠴᠢᠨᠢ ᠶᠠᠮᠠᠷ ᠴᠠᠭ ᠶᠤᠮ ᠪᠤᠢ︕ ᠲᠠᠨ ᠤ ᠲᠡᠷᠡ | ᠦᠶᠡ ᠶᠢᠨ ᠤᠴᠢᠷ ᠮᠠᠨ ᠳᠤ ᠤᠳᠠᠰᠤᠨ ᠲᠡᠳᠦᠢ ᠴᠦ ᠬᠠᠮᠢᠶᠠ ᠦᠭᠡᠢ᠂ ᠪᠢᠳᠠ ᠬᠤᠶᠠᠷ ᠰᠠᠶᠢᠨ ᠲᠤᠷᠠ ᠠᠴᠠ ᠪᠠᠨ | ᠢᠨᠠᠭᠯᠠᠵᠤ ᠪᠠᠶᠢᠨᠠ︕ ᠰᠠᠷᠠ ᠭᠡᠳᠡᠭ ᠬᠦᠮᠦᠨ ᠲᠡᠶᠢᠮᠦ ᠮᠠᠭᠤ ᠬᠦᠮᠦᠨ ᠪᠢᠰᠢ︕︾ ᠭᠡᠬᠦ ᠳᠤ ︽ᠬᠦᠮᠦᠨ ᠤ | ᠡᠷᠢᠶᠡᠨ ᠲᠤᠳᠤᠷᠠ ᠪᠠᠨ ᠮᠤᠭᠠᠢ ᠶᠢᠨ ᠡᠷᠢᠶᠡᠨ ᠭᠠᠳᠠᠨᠠ ᠪᠠᠨ︾ ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠪᠠ᠃ | ᠭᠠᠯᠰᠠᠩ᠂ ᠬᠦᠭᠰᠢᠨ ᠲᠠᠢ ᠪᠠᠨ ᠨᠢᠳᠦ ᠬᠠᠮᠬᠢᠯ ᠦᠭᠡᠢ ᠨᠢᠭᠡ ᠰᠦᠨᠢ ᠶᠢ ᠦᠩᠭᠡᠷᠡᠭᠡᠪᠡ᠃ ᠭᠡᠳᠡᠯᠡ ᠮᠤᠯᠤᠷ | ᠰᠠᠷᠠ ᠬᠤᠶᠠᠭᠤᠯᠠ ᠤᠳᠤ ᠴᠠᠭ ᠤᠨ ᠬᠡᠦᠬᠡᠳ ᠲᠤᠷᠠᠯᠠᠭᠰᠠᠨ ᠵᠦᠢᠯ ᠪᠦᠬᠦᠨ ᠢᠶᠠᠨ ᠲᠤᠷᠠ ᠪᠠᠷ ᠢᠶᠠᠨ ᠤᠶᠢᠯᠡᠳᠬᠦ | ᠬᠤᠪᠢ ᠲᠠᠢ ᠭᠡᠳᠡᠭ ᠢᠶᠠᠷ ᠪᠠᠶᠠᠷᠯᠠᠵᠤ ᠬᠦᠭᠡᠷᠦᠯᠳᠦᠭᠡᠳ ᠲᠤᠳᠤᠷᠠ ᠦᠷᠦᠭᠡᠨ ᠳᠤ ᠤᠨᠳᠠᠪᠠ᠃ ᠮᠠᠷᠭᠠᠰᠢ ᠦᠷᠯᠦᠭᠡ | ᠲᠠᠬᠢᠶᠠᠨ ᠲᠠᠭᠤᠨ ᠢᠶᠠᠷ ᠬᠤᠶᠠᠷ ᠬᠡᠦᠬᠡᠳ ᠪᠤᠰᠴᠤ ᠬᠤᠭᠤᠯᠠ ᠪᠤᠳᠠᠭᠠ ᠪᠡᠯᠡᠳᠭᠡᠵᠦ ᠡᠬᠢᠯᠡᠪᠡ᠃ ᠰᠢᠷᠡᠭᠡ | ᠲᠦᠭᠦᠷᠳᠡᠯᠡ ᠨᠤᠭᠤᠭᠠ ᠵᠠᠭᠤᠰᠢ ᠪᠡᠯᠡᠳᠭᠡᠭᠡᠳ ᠮᠤᠯᠤᠷ ᠰᠠᠷᠠ ᠬᠤᠶᠠᠭᠤᠯᠠ ᠠᠪᠤ ᠡᠵᠢ ᠳᠡᠭᠡᠨ ᠠᠷᠢᠬᠢ ᠪᠠᠷᠢᠵᠤ᠄ ︽ | ᠪᠢᠳᠡ ᠬᠤᠶᠠᠭᠤᠯᠠ ᠬᠤᠳᠠ ᠠᠴᠠ ᠭᠡᠷ ᠢᠶᠠᠨ ᠠᠪᠤᠴᠢᠬᠠᠵᠠᠢ᠂ ᠤᠷᠤᠭ ᠤᠨ ᠪᠠᠳᠤᠯᠠᠪᠤᠷᠢ ᠪᠠᠨ ᠪᠠᠰᠠ ᠠᠪᠤᠴᠢᠬᠠᠵᠠᠢ᠂ | ᠰᠦᠷᠦᠭ ᠲᠠᠢ ᠬᠤᠨᠢᠳ ᠢᠶᠠᠨ ᠬᠤᠳᠠᠯᠳᠤᠭᠠᠳ᠂ ᠬᠦᠳᠡᠭᠡ ᠭᠡᠷ ᠢᠶᠠᠨ ᠬᠤᠳᠠᠯᠳᠤᠭᠠᠳ ᠠᠰᠠᠷ ᠲᠡᠭᠡᠷᠡ ᠤᠴᠢᠵᠤ | ᠵᠢᠷᠭᠠᠭᠠᠷᠠᠢ︾ ᠭᠡᠵᠦ ᠬᠦᠨᠳᠦᠯᠡᠨ ᠮᠦᠷᠭᠦᠬᠦ ᠳᠤ ᠬᠤᠶᠠᠷ ᠨᠠᠰᠤᠳᠠᠨ ᠨᠢᠯᠪᠤᠰᠤ ᠪᠦᠮᠪᠦᠷᠢᠬᠦᠯᠦᠨ᠄ ︽ᠤᠳᠤ ᠪᠢᠳᠠ | ᠴᠢᠨᠢ ᠨᠠᠷᠠ ᠲᠠᠭᠤᠵᠤ ᠶᠠᠪᠤᠬᠤ ᠪᠠᠨ ᠪᠤᠯᠢᠴᠢᠬᠠᠭᠰᠠᠨ ᠶᠤᠮ ᠦᠦ︖︾ ᠭᠡᠬᠦ ᠳᠤ ᠮᠤᠯᠤᠷ ᠬᠦᠤ ᠢᠨᠢᠶᠡᠭᠡᠳ᠄ ︽ | ᠠᠪᠤ ᠡ︕ ᠨᠠᠷᠠ ᠲᠠᠭᠤᠶᠠ ᠭᠡᠪᠡᠯ ᠠᠰᠠᠷ ᠤᠨ ᠨᠠᠷᠠᠪᠴᠢᠨ ᠳᠤ ᠵᠤᠭᠰᠤᠵᠤ ᠨᠠᠷᠠ ᠲᠠᠭᠤᠭᠠᠷᠠᠢ︕︾ ᠭᠡᠪᠡ᠃ | ᠨᠠᠷᠠ ᠬᠦᠭᠰᠢᠨ ᠡᠪᠦᠭᠡᠨ ᠳᠤ ᠪᠠᠨ᠄ ︽ᠤᠳᠤ ᠴᠠᠭ ᠲᠤ ᠮᠠᠨ ᠤ ᠦᠶᠡᠰ ᠲᠠᠢ ᠲᠠᠭᠠᠷᠠᠬᠤ ᠦᠭᠡᠢ ᠬᠤᠶᠠᠭᠤᠯᠠ ᠪᠠᠨ | ᠲᠤᠷᠠᠳᠠᠢ ᠪᠤᠯ ᠴᠠᠰᠢ ᠪᠠᠨ ᠁ ᠡᠨᠡ ᠲᠡᠷᠡ ᠶᠢ ᠬᠠᠮᠢᠶᠠᠷᠤᠯᠭᠠᠨ ᠦᠭᠡᠢ᠂ ᠬᠡᠦᠬᠡᠳ ᠤᠨ ᠢᠶᠠᠨ ᠰᠠᠨᠠᠭᠤᠯᠭᠠ ᠪᠠᠷ | ᠬᠢᠵᠦ ᠨᠠᠷᠠᠪᠴᠢᠨ ᠳᠤ ᠵᠤᠭᠰᠤᠵᠤ ᠨᠠᠷᠠ ᠲᠠᠭᠤᠶᠠ︾ ᠭᠡᠪᠡ᠃ ᠭᠠᠯᠰᠠᠩ ᠡᠪᠦᠭᠡᠨ ᠮᠠᠷᠰᠠᠭᠠᠨᠠᠨ ᠢᠨᠢᠶᠡᠭᠡᠳ᠄ ︽ | ᠮᠢᠨᠦ ᠡᠨᠡ ᠨᠠᠰᠤ ᠴᠢᠨᠢ ᠨᠠᠷᠠᠨ ᠤ ᠪᠠᠨ ᠲᠤᠣᠷᠠ ᠨᠠᠰᠤ ᠪᠠᠷ ᠢᠶᠠᠨ ᠬᠤᠨᠢ ᠬᠠᠷᠢᠭᠤᠯᠵᠤ᠂ ᠨᠠᠰᠤ ᠪᠠᠷ ᠢᠶᠠᠨ ᠨᠠᠷᠠ ᠪᠠᠨ | ᠲᠡᠪᠡᠷᠢᠵᠦ ᠤᠨᠳᠠᠭᠰᠠᠨ ᠵᠢᠷᠭᠠᠯ ᠲᠠᠢ ᠨᠢᠭᠡ ᠨᠠᠰᠤ ᠶᠤᠮ ᠰᠠᠨ︾ ᠭᠡᠵᠦ ᠶᠠᠷᠢᠪᠠ᠃ | ᠵᠤᠬᠢᠶᠠᠬᠴᠢ᠄ ᠰ᠊᠂ ᠬᠤᠷᠴᠢᠨᠬᠦᠤ | ᠵᠤᠬᠢᠶᠠᠬᠴᠢ ᠶᠢᠨ ᠬᠠᠶ᠋ᠢᠭ᠄ ᠲᠤᠮᠳᠠᠳᠤ ᠬᠤᠰᠢᠭᠤᠨ ᠤ ᠡᠮᠳᠦ ᠶᠢᠨ ᠭᠤᠣᠯ ᠰᠤᠮᠤ ᠶᠢᠨ ᠴᠠᠭᠠᠨ ᠪᠤᠬᠠ | ᠰᠤᠷᠭᠠᠭᠤᠯᠢ |