ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠡᠵᠢ ᠶᠢᠨ ᠲᠤᠬᠠᠢ ᠲᠤᠷᠠᠰᠤᠮᠵᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2019-09-06
   ᠡᠵᠢ ᠮᠢᠨᠢ ᠶᠢᠷᠳᠢᠨᠴᠦ ᠶᠢᠨ ᠮᠦᠩᠭᠡ ᠪᠤᠰᠤ ᠶᠢ ᠬᠠᠷᠠᠭᠤᠯᠤᠭᠠᠳ ᠨᠢᠭᠡᠨᠳᠡ ᠵᠢᠷᠭᠤᠭᠠᠨ ᠵᠢᠯ ᠢᠯᠡᠭᠦᠦ ᠪᠤᠯᠤᠯ᠎ᠠ᠃ ᠤᠨ ᠵᠢᠯ ᠤᠨ ᠤᠷᠤᠰᠬᠠᠯ ᠨᠢ ᠤᠷᠴᠢᠯᠠᠩ ᠤᠨ ᠬᠦᠮᠦᠨ ᠤ ᠤᠶᠤᠨ ᠪᠤᠳᠤᠯ ᠠᠴᠠ ᠤᠯᠠᠩᠭᠢ ᠵᠦᠢᠯ ᠢ ᠠᠷᠢᠯᠭᠠᠳᠠᠭ ᠴᠤ ᠠᠴᠢᠳᠤ ᠡᠵᠢ ᠶᠢᠨ ᠮᠢᠨᠢ ᠲᠦᠷᠢ ᠲᠦᠯᠦᠪ ᠦᠭᠡ ᠶᠠᠷᠢᠶ᠎ᠠ ᠦᠢᠯᠡ ᠠᠵᠢᠯᠯᠠᠭ᠎ᠠ ᠨᠢ ᠵᠢᠷᠦᠭᠡᠨ ᠤ ᠲᠤᠯᠳᠤ ᠳᠤ ᠠᠷᠢᠯᠤᠰᠢ ᠦᠭᠡᠢ ᠢᠮ ᠲᠠᠮᠠᠭ᠎ᠠ ᠦᠯᠡᠳᠡᠭᠡᠵᠤ ᠦᠨᠢᠳᠡ ᠮᠦᠩᠭᠡᠷᠡᠪᠡ᠃    ᠮᠢᠨᠦ ᠡᠵᠢ ᠪᠤᠯ ᠨᠢᠭᠡᠨ ᠡᠭᠡᠯ ᠵᠢᠷ ᠤᠨ ᠲᠠᠷᠢᠶᠠᠴᠢᠨ ᠪᠦᠰᠡᠭᠦᠢ ᠦᠷ᠎ᠡ ᠬᠡᠤᠬᠡᠳ ᠢᠶᠠᠨ ᠬᠦᠮᠦᠨ ᠤ ᠵᠡᠷᠭᠡ ᠳᠤ ᠬᠦᠷᠭᠡᠬᠦ ᠶᠢᠨ ᠲᠦᠯᠦᠭᠡ ᠠᠮᠢᠳᠤᠷᠠᠯ ᠢᠶᠠᠨ ᠦᠭᠡᠳᠡ ᠲᠠᠳᠠᠬᠤ ᠪᠠᠷ ᠦᠵᠡᠬᠦ ᠦᠭᠡᠢ ᠦᠢᠯᠡ ᠶᠢ ᠦᠵᠡᠵᠤ᠂ ᠦᠭᠡᠷ ᠴᠠᠮ ᠢᠶᠠᠨ ᠬᠠᠷᠠᠶᠢᠵᠤ᠂ ᠬᠠᠯᠠ ᠦᠵᠡᠵᠤ ᠬᠠᠯᠠᠭᠤᠨ ᠴᠢᠯᠠᠭᠤ ᠲᠤᠯᠢᠶᠠᠬᠰᠠᠨ ᠶᠤᠮ᠃ ᠡᠪᠤᠯ ᠤᠨ ᠡᠳᠦᠷ ᠦᠳᠦᠷᠮ᠎ᠡ ᠶᠢᠨ ᠲᠤᠯᠢ ᠠᠴᠠ ᠡᠷᠳᠡᠨᠢ ᠰᠢᠰᠢ ᠶᠢᠨ ᠨᠠᠪᠴᠢ ᠡᠭᠦᠷᠴᠦ ᠲᠦᠯᠡᠰᠢ ᠬᠢᠬᠦ ᠪᠠᠷ ᠲᠠᠭᠠᠷᠠᠵᠤ ᠪᠡᠭᠡᠷᠡᠨ ᠪᠦᠳᠦᠴᠢᠨ ᠤᠨᠠᠵᠤ ᠶᠠᠪᠤᠵᠠᠢ᠃ ᠰᠢᠳᠠᠮ᠎ᠠ ᠬᠠᠯᠠᠭᠤᠨ ᠨᠠᠷᠠᠨ ᠳᠤ ᠲᠠᠷᠢᠶᠠᠨ ᠪᠤᠵᠠᠷ ᠦᠭᠳᠡᠭᠡᠵᠤ ᠦᠯᠦᠰᠴᠦ ᠤᠮᠳᠠᠭᠠᠰᠴᠤ ᠶᠠᠪᠤᠵᠠᠢ᠃ ᠨᠠᠮᠤᠷ ᠤᠨ ᠰᠡᠭᠦᠯᠴᠢ ᠡᠪᠤᠯ ᠤᠨ ᠡᠬᠢᠨ ᠤ ᠮᠦᠰᠦ ᠬᠦᠯᠳᠡᠭᠰᠡᠨ ᠤᠰᠤᠨ ᠲᠤᠳᠤᠷ᠎ᠠ ᠠᠴᠠ ᠤᠳᠤᠯ ᠰᠢᠪᠳᠤᠷᠴᠤ ᠦᠴᠦᠭᠡᠨ ᠴᠤ ᠬᠡᠰᠡᠨ ᠵᠤᠭᠤᠰ ᠬᠤᠪᠢᠯᠭᠠᠨ ᠠᠮᠢᠳᠤᠷᠠᠯ ᠤᠨ ᠨᠦᠬᠦᠪᠤᠷᠢ ᠪᠤᠯᠭᠠᠬᠤ ᠪᠠᠷ ᠵᠢᠳᠬᠦᠵᠤ ᠪᠠᠶᠢᠬᠰᠠᠨ᠃ ᠡᠳᠦᠷᠵᠢᠨ ᠮᠤᠩᠭᠠᠨᠢᠵᠤ ᠤᠷᠤᠢ ᠨᠢ ᠲᠤᠰᠤᠨ ᠳ᠋ᠧᠩ ᠤᠨ ᠲᠤᠤᠷ᠎ᠠ ᠤᠶᠤᠳᠠᠯ ᠤᠶᠤᠵᠤ ᠬᠤᠷᠤᠭᠤ ᠬᠢᠮᠤᠰᠤ ᠪᠠᠨ ᠪᠠᠷᠠᠭᠠᠵᠤ ᠶᠠᠪᠤᠵᠠᠢ᠃ ᠤᠯᠠ ᠤᠶᠤᠵᠤ ᠱᠠᠬᠠᠢ ᠬᠢᠨ᠎ᠡ᠃ ᠤᠳᠠᠰᠤ ᠡᠷᠢᠵᠤ ᠨᠤᠤᠰᠤᠨ ᠲᠡᠪᠡᠯ ᠨᠡᠭᠡᠵᠤ ᠦᠭᠭᠦᠨ᠎ᠡ᠃ ᠬᠦᠭᠡᠭᠡ ᠡᠪᠤᠯ ᠤᠨ ᠲᠡᠰᠬᠢᠮ᠎ᠡ ᠬᠦᠢᠳᠡᠨ ᠳᠤ ᠲᠡᠭᠡᠷᠮ᠎ᠡ ᠶᠢᠨ ᠭᠡᠷ ᠲᠤ ᠭᠤᠯᠢᠷ ᠪᠤᠳᠠᠭ᠎ᠠ ᠴᠠᠶᠢᠯᠭᠠᠨ ᠲᠠᠯᠠᠬᠳᠠᠬᠤ ᠪᠠᠷ ᠬᠡᠳᠦᠨ ᠰᠦᠨᠢ ᠬᠡᠳᠦᠨ ᠡᠳᠦᠷ ᠲᠠᠭᠠᠷᠠᠵᠤ ᠪᠡᠭᠡᠷᠡᠵᠤ ᠶᠠᠪᠤᠯ᠎ᠠ᠃ ᠡᠵᠢ ᠮᠢᠨᠢ ᠢᠩᠭᠢᠵᠤ ᠯᠡ ᠪᠢᠳᠡᠨ ᠤ ᠪᠠᠨ ᠲᠦᠯᠦᠭᠡ ᠠᠮᠢ ᠲᠡᠮᠡᠴᠡᠨ ᠴᠢᠷᠮᠠᠶᠢᠵᠤ ᠯᠡ ᠶᠠᠪᠤᠯ᠎ᠠ᠃     ᠡᠭᠡᠴᠤᠤᠯ ᠤᠨ ᠪᠠᠶᠠᠷ ᠤᠨ ᠡᠳᠦᠷ ᠤᠶᠢᠷᠠᠳᠬᠤ ᠶᠢ ᠲᠠᠭᠠᠯᠳᠤᠨ ᠡᠵᠢ ᠶᠢᠨ ᠲᠦᠷᠢ ᠲᠦᠯᠦᠪ ᠶᠡᠷᠦ ᠨᠢ ᠤᠶᠤᠨ ᠲᠠᠷᠢᠬᠢᠨ ᠳᠤ ᠡᠷᠭᠢᠯᠳᠦᠭᠡᠳ ᠯᠡ ᠪᠠᠶᠢᠨ᠎ᠠ᠃ ᠦᠴᠦᠭᠡᠳᠦᠷ ᠰᠦᠨᠢ ᠶᠡᠷᠦ ᠨᠢ ᠬᠠᠶᠢᠷᠠᠳᠤ ᠡᠵᠢ ᠪᠠᠨ ᠰᠠᠨᠠᠨ ᠰᠠᠨᠠᠨ ᠨᠦᠢᠷ ᠬᠤᠯᠵᠢᠭᠠᠳ ᠤᠨᠳᠠᠵᠤ ᠤᠷᠤᠬᠤ ᠦᠭᠡᠢ ᠪᠠᠶᠢᠬᠰᠠᠨ ᠢᠶᠠᠨ ᠬᠡᠨᠡᠳᠳᠡ ᠵᠡᠭᠦᠷᠮᠡᠭᠯᠡᠨ ᠡᠵᠢ ᠨᠠᠳᠠ ᠶᠢ᠄ ︽ᠰᠡᠴᠡᠨ ᠡ᠂ ᠮᠢᠨᠦ ᠬᠢᠮᠤᠰᠤ ᠪᠠᠭ᠎ᠠ ᠤᠷᠳᠤ ᠪᠤᠯᠤᠬᠰᠠᠨ ᠰᠢᠬ ᠁︾ ᠬᠡᠵᠡᠢ᠃ ᠲᠡᠭᠡᠭᠡᠳ ᠪᠢ ᠬᠢᠮᠤᠰᠤ ᠶᠢ ᠨᠢ ᠵᠠᠰᠠᠵᠤ ᠦᠭᠭᠦ ᠪᠠᠷ ᠤᠷᠤᠯᠳᠤᠵᠤ ᠪᠠᠶᠢᠬᠰᠠᠭᠠᠷ ᠤᠪᠠᠶᠢᠨ ᠳᠤ ᠦᠭᠡᠢ ᠴᠢᠰᠦ ᠭᠠᠷᠭᠠᠬᠰᠠᠨ ᠳᠤ ᠰᠠᠨᠳᠤᠷᠬᠤ᠋ ᠳᠤ ᠪᠠᠨ ︽ᠡᠵᠢ ᠡ︾ ᠬᠡᠵᠤ ᠬᠠᠰᠬᠢᠷᠤᠭᠠᠳ ᠰᠡᠷᠢᠪᠠ᠃     ᠡᠵᠢ ᠮᠢᠨᠢ ᠠᠷᠪᠠᠭᠠᠳᠬᠠᠨ ᠨᠠᠰᠤᠳᠠᠢ ᠳᠤ ᠪᠠᠨ ᠡᠨᠡᠷᠢᠯᠳᠦ ᠡᠵᠢ ᠠᠴᠠ ᠪᠠᠨ ᠬᠠᠭᠠᠴᠠᠨ ᠰᠠᠯᠵᠤ ᠦᠨᠦᠴᠢᠨ ᠪᠤᠯᠤᠬᠰᠠᠨ ᠲᠤᠯᠠ ᠠᠮᠢᠳᠤᠷᠠᠯ ᠨᠢ ᠨᠡᠩ ᠬᠦᠴᠢᠷ ᠲᠠᠢ ᠪᠤᠯᠵᠤ᠂ ᠬᠦᠯ ᠭᠠᠷ ᠨᠢ ᠤᠯᠠᠨᠳᠠ ᠬᠦᠯᠳᠡᠭᠰᠡᠨ ᠶᠤᠮ᠃ ᠶᠠᠭ ᠡᠶᠢᠮᠦ ᠠᠴᠠ ᠭᠢᠮᠤᠰᠤ ᠨᠢ ᠵᠢᠭᠠᠬᠠᠨ ᠤᠷᠳᠤ ᠪᠤᠯᠤᠬᠰᠠᠭᠠᠷ ᠵᠤᠪ ᠵᠤᠵᠠᠭᠠᠨ ᠪᠤᠯᠵᠤ ᠵᠠᠰᠠᠬᠤ ᠳᠤ ᠮᠠᠰᠢ ᠲᠦᠪᠡᠭᠳᠡᠢ ᠪᠤᠯᠳᠠᠭ᠃     ᠡᠵᠢ ᠮᠢᠨᠢ ᠬᠠᠷᠠᠬᠠᠨ ᠪᠠᠭ᠎ᠠ ᠠᠴᠠ ᠪᠠᠨ ᠦᠨᠦᠴᠢᠨ ᠦᠰᠦᠭᠰᠡᠨ ᠲᠤᠯᠠ ᠬᠡᠳᠦ᠋ᠢᠪᠡᠷ ᠰᠡᠴᠡᠨ ᠰᠡᠷᠭᠦᠯᠡᠩ ᠪᠤᠯᠪᠠᠴᠤ ᠪᠢᠴᠢᠭ ᠰᠤᠶᠤᠯ ᠤᠨ ᠮᠦᠷ ᠢ ᠭᠦᠬᠡᠬᠡᠵᠤ ᠲᠡᠶᠢᠯᠦᠭᠰᠡᠨ ᠦᠭᠡᠢ᠃ ᠡᠨᠡ ᠨᠢ ᠡᠵᠢ ᠶᠢᠨ ᠮᠢᠨᠢ ᠨᠠᠰᠤᠨ ᠲᠤᠷᠰᠢ ᠶᠢᠨ ᠬᠠᠷᠠᠮᠰᠠᠯ ᠪᠤᠯᠵᠠᠢ᠃ ᠡᠶᠢᠮᠦ ᠶᠢᠨ ᠲᠤᠯᠠ ᠮᠠᠨ ᠤ ᠡᠭᠡᠴᠢ ᠲᠡᠭᠦᠤ ᠲᠠᠪᠤᠭᠤᠯᠠ ᠶᠢ ᠪᠢᠴᠢᠭ ᠰᠤᠶᠤᠯ ᠰᠤᠷᠭᠠᠬᠤ ᠶᠢ ᠶᠡᠭᠡᠳᠡ ᠴᠢᠬᠤᠯᠠᠴᠢᠯᠠᠳᠠᠭ ᠪᠠᠶᠢᠬᠰᠠᠨ᠃ ᠪᠠᠭ᠎ᠠ ᠶᠢᠨ ᠦᠶ᠎ᠡ ᠳᠤ ᠠᠶᠢᠯ ᠤᠨ ᠬᠡᠤᠬᠡᠨᠴᠤᠳ ᠱᠠᠬᠠᠢ ᠭᠤᠳᠤᠯ ᠤᠶᠤᠵᠤ ᠪᠠᠶᠢᠬᠤ ᠶᠢ ᠦᠵᠡᠪᠡᠯ ᠪᠢ ᠪᠠᠰᠠ ᠰᠤᠷᠬᠤ ᠪᠠᠷ ᠤᠷᠤᠯᠳᠤᠳᠠᠭ᠃ ᠲᠡᠭᠡᠪᠡᠯ ᠡᠵᠢ ᠶᠠᠷᠦ ᠨᠢ᠄ ︽ᠬᠡᠤᠬᠡᠨ ᠮᠢᠨᠢ ᠤᠶᠤᠳᠠᠯ ᠤᠶᠤᠵᠤ ᠰᠤᠷᠬᠤ ᠶᠢᠨ ᠤᠷᠤᠨ ᠳᠤ ᠪᠢᠴᠢᠭ ᠰᠤᠶᠤᠯ ᠢᠶᠠᠨ ᠰᠠᠶᠢᠬᠠᠨ ᠡᠷᠬᠢᠮᠯᠡᠵᠤ ᠰᠢᠮᠳᠠ᠂ ᠪᠢ ᠨᠢᠭᠡ ᠨᠠᠰᠤᠨ ᠳᠤ ᠪᠠᠨ ᠦᠪᠡᠷ ᠪᠤᠰᠤᠳ ᠤᠨ ᠤᠶᠤᠳᠠᠯ ᠢ ᠲᠤᠭ᠎ᠠ ᠦᠭᠡᠢ ᠤᠶᠤᠬᠰᠠᠨ ᠪᠤᠯᠪᠠᠴᠤ ᠤᠳᠤ ᠬᠠᠷᠢᠨ ᠨᠢᠭᠡ ᠵᠦᠢᠷᠡᠢ ᠱᠠᠬᠠᠢ ᠴᠤ ᠬᠠᠳᠠᠭᠠᠯᠠᠵᠤ ᠲᠡᠶᠢᠯᠦᠭᠰᠡᠨ ᠦᠭᠡᠢ᠃ ᠡᠷᠳᠡᠮ ᠨᠤᠮ ᠪᠢᠴᠢᠭ ᠰᠤᠶᠤᠯ ᠢᠶᠠᠨ ᠰᠠᠶᠢᠳᠤᠷ ᠡᠵᠡᠮᠰᠢᠴᠢᠭᠡᠪᠡᠯ ᠲᠠᠷᠢᠬᠢ ᠲᠤᠯᠤᠭᠠᠢ ᠲᠤᠳᠤᠷ᠎ᠠ ᠠᠴᠠ ᠴᠢᠨᠢ ᠭᠡᠨ ᠴᠤ ᠠᠪᠠᠴᠢᠵᠤ ᠲᠡᠶᠢᠯᠬᠦ ᠦᠭᠡᠢ ᠰᠢᠤ ᠁︾ ᠬᠡᠵᠤ ᠰᠤᠷᠭᠠᠳᠠᠭ᠃     ᠪᠢ ᠠᠪᠤ ᠡᠵᠢ ᠠᠴᠠ ᠪᠠᠨ ᠡᠭᠡᠴᠢ ᠦᠬᠢᠨ ᠲᠡᠭᠦᠦ ᠪᠠ ᠲᠡᠭᠦᠦ ᠲᠠᠢ ᠲᠠᠪᠤᠭᠤᠯᠠ ᠪᠠᠶᠢᠳᠠᠭ᠃ ᠠᠶᠢᠯ ᠤᠨ ᠵᠠᠷᠢᠮ ᠬᠦᠮᠦᠰ ᠶᠡᠷᠦ ᠨᠢ᠄ ︽ᠠᠮᠢᠳᠤᠷᠠᠯ ᠴᠢᠨᠢ ᠡᠶᠢᠮᠦ ᠬᠦᠴᠢᠷ ᠲᠠᠢ ᠪᠠᠶᠢᠭᠠᠳ ᠬᠡᠤᠬᠡᠨ ᠬᠦᠮᠦᠨ ᠢ ᠪᠢᠴᠢᠭ ᠦᠵᠡᠭᠦᠯᠦᠭᠡᠳ ᠶᠠᠮᠠᠷ ᠲᠤᠯᠤᠭᠠᠢ ᠳᠤ ᠪᠠᠨ ᠭᠤᠷᠪᠠᠨ ᠠᠶᠠᠭ᠎ᠠ ᠤᠰᠤ ᠲᠠᠢ ᠪᠤᠢ︖ ᠮᠤᠩᠭᠤᠯ ᠪᠢᠴᠢᠭ ᠭᠡᠳᠡᠭ ᠴᠢᠨᠢ ᠪᠠᠶᠢᠴᠧᠩ ᠬᠦᠷᠪᠡᠯ ᠬᠡᠷᠡᠭᠯᠡᠬᠦ ᠬᠦᠮᠦᠨ ᠦᠭᠡᠢ ᠰᠢᠤ︾ ᠬᠡᠵᠤ ᠬᠡᠯᠡᠬᠦ ᠳᠤ ᠨᠢ ᠡᠵᠢ ᠮᠢᠨᠢ ᠬᠠᠷᠢᠨ᠄ ︽ᠬᠡᠤᠭᠡᠨ ᠨᠢ ᠶᠠᠭᠠᠬᠢᠳᠠᠭ ᠶᠤᠮ ᠪᠤᠢ︖ ᠵᠢᠬᠦᠷ ᠰᠦᠳᠦ ᠶᠢ ᠨᠢ ᠪᠦᠷᠢᠳᠦᠬᠦᠯᠴᠢᠬᠡᠪᠡᠯ ᠬᠦᠤ ᠪᠠᠷ ᠴᠢᠨᠢ ᠰᠤᠯᠢᠬᠤ ᠦᠭᠡᠢ ᠶᠤᠮ᠃ ᠮᠤᠩᠭᠤᠯ ᠬᠡᠤᠬᠡᠳ ᠮᠤᠩᠭᠤᠯ ᠪᠢᠴᠢᠭ ᠦᠵᠡᠬᠦ ᠴᠢᠨᠢ ᠲᠡᠭᠷᠢ ᠶᠢᠨ ᠵᠦᠢ ᠭᠠᠵᠠᠷ ᠤᠨ ᠶᠤᠰᠤ︾ ᠬᠡᠵᠤ ᠬᠠᠷᠢᠭᠤᠯᠳᠠᠭ ᠶᠤᠮ ᠪᠠᠶᠢᠵᠠᠢ᠃     ᠡᠵᠢ ᠪᠤᠯ ᠮᠠᠰᠢ ᠰᠦᠰᠦ ᠵᠤᠷᠢᠭ ᠲᠠᠢ ᠬᠦᠮᠦᠨ ᠶᠤᠮ᠃ ᠠᠮᠢᠳᠤᠷᠠᠯ ᠤᠨ ᠲᠦᠪᠡᠭ ᠭᠠᠴᠢᠬᠳᠠᠯ ᠠᠴᠠ ᠵᠢᠯ ᠪᠦᠷᠢ ᠶᠢᠨ ᠨᠠᠮᠤᠷ ᠤᠨ ᠬᠤᠷᠢᠶᠠᠯᠳᠠ ᠲᠠᠭᠤᠰᠤᠬᠰᠠᠨ ᠤ ᠰᠡᠭᠦᠯᠡᠷ ᠲᠠᠷᠢᠶᠠᠨ ᠲᠠᠯᠠᠩ ᠤᠨ ᠲᠤᠳᠤᠷ᠎ᠠ ᠠᠴᠠ ᠨᠠᠷᠠᠨ ᠬᠤᠸᠠᠷ ᠤᠨ ᠦᠷ᠎ᠡ ᠲᠡᠭᠦᠳᠡᠭ᠃ ᠡᠵᠢ ᠡᠷᠳᠡ ᠶᠢᠨ ᠬᠤᠭᠤᠯᠠ ᠪᠠᠨ ᠢᠳᠡᠵᠤ ᠪᠠᠷᠠᠬᠰᠠᠨ ᠤ ᠲᠠᠷᠠᠭ᠎ᠠ ᠬᠦᠭᠡ ᠦᠩᠭᠡᠳᠡᠢ ᠬᠤᠷᠮᠦ᠋ᠢᠪᠴᠢ ᠪᠠᠨ ᠪᠦᠰᠡᠯᠡᠵᠤ᠂ ᠰᠠᠬᠰᠤ᠂ ᠲᠡᠪᠢᠭᠦᠷ᠂ ᠤᠭᠤᠳᠠ ᠬᠡᠤᠳᠡᠢ ᠵᠡᠷᠭᠡ ᠪᠠᠨ ᠠᠪᠤᠭᠠᠳ ᠨᠠᠷᠠᠨ ᠬᠤᠸᠠᠷ ᠲᠠᠷᠢᠬᠰᠠᠨ ᠲᠠᠷᠢᠶ᠎ᠠ ᠶᠢ ᠴᠢᠭᠯᠡᠳᠡᠭ᠃ ᠲᠡᠭᠡᠭᠡᠳ ᠭᠠᠵᠠᠷ ᠤᠨᠠᠬᠰᠠᠨ ᠨᠠᠷᠠᠨ ᠬᠤᠸᠠᠷ ᠤᠨ ᠦᠷ᠎ᠡ ᠶᠢ ᠨᠢᠭᠡ ᠨᠢᠭᠡ ᠮᠦᠬᠦᠯᠢᠭ ᠢᠶᠠᠷ ᠲᠡᠭᠦᠭᠦ ᠪᠤᠶᠤ ᠱᠦᠭᠦᠷᠳᠡᠨ ᠴᠤᠬᠯᠠᠭᠤᠯᠵᠤ᠂ ᠲᠡᠪᠢᠨ ᠠᠷᠢᠯᠭᠠᠵᠤ ᠠᠭᠤᠳᠠᠯᠠᠵᠤ ᠠᠪᠳᠠᠭ᠃ ᠢᠩᠭᠢᠵᠦ ᠨᠢᠭᠡ ᠨᠠᠮᠤᠷ ᠡᠷᠳᠡᠯᠡᠵᠤ ᠤᠷᠦ᠋ᠢᠯᠠᠵᠤ ᠲᠠᠪᠤ ᠵᠢᠷᠭᠤᠭᠠᠨ ᠵᠠᠭᠤᠨ ᠵᠢᠩ ᠲᠡᠭᠦᠳᠡᠭ᠃ ᠲᠡᠭᠦᠨ ᠢᠶᠠᠨ ᠬᠠᠳᠠᠭᠠᠵᠤ ᠬᠠᠭᠤᠷᠤᠭᠠᠳ ᠬᠤᠳᠠ ᠳᠤ ᠠᠪᠠᠴᠢᠵᠤ ᠨᠢᠭᠡ ᠨᠢᠭᠡ ᠴᠤᠮᠦ ᠪᠠᠷ ᠬᠤᠳᠠᠯᠳᠤᠵᠤ ᠨᠢᠭᠡ ᠡᠪᠤᠯ ᠤᠨ ᠠᠮᠢᠳᠤᠷᠠᠯ ᠤᠨ ᠵᠠᠷᠤᠳᠠᠯ ᠪᠤᠯᠭᠠᠳᠠᠭ᠃ ᠬᠤᠯᠠ ᠤᠶᠢᠷ᠎ᠠ ᠶᠢᠨ ᠲᠠᠨᠢᠯ ᠲᠠᠰᠤᠯ ᠬᠦᠮᠦᠰ ᠡᠵᠢ ᠶᠢᠨ ᠡᠨᠡ ᠬᠦ ᠡᠷᠴᠢ ᠵᠤᠷᠢᠭ ᠢ ᠭᠠᠶᠢᠬᠠᠬᠤ ᠦᠭᠡᠢ ᠬᠦᠮᠦᠨ ᠬᠡᠵᠤ ᠠᠯᠠᠭ᠎ᠠ ᠡ᠃ ᠨᠢᠭᠡᠨ ᠡᠳᠦᠷ ᠨᠠᠷᠠᠨ ᠠᠭᠤᠯᠠᠨ ᠲᠤᠯᠤᠭᠠᠢ ᠳᠤ ᠰᠢᠷᠭᠤᠵᠤ᠂ ᠪᠦᠷᠦᠭ ᠪᠠᠷᠤᠭ ᠪᠤᠯᠬᠤ ᠦᠶ᠎ᠡ ᠪᠠᠷ ᠠᠪᠤ ᠰᠡᠩᠳᠡ ᠮᠡᠩᠳᠡ ᠡᠵᠢ ᠶᠢᠨ ᠲᠡᠷᠭᠡᠳᠡ ᠬᠦᠶᠦᠨ ᠤᠴᠢᠭᠠᠳ᠄ ᠬᠤᠷᠳᠤᠨ ᠶᠠᠪᠤᠶ᠎ᠠ᠂ ᠬᠤᠷᠳᠤᠨ︾ ᠬᠡᠵᠤ ᠰᠠᠬᠰᠤ ᠲᠡᠪᠢᠭᠦᠷ ᠢ ᠨᠢ ᠬᠤᠮᠪᠢᠨ ᠠᠪᠤᠭᠠᠳ ᠭᠡᠷ ᠵᠦᠭ ᠢᠶᠠᠨ ᠬᠦᠶᠦᠭᠰᠡᠨ ᠬᠡᠨ᠎ᠡ᠃ ᠡᠵᠢ ᠤᠬᠠᠭᠠᠨ ᠲᠦᠭᠦᠭᠡ ᠶᠢ ᠨᠢ ᠤᠯᠬᠤ ᠦᠭᠡᠢ ᠪᠠᠶᠢᠬᠰᠠᠨ ᠠᠴᠠ ᠪᠠᠨ ᠭᠡᠷ ᠲᠤ ᠭᠦᠷᠦᠭᠰᠡᠨ ᠤ ᠰᠡᠭᠦᠯᠡᠷ ᠰᠠᠶ᠋ᠢ ᠤᠴᠢᠷ ᠢ ᠨᠢ ᠮᠡᠳᠡᠪᠡ᠃ ᠮᠠᠨ ᠤ ᠠᠶᠢᠯ ᠤᠨ ᠨᠢᠭᠡᠨ ᠬᠤᠨᠢᠴᠢᠨ ᠠᠪᠤ᠂ ᠨᠠᠷᠠᠨ ᠠᠭᠤᠯᠠᠨ᠎ᠠ ᠲᠠᠰᠢᠬᠤ ᠶᠢᠨ ᠦᠶ᠎ᠡ ᠪᠠᠷ ᠬᠤᠨᠢ ᠪᠠᠨ ᠬᠤᠳᠠᠯᠠᠬᠤ ᠪᠠᠷ ᠠᠶᠢᠯ ᠵᠦᠭ ᠢᠶᠠᠨ ᠶᠠᠪᠤᠵᠤ ᠪᠠᠶᠢᠬᠰᠠᠭᠠᠷ ᠠᠭᠤᠯᠠᠨ ᠤᠷᠤᠢ ᠲᠡᠭᠡᠷ᠎ᠡ ᠠᠴᠠ ᠲᠡᠷᠳᠡᠭᠡ ᠵᠦᠭ ᠲᠡᠭᠡᠨ ᠬᠠᠷᠠᠬᠤ ᠳᠤ ᠡᠵᠢ ᠶᠢᠨ ᠨᠠᠷᠠᠨ ᠬᠤᠸᠠᠷ ᠲᠡᠭᠦᠵᠤ ᠪᠠᠶᠢᠬᠰᠠᠨ ᠲᠠᠷᠢᠶᠠᠨ ᠤ ᠲᠡᠷᠭᠡᠳᠡ ᠪᠠᠶᠢᠬᠤ ᠠᠭᠤᠯᠠᠨ ᠬᠠᠷᠢ ᠲᠡᠭᠡᠷ᠎ᠡ ᠨᠢᠭᠡᠨ ᠪᠦᠳᠦᠬᠦᠨ ᠴᠢᠨ᠋ᠸ᠎ᠠ ᠰᠠᠭᠤᠭᠠᠳ ᠡᠵᠢ ᠶᠢᠨ ᠡᠰᠡᠷᠭᠦᠤ ᠠᠴᠠ ᠬᠠᠷᠠᠵᠤ ᠪᠠᠶᠢᠬᠰᠠᠨ ᠬᠡᠨ᠎ᠡ᠃ ᠢᠩᠭᠢᠭᠡᠳ ᠰᠠᠨᠳᠤᠷᠤᠨ ᠬᠦᠶᠦᠵᠤ ᠤᠴᠢᠭᠠᠳ ᠠᠪᠤ ᠳᠤ ᠬᠡᠯᠡᠵᠤ ᠦᠭᠭᠦᠭᠰᠡᠨ ᠨᠢ ᠡᠨᠡ ᠪᠠᠶᠢᠵᠠᠢ᠃ ᠡᠵᠢ ᠮᠢᠨᠢ ᠢᠩᠭᠢᠵᠤ ᠠᠶᠤᠯ ᠲᠦᠭᠰᠢᠬᠦᠷᠢ᠂ ᠬᠦᠴᠢᠷ ᠵᠤᠪᠠᠯᠠᠩ ᠢ ᠬᠠᠶᠢᠬᠤᠷᠤᠯ ᠦᠭᠡᠢ ᠪᠠᠷ ᠠᠮᠢᠳᠤᠷᠠᠯ ᠤᠨ ᠢᠶᠠᠨ ᠲᠦᠯᠦᠭᠡ ᠴᠢᠷᠮᠠᠶᠢᠳᠠᠭ ᠯᠡ ᠪᠠᠶᠢᠵᠠᠢ᠃     ᠡᠵᠢ ᠪᠤᠯ ᠪᠤᠳᠤᠯᠭ᠎ᠠ ᠴᠢᠩᠭ᠎ᠠ ᠬᠡᠯᠡ ᠬᠤᠷᠴᠠ ᠵᠤᠷᠢᠭ ᠰᠦᠰᠦ ᠲᠠᠢ ᠪᠦᠭᠡᠳ ᠪᠠᠰᠠ ᠬᠦᠴᠢᠷ ᠵᠤᠪᠠᠭᠤᠷᠢ ᠲᠠᠢ ᠬᠦᠮᠦᠨ ᠢ ᠤᠨᠴᠠᠭᠠᠶᠢᠯᠠᠨ ᠦᠷᠦ ᠡᠪᠡᠳᠳᠡᠭ ᠦᠷᠦᠪᠴᠢ ᠵᠦᠬᠡᠯᠡᠨ ᠰᠡᠳᠬᠢᠯ ᠲᠠᠢ ᠬᠦᠮᠦᠨ ᠪᠢᠯᠡ᠃ ᠮᠠᠨ ᠤ ᠠᠶᠢᠯ ᠳᠤ ᠲᠠᠪᠤᠨ ᠪᠠᠳᠤᠯᠠᠭᠠᠳᠦ ᠡᠷᠦᠭᠡ ᠶᠢᠨ ᠨᠢᠭᠡ ᠡᠪᠦᠭᠡ ᠠᠪᠤ ᠪᠠᠶᠢᠵᠠᠢ᠃ ᠤᠤᠯ ᠨᠢ ᠶᠠᠮᠠᠷ ᠨᠡᠷ᠎ᠡ ᠲᠠᠢ ᠶᠢ ᠮᠡᠳᠡᠬᠦ ᠦᠭᠡᠢ᠃ ᠲᠡᠬᠦᠨ ᠤ ᠪᠡᠶ᠎ᠡ ᠨᠢ ᠦᠨᠳᠦᠷ ᠪᠤᠯᠬᠤᠷ ᠶᠡᠷᠦ ᠨᠢ ︽ᠦᠨᠳᠦᠷ ᠠᠪᠤ︾ ᠬᠡᠵᠤ ᠲᠠᠭᠤᠳᠠᠳᠠᠭ᠃ ᠮᠠᠨ ᠤ ᠬᠢᠨ ᠠᠮᠳᠠ ᠲᠠᠢ ᠬᠤᠭᠤᠯᠠ ᠪᠤᠳᠠᠭ᠎ᠠ ᠬᠢᠭᠰᠡᠭᠡᠷ ᠯᠡ ᠡᠵᠢ ᠮᠢᠨᠢ ᠲᠡᠷᠡ ᠡᠪᠦᠭᠡ ᠳᠤ ᠠᠪᠠᠴᠢᠵᠤ ᠦᠭᠳᠡᠭ᠃ ᠮᠢᠨᠦ ᠴᠡᠭᠡᠵᠢᠯᠡᠵᠤ ᠪᠠᠶᠢᠬᠤ ᠪᠠᠷ ᠮᠠᠨ ᠤ ᠨᠢᠭᠡ ᠲᠤᠮᠤᠬᠠᠨ ᠮᠤᠳᠤᠨ ᠠᠶᠠᠭ᠎ᠠ ᠪᠠᠶᠢᠬᠰᠠᠨ᠃ ᠡᠵᠢ ᠲᠡᠷᠡ ᠠᠶᠠᠭᠠᠨ ᠳᠤ ᠪᠠᠨ ᠨᠢᠶᠠᠩ ᠭᠤᠯᠢᠷ ᠤᠨ ᠪᠤᠤᠪᠤ ᠪᠠᠨ ᠬᠢᠬᠡᠳ ᠲᠤᠮᠳᠠ ᠨᠢ ᠰᠢᠬᠢᠷ ᠲᠤᠰᠤ ᠪᠠᠨ ᠬᠠᠪᠴᠢᠭᠤᠯᠵᠤ ᠦᠭᠭᠦᠭᠡᠳ ᠠᠯᠴᠢᠭᠤᠷ ᠢᠶᠠᠷ ᠪᠤᠭᠤᠭᠠᠳ ᠨᠠᠳᠠ ᠳᠤ ᠭᠠᠷᠳᠠᠭᠤᠯᠵᠤ᠄ ︽ᠬᠤᠷᠳᠤᠨ ᠬᠡᠦᠬᠡᠨ ᠮᠢᠨᠢ᠂ ᠬᠦᠷᠦᠬᠦ ᠠᠴᠠ ᠨᠢ ᠡᠮᠦᠨ᠎ᠡ ᠦᠨᠳᠦᠷ ᠡᠪᠦᠭᠡ ᠳᠡᠭᠡᠨ ᠠᠪᠠᠴᠢᠵᠤ ᠦᠭ︾ ᠬᠡᠵᠤ ᠨᠠᠮ᠎ᠠ ᠶᠢ ᠶᠠᠪᠤᠭᠤᠯᠤᠬᠰᠠᠨ ᠤᠳᠠᠭ᠎ᠠ ᠤᠯᠠᠨ ᠪᠤᠢ᠃ ᠦᠨᠳᠦᠷ ᠡᠪᠦᠭᠡ ᠨᠠᠮ᠎ᠠ ᠶᠢ ᠤᠴᠢᠬᠤ ᠪᠦᠷᠢ ᠬᠠᠨᠵᠤᠨ ᠤ ᠪᠠᠨ ᠬᠠᠯᠠᠭᠤᠨ ᠬᠡᠰᠡᠭ ᠲᠤ ᠬᠡᠪᠳᠡᠵᠤ ᠯᠡ ᠪᠠᠶᠢᠳᠠᠭ᠃ ᠲᠡᠭᠡᠭᠡᠳ ᠦᠷᠴᠢᠯᠡᠭᠡᠰᠦ ᠲᠦᠭᠦᠷᠦᠭᠰᠡᠨ ᠴᠢᠷᠠᠢ ᠳᠤᠨᠢ ᠪᠠᠶᠠᠷ ᠪᠠᠶᠠᠰᠤᠯ ᠲᠤᠳᠤᠷᠠᠵᠤ᠄ ︽ᠬᠡᠤᠬᠡᠨ ᠡ᠂ ᠲᠡᠷᠡ ᠰᠢᠷᠡᠭᠡᠨ ᠲᠡᠭᠡᠷ᠎ᠡ ᠠᠴᠠ ᠨᠢᠭᠡ ᠠᠶᠠᠭ᠎ᠠ ᠠᠪᠤᠭᠠᠳ ᠢᠷ᠎ᠡ︾ ᠬᠡᠵᠤ ᠰᠠᠯᠭᠠᠨᠠᠨ ᠴᠡᠴᠡᠷᠬᠢᠯᠡᠭᠰᠡᠭᠡᠷ ᠠᠶᠠᠭᠠᠨ ᠳᠤ ᠪᠠᠨ ᠶᠡᠭᠦᠯᠡᠵᠤ ᠠᠪᠳᠠᠭ᠃ ᠤᠳᠤ ᠪᠤᠳᠤᠬᠤᠯᠠᠷ ᠦᠨᠳᠦᠷ ᠡᠪᠦᠭᠡ ᠮᠢᠨᠢ ᠶᠡᠭᠡ ᠯᠡ ᠬᠦᠬᠡᠷᠦᠬᠦ᠋ᠢᠯᠡᠯᠳᠡᠢ ᠪᠠᠶᠢᠬᠰᠠᠨ ᠶᠤᠮ᠃     ᠲᠡᠭᠡᠳᠦ ᠵᠠᠭᠤᠨ ᠤ ᠲᠠᠪᠢᠭᠠᠳ ᠤᠨ ᠤ ᠦᠶ᠎ᠡ ᠪᠠᠷ ᠮᠦᠨ ᠴᠤ ᠭᠤᠷᠪᠠᠨ ᠵᠢᠯ ᠤᠨ ᠭᠠᠢ ᠭᠠᠮᠰᠢᠭ ᠤᠨ ᠦᠶ᠎ᠡ ᠳᠤ ᠵᠤᠨ ᠨᠠᠮᠤᠷ ᠤᠨ ᠠᠭᠤᠯᠵᠠᠭᠤᠷ ᠲᠡᠭᠡᠷ᠎ᠡ ᠡᠵᠢ ᠮᠢᠨᠢ ᠤᠷᠤᠢ ᠶᠢᠨ ᠬᠤᠭᠤᠯᠠ ᠪᠠᠨ ᠪᠠᠵᠠᠭᠠᠵᠤ ᠶᠠᠭᠠᠷᠠᠵᠤ ᠪᠠᠶᠢᠯ᠎ᠠ᠃ ᠡᠨᠡ ᠦᠶ᠎ᠡ ᠳᠤ ᠨᠢᠭᠡᠨ ᠶᠡᠬᠡᠳᠡ ᠦᠯᠦᠰᠦᠭᠰᠡᠨ ᠪᠠᠶᠢᠳᠠᠯ ᠲᠠᠢ ᠲᠦᠴᠢᠭᠡᠳ ᠨᠠᠰᠤᠨ ᠤ ᠡᠷᠡᠭᠳᠡᠢ ᠮᠠᠨ ᠤ ᠡᠭᠦᠳᠡᠨ ᠲᠡᠭᠡᠷ᠎ᠡ ᠲᠡᠨᠦᠭᠦᠴᠢᠯᠡᠨ ᠢᠷᠡᠭᠡᠳ᠄ ︽ᠦᠯᠦ ᠬᠤᠭᠤᠯᠠ ᠵᠤᠯᠭᠠᠬᠤ ᠶᠠᠭᠤᠮ᠎ᠠ ᠤᠯᠤᠭᠠᠳ ᠦᠭᠭᠦᠨᠦ︖︾ ᠭᠡᠯ᠎ᠡ᠃ ᠲᠤᠭᠤᠭᠠᠨ ᠲᠤᠳᠤᠷ᠎ᠠ ᠨᠤᠭᠤᠭ᠎ᠠ ᠲᠠᠢ ᠬᠤᠯᠢᠬᠰᠠᠨ ᠰᠢᠩᠭᠡᠨ ᠪᠤᠳᠠᠭ᠎ᠠ ᠫᠤᠯ ᠫᠤᠯ ᠪᠤᠴᠠᠯᠵᠤ ᠪᠠᠶᠢᠯ᠎ᠠ᠃ ᠲᠡᠷᠡᠬᠦ ᠭᠠᠴᠢᠭ ᠴᠠᠭ ᠬᠠᠮᠢᠭ᠎ᠠ ᠠᠴᠠ ᠢᠯᠡᠭᠦᠴᠡ ᠴᠢᠨᠠᠬᠤ ᠪᠤᠳᠠᠭ᠎ᠠ ᠪᠠᠶᠢᠬᠤ ᠪᠢᠯᠡ︖ ᠪᠦᠷ ᠯᠡ ᠬᠦᠮᠦᠨ ᠠᠮᠠᠨ ᠲᠤᠭᠠᠨ ᠳᠤ ᠪᠠᠨ ᠠᠷᠠᠢ ᠭᠡᠵᠤ ᠡᠪᠯᠡᠭᠦᠯᠦᠨ ᠬᠦᠢᠴᠡᠭᠡᠳᠡᠭ ᠪᠠᠶᠢᠯ᠎ᠠ᠃ ᠭᠡᠳᠡᠯ᠎ᠡ ᠡᠵᠢ ᠮᠢᠨᠢ ᠬᠠᠷᠢᠨ ᠲᠡᠷᠡ ᠬᠦᠮᠦᠨ ᠳᠤ ᠨᠢᠭᠡ ᠲᠤᠮᠤ ᠠᠶᠠᠭ᠎ᠠ ᠪᠤᠳᠠᠭ᠎ᠠ ᠠᠶᠠᠭᠠᠯᠠᠵᠤ ᠦᠭᠪᠡ᠃ ᠲᠡᠷᠡ ᠬᠦᠮᠦᠨ ᠭᠠᠳᠠᠨ᠎ᠠ ᠡᠭᠦᠳᠡᠨ ᠤ ᠵᠡᠭᠦᠨ ᠵᠠᠬ᠎ᠠ ᠬᠡᠷᠡᠮ ᠢ ᠲᠦᠰᠢᠵᠤ ᠤᠴᠦ᠋ᠢᠨ ᠰᠠᠭᠤᠭᠠᠳ ᠭᠠᠷ ᠨᠢ ᠲᠠᠬᠵᠢᠷᠠᠨ ᠴᠡᠴᠡᠷᠡᠵᠤ ᠢᠳᠡᠵᠤ ᠪᠠᠷᠠᠭᠠᠳ ᠨᠢᠳᠦᠨ ᠳᠤ ᠪᠠᠨ ᠨᠢᠯᠪᠤᠰᠤ ᠲᠠᠢ ᠪᠠᠷ ᠡᠵᠢ ᠳᠤ ᠲᠠᠯᠠᠷᠬᠠᠨ ᠶᠠᠪᠤᠭᠠᠳ ᠦᠭᠴᠡᠢ᠃ ᠤᠳᠤ ᠶᠠᠭᠠᠬᠢᠬᠤ ᠪᠢᠯᠡ︖ ᠠᠪᠤ ᠶᠢᠨ ᠠᠭᠠᠰᠢ ᠵᠠᠩ ᠲᠤᠬᠰᠢᠨ᠂ ᠨᠢᠭᠡ ᠡᠳᠦᠷ ᠪᠠᠷᠢᠭᠠᠳᠠ ᠶᠢᠨ ᠲᠠᠷᠢᠶᠠᠨ ᠠᠵᠢᠯ ᠢ ᠬᠢᠬᠡᠳ ᠶᠠᠳᠠᠷᠠᠵᠤ ᠵᠦᠳᠡᠷᠡᠭᠡᠳ ᠢᠷᠡᠭᠦ ᠳᠤ ᠪᠠᠨ ᠡᠳᠡᠭᠡᠷ ᠪᠠᠶᠢᠳᠠᠯ ᠢ ᠮᠡᠳᠡᠪᠡᠯ ᠶᠠᠭᠠᠬᠢᠳᠠᠭ ᠪᠢᠯᠡ︖ ᠬᠡᠵᠤ ᠪᠢ ᠠᠶᠤᠵᠤ ᠪᠠᠶᠢᠳᠠᠯ᠎ᠠ ᠠᠪᠤ ᠠᠵᠢᠯ ᠠᠴᠠ ᠪᠠᠨ ᠪᠠᠭᠤᠭᠠᠳ ᠬᠦᠷᠦᠭᠡᠳ ᠢᠷᠡᠪᠡ᠃ ᠡᠵᠢ ᠰᠢᠷᠡᠭᠡ ᠪᠠᠨ ᠵᠠᠰᠠᠵᠤ ᠪᠤᠳᠠᠭ᠎ᠠ ᠪᠠᠨ ᠠᠶᠠᠭᠠᠯᠠᠵᠤ ᠦᠭᠭᠦᠭᠡᠳ ᠵᠤᠷᠢᠭᠤᠳᠠ ᠰᠢᠷᠡᠭᠡᠨ ᠳᠤ ᠰᠠᠭᠤᠬᠤ ᠦᠭᠡᠢ ᠡᠨᠡ ᠲᠡᠷᠡ ᠠᠷᠰᠠᠷ ᠠᠵᠢᠯ ᠢᠶᠠᠨ ᠬᠢᠵᠤ ᠯᠡ ᠪᠠᠶᠢᠯ᠎ᠠ᠃ ᠠᠪᠤ ᠤᠴᠢᠷ ᠢ ᠨᠢ ᠮᠡᠳᠡᠬᠦ ᠦᠭᠡᠢ ᠢᠳᠡᠬᠦ ᠪᠠᠷ ᠢᠶᠠᠨ ᠢᠳᠡᠨ᠎ᠡ᠂ ᠪᠠᠭ᠎ᠠ ᠠᠩᠭ᠎ᠠ ᠲᠡᠭᠦᠤ ᠨᠠᠷ ᠴᠠᠳᠳᠠᠯ᠎ᠠ ᠢᠳᠡᠭᠡᠳ ᠨᠠᠭᠠᠳᠬᠤ ᠪᠠᠷ ᠶᠠᠪᠤᠪᠠ᠃ ᠡᠵᠢ ᠠᠷᠭ᠎ᠠ ᠦᠭᠡᠢ ᠯᠡ ᠲᠤᠭᠤᠭᠠᠨ ᠤ ᠨᠠᠭᠠᠯᠳᠤᠪᠤᠷᠢ ᠶᠢ ᠤᠰᠤ ᠬᠢᠵᠤ ᠲᠡᠪᠳᠦᠭᠡᠭᠡᠳ ᠡᠭᠡᠴᠢ ᠪᠢᠳᠡ ᠬᠤᠶᠠᠷ ᠲᠤ ᠦᠯ ᠬᠤᠭᠤᠯᠠ ᠵᠤᠯᠭᠠᠭᠤᠯᠪᠠ᠃ ᠡᠵᠢ ᠮᠢᠨᠢ ᠬᠠᠷᠢᠨ ᠬᠡᠯᠡ ᠲᠡᠭᠡᠷ᠎ᠡ ᠪᠠᠡᠨᠢᠭᠡ ᠮᠦᠬᠦᠯᠢᠭ ᠪᠤᠳᠠᠭ᠎ᠠ ᠴᠤ ᠤᠯᠵᠤ ᠲᠠᠯᠪᠢᠬᠰᠠᠨ ᠦᠭᠡᠢ ᠬᠤᠭᠤᠰᠤᠨ ᠬᠤᠨᠤᠪᠠ᠃ ᠢᠩᠭᠢᠬᠦᠯᠡᠷ ᠨᠢ ᠡᠵᠢ ᠮᠢᠨᠢ ᠵᠠᠮ ᠲᠡᠭᠡᠷᠡᠬᠢ ᠬᠤᠭᠤᠯᠠ ᠪᠤᠳᠠᠭ᠎ᠠ ᠭᠤᠶᠤᠬᠴᠢ ᠶᠢ ᠦᠵᠡᠬᠦ ᠪᠤᠯᠭᠠᠨ ᠶᠡᠭᠡ ᠯᠠ ᠦᠷᠦᠪᠳᠡᠨ ᠴᠢᠳᠠᠯ ᠤᠨ ᠬᠢᠷᠢ ᠪᠠᠷ ᠢᠶᠠᠨ ᠬᠠᠪᠰᠤᠷᠳᠠᠭ ᠪᠠᠶᠢᠯ᠎ᠠ᠃     ᠬᠤᠵᠢᠮ ᠨᠢ ᠤᠯᠠᠭᠠᠨᠮᠤᠳᠤ ᠨᠤᠳᠤᠬ ᠲᠤ ᠨᠡᠬᠦᠵᠤ ᠤᠴᠢᠬᠰᠠᠨ ᠤ ᠰᠡᠭᠦᠯᠡᠷ ᠡᠵᠢ ᠮᠢᠨᠢ ᠭᠡᠷ ᠲᠡᠭᠡᠨ ᠰᠤᠷᠤᠭᠴᠢ ᠠᠪᠴᠤ ᠰᠠᠭᠤᠭᠠᠳ ᠰᠤᠬᠤᠷ ᠵᠤᠭᠤᠰ ᠴᠤ ᠠᠪᠬᠤ ᠦᠭᠡᠢ ᠮᠦᠷᠳᠡᠭᠡᠨ ᠠᠯᠢᠪᠠ ᠠᠮᠳᠠ ᠰᠢᠮᠳᠠ ᠲᠠᠢ ᠶᠠᠭᠤᠮ᠎ᠠ ᠪᠠᠨ ᠲᠤᠷ᠎ᠠ ᠪᠠᠷ ᠨᠢ ᠢᠳᠡᠭᠦᠯᠳᠡᠭ᠃ ᠲᠡᠳᠡᠨᠤᠰ ᠪᠢᠴᠢᠭ ᠰᠤᠶᠤᠯ ᠤᠨ ᠮᠦᠷ ᠢ ᠬᠦᠭᠡᠭᠡᠭᠡᠳ ᠠᠵᠢᠯ ᠦᠢᠯᠡᠰ ᠲᠠᠢ ᠪᠤᠯᠤᠬᠰᠠᠨ ᠤ ᠲᠠᠷᠠᠭ᠎ᠠ ᠤᠯᠠᠩᠭᠢ ᠨᠢ ᠪᠦᠷ ᠡᠵᠢ ᠶᠢ ᠡᠷᠬᠢᠵᠤ ᠦᠵᠡᠵᠤ ᠪᠠᠶᠢᠬᠰᠠᠨ᠃     1969 ᠤᠨ ᠤ ᠬᠠᠬᠢᠷ ᠡᠪᠤᠯ ᠤᠨ ᠬᠦᠢᠳᠡᠨ ᠳᠤ ᠴᠢᠯᠦᠭᠡᠯᠡᠬᠦ ᠴᠡᠷᠢᠭ ᠤᠨ ᠲᠠᠷᠤᠭ᠎ᠠ ᠪᠠᠶᠢᠯᠳᠤᠬᠴᠢᠳ ᠭᠡᠭᠡᠷᠡᠯᠡᠨ ᠠᠯᠬᠤᠬᠤ ᠡᠭᠦᠷᠭᠡ ᠬᠦᠢᠴᠡᠳᠭᠡᠬᠦ ᠪᠠᠷ ᠶᠠᠪᠤᠬᠤ ᠵᠠᠭᠤᠷ᠎ᠠ ᠪᠠᠨ ᠮᠠᠨ ᠤ ᠠᠶᠢᠯ ᠳᠤ ᠰᠠᠷ᠎ᠠ ᠭᠠᠷᠤᠢ ᠰᠠᠭᠤᠵᠠᠢ ᠃ ᠪᠠᠷᠢᠭᠠᠳᠠ ᠠᠴᠠ ᠮᠠᠨ ᠤ ᠬᠢᠨ ᠳᠤ ᠠᠷᠪᠠᠭᠠᠳ ᠴᠡᠷᠢᠭ ᠲᠤᠬᠢᠷᠠᠭᠤᠯᠤᠬᠰᠠᠨ ᠪᠠᠶᠢᠨ᠎ᠠ᠃ ᠲᠡᠭᠡᠭᠰᠡᠨ ᠳᠤ ᠡᠵᠢ ᠮᠢᠨᠢ ᠮᠠᠨᠤᠰ ᠢ ᠲᠠᠭᠠᠭᠤᠯᠵᠤ᠂ ᠬᠦᠮᠦᠷᠭᠡ ᠪᠠᠷ ᠬᠡᠷᠡᠭᠯᠡᠵᠤ ᠪᠠᠶᠢᠬᠰᠠᠨ ᠵᠡᠬᠦᠨ ᠲᠠᠰᠤᠯᠭ᠎ᠠ ᠭᠡᠷ ᠲᠡᠭᠡᠨ ᠤᠷᠤᠵᠤ ᠰᠠᠭᠤᠭᠠᠳ᠂ ᠴᠡᠷᠢᠭ ᠤᠳ ᠢ ᠦᠪᠡᠷ ᠤᠨ ᠰᠠᠭᠤᠵᠤ ᠪᠠᠶᠢᠬᠰᠠᠨ ᠬᠠᠯᠠᠭᠤᠨ ᠲᠤᠯᠠᠭᠠᠨ ᠭᠡᠷ ᠲᠡᠭᠡᠨ ᠰᠠᠭᠤᠯᠭᠠᠪᠠ᠃ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠤ ᠠᠮᠢᠳᠤᠷᠠᠯ ᠬᠦᠴᠢᠷᠳᠡᠢ ᠪᠤᠯᠬᠤᠷ ᠬᠦᠮᠦᠷᠭᠡ ᠶᠢᠨ ᠭᠡᠷ ᠤᠨ ᠴᠤᠩᠬᠤ ᠨᠢ ᠰᠢᠯ ᠪᠠᠰᠠ ᠦᠭᠡᠢ ᠴᠠᠭᠠᠰᠦ ᠪᠠᠷ ᠨᠠᠭᠠᠵᠤ ᠪᠠᠶᠢᠬᠰᠠᠨ ᠶᠤᠮ᠃ ᠴᠡᠷᠢᠭ ᠠᠩᠭᠢ ᠶᠢᠨ ᠪᠤᠴᠠᠬᠤ ᠴᠠᠭ ᠨᠢ ᠲᠤᠯᠤᠭᠠᠳ ᠤᠯᠠᠭᠠᠨᠬᠠᠳᠠ ᠬᠦᠩᠱᠧ ᠳᠤ ᠳ᠋ᠦᠩᠨᠡᠯᠳᠡ ᠶᠢᠨ ᠬᠤᠷᠠᠯ ᠬᠢᠬᠦ ᠳᠤ ᠪᠠᠨ ᠴᠡᠷᠢᠭ ᠠᠷᠠᠳ ᠤᠨ ᠵᠢᠭᠠᠰᠤ ᠤᠰᠤᠨ ᠤ ᠬᠠᠷᠢᠴᠠᠭ᠎ᠠ ᠶᠢ ᠢᠯᠡᠳᠭᠡᠭᠰᠡᠨ ᠵᠢᠱᠢᠶ᠎ᠡ ᠪᠤᠯᠭᠠᠨ ᠡᠵᠢ ᠶᠢᠨ ᠦᠢᠯᠡ ᠠᠵᠢᠯᠯᠠᠭ᠎ᠠ ᠶᠢ ᠦᠨᠳᠦᠷ ᠢᠶᠠᠷ ᠦᠨᠡᠯᠡᠵᠤ ᠦᠩᠭᠡᠷᠡᠪᠡ᠃     ᠡᠵᠢ ᠮᠢᠨᠢ ᠠᠶᠢᠯ ᠰᠠᠭᠠᠬᠠᠯᠳᠠ ᠲᠠᠢ ᠪᠠᠨ ᠡᠶ᠎ᠡ ᠨᠠᠶᠢᠷ ᠲᠠᠢ ᠪᠤᠯᠬᠤᠷ ᠠᠶᠢᠯ ᠤᠨ ᠡᠵᠢ ᠨᠠᠷ ᠪᠦᠷ ᠮᠢᠨᠦ ᠡᠵᠢ ᠲᠠᠢ ᠦᠶᠡᠷᠭᠡᠨ ᠶᠠᠪᠤᠯᠴᠠᠬᠤ ᠲᠤᠷ᠎ᠠ ᠲᠠᠢ᠂ ᠡᠵᠢ ᠦᠨᠡᠨᠴᠢ ᠰᠢᠳᠤᠷᠭᠤ᠂ ᠪᠤᠰᠤᠳ ᠢ ᠬᠠᠪᠰᠤᠷᠬᠤ ᠲᠤᠷᠠᠳᠠᠢ ᠪᠤᠯᠬᠤᠷ ᠤᠯᠠᠨ ᠤ ᠪᠠᠨ ᠲᠤᠮᠳᠠ ᠶᠡᠭᠡ ᠢᠳᠡᠭᠡᠯ ᠬᠦᠨᠳᠦ ᠲᠠᠢ ᠪᠠᠶᠢᠯ᠎ᠠ᠃ ᠶᠠᠭ ᠡᠶᠢᠮᠦ ᠠᠴᠠ ᠵᠤᠨ ᠪᠦᠷᠢ ᠲᠠᠷᠢᠶᠠᠨ ᠠᠵᠢᠯ ᠶᠠᠭᠠᠷᠠᠤ ᠦᠶ᠎ᠡ ᠳᠤ ᠪᠠᠷᠢᠭᠠᠳᠠ ᠶᠢᠨ ᠲᠠᠷᠤᠭ᠎ᠠ ᠮᠠᠨᠠᠶᠢᠬᠢᠨ ᠳᠤ ᠢᠷᠡᠭᠡᠳ᠄ ︽ᠡᠭᠡᠴᠢ ᠡ᠂ ᠤᠳᠤ ᠶᠠᠭᠠᠬᠢᠬᠤ ᠪᠢᠯᠡ᠂ ᠨᠠᠷᠢᠮᠦ ᠦᠯᠦᠩᠳᠡᠭᠡᠳ ᠡᠪᠡᠰᠦ ᠶᠢ ᠨᠢ ᠦᠭᠳᠦᠭᠡᠬᠦ ᠴᠠᠭ ᠪᠤᠯᠵᠠᠢ᠃ ᠠᠶᠢᠯ ᠤᠨ ᠡᠮᠡᠭᠳᠡᠶᠢᠴᠦᠳ ᠢ ᠲᠠᠶᠢᠴᠢᠯᠠᠭᠠᠳ ᠦᠭᠭᠦᠨ᠎ᠡ ᠦᠦ︖︾ ᠬᠡᠵᠤ ᠭᠤᠶᠤᠳᠠᠭ ᠪᠠᠶᠢᠯ᠎ᠠ᠃ ᠡᠵᠢ ᠮᠢᠨᠢ ᠴᠢᠳᠠᠯ ᠤᠨ ᠢᠶᠠᠨ ᠬᠢᠷᠢ ᠲᠤᠳᠤᠷ᠎ᠠ ᠬᠡᠵᠢᠶᠡᠳᠡ ᠪᠤᠰᠤᠳ ᠲᠤ ᠦᠭᠡᠢ ᠭᠡᠵᠤ ᠭᠡᠯᠡᠳᠡᠭ ᠦᠭᠡᠢ ᠪᠤᠯᠬᠤᠷ ᠶᠠᠳᠠᠷᠠᠯ ᠵᠦᠳᠡᠷᠡᠯ ᠢᠶᠠᠨ ᠬᠠᠮᠢᠶᠠᠷᠤᠯ ᠦᠭᠡᠢ ᠠᠶᠢᠯ ᠡᠷᠦᠭᠡ ᠪᠦᠷᠢ ᠪᠠᠷ ᠲᠠᠷᠠᠭᠠᠯᠠᠨ᠄ ︽ᠮᠠᠷᠭᠠᠰᠢ ᠠᠴᠠ ᠡᠬᠢᠯᠡᠭᠡᠳ ᠡᠪᠡᠰᠦ ᠦᠭᠳᠦᠭᠡᠬᠦ ᠪᠠᠷ ᠭᠠᠷᠴᠠᠭᠠᠶ᠎ᠠ᠃ ᠪᠠᠷᠢᠭᠠᠳᠠ ᠶᠢᠨ ᠠᠵᠢᠯ ᠮᠠᠨ ᠤ ᠡᠷᠦᠭᠡ ᠪᠦᠷᠢ ᠲᠠᠢ ᠬᠤᠯᠪᠤᠬᠳᠠᠨ᠎ᠠ᠃ ᠲᠤᠭᠤᠭᠠᠨ ᠳᠤᠨᠢ ᠦᠭᠡᠢ ᠪᠤᠯ ᠠᠶᠠᠭᠠᠨ ᠳᠤᠨᠢ ᠶᠠᠭᠠᠬᠢᠵᠤ ᠪᠠᠶᠢᠬᠤ ᠪᠤᠢ︖︾ ᠬᠡᠵᠤ ᠤᠬᠠᠭᠤᠯᠭ᠎ᠠ ᠬᠢᠭᠰᠡᠨ ᠠᠴᠠ ᠪᠤᠯᠵᠤ ᠬᠡᠯᠡᠭᠰᠡᠨ ᠶᠤᠰᠤᠭᠠᠷ ᠨᠢ ᠠᠵᠢᠯ ᠳᠤ ᠭᠠᠷᠳᠠᠭ ᠪᠠᠶᠢᠨ᠎ᠠ᠃     ᠮᠢᠨᠦ ᠡᠵᠢ ᠶᠢᠨ ᠬᠢᠮᠤᠰᠤ ᠬᠤᠷᠤᠭᠤ ᠨᠢ ᠪᠤᠰᠤᠳ ᠤᠨ ᠬᠢ ᠲᠠᠢ ᠵᠢᠭᠠᠬᠠᠨ ᠤᠨᠳᠤᠤ ᠤᠷᠭᠤᠬᠰᠠᠨ ᠪᠤᠯᠪᠠᠴᠤ ᠤᠶᠤᠳᠠᠯ ᠳᠤ ᠮᠠᠰᠢ ᠤᠷᠠᠨ ᠨᠠᠷᠢᠨ ᠨᠡᠷᠡᠳᠡᠢ ᠪᠠᠶᠢᠯ᠎ᠠ᠃ ᠡᠶᠢᠮᠦ ᠠᠴᠠ ᠠᠶᠢᠯ ᠤᠨ ᠡᠭᠡᠴᠢ ᠲᠡᠭᠦᠤ ᠨᠠᠷ ᠨᠢ ᠬᠤᠪᠴᠠᠰᠤ ᠡᠰᠭᠡᠬᠦᠯᠬᠦ᠂ ᠱᠠᠬᠠᠢ ᠶᠢᠨ ᠵᠤᠯᠤᠭ ᠤᠨ ᠬᠤᠩᠰᠢᠶᠠᠷ ᠲᠡᠭᠡᠷ᠎ᠡ ᠨᠢ ᠬᠤᠸᠠᠷ ᠵᠢᠷᠤᠭᠤᠯᠬᠤ ᠭᠡᠬᠦ ᠮᠡᠳᠦ ᠶᠢᠨ ᠤᠷᠠᠨ ᠨᠠᠷᠢᠨ ᠤᠶᠤᠳᠠᠯ ᠬᠢᠬᠦ ᠪᠤᠯᠭᠠᠨ ᠪᠦᠷ ᠯᠡ ᠡᠵᠢ ᠶᠢ ᠡᠷᠢᠵᠤ ᠢᠷᠡᠳᠡᠭ ᠪᠠᠶᠢᠯ᠎ᠠ᠃ ᠡᠵᠢ ᠮᠢᠨᠢ ᠨᠠᠮ᠎ᠠ ᠶᠢ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠳᠠᠯ᠎ᠠ ᠬᠠᠳᠬᠤᠮᠠᠯ ᠬᠤᠸᠠᠷ ᠲᠠᠢ ᠱᠠᠬᠠᠢ ᠡᠮᠦᠰᠭᠡᠵᠤ ᠪᠠᠶᠢᠵᠠᠢ᠃ ᠰᠦᠮ᠎ᠡ ᠶᠢᠨ ᠬᠡᠭᠡᠨ ᠬᠦᠷᠳᠡᠯ᠎ᠡ ᠨᠠᠰᠤᠨ ᠰᠡᠭᠦᠳᠡᠷ ᠲᠡᠭᠡᠷ᠎ᠡ ᠪᠠᠨ ᠡᠮᠦᠰᠬᠦ ᠱᠠᠬᠠᠢ ᠪᠠᠨ ᠴᠤ ᠡᠵᠢ ᠪᠠᠷ ᠬᠢᠯᠬᠡᠳᠡᠭ ᠪᠠᠶᠢᠯ᠎ᠠ᠃     ᠡᠵᠢ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠶᠢᠬᠤ ᠳᠤ ᠪᠠᠨ ᠪᠤᠷᠬᠠᠨ ᠳᠤ ᠵᠠᠯᠪᠠᠷᠢᠵᠤ ᠪᠤᠶᠠᠨ ᠦᠢᠯᠡᠳᠬᠦ ᠶᠢ ᠪᠤᠳᠤᠳᠠᠭ ᠤᠨ ᠤᠴᠢᠷ ᠴᠢᠳᠠᠯ ᠤᠨ ᠢᠶᠠᠨ ᠬᠢᠷᠢ ᠪᠠᠷ ᠪᠤᠰᠤᠳ ᠢ ᠲᠤᠰᠠᠯᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠮᠢᠬ᠎ᠠ ᠢᠳᠡᠳᠡᠭ ᠦᠭᠡᠢ ᠵᠠᠩᠰᠢᠯ ᠢ ᠤᠯᠠᠨ ᠵᠢᠯ ᠪᠠᠷᠢᠮᠳᠠᠯᠠᠬᠰᠨ ᠶᠤᠮ᠃     ᠬᠠᠶᠢᠷᠠᠳᠦ ᠡᠵᠢ ᠮᠢᠨᠢ 2012 ᠤᠨ ᠤ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠨᠠᠢᠮᠠᠨ ᠰᠠᠷ᠎ᠠ ᠶᠢᠨ ᠨᠠᠢᠮᠠᠨ ᠤ ᠦᠭᠡᠷ ᠴᠠᠭ ᠤᠨ ᠦᠶ᠎ᠡ ᠪᠠᠷ ᠠᠭᠤᠰᠬᠢ ᠵᠢᠷᠦᠭᠡᠨ ᠤ ᠡᠪᠡᠳᠴᠢᠨ ᠢᠶᠠᠷ ᠪᠢᠳᠡᠨ ᠠᠴᠠ ᠪᠠᠨ ᠡᠭᠦᠷᠢᠳᠡ ᠬᠠᠭᠠᠴᠠᠯ᠎ᠠ᠃ ᠡᠵᠢ ᠮᠢᠨᠢ ᠨᠠᠰᠤ ᠠᠬᠢᠬᠤ ᠲᠤᠳᠤᠮ ᠪᠢ ᠬᠤᠵᠢᠮ ᠬᠡᠤᠬᠡᠳ ᠤᠳ ᠢᠶᠠᠨ ᠵᠤᠪᠠᠭᠠᠬᠤ ᠦᠭᠡᠢ ᠪᠤᠯ ᠪᠤᠯᠴᠢᠬᠠᠨ᠎ᠠ ᠬᠡᠵᠤ ᠪᠤᠷᠬᠠᠨ ᠳᠤ ᠪᠠᠨ ᠵᠠᠯᠪᠠᠷᠢᠨ ᠲᠠᠭᠠᠳᠬᠠᠳᠠᠭ ᠤᠴᠢᠷ ᠠᠴᠠ ᠴᠤ ᠪᠤᠯᠪᠠ ᠦᠦ︖ ᠪᠤᠤ ᠮᠡᠳᠡ᠂ ᠤᠨᠳᠠᠭ᠎ᠠ ᠪᠠᠷ ᠢᠶᠠᠨ ᠲᠠᠶᠢᠪᠤᠭᠤᠨ ᠨᠠᠰᠤ ᠪᠠᠷᠠᠪᠠ᠃     ᠡᠨᠡᠷᠢᠯ ᠤᠨ ᠲᠡᠭᠷᠢ ᠪᠤᠯᠤᠬᠰᠠᠨ ᠡᠵᠢ ᠮᠢᠨᠢ ᠡᠨᠡ ᠶᠢᠷᠳᠢᠨᠴᠦ ᠳᠤ ᠨᠠᠶᠠᠨ ᠨᠠᠢᠮᠠᠨ ᠨᠠᠰᠤᠯᠠᠳᠠᠯ᠎ᠠ ᠠᠮᠢᠳᠤᠷᠠᠬᠤ ᠳᠤ ᠪᠠᠨ ᠦᠳᠡᠯᠬᠦ ᠶᠢᠨ ᠦᠵᠤᠭᠦᠷ ᠶᠡᠷᠦ ᠨᠢ ᠭᠤᠷᠪᠠᠨ ᠵᠦᠢᠯ ᠤᠨ ᠬᠦᠰᠡᠯ ᠡᠪᠤᠷᠯᠡᠵᠤ ᠪᠠᠶᠢᠯ᠎ᠠ᠃ ᠵᠠᠯᠠᠭᠤ ᠶᠢᠨ ᠦᠶ᠎ᠡ ᠳᠡᠭᠡᠨ ᠦᠰᠴᠦ ᠲᠦᠷᠦᠭᠰᠡᠨ ᠨᠤᠳᠤᠭ ︵ᠤᠳᠤ ᠶᠢᠨ ᠬᠢᠷᠢᠨ ᠮᠤᠵᠢ ᠶᠢᠨ ᠲᠤᠤ ᠨᠠᠨ ᠰᠢᠶᠠᠨ ᠤ ᠬᠤᠸᠠ ᠲᠤᠪᠤ︶ ᠲᠤ ᠪᠠᠨ ᠬᠠᠷᠢᠵᠤ ᠦᠵᠡᠪᠡᠯ ᠡ ᠬᠡᠵᠤ ᠦᠷᠭᠦᠯᠵᠢ ᠶᠠᠷᠢᠳᠠᠭ ᠠᠴᠠ ᠲᠡᠭᠦᠨ ᠤ ᠨᠢᠭᠡ ᠬᠦᠰᠡᠯ ᠢ ᠨᠢ ᠮᠡᠳᠡᠵᠤ ᠪᠤᠯᠤᠨ᠎ᠠ᠃ ᠲᠠᠷᠠᠭ᠎ᠠ ᠨᠢ ᠤᠳᠠᠭᠠᠨ ᠵᠢᠯ ᠠᠮᠢᠳᠤᠷᠠᠬᠰᠠᠨ ᠤᠯᠠᠭᠠᠨᠬᠠᠳᠠ ᠶᠢᠨ ᠵᠡᠭᠦᠨ ᠪᠠᠶᠠᠨ ᠲᠤᠬᠤᠢ ᠳᠤ ᠪᠠᠨ ᠬᠠᠷᠢᠵᠤ ᠦᠵᠡᠪᠡᠯ ᠡ ᠬᠡᠬᠦ ᠶᠠᠷᠢᠶᠠᠨ ᠠᠴᠠ ᠲᠡᠭᠦᠨ ᠤ ᠪᠠᠰᠠ ᠨᠢᠭᠡ ᠬᠦᠰᠡᠯ ᠢ ᠨᠢ ᠮᠡᠳᠡᠬᠦ ᠪᠤᠯᠤᠨ᠎ᠠ᠃ ᠰᠡᠭᠦᠯᠡᠷ ᠨᠢ ᠪᠢᠳᠡ ᠡᠭᠡᠴᠢ ᠲᠡᠭᠦᠦ ᠬᠡᠳᠦᠭᠦᠯᠡ ᠪᠠᠨ ᠤᠳᠠᠭᠠᠨ ᠵᠢᠯ ᠠᠮᠢᠳᠤᠷᠠᠬᠰᠠᠨ ᠤᠯᠠᠭᠠᠨᠮᠤᠳᠤ ᠠᠴᠠ ᠪᠠᠨ ᠠᠵᠤ ᠠᠮᠢᠳᠤᠷᠠᠯ ᠠᠵᠢᠯ ᠦᠢᠯᠡᠰ ᠤᠨ ᠬᠠᠷᠠᠭ᠎ᠠ ᠠᠴᠠ ᠪᠤᠯᠵᠤ ᠰᠠᠯᠵᠤ ᠭᠠᠷᠴᠤ ᠢᠷᠡᠭᠰᠡᠨ ᠲᠤᠯᠠ ᠡᠵᠢ ᠮᠢᠨᠢ ᠪᠠᠰᠠ ᠤᠯᠠᠭᠠᠨᠮᠤᠳᠤ ᠳᠤ ᠪᠠᠨ ᠬᠠᠷᠢᠵᠤ ᠦᠵᠡᠪᠡᠯ ᠡ ᠬᠡᠵᠤ ᠶᠠᠷᠢᠵᠤ ᠪᠠᠶᠢᠯ᠎ᠠ᠃ ᠡᠨᠡ ᠭᠤᠷᠪᠠᠨ ᠬᠦᠰᠡᠯ ᠢ ᠨᠢ ᠪᠢᠳᠡ ᠠᠵᠢᠯ ᠤᠨ ᠶᠠᠭᠠᠷᠠᠤ ᠪᠠ ᠡᠯ᠎ᠡ ᠵᠦᠢᠯ ᠤᠨ ᠰᠢᠯᠳᠠᠭᠠᠨ ᠠᠴᠠ ᠪᠤᠯᠵᠤ ᠪᠡᠶᠡᠯᠡᠭᠦᠯᠵᠤ ᠦᠭᠴᠦ ᠵᠠᠪᠳᠤᠬᠰᠠᠨ ᠦᠭᠡᠢ ᠨᠢ ᠲᠤᠩ ᠬᠠᠷᠠᠮᠰᠠᠯᠳᠠᠢ ᠤᠴᠢᠷ ᠪᠤᠯᠤᠭᠠᠳ ᠰᠡᠳᠬᠢᠯ ᠵᠢᠷᠦᠭᠡ ᠶᠢ ᠮᠢᠨᠢ ᠰᠢᠨᠠᠯᠭᠠᠨ᠎ᠠ᠃ ᠲᠡᠭᠡᠬᠦᠯᠡᠷ ᠨᠢ ᠡᠵᠢ ᠮᠢᠨᠢ ᠨᠠᠰᠤ ᠪᠠᠷᠠᠬᠰᠠᠨ ᠤ ᠰᠡᠭᠦᠯᠡᠷ ᠬᠡᠭᠦᠷ ᠪᠡᠶ᠎ᠡ ᠶᠢ ᠨᠢ ᠤᠯᠠᠭᠠᠨᠮᠤᠳᠤ ᠶᠢᠨ ᠠᠷᠤ ᠠᠭᠤᠯᠠᠨ ᠲᠡᠭᠡᠷ᠎ᠡ ᠤᠷᠤᠰᠢᠭᠤᠯᠪᠠ᠃ ᠶᠠᠭᠤ ᠴᠦ ᠭᠡᠰᠡᠨ ᠨᠢᠭᠡᠨ ᠬᠦᠰᠡᠯ ᠢ ᠨᠢ ᠡᠶᠢᠮᠦᠷᠭᠦᠤ ᠶᠠᠩᠵᠤ ᠪᠠᠷ ᠪᠡᠶᠡᠯᠡᠭᠦᠯᠪᠡ᠃ ᠲᠡᠭᠡᠳᠦ ᠲᠡᠭᠷᠢ ᠳᠤ ᠪᠠᠶᠢᠭ᠎ᠠ ᠡᠵᠢ ᠮᠢᠨᠢ ᠮᠠᠨ ᠢ ᠪᠠᠨ ᠠᠭᠤᠴᠢᠯᠠᠭᠠᠷᠠᠢ ᠬᠡᠵᠤ ᠲᠠᠭᠠᠳᠬᠠᠨ ᠲᠠᠭᠠᠳᠬᠠᠨ ᠵᠠᠯᠪᠠᠷᠢᠶ᠎ᠠ᠃ ᠡᠵᠢ ᠮᠢᠨᠢ ᠠᠮᠤᠷᠯᠢᠩᠭᠤᠢ ᠨᠦᠢᠷᠰᠤᠭᠠᠷᠠᠢ᠃ ᠡᠨᠡᠷᠢᠯᠳᠦ ᠲᠠᠨ ᠤ ᠰᠦᠰᠦᠯᠢᠭ ᠵᠠᠩ᠂ ᠲᠠᠮᠢᠷᠯᠢᠭ ᠴᠢᠨᠠᠷ᠂ ᠭᠡᠭᠡᠯᠢᠭ ᠤᠭᠠᠬᠠᠨ ᠢ ᠰᠢᠩᠭᠡᠭᠡᠭᠰᠡᠨ ᠤᠯᠠᠭᠠᠨ ᠴᠢᠰᠦ ᠮᠠᠨ ᠤ ᠪᠠᠨ ᠰᠤᠳᠠᠯ ᠳᠤ ᠤᠷᠤᠰᠴᠤ᠂ ᠵᠤᠷᠢᠭ ᠢ ᠬᠦᠪᠴᠢᠯᠡᠵᠤ᠂ ᠰᠢᠷᠪᠤᠰᠤ ᠶᠢ ᠡᠷᠴᠢᠮᠯᠡᠵᠤ ᠪᠠᠶᠢᠬᠤ ᠪᠤᠯᠬᠤᠷ ᠦᠷ᠎ᠡ ᠠᠴᠢᠨᠠᠷ ᠴᠢᠨᠢ ᠬᠡᠵᠢᠶᠡᠳᠡ ᠦᠭᠡᠳᠡ ᠲᠠᠢ᠂ ᠤᠷᠤᠬᠰᠢ ᠲᠠᠢ ᠠᠮᠢᠳᠤᠷᠠᠵᠤ ᠠᠵᠢᠯ ᠦᠢᠯᠡᠰ ᠲᠤ ᠪᠠᠨ ᠭᠠᠷᠮᠠᠭᠠᠶᠢᠯᠠᠬᠤ ᠶᠤᠰᠤ ᠲᠠᠢ᠃     ᠡᠨᠡᠷᠢᠯ ᠤᠨ ᠲᠡᠭᠷᠢ ᠪᠤᠯᠤᠬᠰᠠᠨ ᠡᠵᠢ ᠶᠢᠨ ᠮᠢᠨᠢ ᠮᠠᠷᠳᠠᠬᠳᠠᠰᠢ ᠦᠭᠡᠢ ᠦᠩᠭᠡᠷᠡᠯᠳᠡ ᠨᠢ ᠤᠭᠤᠷᠠᠭ ᠲᠠᠷᠢᠬᠢᠨ ᠳᠤ ᠮᠢᠨᠢ ᠰᠢᠩᠭᠡᠭᠰᠡᠨ ᠪᠠᠶᠢᠳᠠᠭ᠃ ᠡᠵᠢ ᠶᠢᠨ ᠮᠢᠨᠢ ᠮᠠᠨ ᠳᠤ ᠪᠠᠨ ᠬᠠᠶᠢᠷᠠᠯᠠᠬᠰᠠᠨ ᠡᠷᠬᠢᠮ ᠰᠤᠷᠭᠠᠯ ᠢ ᠶᠠᠮᠠᠷ ᠴᠤ ᠦᠭᠡ ᠪᠠᠷ ᠢᠯᠡᠳᠭᠡᠵᠤ ᠡᠰᠡ ᠴᠢᠳᠠᠨ᠎ᠠ᠃ ᠬᠡᠤᠬᠡᠨ ᠴᠢᠨᠢ ᠤᠯᠳᠤᠢ ᠪᠤᠯᠤᠬᠰᠠᠨ ᠤ ᠰᠢᠯᠳᠠᠭᠠᠨ᠎ᠠ ᠲᠠᠨ ᠤ ᠪᠠᠨ ᠲᠤᠬᠠᠢ ᠪᠦᠷᠢᠨ ᠬᠦᠢᠴᠡᠳ ᠢᠯᠡᠳᠭᠡᠵᠤ ᠴᠢᠳᠠᠬᠰᠠᠨ ᠦᠭᠡᠢ ᠪᠤᠯᠪᠠᠴᠤ ᠡᠵᠢ ᠲᠠᠨ ᠤ ᠪᠠᠨ ᠠᠰᠢᠳᠠ ᠶᠢᠨ ᠲᠤᠷᠠᠰᠬᠠᠯ ᠳᠤ ᠵᠤᠷᠢᠭᠤᠯᠪᠠ᠃ᠵᠣᠬᠢᠶᠠᠭᠴᠢ᠄ ● ᠴᠢ᠊ · ᠰᠡᠴᠡᠨᠵᠤᠬᠢᠶᠠᠬᠴᠢ ᠶᠢᠨ ᠬᠠᠶ᠋ᠢᠬ᠄ ᠡᠮᠤᠨᠡᠳᠦ ᠬᠤᠰᠢᠭᠤᠨ ᠤ ᠨᠢᠭᠡᠳᠦᠭᠡᠷ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ
  
ᠢᠷᠡᠯᠲᠡ᠄ ᠬᠢᠩᠭᠠᠨ ᠮᠣᠩᠭᠤᠯ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠬᠤᠶᠠᠷ ᠯᠤᠩᠬᠤ ᠠᠷᠢᠬᠢᠨ ᠤ ᠦᠷᠢ
ᠬᠤᠯᠠᠨ ᠰᠢᠷᠭ᠎ᠠ
ᠮᠧᠲᠷ ᠵᠠᠢ
ᠰᠦᠨᠢ ᠶᠢᠨ ᠭᠦᠨ ᠳᠤ
ᠴᠢᠮᠬᠢᠭᠦᠷ ᠲᠤ ᠬᠦᠷᠦᠶᠤ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号