ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠶᠡᠭᠡ ᠪᠠᠶᠢᠰᠢᠩ ᠳᠠᠬᠢ ᠡᠩᠭᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠤ ᠲᠤᠬᠠᠢ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020-04-24
    1964 ᠤᠨ ᠳᠤ ᠶᠡᠭᠡ ᠰᠤᠷᠭᠠᠭᠤᠯᠢ ᠳᠤ ᠲᠠᠪᠰᠢᠬᠤ ᠰᠢᠯᠭᠠᠯᠳᠠ ᠶᠢ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠳᠤ ᠬᠢᠭᠰᠡᠨ ᠠᠴᠠ ᠰᠡᠭᠦᠯᠡᠷ ᠲᠤᠰ ᠠᠶᠠᠯᠠᠯ ᠤᠨ ᠤᠷᠳᠤᠨ ᠤ ᠭᠤᠶᠤ ᠰᠠᠶᠢᠬᠠᠨ ᠪᠠᠷᠢᠯᠭ᠎ᠠ ᠪᠠ ᠲᠡᠤᠬᠡ ᠶᠢᠨ ᠶᠠᠷᠢᠶ᠎ᠠ ᠲᠤᠮᠤᠭ ᠨᠢ ᠮᠢᠨᠤ ᠰᠤᠨᠢᠷᠬᠠᠯ ᠢ ᠶᠡᠭᠡ ᠲᠠᠳᠠᠵᠤ ᠠᠯᠢ ᠨᠢᠭᠡ ᠡᠳᠤᠷ ᠵᠠᠪᠰᠢᠶᠠᠨ ᠤᠯᠳᠠᠪᠠᠯ ᠲᠡᠷᠡ ᠪᠠᠷᠢᠯᠭ᠎ᠠ ᠶᠢ ᠰᠠᠶᠢᠬᠠᠨ ᠰᠤᠨᠢᠷᠬᠠᠵᠤ ᠲᠤᠳᠤᠷᠠᠬᠢ ᠤᠴᠢᠷ ᠶᠠᠪᠤᠳᠠᠯ ᠢ ᠨᠢ ᠤᠶᠢᠯᠠᠭᠠᠶ᠎ᠠ ᠬᠡᠵᠤ ᠪᠤᠳᠤᠭᠰᠠᠭᠠᠷ ᠪᠠᠶᠢᠭᠰᠠᠨ ᠶᠤᠮ᠃ ᠪᠢ ᠠᠵᠢᠯ ᠳᠤ ᠤᠷᠤᠵᠤ ᠠᠷᠪᠠᠨ ᠬᠡᠳᠤᠨ ᠵᠢᠯ ᠪᠤᠯᠤᠭᠰᠠᠨ ᠤ ᠲᠠᠷᠠᠭ᠎ᠠ 1975 ᠤᠨ ᠳᠤ ᠳ᠋ᠠᠪᠠᠨ ᠨᠢᠭᠡᠳᠤᠭᠡᠷ ᠲᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠲᠠᠷᠤᠢ ᠮᠢᠨᠤ ᠡᠬᠡ ᠰᠤᠷᠭᠠᠭᠤᠯᠢ ᠳᠠᠭᠠᠨ ᠠᠵᠢᠯ ᠰᠢᠯᠵᠢᠵᠤ ᠢᠷᠡᠭᠰᠡᠨ ᠠᠴᠠ ᠰᠡᠭᠦᠯᠡᠷ ᠬᠤᠰᠢᠭᠤᠨ ᠤ ᠬᠠᠷᠢᠶ᠎ᠠ ᠪᠠᠶᠢᠭᠤᠯᠤᠯᠭ᠎ᠠ ᠶᠢᠨ ᠬᠢᠨ ᠬᠤᠷᠠᠯ ᠬᠢᠬᠦ ᠭᠡᠪᠡᠯ ᠮᠦᠨ ᠯᠠ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠤ ᠭᠤᠤᠯ ᠶᠡᠭᠡ ᠭᠡᠷ ᠲᠤ ᠬᠤᠷᠠᠯ ᠬᠢᠵᠤ ᠪᠠᠶᠢᠯ᠎ᠠ᠃ ᠡᠨᠡ ᠨᠢ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠢ ᠰᠤᠨᠢᠷᠬᠠᠨ ᠤᠶᠢᠯᠠᠭᠠᠬᠤ ᠵᠠᠪᠰᠢᠶᠠᠨ ᠢ ᠨᠠᠳᠠᠳᠤ ᠤᠯᠭᠤᠭᠰᠠᠨ ᠶᠤᠮ᠃ ᠲᠡᠷᠡ ᠨᠢ ᠡᠮᠦᠨ᠎ᠡ ᠲᠠᠯ᠎ᠠ ᠨᠢ ᠶᠡᠭᠡ ᠡᠭᠦᠳᠡ ᠪᠠ ᠬᠤᠶᠠᠳᠤᠭᠠᠷ ᠡᠭᠦᠳᠡ ᠬᠡᠭᠦ ᠬᠤᠶᠠᠷ ᠲᠠᠪᠬᠤᠷ ᠡᠭᠦᠳᠡᠨ ᠭᠡᠷ ᠲᠠᠢ᠃ ᠬᠤᠶᠠᠳᠤᠭᠠᠷ ᠡᠭᠦᠳᠡᠨ ᠭᠡᠷ ᠠᠴᠠ ᠲᠤᠳᠤᠭᠰᠢ ᠪᠤᠯ ᠲᠦᠷᠪᠡᠨ ᠲᠠᠯ᠎ᠠ ᠪᠠᠷ ᠢᠶᠠᠨ ᠭᠡᠷ ᠪᠦᠬᠦᠨ ᠢ ᠵᠠᠯᠭᠠᠭᠰᠠᠨ ᠰᠠᠷᠠᠪᠴᠢᠨ ᠬᠡᠷᠡᠮ ᠲᠠᠢ ᠂ ᠭᠤᠤᠯ ᠭᠡᠷ ᠤᠨ ᠰᠠᠭᠤᠷᠢ ᠨᠢ ᠪᠤᠰᠤᠳ ᠭᠡᠷ ᠠᠴᠠ ᠪᠠᠨ ᠨᠡᠯᠢᠶᠡᠳ ᠦᠨᠳᠤᠷ ᠪᠦᠭᠡᠳ ᠭᠡᠷ ᠤᠨ ᠬᠢᠨᠢ ᠡᠭᠦᠳᠡᠨ ᠳᠤᠨᠢ ᠪᠠᠷᠤᠭ ᠠᠷᠪᠠᠨ ᠲᠡᠭᠰᠢ ᠲᠦᠷᠪᠡᠯᠵᠢᠨ ᠮᠧᠳ᠋ᠷ ᠲᠠᠯᠠᠪᠠᠢ ᠪᠦᠬᠦᠢ ᠭᠤᠤᠯ ᠭᠡᠷ ᠤᠨ ᠢᠶᠠᠨ ᠰᠠᠭᠤᠷᠢ ᠲᠠᠢ ᠠᠳᠠᠯᠢ ᠲᠦᠷᠪᠡᠯᠵᠢᠨ ᠲᠠᠶᠢᠰᠠ ᠰᠢᠭ᠋ ᠲᠠᠯᠠᠪᠠᠢ ᠲᠠᠢ᠂ ᠲᠡᠭᠦᠨ ᠢ ᠨᠢ ᠴᠦᠮ ᠪᠤᠷᠵᠢᠨ ᠴᠢᠯᠠᠭᠤ ᠪᠠᠷ ᠬᠦᠪᠡᠭᠡ ᠶᠢ ᠨᠢ ᠵᠡᠷᠬᠡᠯᠡᠵᠤ᠂ ᠲᠡᠭᠡᠷ᠎ᠡ ᠨᠢ ᠪᠦᠳᠦᠭᠦᠨ ᠬᠦᠬᠡ ᠦᠩᠬᠡᠳᠠᠢ ᠲᠤᠭᠤᠰᠬ᠎ᠠ ᠲᠡᠪᠢᠰᠴᠠᠢ᠃ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠢ ᠪᠠᠭᠠᠷᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠬᠤᠰᠢᠭᠤᠨ ᠤ ᠲᠦᠷᠪᠡᠳᠦᠭᠡᠷ ᠦᠶ᠎ᠡ ᠶᠢᠨ ᠵᠠᠰᠠᠭ ᠲᠦᠷᠤ ᠶᠢᠨ ᠵᠢᠶᠦ᠋ᠨ ᠸᠠᠩ ᠦᠷᠭᠦᠨ ︵1670-1720︶ ᠤ ᠦᠶ᠎ᠡ ᠳᠤ ᠪᠠᠶᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ᠃     1691 ᠤᠨ ᠳᠤ ᠦᠷᠭᠦᠨ ᠵᠢᠶᠦ᠋ᠨ ᠸᠠᠩ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠤ ᠬᠤᠶᠠᠳᠤᠭᠠᠷ ᠦᠬᠢᠨ ᠦᠯᠡᠮᠵᠢ ᠬᠡᠮᠵᠢᠶᠡᠳᠤ ᠭᠦᠩᠵᠦ ᠲᠠᠢ ᠬᠤᠷᠢᠮᠯᠠᠵᠠᠢ᠃ ᠦᠷᠭᠦᠨ ᠵᠢᠶᠦ᠋ᠨ ᠸᠠᠩ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠪᠠᠭᠠᠷᠢᠨ ᠢᠶᠠᠷ ᠠᠶᠠᠯᠠᠨ ᠢᠷᠡᠬᠦ ᠪᠤᠶᠤ ᠠᠪᠠ ᠠᠩᠨᠠᠯ ᠬᠢᠬᠦ ᠪᠠᠷ ᠢᠷᠡᠪᠡᠯ ᠲᠦᠭᠦᠮ ᠢ ᠪᠤᠳᠤᠵᠤ ᠲᠡᠭᠦᠨ ᠳᠤ ᠲᠤᠰᠬᠠᠶᠢᠯᠠᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠢ ᠪᠠᠶᠢᠭᠤᠯᠵᠤ ᠦᠭᠭᠦᠭᠰᠡᠨ ᠪᠠᠶᠢᠵᠠᠢ᠃ 1711 ᠤᠨ ᠳᠤ ᠳ᠋ᠠᠪᠠᠨ ᠳᠤ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠢ ᠪᠠᠷᠢᠵᠤ ᠲᠠᠭᠤᠰᠬᠠᠵᠠᠢ᠃ 1715 ᠤᠨ ᠳᠤ ᠡᠩᠬᠡ ᠠᠮᠤᠭᠤᠯᠠᠩ ᠬᠠᠭᠠᠨ ᠪᠠᠭᠠᠷᠢᠨ ᠳᠤ ᠢᠷᠡᠵᠦ ᠠᠪᠠᠯᠠᠬᠤ ᠳᠠᠭᠠᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠳᠤ ᠲᠦᠷ ᠪᠠᠭᠤᠵᠤ᠂ ᠠᠶᠠᠯᠠᠯ ᠤᠨ ᠤᠷᠳᠤᠨ ᠳᠤ ︽ᠠᠯᠳᠠᠨ ᠰᠠᠯᠠᠭ᠎ᠠ ᠮᠦᠴᠢᠷᠯᠡᠨ ᠲᠡᠯᠭᠡᠷᠡᠪᠡ︾ ᠭᠡᠬᠦ ᠢᠯᠡᠷᠬᠡᠶᠢᠯᠡᠯ ᠪᠢᠴᠢᠵᠦ ᠦᠭᠴᠡᠢ᠃    ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠤ ᠭᠤᠶᠢᠳᠠ ᠰᠠᠶᠢᠬᠠᠨ ᠦᠵᠡᠮᠵᠢ ᠨᠢ ᠪᠠᠭᠠᠷᠢᠨ ᠳᠠᠬᠢ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠰᠦᠮ᠎ᠡ ᠬᠡᠶᠢᠳ ᠢ ᠭᠠᠷᠭᠠᠪᠠᠯ ᠲᠡᠭᠦᠨ ᠲᠠᠢ ᠲᠡᠩᠴᠡᠬᠦ ᠪᠠᠷᠢᠯᠭ᠎ᠠ ᠬᠡᠵᠤ ᠪᠠᠶᠢᠭᠰᠠᠨ ᠦᠭᠡᠢ᠃ ᠭᠤᠤᠯ ᠤᠷᠳᠤᠨ ᠨᠢ ᠡᠮᠤᠨᠡᠰᠢ ᠬᠤᠶᠢᠰᠢ ᠠᠷᠪᠠᠨ ᠭᠤᠷᠪᠠᠨ ᠮᠧᠳ᠋ᠷ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠤᠷᠢᠨ ᠲᠠᠪᠤᠨ ᠮᠧᠲᠷ᠂ ᠳ᠋ᠢᠶᠠᠮᠧᠲᠷ ᠨᠢ 0.42 ᠮᠧᠲᠷ ᠤᠨ ᠪᠦᠳᠦᠭᠦᠨ ᠲᠤᠯᠭᠠᠭᠤᠷ ᠲᠠᠢ᠂ ᠲᠤᠯᠭᠠᠭᠤᠷ ᠪᠦᠷᠢ ᠨᠢ ᠴᠦᠮ ᠯᠤᠤ ᠤᠷᠢᠶᠠᠭᠰᠠᠨ ᠵᠢᠷᠤᠭ ᠲᠠᠢ᠂ ᠠᠳᠠᠭᠠᠷ ᠤᠨ ᠫᠠᠨᠰᠠ ᠨᠢ ᠴᠠᠭᠠᠨ ᠲᠤᠭᠤᠷᠤᠤ ᠶᠢᠨ ᠵᠢᠷᠤᠭ ᠲᠠᠢ᠂ ᠭᠡᠪᠡᠴᠦ ᠡᠳᠡᠭᠡᠷ ᠵᠢᠷᠤᠭ ᠤᠳ ᠨᠢ ᠬᠡᠳᠤ ᠤᠳᠠᠭᠠᠨ ᠤ ᠵᠠᠰᠠᠯᠳᠠ ᠪᠠᠷ ᠲᠠᠮᠵᠢᠭᠠᠳ ᠵᠠᠷᠢᠮ ᠨᠢ ᠪᠦᠷ ᠦᠩᠭᠡ ᠨᠢ ᠬᠤᠪᠢᠷᠠᠭᠰᠠᠨ ᠪᠠᠶᠢᠨ᠎ᠠ ᠃ ᠠᠶᠠᠯᠠᠯ ᠤᠨ ᠤᠷᠳᠤᠨ ᠳᠠᠬᠢ ᠪᠠᠰᠠ ᠨᠢᠭᠡᠨ ᠰᠢᠨ᠎ᠡ ᠢᠯᠡᠷᠡᠭᠦᠯᠤᠯᠳᠡ ᠭᠡᠪᠡᠯ ᠬᠦᠢᠳᠡᠨ ᠴᠠᠭ ᠤᠨ ᠭᠡᠷ ᠤᠨ ᠲᠤᠯᠠᠭᠠᠯᠠᠬᠤ ᠲᠦᠬᠦᠭᠡᠷᠦᠮᠵᠢ ᠨᠢ ᠤᠷᠳᠤᠨ ᠤ ᠬᠢᠨᠢ ᠲᠤᠤᠷ᠎ᠡ ᠠᠴᠠ ᠨᠢ ᠲᠦᠯᠡᠳᠡᠭ ᠵᠤᠤᠬ᠎ᠠ᠂ ᠭᠡᠷ ᠤᠨ ᠲᠤᠤᠷᠠᠬᠢ ᠬᠦᠨᠳᠡᠢ ᠶᠢ ᠴᠦᠮ ᠤᠷᠴᠢᠮ ᠤᠨ ᠵᠢᠯ ᠢᠯᠡᠷᠡᠭᠦᠯᠦᠭᠰᠡᠨ ᠪᠥᠭᠡᠳ ᠭᠠᠵᠠᠷ ᠲᠤᠤᠭᠤᠷ ᠨᠢ ᠭᠠᠯ ᠨᠢ ᠬᠠᠮᠢᠭᠠᠰᠢ ᠶᠠᠪᠤᠭᠠᠳ ᠶᠠᠨᠲᠦ᠋ᠩ ᠨᠢ ᠬᠠᠮᠢᠭ᠎ᠠ ᠨᠢ ᠪᠠᠶᠢᠭᠰᠠᠨ ᠢ ᠮᠡᠳᠡᠵᠦ ᠭᠠᠷᠤᠭᠰᠠᠨ ᠦᠭᠡᠢ᠃ ᠲᠡᠷᠡᠬᠦ ᠪᠠᠷᠢᠯᠭ᠎ᠠ ᠶᠢᠨ ᠦᠵᠡᠮᠵᠢ ᠭᠤᠶᠤ ᠰᠠᠶᠢᠬᠠᠨ᠂ ᠪᠠᠷᠢᠯᠭ᠎ᠠ ᠶᠢᠨ ᠶᠠᠰᠤ ᠴᠢᠨᠠᠷ ᠤᠨ ᠰᠠᠶᠢᠨ ᠨᠢ ᠲᠤᠬᠠᠢ ᠶᠢᠨ ᠦᠶ᠎ᠡ ᠶᠢᠨ ᠬᠦᠳᠡᠯᠮᠦᠷᠢᠴᠢᠨ ᠠᠷᠠᠳ ᠲᠦᠮᠡᠨ ᠤ ᠰᠡᠴᠡᠨ ᠰᠡᠷᠭᠦᠯᠡᠩ ᠤᠶᠤᠨ ᠤᠬᠠᠭᠠᠨ᠂ ᠬᠦᠳᠡᠯᠮᠦᠷᠢᠴᠢ ᠬᠤᠶᠠᠷ ᠭᠠᠷ ᠤᠨ ᠬᠢᠨᠢ ᠤᠷᠠᠨ ᠪᠦᠳᠦᠭᠡᠯ ᠪᠤᠯᠬᠤ ᠶᠤᠮ᠃ ᠮᠦᠨ ᠴᠤ ᠬᠤᠶᠢᠴᠢ ᠶᠢᠨ ᠬᠦᠮᠦᠰ ᠲᠡᠭᠡᠨ ᠦᠯᠡᠳᠡᠭᠡᠨ ᠦᠭᠭᠦᠭᠰᠡᠨ ᠲᠡᠤᠬᠡ ᠶᠢᠨ ᠦᠪ ᠬᠦᠷᠦᠩᠭᠡ ᠪᠢᠯᠡ᠃    ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠢ ᠪᠠᠶᠢᠭᠤᠯᠬᠤ ᠳᠤ ᠤᠯᠠᠨ ᠠᠷᠪᠢᠨ ᠰᠢᠨᠵᠢᠭᠡᠴᠢ ᠦᠵᠡᠭᠡᠴᠢ᠂ ᠯᠠᠮᠠ ᠬᠤᠸᠠᠷᠠᠭ᠂ ᠪᠠᠷᠢᠯᠭᠠᠴᠢᠨ᠂ ᠡᠷᠳᠡᠮᠳᠡᠨ ᠮᠡᠷᠭᠡᠳ ᠢ ᠵᠠᠯᠠᠵᠤ ᠲᠦᠰᠢᠯᠭᠡ ᠪᠤᠯᠤᠨ ᠬᠠᠷᠠᠴᠠ ᠶᠢ ᠶᠡᠭᠡᠳᠡ ᠠᠩᠬᠠᠷᠤᠨ ᠨᠤᠳᠤᠭ ᠰᠤᠩᠭᠤᠵᠠᠢ᠃ ᠦᠭᠡᠳᠡ ᠡᠰᠡᠷᠡᠭ ᠠᠮᠤᠷ ᠠᠮᠤᠭᠤᠯᠠᠩ ᠪᠦᠷᠢᠳᠦᠭᠰᠡᠨ ᠨᠤᠳᠤᠭ ᠢ ᠰᠤᠩᠭᠤᠨ᠂ ᠴᠠᠭᠠᠨ ᠮᠦᠷᠡᠨ ᠤ ᠤᠷᠤᠰᠬᠠᠯ ᠦᠪᠤᠷ ᠤᠷᠤᠭᠤ ᠴᠠᠶᠢᠯᠵᠠᠭᠰᠠᠨ᠂ ᠰᠢᠷ᠎ᠠ ᠰᠡᠷᠡᠭᠡᠳᠤ ᠶᠢᠨ ᠲᠡᠨᠵᠢᠨ ᠲᠡᠭᠡᠷ᠎ᠡ᠂ ᠲᠠᠷᠬᠠᠨ ᠬᠠᠨ᠂ ᠪᠠᠶᠠᠨᠳᠤᠤᠪᠠᠢ ᠬᠤᠶᠠᠷ ᠬᠠᠶᠢᠷᠬᠠᠨ ᠢᠶᠠᠷ ᠲᠦᠰᠢᠯᠭᠡ ᠪᠤᠯᠭᠠᠨ᠂ ᠴᠠᠭᠠᠨ ᠮᠦᠷᠡᠨ᠂ ᠪᠠᠶᠠᠨ ᠮᠦᠷᠡᠨ ᠤ ᠠᠭᠤᠯᠵᠠᠷ ᠢ ᠦᠩᠭᠡᠶᠢᠨ ᠪᠠᠷᠠᠯᠠᠵᠤ᠂ ᠶᠢᠰᠤᠨ ᠬᠠᠭᠠᠯᠭ᠎ᠠ ᠶᠢᠨ ᠰᠢᠨᠵᠢ ᠪᠦᠬᠦᠢ ᠴᠠᠭᠠᠨ ᠮᠦᠷᠡᠨ ᠤ ᠬᠤᠶᠠᠷ ᠡᠷᠭᠢ ᠶᠢᠨ ᠮᠦᠷᠭᠦᠬᠦ ᠶᠢᠰᠤᠨ ᠬᠠᠳᠠ ᠨᠤᠭᠤᠳ ᠢᠶᠠᠷ ᠬᠠᠷᠠᠴᠠ ᠪᠤᠯᠭᠠᠨ ᠲᠤᠰ ᠤᠷᠳᠤᠨ ᠢ ᠪᠠᠶᠢᠭᠤᠯᠤᠭᠰᠠᠨ ᠪᠠᠶᠢᠨ᠎ᠠ ᠃    ᠲᠡᠳᠡᠭᠡᠷ ᠬᠠᠭᠠᠯᠭ᠎ᠠ ᠶᠢᠨ ᠰᠢᠨᠵᠢᠳᠠᠢ ᠬᠠᠳᠠ ᠨᠤᠭᠤᠳ ᠭᠡᠪᠡᠯ᠂ ᠮᠠᠨᠢᠳᠤ ᠪᠤᠯᠤᠨ ᠬᠡᠶᠢᠳ ᠤᠨ ᠪᠤᠯᠤᠩ ᠤᠨ ᠬᠠᠳᠠ ᠨᠢᠭᠡᠳᠤᠭᠡᠷ ᠬᠠᠭᠠᠯᠭ᠎ᠠ᠂ ᠯᠠᠮᠠ ᠶᠢᠨ ᠤᠪᠤᠭ᠎ᠠ ᠬᠠᠳᠠ ᠪᠤᠯᠤᠨ ᠡᠩᠭᠡᠷ ᠬᠠᠳᠠ ᠬᠤᠶᠠᠳᠤᠭᠠᠷ ᠬᠠᠭᠠᠯᠭ᠎ᠠ᠂ ᠪᠢᠴᠢᠭᠳᠦ ᠶᠢᠨ ᠬᠠᠳᠠ ᠪᠤᠯᠤᠨ ᠮᠠᠩᠬᠠᠳᠤ ᠶᠢᠨ ᠬᠠᠳᠠ ᠭᠤᠷᠪᠠᠳᠤᠭᠠᠷ ᠬᠠᠭᠠᠯᠭ᠎ᠠ᠂ ᠬᠠᠷ᠎ᠠ ᠱᠤᠷᠤᠩ ᠪᠤᠯᠤᠨ ᠭᠡᠭᠡᠨ ᠱᠤᠷᠤᠩ ᠲᠦᠷᠪᠡᠳᠦᠭᠡᠷ ᠬᠠᠭᠠᠯᠭ᠎ᠠ᠂ ᠲᠠᠷᠬᠠᠨ ᠪᠤᠯᠤᠨ ᠮᠦᠷᠭᠦᠴᠡᠭ ᠲᠠᠪᠤᠳᠤᠭᠠᠷ ᠬᠠᠭᠠᠯᠭ᠎ᠠ᠂ ᠤᠨᠢᠳᠤ ᠱᠤᠷᠤᠩ ᠪᠤᠯᠤᠨ ᠪᠠᠶᠠᠨᠬᠤᠰᠢᠭᠤ ᠵᠢᠷᠭᠤᠳᠤᠭᠠᠷ ᠬᠠᠭᠠᠯᠭ᠎ᠠ᠂ ᠲᠤᠯᠭ᠎ᠠ ᠠᠭᠤᠯᠠ ᠪᠤᠯᠤᠨ ᠴᠤᠭ ᠦᠨᠳᠤᠷ ᠲᠤᠯᠤᠳᠤᠭᠠᠷ ᠬᠠᠭᠠᠯᠭ᠎ᠠ᠂ ᠪᠠᠷᠠᠭᠤᠨ ᠪᠢᠯᠡᠭᠦᠳᠠᠢ ᠪᠤᠯᠤᠨ ᠵᠡᠭᠦᠨ ᠪᠢᠯᠡᠭᠦᠳᠠᠢ ᠨᠠᠢᠮᠠᠳᠤᠭᠠᠷ ᠬᠠᠭᠠᠯᠭ᠎ᠠ᠂ ᠵᠠᠭᠠᠨ᠎ᠠ ︵ᠵᠠᠭᠠᠭ︶ ᠶᠢᠨ ᠬᠤᠰᠢᠭᠤ ᠪᠤᠯᠤᠨ ᠬᠠᠳᠠᠳᠤ ᠶᠢᠰᠤᠳᠤᠭᠡᠷ ᠬᠠᠭᠠᠯᠭ᠎ᠠ ᠭᠡᠳᠡᠭ᠃    ᠲᠡᠳᠡᠭᠡᠷ ᠶᠢᠰᠤᠨ ᠬᠠᠭᠠᠯᠭ᠎ᠠ ᠶᠢ ᠨᠢᠭᠡ ᠨᠢᠭᠡ ᠪᠠᠷ ᠲᠤᠷᠠᠳᠪᠠᠯ᠂ ᠳ᠋ᠠᠪᠠᠨ ᠤ ᠵᠡᠭᠦᠨ ᠡᠮᠤᠨ᠎ᠠ ᠪᠠᠶᠢᠭ᠎ᠠ ᠬᠡᠶᠢᠳ ᠤᠨ ᠪᠤᠯᠤᠩ ᠤᠨ ᠠᠶᠢᠯ ᠤᠨ ᠠᠷᠤ ᠶᠢᠨ ᠬᠠᠳᠠ ︵ᠠᠶᠢᠯ ᠤᠨ ᠬᠠᠭᠤᠴᠢᠨ ᠰᠠᠭᠤᠴᠠ ᠨᠢ ᠨᠢᠭᠡᠨᠳᠡ ᠲᠡᠷᠡᠰᠤ ᠪᠤᠯᠤᠩ ᠤᠨ ᠤᠰᠤᠨ ᠴᠦᠭᠦᠷᠤᠮ ᠳᠤ ᠤᠷᠤᠵᠠᠢ︶ ᠪᠤᠯᠤᠨ᠎ᠠ᠃ ᠬᠡᠶᠢᠳ ᠭᠡᠳᠡᠭ ᠨᠡᠷ᠎ᠡ ᠶᠢᠨ ᠲᠤᠬᠠᠢ ᠲᠤᠳᠤᠷᠬᠠᠢ ᠲᠠᠶᠢᠯᠪᠤᠷᠢᠯᠠᠯᠳᠠ ᠦᠭᠡᠢ ᠪᠠᠶᠢᠭᠰᠠᠭᠠᠷ᠂ ᠭᠡᠪᠡᠴᠦ ᠮᠢᠨᠤ ᠰᠤᠨᠤᠰᠬᠠᠯ ᠢᠶᠠᠷ ᠭᠦᠷᠤᠨ ᠭᠦᠩᠵᠦ ᠰᠧᠪᠳᠠᠨ ᠸᠠᠩ ᠳᠤ ᠮᠤᠷᠳᠠᠵᠤ ᠢᠷᠡᠭᠰᠡᠨ ᠲᠠᠷᠤᠢ ᠳᠠᠭᠠᠨ ᠬᠡᠶᠢᠳ ᠤᠨ ᠬᠠᠳᠠᠨ ᠤ ᠡᠩᠭᠡᠷ ᠪᠢᠴᠢᠬᠠᠨ ᠰᠦᠮ᠎ᠡ ᠪᠠᠷᠢᠵᠤ ᠲᠠᠬᠢᠯ ᠲᠠᠯᠪᠢᠨ ᠮᠦᠷᠭᠦᠯ ᠬᠢᠳᠡᠭ ᠬᠡᠨ᠎ᠠ ᠃ ᠰᠡᠭᠦᠯᠡᠷ ᠨᠢ ᠪᠤᠶᠠᠨ ᠴᠤᠭᠯᠠᠭᠤᠯᠤᠭᠴᠢ ᠰᠦᠮ᠎ᠡ ᠶᠢ ᠪᠠᠷᠢᠭᠰᠠᠨ ᠠᠴᠠ ᠬᠡᠶᠢᠳ ᠤᠨ ᠪᠤᠯᠤᠩ ᠤᠨ ᠰᠦᠮ᠎ᠡ ᠤᠳᠠᠭᠠᠨ ᠳᠠᠭᠠᠨ ᠬᠠᠭᠤᠴᠢᠷᠠᠵᠤ ᠨᠤᠷᠠᠭᠠᠳ ᠦᠭᠡᠢ ᠪᠤᠯᠤᠭᠰᠠᠨ ᠭᠡᠨ᠎ᠠ᠃ ᠡᠭᠦᠨ ᠠᠴᠠ ᠲᠠᠭᠠᠮᠠᠭᠯᠠᠪᠠᠯ ᠬᠡᠶᠢᠳ ᠭᠡᠰᠡᠨ ᠨᠡᠷ᠎ᠡ ᠨᠢ ᠰᠦᠮ᠎ᠡ ᠬᠡᠶᠢᠳ ᠤᠨ ᠬᠡᠶᠢᠳ ᠪᠠᠶᠢᠵᠤ ᠮᠡᠳᠡᠨ᠎ᠠ᠃    ᠬᠡᠶᠢᠳ ᠤᠨ ᠬᠠᠳᠠ ᠨᠢ ᠬᠠᠳᠠᠨ ᠰᠤᠭᠤ ᠳᠠᠭᠠᠨ ᠲᠤᠩᠭᠠᠯᠠᠭ ᠬᠠᠷ᠎ᠠ ᠤᠰᠤᠨ ᠤ ᠤᠨᠳᠤᠷᠤᠯ ᠲᠠᠢ ᠴᠦᠩᠭᠦᠷᠡᠭ ᠪᠠᠶᠢᠵᠤ᠂ ᠵᠤᠨ ᠤ ᠴᠠᠭ ᠲᠤ ᠡᠯᠳᠡᠪ ᠦᠩᠭᠡ ᠶᠢᠨ ᠴᠡᠴᠡᠭ ᠬᠤᠸᠠᠷ ᠲᠡᠯᠭᠡᠷᠡᠨ᠂ ᠵᠡᠭᠡᠰᠤ ᠬᠤᠯᠤᠰᠤ ᠬᠤᠯᠢᠯᠳᠤᠨ ᠤᠷᠭᠤᠭᠰᠠᠨ᠂ ᠠᠮᠢᠳᠤ ᠤᠰᠤᠨ ᠨᠠᠭᠤᠷ ᠤᠨ ᠭᠦᠨ ᠳᠡᠭᠡᠨ ᠵᠠᠩᠭᠤᠤ ᠭᠡᠳᠡᠭ ᠢᠰᠢᠭᠡᠨ ᠡᠪᠡᠷ ᠬᠢᠷᠢ ᠪᠦᠳᠤᠭᠦᠨ᠂ ᠶᠤᠸᠠᠮᠪᠤᠤ ᠶᠢᠨ ᠬᠡᠯᠪᠡᠷᠢ ᠲᠠᠢ ᠪᠤᠷᠤ ᠽᠠᠨᠳᠠᠨ ᠦᠩᠭᠡ ᠲᠠᠢ ᠤᠷᠭᠤᠮᠠᠯ ᠤᠨ ᠦᠷ᠎ᠡ ᠨᠢ ᠬᠤᠯᠠ ᠤᠶᠢᠷ᠎ᠠ ᠳᠠᠭᠠᠨ ᠠᠯᠳᠠᠷᠳᠠᠢ ᠭᠤᠶᠤ ᠰᠠᠶᠢᠬᠠᠨ ᠦᠵᠡᠮᠵᠢ ᠶᠢᠨ ᠡᠳ᠋ ᠪᠤᠯᠬᠤᠷ ᠨᠢᠯᠬ᠎ᠠ ᠬᠡᠤᠬᠡᠳ ᠤᠨ ᠬᠠᠷᠠᠭ᠎ᠠ ᠳᠤ ᠲᠡᠭᠦᠵᠢᠯᠠᠳᠡᠭ ᠪᠤᠶᠤ ᠨᠠᠰᠤᠳᠠᠶᠢᠴᠤᠳ ᠬᠡᠳᠡ ᠶᠢᠨ ᠤᠭᠤᠰᠤᠷ ᠵᠡᠭᠦᠪᠴᠢ ᠶᠢᠨ ᠤᠭᠤᠰᠤᠷ ᠲᠤ ᠬᠡᠯᠬᠢᠵᠤ ᠪᠠᠶᠢᠳᠠᠭ ᠬᠤᠪᠤᠷ ᠴᠤᠬᠠᠭ ᠡᠳ᠋ ᠪᠠᠶᠢᠵᠠᠢ᠃ ᠮᠠᠨᠢᠳᠤ ᠬᠡᠳᠡᠭ ᠨᠢ ᠬᠡᠶᠢᠳ ᠤᠨ ᠬᠠᠳᠠᠨ ᠤ ᠪᠠᠷᠠᠭᠤᠨ ᠲᠠᠯ᠎ᠠ᠂ ᠲᠠᠷᠤᠢ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠪᠠᠷᠠᠭᠤᠨ ᠬᠦᠪᠡᠭᠡ ᠳᠤ ᠪᠠᠶᠢᠭ᠎ᠠ ᠬᠠᠳᠠ ᠶᠢ ᠮᠠᠨᠢᠳᠤ ᠬᠡᠳᠡᠭ᠃ ᠡᠨᠡ ᠪᠤᠯ ᠨᠢᠭᠡᠳᠤᠭᠡᠷ ᠬᠠᠭᠠᠯᠭ᠎ᠠ ᠪᠤᠯᠤᠨ᠎ᠠ᠃    ᠬᠤᠶᠠᠳᠤᠭᠠᠷ ᠬᠠᠭᠠᠯᠭ᠎ᠠ ᠨᠢ ᠯᠠᠮᠠ ᠶᠢᠨ ᠤᠪᠤᠭ᠎ᠠ ᠪᠤᠯᠤᠨ ᠡᠩᠭᠡᠷ ᠬᠠᠳᠠ ᠪᠤᠯᠤᠨ᠎ᠠ᠃ ᠯᠠᠮᠠ ᠶᠢᠨ ᠤᠪᠤᠭ᠎ᠠ ᠨᠢ ᠰᠠᠶᠢᠷᠠᠮ ᠤᠨ ᠠᠶᠢᠯ ᠤᠨ ᠵᠡᠭᠦᠨ ᠡᠮᠦᠨ᠎ᠡ ︵ᠡᠨᠡ ᠠᠶᠢᠯ ᠤᠨ ᠨᠤᠳᠤᠭ ᠨᠢ ᠲᠡᠷᠡᠰᠤ ᠪᠤᠯᠤᠩ ᠤᠰᠤᠨ ᠴᠦᠭᠦᠷᠤᠮ ᠳᠤ ᠤᠷᠤᠭᠰᠠᠨ ᠲᠤᠯᠠ ᠤᠷᠤᠨ ᠪᠠᠶᠢᠷᠢ ᠨᠢ ᠲᠤᠳᠤᠷᠬᠠᠢ ᠦᠭᠡᠢ ᠪᠤᠯᠵᠠᠢ︶ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠪᠠᠷᠠᠭᠤᠨ ᠬᠦᠪᠡᠭᠡ ᠳᠤ ᠮᠠᠩᠬᠠᠳᠤ ᠶᠢᠨ ᠠᠶᠢᠯ ᠤᠨ ᠠᠷᠤ ᠶᠢᠨ ᠠᠭᠤᠯᠠ ᠶᠢᠨ ᠬᠤᠶᠢᠨ᠎ᠠ ᠪᠠᠶᠢᠭ᠎ᠠ ᠱᠠᠩᠰᠢᠨ ᠬᠠᠳᠠᠨ ᠲᠡᠭᠡᠷ᠎ᠡ ᠪᠤᠰᠬᠠᠭᠰᠠᠨ ᠤᠪᠤᠭ᠎ᠠ ᠶᠢ ᠯᠠᠮᠠ ᠶᠢᠨ ᠤᠪᠤᠭ᠎ᠠ ᠭᠡᠳᠡᠭ᠃ ᠦᠩᠭᠡᠷᠡᠭᠰᠡᠨ ᠳᠡᠭᠡᠨ ᠪᠤᠶᠠᠨ ᠴᠤᠭᠯᠠᠭᠤᠯᠤᠭᠴᠢ ᠰᠦᠮ᠎ᠡ ᠶᠢᠨ ᠯᠠᠮᠠ ᠨᠠᠷ ᠵᠢᠯ ᠪᠦᠷᠢ ᠶᠢᠨ ᠪᠢᠯᠢᠭ ᠤᠨ 6 ᠰᠠᠷ᠎ᠠ ᠶᠢᠨ 18 ᠳᠤ ᠲᠠᠬᠢᠳᠠᠭ᠂ ᠰᠡᠭᠦᠯᠡᠷ ᠨᠢ ᠮᠠᠩᠬᠠᠳᠤ ᠶᠢᠨ ᠡᠩᠭᠡᠷ ᠤᠨ ᠠᠶᠢᠯ ᠤᠨ ᠮᠠᠯᠴᠢᠳ ᠲᠠᠬᠢᠬᠤ ᠪᠤᠯᠵᠠᠢ᠃    ᠡᠩᠭᠡᠷ ᠬᠠᠳᠠ ᠭᠡᠳᠡᠭ ᠨᠢ ᠯᠠᠮᠠ ᠶᠢᠨ ᠤᠪᠤᠭᠠᠨ ᠬᠠᠳᠠᠨ ᠤ ᠵᠡᠭᠦᠨ ᠬᠤᠶᠢᠨ᠎ᠠ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠵᠡᠭᠦᠨ ᠬᠦᠪᠡᠭᠡᠨ ᠳᠤ ᠪᠠᠶᠢᠳᠠᠭ᠂ ᠲᠡᠷᠡ ᠬᠠᠳᠠ ᠲᠡᠶᠢᠮᠦ ᠲᠤᠮᠤ ᠪᠢᠰᠢ ᠴᠤ ᠪᠤᠰᠤᠳ ᠠᠭᠤᠯᠠ ᠬᠠᠶᠢᠷᠬᠠᠨ ᠠᠴᠠ ᠤᠨᠴᠠᠭᠠᠢ ᠠᠰᠳᠠᠭᠠᠨ ᠪᠠᠶᠢᠳᠠᠭ᠃ ᠦᠨᠤ ᠲᠡᠷᠡᠰᠤ ᠪᠤᠯᠤᠩ ᠤᠰᠤᠨ ᠴᠦᠭᠦᠷᠤᠮ ᠤᠨ ᠨᠢᠭᠡᠨ ᠦᠵᠡᠮᠵᠢ ᠪᠤᠯᠤᠭᠠᠳ ᠪᠠᠶᠢᠨ᠎ᠠ᠃     ᠭᠤᠷᠪᠠᠳᠤᠭᠠᠷ ᠬᠠᠭᠠᠯᠭ᠎ᠠ ᠨᠢ ᠪᠢᠴᠢᠭᠳᠦ ᠪᠤᠯᠤᠨ ᠮᠠᠩᠬᠠᠳᠤ ᠪᠤᠯᠤᠨ᠎ᠠ᠃ ᠪᠢᠴᠢᠭᠳᠦ ᠬᠡᠳᠡᠭ ᠨᠢ ᠦᠨᠤ ᠶᠢᠨ ᠲᠡᠷᠡᠰᠤ ᠪᠤᠯᠤᠩ ᠤᠰᠤᠨ ᠴᠦᠭᠦᠷᠤᠮ ᠤᠨ ᠬᠠᠰᠢᠯᠭ᠎ᠠ ᠶᠢᠨ ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠠᠭᠤᠯᠠ ᠶᠢ ᠵᠢᠭᠠᠵᠤ ᠪᠠᠶᠢᠨ᠎ᠠ᠃ ᠲᠡᠷᠡ ᠠᠭᠤᠯᠠ ᠶᠢᠨ ᠪᠠᠷᠠᠭᠤᠨ ᠬᠤᠶᠢᠰᠢ ᠬᠠᠨᠳᠤᠭᠰᠠᠨ ᠨᠢᠭᠤᠷ ᠬᠠᠳᠠᠨ ᠲᠡᠭᠡᠷ᠎ᠡ ᠴᠠᠭᠠᠨ ᠢᠶᠠᠷ ᠪᠢᠴᠢᠭᠰᠡᠨ ᠦᠰᠦᠭ ᠪᠠᠶᠢᠭᠰᠠᠨ ᠶᠤᠮ᠃ ᠲᠡᠷᠡ ᠦᠰᠦᠭ ᠨᠢ ᠴᠤᠬᠤᠮ ᠶᠠᠮᠠᠷ ᠦᠨᠳᠤᠰᠤᠳᠡᠨ ᠤ ᠶᠠᠮᠠᠷ ᠦᠰᠦᠭ ᠪᠤᠯᠬᠤ᠂ ᠠᠯᠢ ᠦᠶ᠎ᠡ ᠳᠤ ᠪᠢᠴᠢᠭᠰᠡᠨ ᠨᠢ ᠲᠤᠳᠤᠷᠬᠠᠢ ᠦᠭᠡᠢ᠂ ᠪᠢᠴᠢᠭᠳᠦ ᠭᠡᠰᠡᠨ ᠨᠡᠷᠡᠶᠢᠳᠦᠯ ᠨᠢ ᠬᠡᠵᠢᠶ᠎ᠡ ᠠᠴᠠ ᠡᠬᠢᠯᠡᠨ ᠲᠠᠭᠤᠳᠠᠭᠰᠠᠨ ᠨᠢ ᠴᠦ ᠲᠤᠳᠤᠷᠬᠠᠢ ᠦᠭᠡᠢ᠂ ᠭᠡᠪᠡᠴᠦ ᠤᠨ ᠵᠢᠯ ᠤᠳᠠᠭᠠᠨ ᠪᠤᠯᠤᠭᠰᠠᠨ ᠢ ᠨᠢ ᠤᠶᠢᠷ᠎ᠠ ᠤᠷᠴᠢᠮ ᠤᠨ ᠬᠦᠮᠤᠰ ᠤᠨ ᠬᠡᠯᠡᠯᠭᠡ ᠵᠤᠭᠤᠭ ᠠᠴᠠ ᠮᠡᠳᠡᠵᠤ ᠪᠤᠯᠬᠤ ᠪᠦᠭᠡᠳ ᠵᠠᠷᠢᠮ ᠮᠡᠳᠡᠯᠭᠡ ᠲᠠᠢ ᠬᠦᠮᠦᠰ ᠤᠨ ᠬᠡᠯᠡᠬᠦ ᠪᠠᠷ ᠤᠯᠠᠮᠵᠢᠯᠠᠯᠳᠦ ᠮᠤᠩᠭᠤᠯ ᠦᠰᠦᠭ ᠬᠡᠵᠤ᠂ ᠵᠠᠷᠢᠮ ᠨᠢ ᠮᠠᠨᠵᠤ ᠦᠰᠦᠭ ᠭᠡᠵᠤ ᠴᠦ ᠬᠡᠯᠡᠳᠡᠭ᠃ ᠦᠨᠤ ᠲᠡᠷᠡᠬᠦ ᠦᠰᠦᠭ ᠪᠠᠶᠢᠭᠰᠠᠨ ᠬᠠᠳᠠ ᠨᠢ ᠤᠰᠤᠨ ᠴᠦᠭᠦᠷᠤᠮ ᠳᠤ ᠤᠷᠤᠭᠰᠠᠨ ᠪᠠᠶᠢᠨ᠎ᠠ᠃    ᠪᠢᠴᠢᠭᠳᠦ ᠶᠢᠨ ᠬᠠᠳᠠᠨ ᠤ ᠪᠠᠷᠠᠭᠤᠨ ᠲᠠᠯ᠎ᠠ᠂ ᠲᠠᠷᠤᠢ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠪᠠᠷᠠᠭᠤᠨ ᠬᠦᠪᠡᠭᠡ ᠳᠤ ᠦᠨᠤ ᠶᠢᠨ ᠤᠰᠤᠨ ᠴᠦᠭᠦᠷᠤᠮ ᠤᠨ ᠬᠠᠰᠢᠯᠭ᠎ᠠ ᠶᠢᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ ᠪᠠᠶᠢᠭ᠎ᠠ ᠠᠭᠤᠯᠠ ᠶᠢ ᠮᠠᠩᠬᠠᠳᠤ ᠭᠡᠳᠡᠭ᠃ ᠲᠡᠷᠡ ᠠᠭᠤᠯᠠ ᠶᠢ ᠠᠷᠤ ᠲᠠᠯ᠎ᠠ ᠠᠴᠠ ᠨᠢ ᠦᠵᠡᠪᠡᠯ ᠬᠠᠳᠠ ᠴᠢᠯᠠᠭᠤ ᠲᠠᠢ ᠪᠤᠯᠪᠠᠴᠤ ᠡᠩᠭᠡᠷ ᠲᠠᠯ᠎ᠠ ᠨᠢ ᠶᠡᠭᠡ ᠮᠠᠩᠬ᠎ᠠ ᠲᠠᠢ ᠤᠴᠢᠷ ᠠᠴᠠ ᠲᠡᠷᠡ ᠠᠭᠤᠯᠠ ᠶᠢ ᠮᠠᠩᠬᠠᠳᠤ ᠭᠡᠳᠡᠭ ᠪᠦᠭᠡᠳ ᠡᠩᠭᠡᠷ ᠲᠤᠨᠢ ᠪᠠᠶᠢᠭ᠎ᠠ ᠠᠶᠢᠯ ᠢ ᠮᠠᠩᠬᠠᠳᠤ ᠶᠢᠨ ᠡᠩᠭᠡᠷ ᠤᠨ ᠠᠶᠢᠯ ᠭᠡᠳᠡᠭ ᠪᠢᠯᠡ᠃    ᠲᠦᠷᠪᠡᠳᠦᠭᠡᠷ ᠬᠠᠭᠠᠯᠭ᠎ᠠ ᠨᠢ ᠬᠠᠷ᠎ᠠ ᠱᠤᠷᠤᠩ ᠪᠤᠯᠤᠨ ᠭᠡᠭᠡᠨ ᠱᠤᠷᠤᠩ ᠪᠤᠯᠤᠨ᠎ᠠ᠃ ᠮᠠᠩᠬᠠᠳᠤ ᠶᠢᠨ ᠠᠶᠢᠯ ᠤᠨ ᠡᠮᠤᠨ᠎ᠠ ᠪᠠᠶᠢᠭ᠎ᠠ ᠠᠭᠤᠯᠠ ᠶᠢᠨ ᠴᠢᠯᠠᠭᠤ ᠨᠢ ᠬᠠᠷ᠎ᠠ ᠦᠩᠭᠡᠳᠠᠢ ᠤᠴᠢᠷ ᠠᠴᠠ ᠬᠠᠷ᠎ᠠ ᠱᠤᠷᠤᠩ ᠭᠡᠵᠤ ᠨᠡᠷᠡᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠨᠡ ᠠᠭᠤᠯᠠ ᠶᠢᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ ᠰᠤᠮᠤᠳᠤ ᠤᠷᠤᠢ᠂ ᠵᠡᠭᠦᠨ ᠳᠤᠨᠢ ᠪᠢᠴᠢᠬᠠᠨ ᠬᠠᠳᠠ ᠭᠡᠵᠤ ᠪᠠᠶᠢᠳᠠᠭ᠃ ᠬᠠᠷ᠎ᠠ ᠱᠤᠷᠤᠩ ᠠᠭᠤᠯᠠ ᠶᠢ ᠠᠯᠠᠭ ᠭᠠᠷᠤᠳᠢ ᠶᠢᠨ ᠰᠢᠨᠵᠢᠯᠡᠭᠡ ᠲᠠᠢ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠰᠤᠮᠤᠳᠤ ᠤᠷᠤᠢ ᠨᠢ ᠭᠠᠷᠤᠳᠢ ᠶᠢᠨ ᠪᠠᠷᠠᠭᠤᠨ ᠵᠢᠭᠦᠷ᠂ ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠪᠢᠴᠢᠬᠠᠨ ᠬᠠᠳᠠ ᠨᠢ ᠭᠠᠷᠤᠳᠢ ᠶᠢᠨ ᠵᠡᠭᠦᠨ ᠵᠢᠭᠦᠷ ᠨᠢ ᠭᠡᠨ᠎ᠠ ᠭᠡᠳᠡᠭ᠃ ᠶᠠᠭ ᠵᠢᠭᠦᠷ ᠢᠶᠠᠨ ᠲᠡᠯᠭᠡᠭᠡᠳ ᠨᠢᠰᠴᠤ ᠪᠠᠶᠢᠭ᠎ᠠ ᠭᠠᠷᠤᠳᠢ ᠶᠢᠨ ᠬᠡᠯᠪᠡᠷᠢ ᠲᠠᠢ ᠠᠭᠤᠯᠠ ᠪᠤᠯᠤᠨ᠎ᠠ᠃    ᠬᠠᠷ᠎ᠠ ᠱᠤᠷᠤᠩ ᠠᠭᠤᠯᠠ ᠶᠢᠨ ᠵᠡᠭᠦᠨ ᠰᠤᠭᠤ ᠪᠠᠷ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠡᠮᠤᠨᠡᠰᠢ ᠤᠷᠤᠰᠴᠤ᠂ ᠲᠡᠭᠦᠨ ᠤ ᠵᠡᠭᠦᠨ ᠳᠤ ᠭᠡᠭᠡᠨ ᠱᠤᠷᠤᠩ ᠠᠭᠤᠯᠠ ᠪᠠᠶᠢᠳᠠᠭ᠃ ᠭᠡᠭᠡᠨ ᠱᠤᠷᠤᠩ ᠠᠭᠤᠯᠠ ᠶᠢ ᠪᠠᠷᠠᠭᠤᠨ ᠡᠮᠤᠨᠡᠰᠢ ᠬᠠᠨᠳᠤᠭᠰᠠᠨ ᠠᠯᠳᠠᠨ ᠭᠠᠷᠤᠳᠢ ᠶᠢᠨ ᠰᠢᠨᠵᠢᠯᠡᠭᠡ ᠲᠠᠢ ᠠᠭᠤᠯᠠ ᠭᠡᠳᠡᠭ᠃ ᠡᠨᠡ ᠠᠭᠤᠯᠠ ᠶᠢ ᠤᠤᠯ ᠳᠠᠭᠠᠨ ᠭᠠᠷᠤᠳᠢ ᠶᠢᠨ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠳᠠᠭ ᠢᠶᠠᠷ ᠨᠢ ᠭᠠᠷᠤᠳᠢ ᠠᠭᠤᠯᠠ ᠭᠡᠳᠡᠭ ᠪᠠᠶᠢᠵᠠᠢ᠃ 1667 ᠤᠨ ᠳᠤ ᠪᠠᠭᠠᠷᠢᠨ ᠤᠤᠭᠠᠨ ᠵᠠᠰᠠᠭ ᠲᠦᠷᠤ ᠶᠢᠨ ᠵᠢᠶᠦ᠋ᠨ ᠸᠠᠩ ᠨᠠᠰᠤ ᠪᠠᠷᠠᠭᠰᠠᠨ ᠳᠤ ᠲᠡᠭᠦᠨ ᠤ ᠴᠢᠨᠳᠠᠷ ᠢ ᠭᠠᠷᠤᠳᠢ ᠠᠭᠤᠯᠠ ᠶᠢᠨ ᠪᠠᠷᠠᠭᠤᠨ ᠡᠮᠤᠨ᠎ᠠ ᠡᠩᠭᠡᠷ ᠲᠤ ᠤᠷᠤᠰᠢᠭᠤᠯᠵᠠᠢ᠃ ᠪᠠᠭᠠᠷᠢᠨ ᠮᠤᠩᠭᠤᠯᠴᠤᠳ ᠲᠡᠭᠦᠨ ᠠᠴᠠ ᠠᠪᠤᠭᠠᠳ ᠸᠠᠩ ᠤᠨ ᠴᠢᠨᠳᠠᠷ ᠢ ᠤᠷᠤᠰᠢᠭᠤᠯᠤᠭᠰᠠᠨ ᠤᠩᠭᠤᠨ ᠪᠤᠯᠠᠰᠢ ᠶᠢ ᠸᠠᠩ ᠤᠨ ᠭᠡᠭᠡᠨ ᠢᠵᠠᠭᠤᠷ ᠭᠡᠵᠤ ᠬᠦᠨᠳᠦᠳᠬᠡᠨ ᠬᠡᠯᠡᠳᠡᠭ ᠪᠤᠯᠬᠤᠷ ᠤᠤᠯ ᠤᠨ ᠭᠠᠷᠤᠳᠢ ᠨᠡᠷᠡᠳᠤ ᠠᠭᠤᠯᠠ ᠶᠢ ᠭᠡᠭᠡᠨ ᠱᠤᠷᠤᠩ ᠭᠡᠵᠤ ᠨᠡᠷᠡᠯᠡᠬᠦ ᠪᠤᠯᠵᠠᠢ᠃     1700 ᠤᠨ ᠳᠤ ᠰᠧᠪᠳᠠᠨ ᠸᠠᠩ ᠤᠨ ᠬᠠᠳᠤᠨ ᠰᠡᠴᠡᠨ ᠲᠡᠭᠡᠳᠤ ᠭᠦᠷᠦᠨ ᠭᠦᠩᠵᠤ ᠪᠡᠭᠡᠵᠢᠩ ᠳᠤ ᠨᠠᠰᠤ ᠪᠠᠷᠠᠭᠰᠠᠨ ᠳᠤ ᠲᠡᠭᠦᠨ ᠤ ᠭᠡᠷᠢᠶᠡᠰ ᠢ ᠦᠨᠳᠦᠰᠤᠯᠡᠨ᠂ ᠴᠢᠨᠳᠠᠷ ᠢ ᠨᠢ ᠪᠠᠭᠠᠷᠢᠨ ᠳᠤ ᠠᠪᠴᠢᠷᠠᠵᠤ ᠪᠠᠶᠠᠨᠬᠠᠨ ᠠᠭᠤᠯᠠ ᠶᠢᠨ ᠡᠩᠭᠡᠷ ᠲᠠᠬᠢ ᠰᠠᠶᠢᠨᠪᠤᠯᠠᠭ ᠤᠨ ᠡᠩᠭᠡᠷ ᠲᠤ ᠤᠷᠤᠰᠢᠭᠤᠯᠵᠠᠢ᠃ ᠰᠡᠭᠦᠯᠠᠷ ᠨᠢ ᠲᠠᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠭᠦᠷᠤᠨ ᠭᠦᠩᠵᠤ ᠶᠢᠨ ᠴᠢᠨᠳᠠᠷ ᠢ ᠰᠠᠶᠢᠨᠪᠤᠯᠠᠭ ᠠᠴᠠ ᠰᠢᠯᠵᠢᠭᠦᠯᠤᠨ ᠰᠧᠪᠳᠠᠨ ᠸᠠᠩ ᠤᠨ ᠤᠩᠭᠤᠨ ᠤ ᠲᠡᠷᠭᠡᠳᠡ ᠤᠷᠤᠰᠢᠭᠤᠯᠵᠠᠢ᠃ ᠭᠦᠷᠦᠨ ᠭᠦᠩᠵᠤ ᠶᠢᠨ ᠤᠩᠭᠤᠨ ᠲᠠᠬᠢᠯᠭ᠎ᠠ ᠶᠢ ᠬᠠᠮᠢᠶᠠᠷᠤᠭᠤᠯᠬᠤ ᠪᠠᠷ ᠪᠤᠷᠵᠢᠬᠢᠨ ᠤᠪᠤᠭᠳᠠᠨ ᠪᠠ ᠭᠦᠷᠤᠨ ᠭᠦᠩᠵᠤ ᠶᠢ ᠲᠠᠭᠠᠵᠤ ᠢᠷᠡᠭᠰᠡᠨ ᠢᠨᠵᠢ ᠮᠠᠨᠵᠤ ᠶᠢᠨ ᠲᠤᠳᠤᠷ᠎ᠠ ᠠᠴᠠ ᠵᠤᠤ ᠶᠢᠨ ᠠᠶᠢᠮᠠᠭ ᠵᠡᠷᠭᠡ ᠨᠡᠶᠢᠳᠡ ᠭᠤᠴᠢᠨ ᠡᠷᠤᠬᠡ ᠶᠢ ᠰᠢᠯᠵᠢᠭᠦᠯᠤᠨ ᠠᠪᠴᠢᠷᠠᠵᠤ ᠤᠩᠭᠤᠨ ᠤ ᠲᠡᠷᠭᠡᠳᠡ ᠰᠠᠭᠤᠯᠭᠠᠵᠠᠢ᠃     ᠰᠡᠭᠦᠯᠡᠷ ᠨᠢ ᠭᠦᠷᠤᠨ ᠭᠦᠩᠵᠤ ᠶᠢᠨ ᠴᠢᠨᠳᠠᠷ ᠢ ᠭᠡᠭᠡᠨ ᠱᠤᠷᠤᠩ ᠠᠴᠠ ᠬᠤᠶᠢᠰᠢ ᠰᠢᠯᠵᠢᠭᠦᠯᠤᠨ ᠴᠠᠭᠠᠨ ᠮᠦᠷᠡᠨ ᠤ ᠬᠦᠪᠡᠭᠡᠨ ᠳᠠᠬᠢ ᠪᠠᠶᠠᠨᠬᠤᠰᠢᠭᠤ ᠳᠤ ᠰᠢᠯᠵᠢᠭᠦᠯᠤᠨ ᠤᠷᠤᠰᠢᠭᠤᠯᠤᠭᠰᠠᠨ ᠪᠦᠭᠡᠳ ᠭᠡᠭᠡᠨ ᠱᠤᠷᠤᠩ ᠠᠭᠤᠯᠠ ᠶᠢ ᠠᠯᠳᠠᠨ ᠭᠠᠷᠤᠳᠢ ᠶᠢᠨ ᠰᠢᠨᠵᠢᠯᠡᠭᠡ ᠲᠠᠢ ᠴᠢᠩ ᠤᠯᠤᠰ ᠤᠨ ᠵᠠᠰᠠᠭ ᠲᠤ ᠮᠠᠭᠤ ᠢᠷᠸ᠎ᠠ ᠪᠤᠯᠤᠨ᠎ᠠ ᠬᠡᠮᠡᠨ ᠴᠢᠩ ᠤᠨ ᠲᠦᠷᠤ ᠠᠴᠠ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠵᠢᠭᠦᠷ ᠢ ᠨᠢ ᠴᠠᠪᠴᠢᠨ ᠬᠠᠶᠠᠬᠤ ᠬᠡᠵᠤ ᠠᠭᠤᠯᠠ ᠶᠢᠨ ᠪᠠᠷᠠᠭᠤᠨ ᠬᠢᠷ᠎ᠠ ᠶᠢᠨ ᠴᠠᠭᠠᠨ ᠬᠠᠳᠠ ᠶᠢ ᠴᠠᠪᠴᠢᠨ ᠨᠤᠷᠠᠭᠠᠨ ᠬᠠᠶᠠᠵᠠᠢ᠃ ᠲᠡᠷᠡᠭᠦ ᠴᠠᠪᠴᠢᠭᠰᠠᠨ ᠤᠷᠤ ᠮᠦᠷ ᠨᠢ ᠡᠳᠤᠭᠡ ᠳᠤ ᠬᠦᠷᠳᠡᠯ᠎ᠠ ᠪᠠᠶᠢᠭᠰᠠᠭᠠᠷ ᠪᠢᠯᠡ᠃     ᠲᠠᠪᠤᠳᠤᠭᠠᠷ ᠬᠠᠭᠠᠯᠭ᠎ᠠ ᠨᠢ ᠲᠠᠷᠬᠠᠨ ᠪᠤᠯᠤᠨ ᠮᠦᠷᠭᠦᠴᠡᠭ ᠪᠤᠯᠤᠨ᠎ᠠ᠃ ᠲᠠᠷᠬᠠᠨ ᠠᠭᠤᠯᠠ ᠪᠤᠯ ᠲᠡᠭᠡᠷ᠎ᠡ ᠶᠠᠷᠢᠭᠰᠠᠨ ᠬᠠᠷ᠎ᠠ ᠱᠤᠷᠤᠩ ᠠᠭᠤᠯᠠ ᠶᠢᠨ ᠡᠮᠦᠨ᠎ᠡ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠪᠠᠷᠠᠭᠤᠨ ᠬᠦᠪᠡᠭᠡᠨ᠎ᠡ ᠪᠠᠶᠢᠳᠠᠭ᠂ ᠵᠡᠭᠦᠨ ᠡᠮᠦᠨ᠎ᠡ ᠲᠠᠯ᠎ᠠ ᠨᠢ ᠪᠠᠶᠠᠨᠬᠠᠨ ᠬᠠᠶᠢᠷᠬᠠᠨ ᠤ ᠵᠡᠭᠦᠨ ᠬᠤᠷᠮᠤᠢ ᠬᠡᠵᠤ ᠬᠡᠯᠡᠵᠤ ᠪᠤᠯᠬᠤ ᠶᠤᠮ᠃ ᠲᠡᠭᠦᠨ ᠤ ᠡᠰᠡᠷᠭᠦ ᠲᠠᠯ᠎ᠠ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠵᠡᠭᠦᠨ᠎ᠠ ᠮᠦᠷᠭᠦᠴᠡᠭ ᠬᠡᠵᠤ ᠬᠤᠶᠠᠷ ᠬᠠᠳᠠ ᠪᠠᠶᠢᠳᠠᠭ᠃ ᠦᠭᠡᠳᠡ ᠦᠭᠡᠳᠡ ᠠᠴᠠ ᠬᠠᠷᠠᠭᠰᠠᠨ ᠬᠤᠶᠠᠷ ᠪᠢᠴᠢᠬᠠᠨ ᠠᠭᠤᠯᠠ ᠲᠤᠯᠠ ᠲᠡᠭᠦᠨ ᠢ ᠮᠦᠷᠭᠦᠴᠡᠭ ᠭᠡᠳᠡᠭ᠃     ᠵᠢᠷᠭᠤᠳᠤᠭᠠᠷ ᠬᠠᠭᠠᠯᠭ᠎ᠠ ᠨᠢ ᠤᠨᠢᠳᠤ ᠱᠤᠷᠤᠩ ᠪᠤᠯᠤᠨ ᠪᠠᠶᠠᠨᠬᠤᠰᠢᠭᠤ ᠪᠤᠯᠤᠨ᠎ᠠ᠃ ᠤᠨᠢᠳᠤ ᠱᠤᠷᠤᠩ ᠬᠡᠵᠤ ᠪᠠᠶᠠᠨᠬᠠᠨ ᠬᠠᠶᠢᠷᠬᠠᠨ ᠤ ᠡᠮᠦᠨ᠎ᠡ ᠡᠩᠭᠡᠷ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠪᠠᠷᠠᠭᠤᠨ ᠳᠤ ᠪᠠᠶᠢᠳᠠᠭ ᠪᠦᠭᠡᠳ ᠲᠡᠭᠦᠨ ᠤ ᠤᠷᠤᠢ ᠨᠢ ᠬᠤᠶᠠᠷ ᠱᠤᠪᠬᠤ ᠬᠠᠳᠠ ᠪᠠᠶᠢᠳᠠᠭ ᠠᠴᠠ ᠤᠨᠢᠳᠤ ᠱᠤᠷᠤᠩ ᠭᠡᠳᠡᠭ᠃ ᠦᠩᠭᠡᠷᠡᠭᠰᠡᠨ ᠳᠤ ᠲᠡᠷᠡ ᠠᠭᠤᠯᠠ ᠶᠢᠨ ᠡᠩᠭᠡᠷ ᠨᠢ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠰᠠᠪᠠ ᠭᠠᠵᠠᠷ ᠲᠤᠯᠠ ᠪᠡᠯᠴᠢᠭᠡᠷ ᠬᠠᠳᠤᠯᠠᠩ ᠰᠠᠶᠢᠨ ᠤᠷᠭᠤᠳᠠᠭ ᠠᠴᠠ ᠤᠢᠢᠷ᠎ᠠ ᠤᠷᠴᠢᠮ ᠤᠨ ᠮᠠᠯᠴᠢᠳ ᠤᠨ ᠪᠡᠯᠴᠢᠭᠡᠷ ᠬᠠᠳᠤᠯᠠᠩ ᠢ ᠬᠠᠩᠭᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠠᠭᠤᠢ ᠶᠢᠨ ᠰᠦᠮ᠎ᠡ ᠶᠢᠨ ᠬᠡᠳᠤᠨ ᠰᠠᠩ ᠤᠨ ᠮᠠᠯ ᠰᠦᠷᠦᠭ ᠤᠨ ᠪᠡᠯᠴᠢᠭᠡᠷ ᠬᠠᠳᠤᠯᠠᠩ ᠪᠠᠶᠢᠵᠠᠢ᠃ ᠪᠠᠶᠠᠨᠬᠤᠰᠢᠭᠤ ᠬᠡᠵᠤ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠵᠡᠭᠦᠨ ᠬᠦᠪᠡᠭᠡᠨ ᠳᠤ᠂ ᠲᠤᠯᠭ᠎ᠠ ᠠᠭᠤᠯᠠ ᠶᠢᠨ ᠠᠷᠤ ᠶᠢᠨ ᠬᠠᠳᠠᠨ ᠤ ᠬᠤᠶᠢᠰᠢ ᠬᠠᠨᠳᠤᠭᠰᠠᠨ ᠤᠯᠠᠭᠠᠨ ᠨᠢᠭᠤᠷ ᠬᠠᠳᠠ ᠶᠢ ᠪᠠᠶᠠᠨᠬᠤᠰᠢᠭᠤ ᠭᠡᠳᠡᠭ᠃ ᠪᠠᠶᠠᠨᠬᠤᠰᠢᠭᠤ ᠠᠭᠤᠯᠠᠨ ᠳᠤ ᠠᠭᠤᠢ ᠶᠢᠨ ᠰᠦᠮ᠎ᠡ ᠶᠢᠨ ᠠᠩᠬᠠᠳᠤᠭᠠᠷ ᠭᠡᠭᠡᠨ ᠭᠧᠯᠢᠭᠵᠡᠯᠰᠠᠨ ᠰᠠᠶᠢᠨ ᠴᠤᠭᠳᠤ ᠶᠢᠨ ᠠᠩᠬ᠎ᠠ ᠤᠳᠠᠭ᠎ᠠ ᠳᠠᠭᠠᠨ ᠳᠤ ᠰᠠᠭᠤᠭᠰᠠᠨ ᠠᠭᠤᠢ ᠪᠤᠢ᠃ ᠲᠡᠷᠡ ᠠᠭᠤᠢ ᠶᠢ ᠵᠠᠷᠢᠮ ᠨᠢ ᠯᠠᠮᠠ ᠶᠢᠨ ᠠᠭᠤᠢ᠂ ᠵᠠᠷᠢᠮ ᠨᠢ ᠤᠷᠳᠤ ᠨᠠᠰᠤᠳᠤ ᠠᠭᠤᠢ ᠭᠡᠳᠡᠭ᠃ ᠪᠠᠶᠠᠨᠬᠤᠰᠢᠭᠤ ᠨᠢ ᠶᠠᠭ ᠰᠠᠶᠢᠬᠠᠨ ᠤᠨᠢᠳᠤ ᠱᠤᠷᠤᠩ ᠲᠠᠢ ᠠᠰᠯᠠᠵᠤ ᠪᠠᠶᠢᠳᠠᠭ᠃     ᠲᠤᠯᠤᠳᠤᠭᠠᠷ ᠬᠠᠭᠠᠯᠭ᠎ᠠ ᠨᠢ ᠲᠤᠯᠭ᠎ᠠ ᠠᠭᠤᠯᠠ ᠪᠠ ᠴᠤᠭ ᠦᠨᠳᠤᠷ ᠪᠤᠯᠤᠨ᠎ᠠ᠃ ᠲᠤᠯᠭ᠎ᠠ ᠠᠭᠤᠯᠠ ᠪᠤᠯ ᠴᠠᠭᠠᠨ ᠮᠦᠷᠡᠨ ᠤ ᠵᠡᠭᠦᠨ ᠬᠦᠪᠡᠭᠡᠨ ᠳᠤ ᠪᠠᠶᠢᠳᠠᠭ᠂ ᠲᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠤᠴᠤᠭ ᠰᠢᠭ᠋ ᠠᠭᠤᠯᠠ ᠶᠢ ᠬᠡᠯᠡᠨ᠎ᠠ᠃ ᠬᠡᠰᠡᠷ ᠪᠠᠭᠠᠳᠤᠷ ᠲᠤᠯᠭ᠎ᠠ ᠠᠭᠤᠯᠠᠨ ᠲᠡᠭᠡᠷ᠎ᠡ ᠨᠠᠷᠡᠠ ᠰᠠᠷᠠᠨ ᠲᠤᠭᠤᠭ᠎ᠠ ᠪᠠᠨ ᠲᠠᠯᠪᠢᠭᠠᠳ ᠴᠡᠷᠢᠭ ᠮᠤᠷᠢ ᠲᠠᠢ ᠪᠠᠨ ᠲᠤᠭᠤᠭᠠᠯᠠᠭᠠᠳ ᠭᠠᠷᠤᠭᠰᠠᠨ ᠭᠡᠬᠦ ᠲᠤᠮᠤᠭ ᠲᠠᠢ ᠪᠠᠶᠢᠳᠠᠭ᠃ ᠲᠤᠯᠭ᠎ᠠ ᠠᠭᠤᠯᠠ ᠶᠢ ᠪᠠᠰᠠ ᠪᠠᠶᠠᠨᠬᠠᠨ ᠬᠠᠶᠢᠷᠬᠠᠨ ᠤ ᠲᠤᠯᠭ᠎ᠠ ᠠᠭᠤᠯᠠ ᠭᠡᠳᠡᠭ ᠪᠦᠭᠡᠳ ᠡᠷᠳᠡᠨ ᠤ ᠲᠤᠮᠤᠭ ᠶᠠᠷᠢᠶᠠᠨ ᠳᠤ ᠪᠠᠶᠠᠨᠬᠠᠨ ᠬᠠᠶᠢᠷᠬᠠᠨ ᠪᠤᠯᠤᠨ ᠲᠤᠯᠭ᠎ᠠ ᠠᠭᠤᠯᠠ ᠶᠡᠷᠦᠨᠢ ᠨᠢᠭᠡᠨ ᠨᠢᠭᠡᠨ ᠠᠴᠠ ᠪᠠᠨ ᠰᠠᠯᠳᠠᠭ ᠦᠭᠡᠢ ᠢᠷᠦᠭᠡᠯ ᠲᠠᠢ ᠬᠤᠶᠠᠷ ᠠᠭᠤᠯᠠ ᠪᠢᠯᠡ᠃ ᠪᠦᠬᠦ ᠤᠯᠤᠰ ᠤᠨ ᠰᠤᠷ ᠬᠠᠷᠪᠤᠯᠳᠠ ᠶᠢᠨ ᠲᠠᠮᠳᠡᠭᠯᠡᠯ ᠢ ᠡᠭᠦᠳᠦᠭᠰᠡᠨ ᠨᠤᠮᠤᠨᠷᠠᠰᠢ ᠪᠤᠯ ᠲᠤᠯᠭ᠎ᠠ ᠶᠢᠨ ᠠᠶᠢᠯ ᠤᠨ ᠬᠦᠮᠦᠨ ᠶᠤᠮ᠃ ᠴᠤᠭ ᠦᠨᠳᠤᠷ ᠠᠭᠤᠯᠠ ᠪᠤᠯ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠪᠠᠷᠠᠭᠤᠨ᠎ᠠ ᠨᠠᠷᠠᠰᠤᠳᠠᠢ ᠠᠶᠢᠯ ᠤᠨ ᠪᠠᠷᠠᠭᠤᠨ ᠳᠤ ᠪᠠᠶᠢᠬᠤ ᠠᠭᠤᠯᠠ ᠶᠢ ᠭᠡᠯᠡᠵᠤ ᠪᠠᠶᠢᠨ᠎ᠠ᠃     ᠨᠠᠢᠮᠠᠳᠤᠭᠠᠷ ᠬᠠᠭᠠᠯᠭ᠎ᠠ ᠪᠤᠯ ᠪᠠᠷᠠᠭᠤᠨ ᠪᠢᠯᠡᠭᠦᠳᠠᠢ ᠪᠤᠯᠤᠨ ᠵᠡᠭᠦᠨ ᠪᠢᠯᠡᠭᠦᠳᠠᠢ ᠪᠤᠯᠤᠨ᠎ᠠ᠃ ᠰᠤᠶᠤᠯ ᠢ ᠲᠡᠯᠭᠡᠷᠡᠭᠦᠯᠦᠭᠴᠢ ᠰᠦᠮ᠎ᠡ ︵ᠠᠭᠤᠢ ᠶᠢᠨ ᠰᠦᠮ᠎ᠡ︶ ᠶᠢᠨ ᠠᠰ ᠡᠮᠦᠨ᠎ᠡ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠵᠡᠭᠦᠨ ᠪᠠᠷᠠᠭᠤᠨ ᠬᠤᠶᠠᠷ ᠲᠠᠯ᠎ᠠ ᠳᠤ ᠪᠠᠶᠢᠭ᠎ᠠ ᠦᠭᠡᠳᠡ ᠦᠭᠡᠳᠡ ᠠᠴᠠ ᠪᠠᠨ ᠬᠠᠨᠳᠤᠭᠰᠠᠨ ᠬᠤᠶᠠᠷ ᠬᠠᠳᠠ ᠪᠤᠯᠤᠨ᠎ᠠ᠃ ᠭᠤᠤᠯ ᠤᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ ᠪᠠᠶᠢᠭ᠎ᠠ ᠨᠢ ᠪᠠᠷᠠᠭᠤᠨ ᠪᠢᠯᠡᠭᠦᠳᠠᠢ᠂ ᠭᠤᠤᠯ ᠤᠨ ᠵᠡᠭᠦᠨ ᠲᠠᠯ᠎ᠠ ᠳᠤ ᠪᠠᠶᠢᠭ᠎ᠠ ᠶᠢ ᠨᠢ ᠵᠡᠭᠦᠨ ᠪᠢᠯᠡᠭᠦᠳᠠᠢ ᠭᠡᠳᠡᠭ ᠪᠦᠭᠡᠳ ᠠᠳᠡᠬᠢ ᠬᠠᠳᠠᠨ ᠠᠴᠠ ᠪᠢᠯᠡᠭᠦᠦ ᠭᠠᠷᠳᠠᠭ ᠲᠤᠯᠠ ᠪᠢᠯᠡᠭᠦᠳᠠᠢ ᠭᠡᠳᠡᠭ ᠨᠡᠷᠡᠶᠢᠳᠤᠯ ᠤᠯᠵᠠᠢ᠃ ᠵᠡᠭᠦᠨ ᠪᠢᠯᠡᠭᠦᠳᠠᠢ ᠶᠢᠨ ᠡᠩᠭᠡᠷ ᠤᠨ ᠠᠶᠢᠯ ᠢ ᠤᠯᠢᠶᠠᠰᠤᠳᠠᠢ ᠬᠡᠳᠡᠭ᠂ ᠪᠦᠭᠦ ᠤᠯᠤᠰ ᠤᠨ ᠰᠤᠷ ᠬᠠᠷᠪᠤᠯᠳᠠ ᠶᠢᠨ ᠲᠡᠮᠳᠡᠭᠯᠡᠯ ᠢ ᠡᠭᠦᠳᠦᠭᠰᠡᠨ ᠪᠠᠰᠠ ᠨᠢᠭᠡᠨ ᠨᠡᠷᠡᠳᠤ ᠰᠤᠷᠴᠢᠨ ᠪᠦᠭᠡᠸ᠋ᠴᠢᠷ ᠤᠨ ᠨᠤᠳᠤᠭ ᠪᠤᠯᠤᠨ᠎ᠠ᠃     ᠶᠢᠰᠤᠳᠤᠭᠡᠷ ᠬᠠᠭᠠᠯᠭ᠎ᠠ ᠪᠤᠯ ᠵᠠᠭᠠᠨ᠎ᠠ ᠶᠢᠨ ᠬᠤᠰᠢᠭᠤ ᠪᠤᠯᠤᠨ ᠬᠠᠳᠠᠳᠤ ᠪᠤᠯᠤᠨ᠎ᠠ᠃ ᠵᠠᠭᠠᠨ᠎ᠠ ᠶᠢᠨ ᠬᠤᠰᠢᠭᠤ ᠪᠤᠯ ᠴᠠᠭᠠᠨ ᠮᠦᠷᠡᠨ ᠪᠤᠯᠤᠨ ᠰᠢᠷ᠎ᠠ ᠮᠦᠷᠡᠨ ᠤ ᠠᠭᠤᠯᠵᠠᠷ ᠲᠤ ᠪᠠᠶᠢᠭ᠎ᠠ ᠬᠠᠳᠠ ᠴᠢᠯᠠᠭᠤ ᠲᠠᠢ ᠬᠤᠰᠢᠭᠤ ᠪᠤᠯᠤᠨ᠎ᠠ᠃ ᠲᠡᠷᠡᠭᠦ ᠬᠤᠰᠢᠭᠤ ᠶᠢᠨ ᠲᠡᠭᠡᠷ᠎ᠡ ᠨᠤᠶᠠᠳ ᠤᠨ ᠤᠪᠤᠭ᠎ᠠ ᠬᠡᠵᠤ ᠠᠷᠪᠠᠨ ᠭᠤᠷᠪᠠᠨ ᠤᠪᠤᠭ᠎ᠠ ᠪᠠᠶᠢᠳᠠᠭ ᠪᠦᠭᠡᠳ ᠦᠩᠭᠡᠷᠡᠭᠰᠡᠨ ᠳᠡᠭᠡᠨ ᠲᠡᠷᠡ ᠤᠷᠴᠢᠮ ᠤᠨ ᠪᠠᠭᠠᠷᠢᠨ ᠤᠩᠨᠢᠭᠤᠳ ᠤᠨ ᠠᠷᠠᠳ ᠤᠪᠤᠭ᠎ᠠ ᠶᠢ ᠨᠢ ᠲᠠᠬᠢᠳᠠᠭ ᠪᠠᠶᠢᠭᠰᠠᠨ ᠭᠡᠨ᠎ᠠ᠃ ᠪᠠᠰᠠ ᠵᠠᠷᠢᠮ ᠨᠢ ᠲᠡᠷᠡ ᠬᠤᠰᠢᠭᠤ ᠶᠢ ᠵᠠᠭᠠᠭ ᠤᠨ ᠬᠤᠰᠢᠭᠤ ᠭᠡᠳᠡᠭ ᠪᠢᠯᠡ᠃ ᠲᠡᠷᠡᠬᠦ ᠬᠤᠰᠢᠭᠤ ᠶᠢᠨ ᠵᠡᠭᠦᠨ ᠲᠠᠯ᠎ᠠ ᠲᠠᠷᠤᠢ ᠴᠠᠭᠠᠨ ᠮᠦᠷᠡᠨ ᠭᠤᠤᠯ ᠤᠨ ᠵᠡᠭᠦᠨ ᠲᠠᠯ᠎ᠠ ᠳᠤ ᠬᠠᠳᠠᠳᠤ ᠭᠡᠳᠡᠭ ᠠᠭᠤᠯᠠ ᠪᠤᠢ᠃ ᠴᠠᠭᠠᠨ ᠨᠠᠭᠤᠷ ᠪᠠᠯᠭᠠᠰᠤᠨ ᠤ ᠶᠡᠭᠡ ᠲᠡᠷᠡᠰᠤ ᠭᠠᠴᠠᠭ᠎ᠠ ᠶᠢᠨ ᠬᠠᠳᠠ ᠠᠶᠢᠯ ᠪᠤᠯ ᠶᠠᠭ ᠬᠠᠳᠠᠳᠤ ᠶᠢᠨ ᠬᠤᠶᠢᠨ᠎ᠠ ᠪᠠᠶᠢᠷᠢᠰᠢᠳᠠᠭ ᠪᠢᠯᠡ᠃ ᠡᠨᠡ ᠬᠠᠳᠠᠳᠤ ᠳᠤ ᠠᠯᠳᠠᠨ ᠠᠭᠤᠷᠬᠠᠢ ᠪᠠᠶᠢᠨ᠎ᠠ ᠭᠡᠵᠤ ᠬᠡᠯᠡᠯᠴᠡᠳᠡᠭ᠃      ︽ᠦᠩᠭᠡᠷᠡᠭᠰᠡᠨ ᠤ ᠬᠢ ᠶᠢ ᠤᠳᠤ ᠳᠤ ᠦᠢᠯᠡᠴᠢᠯᠡᠭᠦᠯᠭᠦ︾ ᠭᠡᠳᠡᠭ ᠨᠢᠭᠡᠨ ᠪᠠᠳᠠᠭ ᠰᠡᠴᠡᠨ ᠦᠭᠡ ᠪᠠᠶᠢᠳᠠᠭ᠃ ᠪᠠᠭᠠᠷᠢᠨ ᠳᠤ ᠪᠠᠶᠢᠭ᠎ᠠ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠨᠢ ᠬᠡᠳᠦ᠋ᠢᠪᠡᠷ ᠬᠡᠳᠤᠨ ᠵᠠᠭᠤᠨ ᠵᠢᠯ ᠤᠨ ᠲᠡᠤᠬᠡ ᠲᠠᠢ ᠲᠡᠤᠬᠡᠨ ᠪᠠᠷᠢᠯᠭ᠎ᠠ ᠪᠤᠯᠤᠭᠰᠠᠨ ᠴᠦ ᠰᠡᠭᠦᠯ ᠤᠨ ᠬᠦᠮᠦᠰ ᠤᠨ ᠰᠡᠯᠪᠢᠨ ᠵᠠᠰᠠᠬᠤ ᠪᠠ ᠬᠠᠮᠠᠭᠠᠯᠠᠯᠳᠠ ᠶᠢᠨ ᠰᠠᠶᠢᠨ ᠢᠶᠠᠷ ᠤᠳᠤ ᠳᠤ ᠲᠤᠯᠲᠠᠯ᠎ᠠ ᠤᠯᠠᠩᠬᠢ ᠪᠠᠷᠢᠯᠭ᠎ᠠ ᠶᠢ ᠨᠢ ᠠᠰᠢᠭᠯᠠᠭᠰᠠᠭᠠᠷ ᠪᠠᠶᠢᠨ᠎ᠠ᠃ ᠴᠢᠯᠤᠭᠡᠯᠡᠭᠳᠡᠭᠰᠡᠨ ᠲᠡᠷᠡ ᠲᠠᠷᠤᠢ ᠳᠤ ᠠᠵᠤ ᠠᠬᠤᠢ ᠶᠢᠨ ᠰᠠᠭᠤᠷᠢ ᠨᠢᠮᠭᠡᠨ᠂ ᠠᠯᠪᠠᠨ ᠪᠠᠶᠢᠭᠤᠯᠤᠯᠭ᠎ᠠ ᠶᠢᠨ ᠭᠡᠷ ᠬᠦᠷᠢᠶ᠎ᠡ ᠪᠠᠶᠢᠭᠤᠯᠬᠤ ᠳᠤ ᠬᠦᠴᠢᠷ ᠲᠠᠢ ᠪᠠᠶᠢᠭᠰᠠᠨ ᠴᠠᠭ ᠲᠤ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠪᠤᠯᠤᠨ ᠪᠠᠭᠠᠷᠢᠨ ᠸᠠᠩ ᠤᠨ ᠤᠷᠳᠤᠨ ᠪᠤᠯ ᠪᠠᠶᠢᠭᠤᠯᠤᠯᠭ᠎ᠠ ᠠᠵᠢᠯᠯᠠᠬᠤ ᠳᠤ ᠲᠤᠬᠢᠷᠠᠮᠵᠢᠳᠠᠢ ᠤᠷᠳᠤᠨ ᠪᠠᠶᠢᠭᠰᠠᠨ᠃ ᠤᠨ ᠵᠢᠯ ᠤᠯᠠᠷᠢᠨ ᠠᠵᠤ ᠠᠬᠤᠢ ᠶᠡᠭᠡᠪᠠᠷ ᠬᠦᠭᠵᠢᠭᠰᠡᠨ ᠠᠴᠠ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠳᠤ ᠠᠵᠢᠯᠯᠠᠵᠤ ᠪᠠᠶᠢᠭᠰᠠᠨ ᠠᠯᠪᠠᠨ ᠪᠠᠶᠢᠭᠤᠯᠤᠯᠭ᠎ᠠ ᠨᠤᠭᠤᠳ ᠢᠳᠡᠭ ᠢᠳᠡᠭ ᠢᠶᠠᠷ ᠰᠢᠨ᠎ᠡ ᠪᠠᠷᠢᠯᠭ᠎ᠠ ᠠᠰᠠᠷ ᠲᠠᠭᠳᠤ ᠳᠤ ᠨᠡᠭᠦᠭᠡᠳ ᠡᠩᠬᠡ ᠠᠮᠤᠭᠤᠯᠠᠩ ᠤᠨ ᠠᠶᠠᠯᠠᠯ ᠤᠨ ᠤᠷᠳᠤᠨ ᠪᠤᠯᠤᠨ ᠪᠠᠭᠠᠷᠢᠨ ᠸᠠᠩ ᠤᠨ ᠤᠷᠳᠤᠨ ᠨᠢ ᠳᠡᠤᠭᠡᠳᠤ ᠲᠤᠷᠠᠰᠬᠠᠯ ᠤᠨ ᠤᠷᠤᠨ ᠪᠤᠯᠤᠨ ᠦᠯᠡᠳᠡᠵᠠᠢ᠃    ᠪᠠᠭᠠᠷᠢᠨ ᠮᠤᠩᠭᠤᠯᠴᠤᠳ ᠤᠨ ᠬᠡᠳᠤᠨ ᠵᠠᠭᠤᠨ ᠵᠢᠯ ᠤᠨ ᠮᠠᠯᠵᠢᠬᠤ ᠠᠮᠢᠳᠤᠷᠠᠯ ᠪᠤᠯᠤᠨ ᠵᠠᠩ ᠠᠭᠠᠯᠢ ᠨᠢ ᠪᠤᠰᠤᠳ ᠭᠠᠵᠠᠷ ᠤᠨ ᠮᠤᠩᠭᠤᠯᠴᠤᠳ ᠲᠠᠢ ᠠᠳᠠᠯᠢᠬᠠᠨ ᠮᠤᠩᠭᠤᠯ ᠦᠨᠳᠦᠰᠤᠳᠡᠡ ᠤ ᠬᠡᠪ ᠵᠠᠩᠰᠢᠯ ᠲᠠᠢ ᠪᠠᠶᠢᠳᠠᠭ ᠪᠠ ᠲᠡᠭᠦᠨ ᠳᠤ ᠪᠠᠰᠠ ᠦᠪᠡᠷ ᠤᠨ ᠬᠢᠨᠢ ᠵᠠᠷᠢᠮ ᠲᠠᠯ᠎ᠠ ᠶᠢᠨ ᠤᠨᠴᠠᠯᠢᠭ ᠪᠠᠶᠢᠳᠠᠭ᠃ ᠲᠡᠳᠡᠭᠡᠷ ᠨᠡᠶᠢᠳᠡᠯᠢᠭ ᠲᠦᠷᠢ ᠪᠤᠯᠤᠨ ᠦᠪᠡᠷ ᠤᠨ ᠬᠢᠨᠢ ᠤᠨᠴᠠᠯᠢᠭ ᠰᠢᠨᠵᠢ ᠨᠢ ᠠᠵᠤ ᠠᠬᠤᠢ ᠶᠢᠨ ᠬᠦᠭᠵᠢᠯᠳᠡ ᠨᠡᠶᠢᠭᠡᠮ ᠤᠨ ᠤᠷᠤᠰᠬᠠᠯ ᠢ ᠲᠠᠭᠠᠭᠠᠳ ᠵᠠᠷᠢᠮ ᠨᠢ ᠠᠶᠠᠨᠳᠠᠭᠠᠨ ᠠᠭᠤᠰᠤᠯᠴᠠᠬᠤ᠂ ᠵᠠᠷᠢᠮ ᠨᠢ ᠪᠦᠳᠡᠭᠢ ᠪᠤᠯᠬᠤ᠂ ᠵᠠᠷᠢᠮ ᠨᠢ ᠮᠠᠷᠳᠠᠭᠳᠠᠬᠤ᠂ ᠵᠠᠷᠢᠮ ᠨᠢ ᠤᠰᠠᠳᠬᠤ ᠵᠦᠭ ᠲᠤ ᠤᠷᠤᠭᠠᠳ ᠪᠠᠶᠢᠬᠤ ᠶᠤᠮ᠃ ᠡᠨᠡ ᠪᠤᠯ ᠨᠡᠶᠢᠭᠡᠮ ᠤᠨ ᠬᠦᠭᠵᠢᠯᠳᠡ ᠶᠢᠨ ᠵᠠᠶᠢᠯᠠᠰᠢ ᠦᠭᠡᠢ ᠵᠢᠮ᠎ᠡ ᠶᠤᠰᠤ ᠪᠢᠯᠡ᠃ ᠭᠡᠪᠡᠴᠦ ᠵᠠᠷᠢᠮ ᠵᠦᠢᠯ ᠢ ᠨᠢ ᠠᠪᠤᠷᠠᠬᠤ᠂ ᠬᠠᠮᠠᠭᠠᠯᠠᠬᠤ᠂ ᠦᠯᠡᠳᠡᠭᠡᠨ ᠤᠯᠠᠮᠵᠢᠯᠠᠬᠤ᠂ ᠵᠠᠷᠢᠮ ᠢ ᠨᠢ ᠬᠦᠭᠵᠢᠭᠦᠯᠬᠦ ᠴᠢᠬᠤᠯᠠ ᠲᠠᠢ᠃ ᠪᠠᠰᠠ ᠵᠠᠷᠢᠮ ᠨᠢᠭᠡ ᠵᠦᠢᠯ ᠢ ᠨᠢ ᠦᠯᠡᠳᠡᠭᠡᠨ ᠲᠤᠷᠠᠰᠬᠠᠯ ᠤᠨ ᠶᠠᠭᠤᠮ᠎ᠠ ᠪᠤᠯᠭᠠᠨ ᠬᠤᠶᠢᠰᠢ ᠶᠢᠨ ᠬᠦᠮᠦᠰ ᠲᠤ ᠮᠡᠳᠡᠭᠦᠯᠬᠦ ᠤᠬᠠᠭᠤᠯᠬᠤ ᠴᠢᠬᠤᠯᠠ ᠲᠠᠢ᠃ ᠲᠡᠤᠬᠡ ᠶᠠᠮᠠᠷ ᠪᠠᠶᠢᠵᠤ ᠪᠤᠢ︖ ᠬᠡᠰᠡᠨ ᠢ ᠲᠠᠨᠢᠭᠤᠯᠬᠤ ᠬᠡᠷᠡᠭᠳᠡᠢ᠃ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ ᠲᠡᠤᠬᠡ᠂ ᠦᠨᠳᠦᠰᠤᠳᠡᠡ ᠤ ᠲᠡᠤᠬᠡ ᠪᠠᠨ ᠪᠢᠳᠡᠬᠡᠢ ᠮᠠᠷᠳᠠᠭᠠᠷᠠᠢ ᠬᠡᠵᠤ ᠬᠤᠶᠢᠴᠢ ᠦᠶ᠎ᠡ ᠶᠢᠨ ᠬᠢᠨ ᠳᠡᠭᠡᠨ ᠰᠤᠷᠭᠠᠵᠤ ᠮᠡᠳᠡᠭᠦᠯᠬᠦ ᠴᠢᠬᠤᠯᠠ ᠲᠠᠢ᠃ ︽ᠪᠠᠭᠠᠷᠢᠨ ᠪᠠᠷᠠᠭᠤᠨ ᠬᠤᠰᠢᠭᠤᠨ ᠤ ᠵᠠᠩ ᠠᠭᠠᠯᠢ ᠶᠢᠨ ᠮᠦᠵᠠᠢ︾ ᠨᠢ ᠨᠢᠭᠡᠨ ᠦᠶ᠎ᠡ ᠶᠢᠨ ᠬᠦᠮᠤᠰ ᠤᠨ ᠬᠠᠳᠠᠭᠤᠵᠢᠯᠳᠠᠢ ᠴᠢᠷᠮᠠᠶᠢᠯᠭ᠎ᠠ ᠪᠠᠷ 2012 ᠤᠨ ᠳᠤ ᠵᠢᠩᠬᠢᠨᠢ ᠪᠠᠷ ᠪᠠᠶᠢᠭᠤᠯᠤᠭᠳᠠᠵᠤ ᠡᠭᠦᠳᠡ ᠡᠷᠤᠬᠡ ᠪᠠᠨ ᠰᠡᠭᠦᠭᠰᠡᠨ ᠪᠠᠶᠢᠨ᠎ᠠ᠃ ᠡᠨᠡ ᠪᠤᠯ ᠡᠷᠳᠡᠨ ᠤ ᠬᠢ ᠶᠢ ᠡᠳᠤᠭᠡ ᠳᠤ ᠬᠡᠷᠡᠭᠯᠡᠭᠰᠡᠨ ᠪᠤᠳᠠᠰ ᠤᠨ ᠪᠤᠳᠠᠳᠠᠢ ᠵᠢᠱᠢᠶ᠎ᠡ ᠪᠤᠯᠬᠤ ᠶᠤᠮ᠃     ᠵᠣᠬᠢᠶᠠᠭᠴᠢ᠄ ᠨᠠ᠊᠂ ᠡᠩᠭᠡ  
 
ᠢᠷᠡᠯᠲᠡ᠄ ᠣᠯᠠᠭᠠᠨᠬᠳᠠ ᠮᠤᠩᠭᠤᠯ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠮᠣᠩᠭᠤᠯ ᠦᠨᠳᠣᠰᠣᠳᠠᠠ ᠤ ᠢᠵᠠᠭᠤᠷ ᠡᠷᠳᠡᠨ ᠤ ᠮᠣᠳᠣᠠ ᠰᠠᠶᠢᠯᠪᠣᠷᠢᠳᠦ ᠣᠶᠣᠠ ᠤ ᠲᠣᠬᠯᠠᠭᠠᠮ - ᠠᠮᠤᠷ ᠁
ᠶᠡᠭᠡ ᠪᠠᠭᠠᠷᠢᠨ ᠤ ᠷᠠᠪᠳᠠᠨ ᠲᠤᠰᠠᠯᠠᠭᠴᠢ ᠭᠢᠭᠡᠳ ᠲᠥᠳᠥᠭᠡᠷ ᠡᠭᠦᠳᠡᠨ ᠤ ᠲᠠᠶᠢᠵᠢ
ᠮᠠᠯ ᠤᠨᠤᠭ᠎ᠠ ᠲᠠᠢ ᠪᠠᠨ ᠦᠭᠡ ᠬᠠᠮᠠᠷ ᠢᠶᠠᠨ ᠣᠯᠣᠯᠴᠠᠳᠠᠭ ᠵᠠᠩ
ᠲᠦᠷᠦ ᠳᠤ ᠲᠤᠯᠭᠠᠭᠤᠷᠢᠯᠠᠭᠰᠡᠨ ᠪᠠᠭᠠᠷᠢᠨᠴᠤᠳ
ᠦᠯᠢᠭᠡᠷ ᠲᠡᠦᠭᠡ ᠳᠤ ᠷᠢᠳᠢ ᠰᠢᠳᠢ ᠤᠷᠤᠰᠢᠭᠤᠯᠳᠠᠭ ᠠᠯᠳᠠᠷᠲᠤ ᠬᠤᠭᠤᠷᠴᠢ ᠭᠤᠩᠭ᠎ᠠ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号